သမ္မတဦးသိန်းစိန် အစိုးရသက်တမ်းအတွင်း ရပ်ဆိုင်းထားခဲ့တဲ့ မြစ်ဆုံရေအားလျှပ်စစ် စီမံကိန်းကို ပြန်စနိုင်ဖို့ ကြိုးပမ်းနေတယ်လို့ တရုတ် နိုင်ငံခြားရေးဝန်ကြီးက ပြောလိုက်ပါတယ်။
မြစ်ဆုံရေကာတာစီမံကိန်း ဟာ စီးပွားဖြစ်စီမံကိန်းတခု ဖြစ်ပြီး လိုအပ်တဲ့ခွင့်ပြုချက်အားလုံး ရယူပြီးဖြစ်ကြောင်း၊ နှစ်ဖက် ပူးပေါင်း ဆောင်ရွက်မှု မရှိတဲ့အချက်က အကြီးမားဆုံးအခက်အခဲ ဖြစ်နေပြီး ဒါကို နှစ်နိုင်ငံအပြုသဘောနဲ့ ဖြေရှင်း ဆောင်ရွက်သွားမယ်လို့ ဒီကနေ့ ဘေကျင်းမှာကျင်းပတဲ့ နှစ်ပတ်လည် သတင်းစာရှင်းလင်းပွဲမှာ တရုတ် နိုင်ငံခြားရေးဝန်ကြီးက ဝေါင်ယှီက ပြောပါတယ်။
အစိုးရသစ်လက်ထက် မြန်မာနဲ့တရုတ်ဆက်ဆံရေးမှာ နှစ်ဘက်အကျိုးရှိမယ့် ပူးပေါင်းဆောင်ရွက်မှု ရှိလာမယ်လို့ ယုံကြည်ကြောင်းလည်း ပြောပါတယ်။
ဒေါ်အောင်ဆန်းစုကြည်နဲ့ သူဦးဆောင်တဲ့ NLD ပါတီဟာ တရုတ်နိုင်ငံနဲ့ ရင်းနှီးချစ်ကြည်တဲ့ ဆက်ဆံရေးရှိပြီး အပြန်အလှန် နားလည်မှုနဲ့ ယုံကြည်မှုတွေ ပိုတိုးလာမှာဖြစ်ကြောင်း၊ မြန်မာနိုင်ငံအနာဂတ်အတွက် အပြည့်အဝ ယုံကြည်ထားကြောင်းလည်း တရုတ်နိုင်ငံခြားရေးဝန်ကြီးက ပြောကြားပါတယ်။
RFA Burmese TV Channel