မွန်တွင် လယ်ယာလုပ်ပိုင်ခွင့်လက်မှတ် ၅၀ ရာခိုင်နှုန်းကျော် ထုတ်ပေးပြီး

|Dawei Watch|မော်လမြိုင်၊ စက်တင်ဘာ ၉

မွန်ပြည်နယ်အတွင်း လယ်သမားများအား လယ်ယာမြေဥပဒေနှင့်အညီ လယ်ယာလုပ်ပိုင်ခွင့်လက်မှတ် ထုတ်ပေးရေး စီမံချက်ကို အကောင်အထည်ဖော်ဆောင်ရွက်လျက်ရှိရာ ၂၀၁၄ ခုနှစ် သြဂုတ်လကုန်ထိ ၅၇ ဒသမ ၁၄ ရာခိုင်နှုန်း ထုတ်ပေးခဲ့ပြီးဖြစ်ကြောင်း မွန်ပြည်နယ် စိုက်ပျိုးရေးနှင့် မွေးမြူရေးဝန်ကြီးက ပြောသည်။

စက်တင်ဘာ ၅ ရက်နေ့မှ စတင်ကျင်းပခဲ့သည့် ပထမအကြိမ် မွန်ပြည်နယ်လွှတ်တော် နဝမပုံ မှန်အစည်းအဝေးတွင် သံဖြူဇရပ် မဲဆန္ဒနယ် ပြည်နယ်လွှတ်တော်ကိုယ်စားလှယ် ဦးနိုင်ဦးက မွန်ပြည်နယ်အတွင်းရှိ လယ်သမားများအား လယ်ယာမြေဥပဒေနှင့် အညီ လယ်ယာလုပ်ပိုင်ခွင့်လက်မှတ်များ ထုတ်ပေးရာ ရာခိုင်နှုန်းမည်မျှရှိခြင်းနှင့် ကျန်လယ်သမားများအတွက် ထုတ်ပေးရန် ရှိ မရှိ မေးမြန်းချက်နှင့် ပတ်သက်ပြီး ယင်းကဲ့သို့ ပြန်လည်ဖြေကြားခဲ့ခြင်းဖြစ်သည်။

“၂၀၁၄ ခုနှစ်မှာ မြေကြီး မြေပုံ မှန်ကန်မှုနည်းပါးပြီး နယ်မြေဒေသမှာလည်း သွားလာရာလွယ်ကူမှုမရှိသော တောင်သူများ အတွက် မြေယာပိုင်ဆိုင်ခွင့် အခွင့်များရရှိရန် ဦးပိုင်ပေါင်း ၁၂၁၇၄ ခုအား ဒုတိယအနေဖြင့် လယ်ယာလုပ်ပိုင်ခွင့် လက်မှတ်ထုတ်ပေးရေး စီမံချက်အနေနဲ့ အကောင်အထည်ဖော်ဆောင်ရွက်လျက်ရှိရာမှာ သြဂုတ်လကုန်ထိ ဦးပိုင်ပေါင်း ၆၉၅၆ ခု ရာခိုင်နှုန်းအားဖြင့် ၅၇ ဒသမ ၁၄ ရာခိုင်နှုန်းဆောင်ရွက်ခဲ့ပြီးဖြစ်ပါတယ်”  ဟု စိုက်ပျိုးရေးနှင့် မွေးမြူရေးဝန်ကြီး ဦးမျိုးညွန့်က ပြန်လည်ဖြေကြားခဲ့သည်။

၎င်းပြင် ကျန်ရှိသည့် လယ်ယာမြေများကိုလည်း ဒေသခံတောင်သူများအနေနှင့် ကျေးရွာအုပ်စု လယ်ယာမြေစီမံခန့်ခွဲမှု အဖွဲ့များနှင့်အတူ ပူးပေါင်းပြီး နယ်မြေနယ်နမိတ်ကန့်သတ်ခြင်းကို ကူညီဆောင်ရွက်ပေးနိုင်မှသာ လယ်ယာလုပ်ပိုင်ခွင့်လက်မှတ် အမြန်ဆုံးထုတ်ပေးသွားမည်ဟု ဆိုသည်။

မွန်ပြည်နယ်အတွင်း လယ်ယာလုပ်ပိုင်ခွင့်လက်မှတ်ကို ထုတ်ပေးရာမှာ ပထမအဆင့်အနေဖြင့် ၂၀၁၃ ခုနှစ်အတွင်း စီမံချက်ချမှတ်ကာ တောင်သူများ၏ လုပ်ပိုင်ခွင့် လုပ်ကွက်ပေါင်း ၂၀၉၄၁၈ ခုကို လက်ယာလုပ်ပိုင်ခွင့်လက်မှတ် ထုတ်ပေးနိုင်ခဲ့ပြီး ရာခိုင်နှုန်းအားဖြင့် ၁၀၀ ရာခိုင်နှုန်း ပြီးစီးကြောင်းလည်း ပြောသည်။

သို့သော်လည်း ၅၀ ရာခိုင်းထက်မကျော်သော တောင်သူများ လယ်ယာလုပ်ပိုင်ခွင့်လက်မှတ် ရရှိရန် ကျန်နေသေးကြောင်း ပြည်နယ်လွှတ်တော်ကိုယ်စားလှယ် ဦးနိုင်ဦးက ပြောသည်။

“သံဖြူဇရပ်မြို့နယ်မှာ ၂၀၁၃ ခု နိုဝင်ဘာလ ၂ ရက်နေ့က မြို့နယ်လယ်ယာမြေလုပ်ပိုင်ခွင့်လက်မှတ် ထုတ်ပေးခြင်းအခမ်းအနားမှာ ၁၀၀ ရာခိုင်နှုန်းထုတ်ပေးပြီးဖြစ်ကြောင်း ကြေညာခဲ့ပါတယ်၊ ဒါပေမယ့် နီးစပ်တဲ့ကျေးရွာတွေကိုလေ့လာကြည့်တဲ့အခါ ၅၀ ရာခိုင်းမကျော်တဲ့ ကျေးရွာ အများကြီးရှိနေတာကို တွေ့ရှိရတယ်” ဟု ၄င်းက ပြောသည်။

တောင်သူလယ်သမားများအတွက် ခိုင်လုံသော အာမခံချက်ရှိသည့် လယ်ယာလုပ်ကိုင်ခွင့်လက်မှတ် ပုံစံ ၇ လက်ယ်ရှိနေခြင်းကြောင့် ၄င်းဥပဒေအရ အခွင့်အရေးအရပ်ရပ်ကို အကျိုးခံစားရမှာဖြစ်သည့်အတွက် ယင်းလက်မှတ်သည် တောင်သူများအတွက် အလွန်တန်ဖိုးရှိကြောင်းလည်း ၎င်းကပြောသည်။