နေပြည်တော်ကောင်စီဥက္ကဋ္ဌသစ် ဒါက်တာမျိုးအောင်နှင့် တခဏ

“ကျွန်တော်က တောက်လျှောက်ပြည်သူ့အတွက် နိုင်ငံရေးလှုပ်ရှားခဲ့တာဆိုတော့ ပြည်သူ တွေနစ်နာတာကို သိပါတယ်။ သူတို့မနစ်နာအောင် အဓိက ဆောင်ရွက်ပေးရမယ်ဆိုတာလည်း သိပါတယ်…”

မေး- နေပြည်တော်ကောင်စီဥက္ကဋ္ဌတာဝန်ကို စတင်ထမ်းဆောင်ရတော့မည့် ဒေါက်တာမျိုးအောင်အနေဖြင့် စိန်ခေါ်မှုတွေဖြစ်တဲ့ လယ်ယာမြေသိမ်းဆည်းခံ လယ်သမားတွေကို ကျူးကျော်သူအဖြင့် တရားစွဲ ထောင်ချ နေမှုအပေါ် ဘယ်လိုများကိုင်တွယ်ဆောင်ရွက်ဖို့ စီစဉ်ထားပါသလဲ။

ဖြေ- ဒီကိစ္စကတော့ အဖွဲ့ချုပ်ရဲ့မူအရပဲ တနိုင်ငံလုံးမှာဖြစ်နေတဲ့ လယ်ယာမြေသိမ်းဆည်းမှု ကျူးကျော်ဆိုပြီး ဖမ်းဆီးထောင်ချခံရမှုတွေကို စိစစ်ပြီး အကောင်းဆုံးဆောင်ရွက်မှာဖြစ်ပါတယ်။ တနိုင်ငံလုံးမှာဖြစ်နေတဲ့ ကိစ္စ ပေါ့နော်။ ကျွန်တော်ကိုယ်ကလည်း လွှတ်တော်ကိုယ်စားလှယ်လောင်းဆိုတော့ လယ်ယာမြေသိမ်းဆည်းမှု ပြဿနာတွေကို သိပါတယ်။ တရားဥပဒေနဲ့အညီပဲ တောင်သူလယ်သမားတွေ မနစ်နာအောင်တော့ တနိုင်ငံလုံး မူနဲ့ပဲ ဖြေရှင်းပေးရမှာပေါ့။
နေပြည်တော်မှာတော့ တခြားတိုင်းဒေသကြီး ပြည်နယ်လောက် အခြေအနေသိပ်မဆိုးဘူးလို့တော့ သိထားပါ တယ်။ နေပြည်တော်ကောင်စီမှာလည်း ဒီပြဿနာ သိပ်မကြီးလို့တော့ သိထားပါတယ်။ နစ်နာမှုမရှိအောင် ဖြေရှင်းဆောင်ရွက်ပေးနိုင်မယ်လို့ ထင်ပါတယ်။

မေး- နေပြည်တော်စည်ပင်အနေနဲ့ တရားရုံးဖွင့်ပြီး ဒေသခံတောင်သူတွေရဲ့ လယ်ယာမြေတွေကို စီမံကိန်း ဆိုပြီးသိမ်း၊ ဖယ်မပေးရင် ကျူးကျော်သူအဖြစ် ပုဒ်မ (၂၆)၊ ပုဒ်မ (၂၇)တွေနဲ့ တရားစွဲ နှစ်ချီပြီး ရုံးချိန်တွေခေါ် ဘာဖြေရှင်းလျှောက်လဲချက်မှ လက်မခံဘဲ ထောင်ချအပြစ်ပေးနေမှုအပေါ် ဆရာ့အနေနဲ့ ဘယ်လိုများဆောင် ရွက်ဖို့ စီစဉ်ထားပါသလဲ။

ဖြေ- ယခုလောလောဆယ်မှာတော့ ဒီကိစ္စအပေါ် မလေ့လာရသေးပါဘူး။ ဥပဒေနဲ့အညီဖြစ်အောင်တော့ အစွမ်း ကုန် ကြိုးစားမှာပါ။ ကျွန်တော်က တောက်လျှောက်ပြည်သူ့အတွက် နိုင်ငံရေးလှုပ်ရှားခဲ့တာဆိုတော့ ပြည်သူ တွေနစ်နာတာကို သိပါတယ်။ သူတို့မနစ်နာအောင် အဓိက ဆောင်ရွက်ပေးရမယ်ဆိုတာလည်း သိပါတယ်ဟု ဒေါက်တာမျိုးအောင်က News Watch ကို ပြောပါသည်။

ဒေါက်တာမျိုးအောင်သည် ၁၉၉၀ ခုနှစ်နောက်ပိုင်း ၀န်ထမ်းဘ၀မှထွက်ပြီး NLD ပါတီသို့ စတင်ဝင်ရောက်ခဲ့ပြီး ပြည်သူများအတွက် တက်ကြွလှုပ်ရှားခဲ့သူဖြစ်ပြီး ၂၀၁၂ ခုနှစ် ကြားဖြတ်ရွေးကောက်ပွဲတွင် ဒဂုံဆိပ်ကမ်းမြို့နယ် မှ ပြည်သူ့လွှတ်တော်ကိုယ်စားလှယ်အဖြစ် ရွေးချယ်ခံရပြီး ၂၀၁၅ ခုနှစ် ရွေးကောက်ပွဲတွင် ဒဂုံအရှေ့ပိုင်းမြို့ နယ်မှ ပြည်သူ့လွှတ်တော်ကိုယ်စားလှယ်အဖြစ် ရွေးချယ်ခံခဲ့ရပြီး ၂၀၁၆ ခုနှစ် ဧပြီ ၁ ရက်တွင် နိုင်ငံတော် သမ္မတမှ နေပြည်တော်ကောင်စီဥက္ကဋ္ဌအဖြစ် တာဝန်ပေးအပ်ခြင်းခံရသူဖြစ်ပါသည်။

ထွန်း(နေပြည်တော်)
News Watch(စောင့်ကြည့်သတင်းဂျာနယ်)

