မလေးရှားဗီဇာကြေး မြင့်တက်နေမှု စိစစ်ဆောင်ရွက်ပေးရန် နိုင်ငံခြားရေးဝန်ကြီး ဒေါ်အောင်ဆန်းစုကြည်ထံ တင်ပြတောင်းဆိုမည်

------ ------ ------ ------ ------
OSC (One- Stop Service Center) ပေါ်လာပြီးနောက်ပိုင်း မလေးရှား နိုင်ငံ၏ ဗီဇာကြေး ခြောက်ဒေါ်လာမှ ၅၇ ဒေါ်လာထိ တိုးမြှင့်လိုက်ခြင်းအပေါ် သေချာစွာ စိစစ်ပေးသွားရန် နိုင်ငံခြားရေး ၀န်ကြီးဌာနသို့ ဆက်လက် တောင်းဆိုမှုများ ပြုလုပ်သွားပြီဖြစ်ကြောင်းနှင့် OSC လုံးဝ မရှိအောင်လုပ်ဆောင်သွားမည်ဖြစ်ကြောင်း မြန်မာ ပြည်ပအလုပ်အကိုင်ဝန်ဆောင်မှု လုပ်ငန်းရှင်များအဖွဲ့ချုပ် (MOEAF) မှ အထွေထွေအတွင်းရေးမှူး ဦးကျော်ထင် ကျော်ပြောသည်။

''လောလောဆယ်မှာ နိုင်ငံခြားရေး ၀န်ကြီးဌာနကလည်း ပြောင်းသွားပြီလေ။ အရင်ကလည်း တင်ပြထားတယ်။ အရင်တုန်းက ခြောက်ဒေါ်လာပဲ။ မလေးရှား သံရုံးကို တရားဝင်သွင်းရတယ်။ (OSC) ပေါ်လာပြီး သူတို့ကို ၅၁ ဒေါ်လာပေးရတယ်။ သူများနိုင်ငံတွေနည်းတူ ၅၇ ဒေါ်လာဆိုရင် တမျိုး။ အခု မြန်မာတနိုင်ငံတည်းပဲ ပေးနေရတာ။ ဒါက လိုကိုမလိုတာ။ မလေးရှားသံရုံးက ယူတယ်ဆိုရင် တမျိုး။ အခုဟာက ကြားခံကုမ္ပဏီကို ၅၇ ဒေါ်လာပေးရပြီး မလေးရှားသံရုံးက စာအုပ်ပေါ်မှာကျတော့ ခြောက်ဒေါ်လာပဲ ရေး ပေးတယ်။ အဲဒီ OSC က မလေးရှား အစိုးရက သူ့ နိုင်ငံမှာရှိတဲ့ ကုမ္ပဏီတခုကို ချပေးတယ်။ ဒီမြန်မာဘက်မှာကျတော့ Diamond Palace ကုမ္ပဏီနဲ့ နှစ်ခုပေါင်းပြီး ၅၁ ဒေါ်လာကောက်နေတာ။ ဘယ်နိုင်ငံမှာက ကြားထဲကနေ၀င်ပြီး OSC ကောက်တယ်ဆိုတာမရှိဘူး။ ဒီလို မလိုအပ်တဲ့အတွက် ပယ်ဖျက်ဖို့ ဒေါ်အောင်ဆန်းစုကြည်ဆီကို တောင်းဆိုသွားမယ်။ ဥပမာမလေးရှားနိုင်ငံကို လာအို၊ စင်ကာပူ၊ ဗီယက်နမ်နိုင်ငံက လူတွေသွားရင် မပေးရ ဘူး။ မြန်မာနိုင်ငံသားတွေသွားမှ ပေးရ တယ်ဆိုတော့ မတရားဘူးလေ။ အင်ဒိုနီးရှားနိုင်ငံဆိုရင် သံရုံးကို လူကိုယ်တိုင်တိုက်ရိုက်လျှောက်လို့ရတယ်။ မလေးရှားကျတော့ OSC ခံနေတော့ တိုက်ရိုက် လျှောက်လို့ မရဘူး။ ဒါက ပုံစံမကျဘူး။ မှားနေတယ်။ မရရအောင်ကိုလုပ်ရမယ်'' ဟု ဦးကျော်ထင်ကျော်က ပြောသည်။
မြန်မာနိုင်ငံမှ မလေးရှားနိုင်ငံသို့သွားရာတွင် အလုပ်သွားလုပ်သူများ သာမက ပညာတော်သင်သွားသူ၊ ဆေးဝါး ကုသဖို့သွားသူ၊ အလည်အပတ်သွားသူများပါ (OSC) သို့ ၅၇ ဒေါ်လာပေးဆောင်နေရ၍ စာချုပ်ပါအချက်အလက်များကို ပြန်လည်စိစစ်ပေးရန်လိုအပ်ကြောင်း မြန်မာပြည်ပအလုပ်အကိုင် ၀န်ဆောင်မှုလုပ်ငန်းရှင်များအဖွဲ့ချုပ် (MOEAF)မှ သိရသည်။
အောင်သူရိန်