 |
| မြိတ်မြို့နယ်အဝင် ဆိုင်းဘုတ်ကို တွေ့ရစဉ်။ Photo: Kyaw Lwin Oo/ RFA |
စာရွက်စာတမ်းအတုတွေနဲ့ မြေကွက်ရောင်းချသူတွေထဲက ၁ ဦးကို မိထားပြီး ကျန်တဲ့ ၁၀ ယောက်ကို ဖမ်းဆီးနိုင်ဖို့ ကြိုးစားနေတယ်လို့ မြိတ်မြို့မရဲစခန်း တာဝန်ရှိသူတစ်ဦးက ပြောပါတယ်။
မြေကွက်ရောင်းချနေသူတွေဟာ မြိတ်မြို့နယ်မှာ လူမှုအထောက်အကူပြုအကျိုးဆောင်ကော်မတီ ဖွဲ့စည်းပြီး တနင်္သာရီတိုင်းဝန်ကြီးချုပ် ဒေါက်တာလဲ့လဲ့မော်က အိုးအိမ်မဲ့တွေအတွက် အိမ်ရာဖော် ဆောင်ပေးဖို့စီစဉ်နေတာကို အကြောင်းပြုပြီး မြေကွက်တွေ ရောင်းချနေတာဖြစ်ပါတယ်။
ဝန်ကြီးချုပ် ဒေါက်တာလဲ့လဲ့မော်က တိုင်းအစိုးရရဲ့ အစီအစဉ်အရ အိုးအိမ်အပိုင်မရှိသူတွေအတွက် မြေကွက်ချပေးမှာမဟုတ်ဘဲ တန်ဖိုးနည်းအိမ်ယာတွေ ဖော်ဆောင်ပေးသွားမှာဖြစ်တယ်လို့ ပြောပါတယ်။
မြေကွက်ရောင်းချသူတွေကို တိုင်းဒေသကြီးအစိုးရအဖွဲ့၊ တိုင်း NLD ပါတီရဲ့ ညွှန်ကြားချက်နဲ့ မြိတ်မြိုနယ် အမျိုးသားဒီမိုကရေစီအဖွဲ့ချုပ်က လူပုဂ္ဂိုလ်နဲ့ အဖွဲ့အစည်း နာမည်ကို အလွဲသုံးစားပြုပြီး ဂုဏ်သိက္ခာကျဆင်းစေတဲ့အတွက် ပုဒ်မ ၅၀၀ နဲ့ တရားရုံးကို ဦးတိုက်လျှောက်ထားတယ်လို့ မြိတ်မြို့နယ် အန်အယ်လ်ဒီ တာဝန်ရှိသူတွေက ပြောပါတယ်။
ပြီးခဲ့တဲ့ တစ်လလောက်ကစပြီး မြိတ်မြို့ကုန်းဖောက်ရပ်ကွက်နဲ့ တောထွတ်ကြီးရပ်ကွက်တွေမှာ တိုင်းဒေသကြီး ဝန်ကြီးချုပ် ဒေါက်တာလဲ့လဲ့မော်နဲ့ NLD ပါတီက ဆင်းရဲသားတွေအတွက် မြေယာဖော်ဆောင်ပေးနေတယ်ဆိုပြီး လူမှုအထောက်အကူပြုအကျိုးဆောင်ကော်မတီ က မြေတစ်ကွက်ကို ငွေကျပ် ၈သောင်း၊ ကျပ် ၅သောင်း စတဲ့နှုန်းတွေနဲ့ ရောင်းချနေတာဖြစ်ပါတယ်။
အဲဒီကော်မတီဟာ မြေကွက် ၃ထောင်ကျော်ရိုက်ထားပြီး မြေကွက် ၁၈၀၀ ကျော် ရောင်းချထားတာဖြစ်ပါတယ်။ ကျွန်းစုမြို့နယ်၊ တနင်္သာရီ စတဲ့ မြို့နယ်တွေက လာရောက်ဝယ်ယူကြသူတွေများပါတယ်။
အဲဒီမြေကွက်ရိုက် ရောင်းချရာမှာ ပါဝင်တဲ့ ကော်မတီဝင် ဦးအောင်သန်းဆိုသူကို ငွေကျပ် သိန်း ၁၆၀ ကျော်နဲ့ ဖမ်းဆီးရမိထားပြီး နောက်ထပ်ကော်မတီဝင် ၃ ဦးရဲ့ ဘဏ်စာအုပ်တွေထဲက ငွေကျပ် သိန်း ၃၀၀ ကို ထပ်မံစစ်ဆေးတွေ့ရှိထားပါတယ်။
RFA Burmese