အိန္ဒိယ မိုးပျံလမ်းမပြိုကျမှု ကုမ္ပဏီတာဝန်ရှိသူ ၅ ဦးကို ဖမ်းဆီး

အိန္ဒိယနိုင်ငံအရှေ့ပိုင်းက Kolkata မြို့မှာ ဆောက်လုပ်စ မိုးပျံလမ်းမပြိုကျမှုအတွင်း ပိတ်မိသူတွေ အသက်ရှင်လွတ်မြောက်ဖို့ မျှော်လင့်ချက်နည်းလာပြီ ဆောက်လုပ်ရေးကုမ္ပဏီ တာဝန်ရှိသူ ၅ ဦးကို အာဏာပိုင်တွေက ဖမ်းဆီးထားပါတယ်။
ပြီးခဲ့တဲ့ မတ် ၃၁ ရက်နေ့က လမ်းသွားလမ်းလာတွေနဲ့ စည်ကားနေတဲ့ အောက်ကလမ်းမပေါ် ဒီမိုးပျံလမ်း ပြိုကျခဲ့မှုမှာ လက်ရှိအချိန်အထိ လူအနည်းဆုံး ၂၄ ဦး သေဆုံးသွားပြီဖြစ်ပြီး လူ ၁၅၀ ကျော် ဒဏ်ရာရခဲ့ကြပါတယ်။
အရှည် ၂ ကီလိုမီတာ လောက်ရှိတဲ့ ဒီမိုးပျံလမ်းမဟာ ၂၀၀၉ ခုနှစ်ကတည်းက ဆောက်လုပ်လာခဲ့တဲ့ ဆောက်လုပ်ရေးစီမံကိန်းဖြစ်ပြီး ဒီဇိုင်းပိုင်းအားနည်းတာကြောင့် အခုလို ပြိုကျတာလို့ ကျွမ်းကျင်သူတွေက သုံးသပ်ပြောဆိုနေကြပါတယ်။
ဒါကြောင့် ဆောက်လုပ်ရေးကုမ္ပဏီကို  အာဏာပိုင်တွေက အမှုဖွင့်ထားပြီး ဟိုင်ဒါရာဘတ်  (Hyderabad) မြို့က ကုမ္ပဏီရုံးချုပ်ကိုလည်း ချိပ်ပိတ်ထားလိုက်ပါတယ်။
ဆောက်လုပ်ရေးကုမ္ပဏီကတော့ အာဏာပိုင်တွေရဲ့ စုံစမ်းစစ်ဆေးမှုတွေမှာ ပူးပေါင်းဆောင်ရွက်မယ်လို့ ပြောဆိုထားပြီး ဘေးကင်းလုံခြုံမှု သမိုင်းကြောင်းကောင်းခဲ့လို့ ကြိုတင်မမျှော်မှန်းနိုင်တဲ့ သဘာဝဘေးအန္တရာယ်ကြောင့် အခုလိုပြိုကျတာလို့ ကုမ္ပဏီ အရာရှိတဦးက ပြောဆိုထားပါတယ်
DVB

ဒုသမ္မတနှစ်ဦး ဖြုတ်ချပေးရန် ရန်ကုန်တွင် ဆန္ဒပြ (ဓာတ်ပုံ)

အမျိုးသားဒီမိုကရေစီအဖွဲ့ချုပ် အန်အယ်လ်ဒီပါတီက ဒုသမ္မတ ၂ အဖြစ် တင်မြှောက်ထားတဲ့ ဦးဟင်နရီ ဗန်ထီးယူနဲ့ တပ်မတော်ကာကွယ်ရေးဦးချုပ်က တင်မြှောက်ထားတဲ့ ဒုသမ္မတ ၁ ဦးမြင့်ဆွေတို့ကို ဖြုတ်ချပေးဖို့အတွက် ရန်ကုန်မြို့ တာမွေအဝိုင်းနားမှာရှိတဲ့ ဗိုလ်စိန်မှန်ကွင်းမှာ ဧပြီလ ၂ ရက်နေ့က ဆန္ဒပြခဲ့ကြပါတယ်။
ဓာတ်ပုံ – ဟိန်းကို
DVB

တနင်္သာရီလွှတ်တော်ဥက္ကဋ္ဌ၊ ၀န်ကြီးချုပ် နှင့် အဖွဲ့ ဘာသာရေးခေါင်းဆောင်များထံ သွားရောက် ဂါရ၀ပြု

ထားဝယ်မြို့ဇေယျဝတီကျောင်းတိုက်တွင် တွေ့ရစဉ်

ထားဝယ်မြို့ ဃောသိတာရာမပါဠိတက္ကသိုလ်တွင် တွေ့ရစဉ်

 ထားဝယ်မြို့ ပိန္နဲတောရပ်ကွက်ရှိ ဗလီတွင် တွေ့ရစဉ်

 မြန်မာနှစ်ခြင်းခရစ်ယာန်အသင်းတော်တွင် တွေ့ရစဉ်

ဆရီးမားရီယမ္မား(ခ) မမဘုရားကျောင်းတွင် တွေ့ရစဉ်

ထားဝယ်၊ ဧပြီ ၁


တနင်္သာရီတိုင်းဒေသကြီး လွှတ်တော် ဥက္ကဋ္ဌ ဦးခင်မောင်အေး၊ ၀န်ကြီးချုပ် ဒေါက်တာလဲ့လဲ့မော် နှင့် အဖွဲ့သည် ထားဝယ်မြို့ရှိ ဘုန်းတော်ကြီးကျာင်းနှစ်ကျောင်းနှင့် အခြားဘာသာရေးကျောင်းထံ မတ်လ ၃၁ ရက်နေ့က သွားရောက်ခဲ့ပြီး ဗုဒဘာသာ သံဃာတော်နှင့် ဘာသာရေး ခေါင်းဆောင်များကို တွေ့ဆုံဂါရ၀ပြုခဲ့ကြသည်။


