ကော့သောင်းမြို့ မလိဝမ်းလူသတ်မှု တစ်ရက်အတွင်း ဖမ်းမိ

|Dawei Watch|ကော့သောင်း၊ ဖေဖော်ဝါရီ ၂၀

တနင်္သာရီတိုင်းဒေသကြီး ကော့သောင်းမြို့နယ်၊ မလိဝမ်းကျေးရွာ၊ ရေပူစမ်းအနီး ဆီအုန်းခြံအတွင်း ဖေဖော်ဝါရီလ ၁၇ ရက်နေ့တွင် ဖြစ်ပွားခဲ့သော လူသတ်မှု ကျူးလွန်သည်ဟုဆိုသော သားအဖ နှစ်ဦးကို  တစ်ရက်အတွင်း ဖော်ထုတ် ဖမ်းဆီးနိုင်ခဲ့သည်ဟု ကော့သောင်းမြို့နယ် ရဲတပ်ဖွဲ့စခန်း ထံမှ သိရသည်။

အသတ်ခံရသူမှာ အမျိုးသမီး ဖြစ်သူထံမှ ပါရှိလာသော သားဖြစ်ပြီး လွန်ခဲ့သည့် ရက်များက အိမ်မှ ငွေ နှစ်ကြိမ် ခိုးယူခဲ့သောကြောင့် ပထွေးဖြစ်သူနှင့် သားဖြစ်သူတို့မှ ဖျားယောင်းခေါ်ကာ ရေပူစမ်းအနီး ဆီအုန်းခြံအတွင်း ဓားဖြင့် တစ်ယောက်တစ်လှည့်စီ မသေမချင်း ထိုးသတ်ခဲ့ကြောင်း ပြစ်မှုကျူးလွန်သည့် တရားခံများ၏ ထွက်ဆိုချက် ကိုးကားပြီး ကော့သောင်းမြို့ရဲစခန်းက သတင်းထုတ်ပြန်သည်။

သေဆုံးသူ လူငယ်မှာ အသက် ၁၄ နှစ်ရှိပြီဖြစ်ပြီး ပြီးခဲ့သည့် သုံးလက ငွေကျပ် နှစ်သိန်း၊ လွန်ခဲ့သော ရက်သတ္တပတ်က ငွေကျပ် ၇၀၀၀ ကျော်နှင့် ထိုင်း ဘတ် ၆၀၀၀ ကျော် ခိုးယူကာ အိမ်မှ ထွက်သွားခဲ့ကြောင်း၊ ၎င်းကို ပန်းခြံအတွင်း တွေ့ရာမှ မလိဝမ်းသို့ ခေါ်ဆောင်ကာ အသင့်ပါလာသော ဓားမြှောင်ဖြင့် သတ်ပစ်ခဲ့ကြောင်း ယင်းထုတ်ပြန်ချက် အရသိရသည်။

ကော့သောင်းတွင် ယင်းလူသတ်မှု အပါအဝင် ၂ ရက်အတွင်း လူသတ်မှု ၃ မူဖြစ်ခဲ့သည့် အနက် ၂ မူကို တရားခံဖမ်းဆီးနိုင်ခဲ့ပြီး အော်ကြီးကျေးရွာတွင်ဖြစ်ပွားခဲ့သည့် လူသတ် တရားခံကို စုံစမ်းနေဆဲဖြစ်ကြောင်း သိရသည်။

Dawei Watch