ပြီးခဲ့တဲ့ရက်ပိုင်းက လက်ပံတောင်းတောင် ကြေးနီစီမံကိန်းမှာ ဖြစ်ပွားခဲ့တဲ့ အကြမ်းဖက်မှုတွေမှာ စုံစမ်းလေ့လာတွေ့ရှိခဲ့ရတာတွေကို အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်ဆီ ဒီနေ့ တင်ပြလိုက်တယ်လို့ စစ်ကိုင်းတိုင်းဒေသကြီး ပုလဲမြို့နယ် ပြည်သူ့လွှတ်တော်ကိုယ်စားလှယ် ဒေါ်ခင်စန်းလှိုင်က ပြောပါ တယ်။
ဒေါ်အောင်ဆန်းစုကြည်ရဲ့ တာဝန်ပေးချက်အရ လက်ပံတောင်းတောင် ကြေးနီစီမံကိန်းက အကြမ်းဖက်မှုတွေကို လေ့လာစုံစမ်းပြီး တင်ပြလိုက်တာလို့ ဒေါ်ခင်စန်းလှိုင်က ပြောပါတယ်။
"နေ့လယ် ၁ နာရီခွဲလောက်ကပဲ ဒေါ်အောင်ဆန်းစုကြည်ဆီကို ကျမကြုံတွေ့ခဲ့ရတဲ့ အဖြစ်အပျက်တွေအားလုံးကို အစီရင်ခံစာတင်လိုက်ပါပြီ၊ ကျမက ပါတီအနေနဲ့ လွှတ်တော် ကိုယ်စားလှယ်တစ်ဦးအနေနဲ့ ကျမပါတီရဲ့ ဥက္ကဌတစ်ယောက်ကို ကျမအနေနဲ့ ဒါကိုအကြောင်းကြားတာပါ၊ ဘာကြောင့်လဲဆိုတော့ ပါတီဥက္ကဌကနေပြီးတော့ တာဝန်ပေးချက်အရ ကျမတို့က ဒီအခုဖြစ်ပျက်တဲ့ အခြေအနေတွေကို လေ့လာဖို့ရာအတွက် လာရတာဖြစ်တဲ့အတွက်ကြောင့် ကျမလေ့လာသိရှိစုံစမ်းရတဲ့ အချက်တွေအားလုံးကို တင်လိုက်တာပါ"
ပြီးခဲ့တဲ့ ဒီဇင်ဘာလ ၂၂ ရက်နေ့ကစပြီး လက်ပံတောင်းတောင် ကြေးနီစီမံကိန်းမှာ လယ်ယာလျော်ကြေးမယူထားတဲ့ လယ်ပိုင်ရှင်တွေရဲ့ မြေတွေအပေါ် ဝမ်ပေါင်ကုမ္ပဏီဖက်က သူတို့ရဲ့ ကြေးနီစီမံကိန်းဧရိယာလို့ သတ်မှတ်ကာ ခြံစည်းရိုးခတ်ခဲ့ပါတယ်။
အဲဒီစီမံကိန်းနေရာမှာ လုံခြုံရေးယူပေးထားတဲ့ မြန်မာနိုင်ငံရဲတပ်ဖွဲ့နဲ့ ဒေသခံတွေ ပဋိပက္ခဖြစ်ပွားခဲ့ကြပြီး မိုးကြိုးပြင်အလယ်ရွာက ဒေါ်ခင်ဝင်း သေနတ်ဒဏ်ရာကြောင့် သေဆုံးခဲ့ကာ ဒဏ်ရာရသူတွေဟာလည်း မုံရွာဆေးရုံမှာ အခုချိန်ထိ ဆေးကုသခံနေကြရပါတယ်။
အကြမ်းဖက်မှုတွေအတွက် စုံစမ်းစစ်ဆေးရေးကော်မရှင်ကို တိုင်းဒေသကြီးအစိုးရအဖွဲ့က ဒီဇင်ဘာလ ၂၄ ရက် နေ့က စစ်ကိုင်းတိုင်း အမျိုးသားဒီမိုကရေစီအဖွဲ့ချုပ် ပါတီဝင်တွေနဲ့ တွေ့ဆုံဆွေးနွေးစဉ် ဖွဲ့စည်းပေးထားခဲ့တယ်လို့ သိရပါတယ်။
RFA Burmese