ဝန်ကြီးချုပ်ဒေါက်တာလဲ့လဲ့မော်၊ လွှတ်တော် ဥက္ကဋ္ဌ ဦးခင်မောင်အေးနှင့် အတူလွှတ်တော်ကိုယ်စားလှယ်များ စုပေါင်းသွားရောက်ခဲ့ကြခြင်းဖြစ်ပြီး ဇေယျဝတီကျောင်းတိုက်၊ ဃောသိတာရာမပါဠိတက္ကသိုလ်၊ မြန်မာနှစ်ခြင်း ခရစ်ယာန်အသင်းတော်၊ ပိန္နတောရပ်ကွက်ရှိ အစ္စလာမ်ဗလီနှင့် ဆရီးမားရီယမ္မား(ခ) မမဘုရားကျောင်းတို့ကို သွားရောက်ခဲ့ကြသည်။


အစိုးရအသစ်၏ ပထမဆုံးနေ့တွင် သံဃာတော်များနှင့် ဘာသာရေးခေါင်းဆောင်များကို လိုက်လံ ဂါရ၀ ပြုခြင်းဖြစ်ကြောင်း တိုင်းဒေသကြီးလွှတ်တော် ဥက္ကဋ္ဌ ဦးခင်မောင်အေးက ဇေယျဝတီကျောင်းတိုက်တွင် ပြောသည်။


“ဘာသာကြီးလေးခုက ပြည်သူတွေ ချစ်ကြည်စည်းလုံးစေချင်တယ်။ အစိုးရ အသစ်တစ်ရပ် အနေနဲ့ အားလုံးကို တန်းတူညီမျှရှိစေချင်တယ်ဆိုတာ သိစေချင်လို့”ဟု တိုင်းဒေသကြီး ဒုတိယ ဥက္ကဋ္ဌ ဦးကြည်စိုးက ဆိုသည်။


တနင်္သာရီတိုင်းဒေသကြီးတွင် အရွေးကောက်ခံ တိုင်းဒေသကြီး လွှတ်တော် ကိုယ်စားလှယ် ၂၁ ဦးရှိပြီး ၀န်ကြီးချုပ် ဒေါက်တာလဲ့လဲ့မော်နှင့် ကရင်တိုင်းရင်းသားရေးရာ ၀န်ကြီး ဦးစောလုကာ တို့မှာ ခရစ်ယာန်ဘာသာဝင်များဖြစ်ကြကာ ကျန်ရှိသော ကိုယ်စားလှယ်အားလုံးမှာ ဗုဒဘာသာဝင်များ ဖြစ်သည်။

Dawei Watch|

ထွေအုပ်နဲ့ ရဲတပ်ဖွဲ့ရဲ့ တာဝန်နဲ့ လုပ်ပိုင်ခွင့်ကို ပြောင်းလဲရမယ် – ရှေ့နေ ဦးကိုနီ

ပြည်ထဲရေးဝန်ကြီးဌာနလက်အောက်ရှိ အထွေထွေအုပ်ချုပ်ရေးဦးစီးဌာနက ရွေးကောက်ခံမဟုတ်ဘဲ တိုင်းပြည်ကို အုပ်ချုပ်နေမှုဟာ ဖွဲ့စည်းပုံအခြေခံဥပဒေနဲ့ မညီတာကြောင့် ပြင်ဆင်ရမယ်လို့ တရားလွှတ်တော်ရှေ့နေ ဦးကိုနီက ပြောပါတယ်။

အစိုးရအဖွဲ့မှာ ၀န်ကြီးဌာန ၂၁ ခုရှိတဲ့အနက် ပြည်ထဲရေးဝန်ကြီး၊ ကာကွယ်ရေးဝန်ကြီး၊ နယ်စပ်ရေးရာဝန်ကြီးတို့ကို တပ်မတော်ကာကွယ်ရေးဦးစီးချုပ်ကပေးတဲ့ အမည်စာရင်းကို သမ္မတက ခန့်အပ်အတည်ပြုပေးရတာ ဖြစ်ပါတယ်။ ဖွဲ့စည်းပုံအရ သမ္မတဟာ နိုင်ငံတော်ရဲ့ အထွတ်အထိပ်လို့ ဖွဲ့စည်းပုံမှာ ဖော်ပြပေမယ့် အမှန်တကယ် အုပ်ချုပ်တာဟာ ပြည်ထဲရေးဝန်ကြီးဌာနသာ ဖြစ်နေတာပါ။

အစိုးရသစ်လက်ထက် ထွေအုပ်ရဲ့တာဝန်နဲ့ လုပ်ပိုင်ခွင့် အပြောင်းအလဲနဲ့ ပတ်သက်လို့   တရားလွှတ်တော်ရှေ့နေ ဦးကိုနီနဲ့ ဆက်သွယ်မေးမြန်းထားပါတယ်။

အထွေထွေအုပ်ချုပ်ရေးဦးစီးဌာန (ထွေအုပ်) ကို သမ္မတရုံးဝန်ကြီးဌာန လက်အောက်ကို ပြောင်းရွှေ့ပစ်လိုက်လို့ ရနိုင်မလား။ ရွေးကောက်ခံအစိုးရက မအုပ်ချုပ်ရဘဲ ကာချုပ်ကခန့်တဲ့ ပြည်ထဲရေးလက်အောက်ခံ ထွေအုပ်အဖွဲ့ကသာ အုပ်ချုပ်ခွင့်ရနေတာကို အပြောင်းအလဲ ဖြစ်သွားအောင်လို့။ ဘာတွေ အခက်အခဲရှိနိုင်မလဲ။

“ကျနော်တို့ ဒီနေ့အထိ လက်ရှိအုပ်ချုပ်ရေးပုံသဏ္ဌာန်က တပြည်ထောင်အုပ်ချုပ်ရေး ပုံသဏ္ဌာန်မျိုးကို ပုံဖော်ထားတာ။ ဆိုလိုတာက ဗမာနိုင်ငံ တနိုင်ငံလုံးကို ပြည်ထဲရေးဝန်ကြီးကို အုပ်ချုပ်ဖို့ အခွင့်အာဏာပေးထားတယ်။ အဲဒီ ပြည်ထဲရေးဝန်ကြီးဌာနက နေပြီးတော့ အထွေထွေအုပ်ချုပ်ရေး ဦးစီးဌာနရယ်၊ ပြည်သူ့ရဲတပ်ဖွဲ့ရယ် အဲဒီအဖွဲ့ကြီး ၂ ဖွဲ့ကို အဓိက ဖွဲ့စည်းပြီးတော့မှ အဲဒီအဖွဲ့ ၂ ဖွဲ့နဲ့ လက်တွေ့ တိုင်းပြည်ကို အုပ်ချုပ်တယ်။

“အဲဒီတော့ ပြည်နယ်၊ တိုင်း အားလုံးမှာ ကိုယ်ပိုင်အစိုးရတွေရှိတယ်၊ ပြည်နယ်အစိုးရရှိတယ်၊ ပြည်နယ်ဝန်ကြီးချုပ်ရှိတယ်၊ ပြည်နယ်ဝန်ကြီးတွေရှိတယ်။ ဒါပေမယ့် သူတို့ကို အုပ်ချုပ်ရေးအာဏာ မပေးဘဲနဲ့ ပြည်ထဲရေးဝန်ကြီးကပဲ တိုက်ရိုက်အုပ်ချုပ်တဲ့ ပုံသဏ္ဌာန်ကို ပုံဖော်ထားတယ်။ အဓိပ္ပာယ်ကတော့ ဖွဲ့စည်းပုံအခြေခံဥပဒေနဲ့ လက်တွေ့အုပ်ချုပ်နေတာဟာ အံမ၀င်ဘူး၊ လွဲချော်နေတယ်။ ဖွဲ့စည်းပုံရဲ့သဘောက ကိုယ့်ပြည်နယ် ကိုယ်အုပ်ချုပ်ရမယ့် ပုံသဏ္ဌာန်ကို ဖော်ထားတယ်။ ဒါပေမယ့် လက်တွေ့အုပ်ချုပ်ရေးဌာန ဖွဲ့စည်းပုံကျတော့ တနိုင်ငံလုံးကို ပြည်ထဲရေးဝန်ကြီးက အုပ်ချုပ်တဲ့ ပုံသဏ္ဌာန် ပုံဖော်ထားတယ်။ ဒါကြောင့် လက်ရှိ အုပ်ချုပ်ရေးပုံသဏ္ဌာန်ဟာ လက်ရှိ ဖွဲ့စည်းပုံအခြေခံဥပဒေနဲ့ အံဝင်တဲ့ပုံစံမျိုး မဟုတ်ဘူး။ ဒါ့ကြောင့်မို့လို့ ကျနော်တို့ ပြုပြင်ပြောင်းလဲရေး လုပ်ရမယ်။ အဲဒီတော့ ပြုပြင်ပြောင်းလဲရေး လုပ်တဲ့အခါမှာ ရေတို၊ ရေရှည် ပြုပြင်ပြောင်းလဲရေး ၂ ခု လုပ်ရမယ်။

“ရေတို လတ်တလော ပြုပြင်ပြောင်းလဲရမယ့် ကိစ္စကတော့ အထွေထွေအုပ်ချုပ်ရေး ဦးစီးဌာနကို ပြည်ထဲရေးဝန်ကြီးလက်အောက်မှာ အကုန်လုံးကို မထားတော့ဘဲနဲ့ ဗဟိုအဆင့်ကိုပဲ ပြည်ထဲရေးဝန်ကြီးရဲ့ လက်အောက်မှာ ထားပြီးတော့ ကျန် ပြည်နယ်နဲ့ တိုင်းအသီးသီးမှာရှိတဲ့ အဲဒီ အထွေထွေအုပ်ချုပ်ရေးဦးစီးဌာန ၀န်ထမ်းတွေ အားလုံးကို ပြည်နယ်နဲ့တိုင်းအစိုးရ အဖွဲ့နဲ့ ၀န်ကြီးချုပ်ရဲ့ အုပ်ချုပ်မှုလက်အောက်ကို လွှဲပေးလိုက်ရမယ်။ အဲဒီတော့ ဘာဖြစ်သွားမတုန်းဆိုရင် ပြည်နယ်နဲ့တိုင်းဝန်ကြီးချုပ်ဟာ သူ့ရဲ့ပြည်နယ်၊ သူ့ရဲ့တိုင်းကို လက်တွေ့အုပ်ချုပ်ဖို့အတွက် သူ့ကို ၀န်ထမ်းအဖွဲ့အစည်းတခု ပေးလိုက်တဲ့သဘော ဖြစ်သွားပြီ။

“တိုတိုပြောရရင် ပြည်နယ်ထွေအုပ်တွေ အားလုံးဟာ ပြည်နယ်ဝန်ကြီးချုပ်ရဲ့အောက်ကို ရောက်သွားရမယ်။ ပြည်နယ်ဝန်ကြီးချုပ်ကပဲ အုပ်ချုပ်ရမယ်။ အမိန့်က အဲဒီကပဲသွားရမယ်၊ ဗဟိုအစိုးရက မသွားတော့ဘူး။ ဒါတခု။ နောက်တခါ ရဲတပ်ဖွဲ့။ ပြည်နယ်၊ တိုင်း ရဲတပ်ဖွဲ့တွေ အားလုံးကို ပြည်နယ်၊ တိုင်းတွေမှာရှိတဲ့ ရဲတပ်ဖွဲ့တွေအားလုံးကို ဒါကိုလည်း ပုံစံတမျိုးနဲ့ ပြန်ဖွဲ့ရမယ်။ အဲဒီတော့ ကျနော်တို့ အခုရဲတပ်ဖွဲ့ဟာ တပြည်လုံးကို ရဲတပ်ဖွဲ့တခုပဲ ထားတယ်၊ ရဲချုပ်တယောက်ကို ထားပြီးတော့ အဲဒီရဲချုပ်က တပြည်လုံးမှာရှိတဲ့ ရဲတွေကို အုပ်ချုပ်တယ်၊ အမိန့်ပေးတယ်။ သူ့ရဲ့အထက်မှာ ပြည်ထဲရေးဝန်ကြီးကနေတယ်။ သူ့ရဲ့အထက်မှာ ကာကွယ်ရေးဦးစီးချုပ်က ရှိတယ်။ အဲဒီတော့ အဲဒီဟာကိုလည်း ကျနော်တို့က ပြောင်းရမယ်။ ရဲကို ၂ မျိုး ပြန်ဖွဲ့သင့်တယ်။ ပထမတခုက ပြည်ထောင်စုလုံခြုံရေး ရဲတပ်ဖွဲ့လို့ ခေါ်တယ်။ တနိုင်ငံလုံးရဲ့ လုံခြုံရေးကိုလုပ်မယ်၊ ဘယ်နားမှာ သောင်းကျန်းသတုန်း၊ ဘယ်နားမှာ ပြဿနာ ကြီးကြီးမားမား ရှိသတုန်း၊ အဲဒါတွေကို အဲဒီ ပြည်ထောင်စုလုံခြုံရေး ရဲတပ်ဖွဲ့ကနေပြီးတော့ ကိုင်တွယ်ရမယ်။ အဲဒါ ပြည်ထဲရေးဝန်ကြီးလက်အောက်မှာ ထားရမယ်။ ပြီးတော့ ဒေသဆိုင်ရာ လုံခြုံရေးရဲတပ်ဖွဲ့ဆိုတာ သပ်သပ်ဖွဲ့ရမယ်။ ဥပမာ ရှမ်းပြည်နယ်တွင်းမှာ လူဆိုး၊ သူခိုး၊ ဓားပြ၊ ဒါတွေမရှိရအောင် ထိန်းသိမ်းစောင့်ရှောက်မယ့်ရဲကို ကျနော်တို့က ဒေသဆိုင်ရာ လုံခြုံရေးရဲတပ်ဖွဲ့ဆိုတဲ့ နာမည်နဲ့ ပြည်နယ်နဲ့တိုင်းအားလုံးမှာ ဒါတွေက ဖွဲ့ထားပြီးသားတွေက ရှိပြီးသားတွေ။ အဲဒီတော့ လောလောဆယ် ပြည်နယ်၊ တိုင်း အသီးသီးမှာ တာဝန်ထမ်းဆောင်နေတဲ့ ရဲတပ်ဖွဲ့ဝင်တွေ အားလုံးကိုလည်း ပြည်နယ်၊ တိုင်းဒေသကြီး အစိုးရနဲ့ ၀န်ကြီးချုပ်ရဲ့လက်အောက်ကို ပြောင်းပေးလိုက်လို့ရှိရင် အေးအေးဆေးဆေးလေးနဲ့ ဒီဌာန ၂ ခုဟာ၊ ထွေအုပ်နဲ့ ရဲတပ်ဖွဲ့ဟာ သက်ဆိုင်ရာ ပြည်နယ်၊ တိုင်းအစိုးရအဖွဲ့နဲ့ ၀န်ကြီးချုပ်တွေအောက်ကို ရောက်သွားလိမ့်မယ်။ အဲဒီဝန်ကြီးချုပ်တွေက ဦးဆောင်ပြီးတော့မှ ဆက်ပြီး ကိုယ့်ပြည်နယ် ကိုယ်အုပ်ချုပ်သွားမယ်ဆိုရင် ဗဟိုအစိုးရမှာလည်း ၀န်ထုပ်ဝန်ပိုး အများကြီး ပေါ့သွားမှာဖြစ်သလို ပြည်နယ်၊ တိုင်းအစိုးရတွေကလည်း သူတို့ပြည်နယ်၊ သူတို့တိုင်း၊ သူတို့ကိုယ်ပိုင် အုပ်ချုပ်လို့ရတယ်ဆိုတဲ့ အနေအထားမျိုးကို ဖြစ်သွားမယ့်အတွက် ဖက်ဒရယ်ပြည်ထောင်စုရဲ့ ရှေ့ပြေးပုံသဏ္ဌာန်လေး ဖြစ်မှာပေါ့။ တကယ် အမြဲတမ်းအတွက်ကတော့ နောက်မှာ ကျနော်တို့ ဥပဒေ ထပ်ပြီးတော့ လိုက်ပေးရမယ်။ အဲဒါက ဘာတုန်းဆိုတော့ ဒေသန္တရအုပ်ချုပ်ရေးဥပဒေလို့ ခေါ်တဲ့ ဥပဒေကို ပြန်ပြီးပြဋ္ဌာန်းပေးရမယ်။ ၁၉၅၃ ခုနှစ်က ပြဋ္ဌာန်းထားတာ ရှိပါတယ်။ ဒေသန္တရအုပ်ချုပ်ရေးဥပဒေလို့ ခေါ်ပါတယ်။ အဲဒါ ရပ်ကွက်ရယ်၊ မြို့နယ်ရယ်၊ ခရိုင်ရယ်၊ အဲဒီ ၃ ခုကို ဘယ်လိုအုပ်ချုပ်ရမလဲဆိုတာကို ပြဋ္ဌာန်းထားတာ။ ပြည်သူလူထုက အုပ်ချုပ်ရေးကောင်စီကို ရွေးကောက်တင်မြှောက်ရတယ်။ အဲဒီ အုပ်ချုပ်ရေးကောင်စီကနေပြီးတော့ ရပ်ကွက်ဆို ရပ်ကွက်အုပ်ချုပ်ရေးကောင်စီက ရပ်ကွက်ကို အုပ်ချုပ်တယ်။ မြို့နယ်ဆိုလည်း မြို့နယ်အုပ်ချုပ်ရေးကောင်စီက မြို့နယ်ကိုအုပ်ချုပ်မယ်၊ ခရိုင်ကလည်း ပြည်သူလူထုရွေးတဲ့ ခရိုင်အုပ်ချုပ်ရေးကောင်စီက ခရိုင်ကို အုပ်ချုပ်မယ်။ ခုနက ကျနော်တို့ပြောခဲ့တဲ့ အထွေထွေအုပ်ချုပ်ရေးဦးစီးဌာန ၀န်ထမ်းတွေဟာ ခရိုင်မှာရှိတဲ့ ထွေအုပ်ဝန်ထမ်းတွေဟာ အဲဒီ ခရိုင်အုပ်ချုပ်ရေးကောင်စီ အောက်ကို ရောက်သွားလိမ့်မယ်။ မြို့နယ်မှာရှိတဲ့ ထွေအုပ်ဝန်ထမ်းကလည်း မြို့နယ်အုပ်ချုပ်ရေးကောင်စီအောက်ကို ၀င်သွားမယ်။ အဲဒီလို ဒေသန္တရာဆိုင်ရာ အုပ်ချုပ်ရေးဥပဒေတခုကို ကျနော်တို့ ပြဋ္ဌာန်းနိုင်ပြီဆိုရင် အဲဒီဥပဒေနဲ့ အညီ ရွေးကောက်တင်မြှောက်လိုက်လို့ရှိရင် ကျနော်ထင်တယ် ၂၀၁၇ လောက်ကနေစပြီးတော့ တတိုင်းပြည်လုံးကို ပြည်သူလူထု ရွေးကောက်တင်မြှောက်တဲ့သူက အုပ်ချုပ်တဲ့စနစ် ပြန်ပြီးတော့ ပေါ်သွားပါလိမ့်မယ်။”

ထွေအုပ်အဖွဲ့ကို ပြည်နယ်၊ တိုင်းဝန်ကြီးချုပ်အဆင့်နဲ့ ပြည်ထောင်စုအဆင့်ခွဲပြီး နေရာချ အပြောင်းအရွှေ့လုပ်ရင် အုပ်ချုပ်ရေးမှာ ပြည်နယ်၊ တိုင်း ၀န်ကြီးချုပ်က ပြည်ထောင်စုကို ဘယ်လိုတာဝန်ခံရမလဲ။ ရှုပ်ထွေးမှုတွေ မဖြစ်နိုင်ဘူးလား။

“မဖြစ်ဘူးခင်ဗျ၊ မဖြစ်ဘူးခင်ဗျ။ ကျနော်တို့အားလုံးက ပြည်နယ်ဝန်ကြီးချုပ်အားလုံးဟာ နိုင်ငံတော်သမ္မတက ခန့်ထားတဲ့အတွက် နိုင်ငံတော်သမ္မတကို တာဝန်ခံရမယ်လို့ ရေးထားပါတယ်။ နိုင်ငံတော်သမ္မတကို ပြည်ထောင်စုလွှတ်တော်က ခန့်ထားတဲ့အတွက် နိုင်ငံတော်သမ္မတက ပြည်ထောင်စုလွှတ်တော်ကို တာဝန်ခံရမယ်ဆိုတာက ရှင်းရှင်းလင်းလင်း ရေးသားထားပြီးသားပါ။ အဲဒီတော့ ပြည်နယ်၊ တိုင်းဝန်ကြီးချုပ်တွေ အားလုံးက သမ္မတက ခန့်တာဖြစ်တဲ့အတွက် သမ္မတကို တာဝန်ခံရမယ်။ တနိုင်ငံလုံးရဲ့ အုပ်ချုပ်ရေးအကြီးအကဲက သမ္မတဖြစ်ပါတယ်။ အဲဒီတော့ သမ္မတက သူ့ရဲ့ အုပ်ချုပ်ရေးအာဏာကို ပြည်နယ်၊ တိုင်းတွေ အားလုံးကို လက်တွေ့ကျကျ ခွဲပေးလိုက်တဲ့အဓိပ္ပာယ် ဖြစ်ပါတယ်။ အဲဒီတော့ အခု ဒီမှာ နည်းနည်းလေး ရှုပ်ထွေးနေတာက ကျနော်တို့ဗမာပြည်မှာ အခုလောလောဆယ် အုပ်ချုပ်ရေး ၅ ဆင့်ရှိတယ်။ အောက်ကနေပြောရင် ရပ်ကွက်၊ မြို့နယ်၊ ခရိုင်၊ ပြည်နယ်၊ တိုင်းနဲ့ ဗဟိုပေါ့။ အဲဒီတော့ ဗဟိုပြည်ထောင်စုအစိုးရက ရွေးကောက်တင်မြှောက်ထားတာ၊ နောက်တခါ ပြည်နယ်၊ တိုင်းအစိုးရတွေကလည်း ရွေးကောက်တင်မြှောက်ထားတာ၊ အခု ရပ်ကွက်အုပ်ချုပ်ရေးမှူး ဆိုတာလည်း ရွေးကောက်တင်မြှောက်ထားတာ။ အဲဒီတော့ အလယ်မှာရှိတဲ့ ၂ ခု၊ မြို့နယ်နဲ့ ခရိုင်ကပဲ ရွေးကောက်တာမဟုတ်ဘဲ ခန့်ထားတဲ့လူက အုပ်ချုပ်နေတာ။ အဓိကက အရေးအကြီးဆုံး အခြေခံအကျဆုံး နေရာ ၂ ခုကို ရွေးကောက်တင်မြှောက်ပုံစံ မဟုတ်ဘဲ အထက်က ခန့်ထားတဲ့ပုံစံနဲ့ အုပ်ချုပ်နေတာ။ အဲဒါကြောင့် ပြဿနာက သိပ်ပြီးတော့ များနေတယ်၊ မတရားမှုတွေ အရမ်းများနေတယ်။ တရားဥပဒေစိုးမိုးမှု ကင်းမဲ့တာတွေဟာ အများကြီးဖြစ်နေတယ်။ ဘာဖြစ်လို့တုန်းဆိုတော့ အဲဒီ အုပ်ချုပ်တဲ့ ၀န်ထမ်းနောက်မှာ ပြည်ထဲရေးဝန်ကြီးဆိုတဲ့ သိပ်ရာထူးကြီးတဲ့လူတွေက ကာဗာ (အကာအကွယ်) ပေးထားလို့။ တကယ့်တကယ်တော့ အဲဒီလို မဖြစ်ရဘူးလေ။ ကျနော် စောစောကပြောသလို ဒေသန္တရအုပ်ချုပ်ရေးဥပဒေ ပြဋ္ဌာန်းလိုက်တာနဲ့ ပြည်သူရွေးတဲ့လူကပဲ အုပ်ချုပ်တာ ဖြစ်တော့မယ်။ မကြိုက်တာနဲ့ ပြည်သူက အော်မယ်၊ သူထွက်ပေးရမယ်။ အနိမ့်ဆုံး သူ ၅ နှစ်ပဲ အုပ်ချုပ်လို့ရမယ်၊ နောက်ဆို အရွေးခံရမှာ မဟုတ်တော့ဘူး။”

ဒါဆို ပြည်ထဲရေးဝန်ကြီးက ဘယ်ထွေအုပ်ကို သွားကိုင်ရတော့မှာလဲ။

“ပြည်ထဲရေးဝန်ကြီးက ဗဟိုအဆင့်ပဲ ကျန်တော့မယ်လေ။ ဒီ တနိုင်ငံလုံးမှာရှိတဲ့ အုပ်ချုပ်ရေးကို သမ္မတက တာဝန်ခံထားရတာ ဖြစ်တဲ့အတွက် လိုအပ်ရင် လိုအပ်တဲ့နေရာမှာ ဖြည့်ဆည်းပေးဖို့အတွက်လောက်ပဲ ပြည်ထောင်စုအဆင့် ပြည်ထဲရေးဝန်ကြီးက ဒါပဲရှိတော့မယ်။ သူ့မှာ အဓိက ဘာရှိမတုန်းဆိုတော့ဗျာ ထောက်လှမ်းရေးရှိမယ်၊ ထောက်လှမ်းရေးဆိုတာ ပြည်ထောင်စုတခုလုံးရဲ့ လုံခြုံရေးနဲ့ပတ်သက်တဲ့ ထောက်လှမ်းရေးဟာ သူ့ဆီမှာရှိမယ် (သို့မဟုတ်) သမ္မတဆီမှာထားမယ်။ နောက်တခါ ပြည်ထောင်စုလုံခြုံရေး ရဲတပ်ဖွဲ့ပေါ့။ သိပ်ပြီးတော့ သောင်းကျန်းနေတဲ့နေရာ၊ ဆူတဲ့ပူတဲ့နေရာတွေ အားဖြည့်ပေးဖို့ဆိုရင် အဲဒါ သူ့ဆီမှာထားမယ်။ ပြည်ထောင်စုတခုလုံးမှာ တနေရာမှာ အုပ်ချုပ်ရေးအားနည်းနေရင် အားနည်းတဲ့နေရာကို ဖြည့်စွက်ပေးဖို့ အင်အားဟာ ပြည်ထဲရေးဝန်ကြီး လက်အောက်မှာ ရှိလိမ့်မယ်။ ကျန်တဲ့ ဒီ ပြည်နယ်နဲ့ တိုင်းဒေသကြီး တခုချင်းကိုကတော့ သူ့ဟာသူ သက်ဆိုင်ရာ ပြည်နယ်၊ တိုင်းဝန်ကြီးချုပ်တွေကပဲ အုပ်ချုပ်သွားလိမ့်မယ်။”

ထွေအုပ်ကို ပြည်နယ်၊ တိုင်းဝန်ကြီးချုပ်တွေလက်အောက် ပို့ဖို့ဆိုရင် ပြည်ထောင်စုလွှတ်တော်မှာ လွယ်ကူပါ့မလား၊ နိုင်ငံတ၀န်း လူထုဆန္ဒခံယူပွဲတွေ ယူရလောက်မယ့် အဆင့်မျိုး ပြုပြင်ပြောင်းလဲ ပြဋ္ဌာန်းရတာမျိုးလား။

“မဟုတ်ဘူး၊ မလိုဘူး။ ဘာဖြစ်လို့တုန်းဆိုတော့ အုပ်ချုပ်ရေးအကြီးအကဲက သမ္မတဖြစ်ပါတယ်။ အုပ်ချုပ်ရေးအကြီးအကဲက သမ္မတဖြစ်တဲ့အတွက် အုပ်ချုပ်တာကို သမ္မတက သူ့စိတ်တိုင်းကျ အုပ်ချုပ်လို့ရပါတယ်။ သူ့ရဲ့လုပ်ပိုင်ခွင့်အာဏာကို သုံးပြီးတော့ အုပ်ချုပ်လို့ ရပါတယ်။ ဒါပေမယ်လို့ ခုန ကျနော်ပြောတဲ့ ဒေသန္တရအုပ်ချုပ်ရေး ဥပဒေမျိုးကျတော့ ဥပဒေပြဋ္ဌာန်းပြီးမှ အုပ်ချုပ်ရမှာဖြစ်တဲ့အတွက် သမ္မတက ဥပဒေကြမ်းရေးပြီးတော့ လွှတ်တော်ကို တင်ရပါမယ်။ လွှတ်တော်က အတည်ပြုပြီးတော့မှ ခုနက ကျနော်ပြောတဲ့ ရပ်ကွက်ကောင်စီ၊ မြို့နယ်ကောင်စီတို့ ခရိုင်ကောင်စီတို့ဆိုတာ၊ ဒါကတော့ ဥပဒေပြဋ္ဌာန်းပြီးမှ လုပ်ရမယ်။ ဖွဲ့စည်းပုံအခြေခံဥပဒေနဲ့ မဆန့်ကျင်ဘူး။ အခုအုပ်ချုပ်နေတာကသာ ဖွဲ့စည်းပုံအခြေခံဥပဒေနဲ့ ဆန့်ကျင်တယ်။ မညီမညွတ် ဖြစ်နေတာပေါ့ဗျာ။ ပြည်နယ်၊ တိုင်းဒေသကြီးတွေကို ရွေးတယ်ဗျာ ပြည်သူလူထုကနေ။ အစိုးရဆိုတာ ဖွဲ့တယ်ဗျာ။ ၀န်ကြီးဆိုတာတွေ ဖွဲ့ပေးတယ်ဗျာ၊ ၀န်ကြီးချုပ်ဆိုတာ ခန့်ပေးတယ်။ တကယ်တမ်းကျတော့ အဲဒီဝန်ကြီးချုပ်က သူ့ပြည်နယ်ကို အုပ်ချုပ်ဖို့ သူ့မှာ ရဲလည်းမရှိဘူး၊ အထွေထွေအုပ်ချုပ်ရေးဌာန ၀န်ထမ်းလည်း မရှိဘူး။ အဲဒီတော့ အဲဒါကြီးက ဘာခေါ်သတုန်းဆိုတော့ဗျာ အိမ်ကြီးလှလှပပ ဆောက်ပြီးတော့ ဘာမှ လူလည်းမနေ၊ ဘာမှလည်းမရှိဘူးဆိုတဲ့ သဘောပေါ့ဗျာ၊ အဲသလိုဖြစ်နေတာ။”

ထွေအုပ်ထဲမှာ စစ်တပ်က အရာရှိတွေက ထိပ်တန်းတာဝန်ရှိသူတွေ နေရာမှာ ပါဝင်ဆောင်ရွက်နေတာ တော်တော်များများရှိနေတယ်။ အခုလည်း ထွေအုပ်မှာ တပ်ကလူတွေ ၅၀၀ လောက် ထပ်တိုးနေတယ်ကြားတယ်။ ထွေအုပ်ကို ပြုပြင်ပြောင်းလဲရေးလုပ်ရင် ပြည်ထဲရေးက လက်ခံပါ့မလား။ ကာချုပ်က လက်ခံပါ့မလား။

“ဟုတ်ပြီဗျာ အဲဒီတော့ ၂ ခုခွဲဖြေမယ်။ နံပါတ် ၁ လူတွေပို့တယ်ပြောတယ်။ နောက်ထပ် လူ ၅၀၀ လောက်ပို့မယ် ထွေအုပ်ကို။ ပို့ပေ့ါဗျာ၊ နောက်တော့ အဲဒီဟာတွေက လုပ်ပိုင်ခွင့်အာဏာရှိလို့ ဒါကို မက်မောတာကိုး။ တကယ့်တကယ် စောစောကပြောသလို ရပ်ကွက်ကိုအုပ်ချုပ်လို့ ရပ်ကွက်ကောင်စီ၊ မြို့နယ်ကိုအုပ်ချုပ်လို့ မြို့နယ်ကောင်စီတွေ ပေါ်လာပြီဆိုရင် သူတို့က ဘာလုပ်ပိုင်ခွင့်အာဏာမှ မရှိတော့ဘူး။ သူက ရိုးရိုး နိုင်ငံ့ဝန်ထမ်းပဲ ဖြစ်တော့မယ်။ အဲဒီဟာကျတော့ သူတို့ ဒီရာထူး သူတို့မက်ချင်မှ မက်တော့မယ်ပေါ့ဗျာ၊ ဒါက တခု။ နောက်ခုနတခု၊ ပြည်ထဲရေးဝန်ကြီးက သဘောတူပါ့မလား၊ ကာချုပ်က သဘောတူပါ့မလားဆိုတဲ့ ခင်ဗျားရဲ့မေးခွန်း။ အဲဒီတော့ သမ္မတဟာ အုပ်ချုပ်ရေးရဲ့ အကြီးအကဲ၊ လက်ရှိ ၂၀၀၈ ဖွဲ့စည်းပုံအခြေခံဥပဒေအရ နိုင်ငံတော်သမ္မတဟာ နိုင်ငံတော်ရဲ့ အကြီးအကဲလည်းဖြစ်တယ်၊ အစိုးရအဖွဲ့ရဲ့ အကြီးအကဲလည်းဖြစ်တယ်၊ ဒါ ပုဒ်မ ၁၆။ နောက်တခါ ပုဒ်မ ၅၈ အရ နိုင်ငံတော်ရဲ့ အထွတ်အထိပ်ပုဂ္ဂိုလ်ဖြစ်တယ်ဗျ။ ၁၉၉ အရ အစိုးရအဖွဲ့ရဲ့ အကြီးအကဲလည်း ဖြစ်တယ်ဗျ။ အဲဒီတော့ နိုင်ငံတော်အကြီးအကဲ၊ အစိုးရအဖွဲ့အကြီးအကဲဖြစ်တဲ့ သမ္မတလုပ်တာကို ပြည်ထဲရေးဝန်ကြီးက မလိုက်နာရင် ထွက် သူ။ သူ့အလုပ်က ထွက်ဖို့ပဲရှိတယ်။ မထွက်နိုင်လို့ရှိရင် စွပ်စွဲပြစ်တင်ပြီး ထုတ်ပစ်ဖို့ပဲရှိတယ်။ ဘာဖြစ်လို့တုန်းဆိုတော့ အဖြေက ရှင်းရှင်းလေး။ ပြည်ထောင်စုလွှတ်တော်ဆိုတာ ပြည်သူလူထုက ရွေးကောက်တင်မြှောက်ဖွဲ့စည်းတာ။ အဲဒီပြည်ထောင်စုလွှတ်တော်က သမ္မတကို ရွေးပြီးတော့ ခန့်အပ်ထားတာ။ အဲဒီသမ္မတက ပြည်ထောင်စုလွှတ်တော်ကို တာဝန်ခံရတယ်။ ဆိုလိုတာက ပြဿနာပေါ်ရင် တာဝန်ခံရမယ့်သူသည် သမ္မတဖြစ်တယ်၊ ပြည်ထဲရေးဝန်ကြီး မဟုတ်ဘူး။ ဒါ့ကြောင့်မို့လို့ ပြည်ထဲရေးဝန်ကြီးဟာ သမ္မတကို မနာခံဘူးဆိုရင် ထုတ်ပစ်ဖို့ပဲရှိတယ်၊ အသစ်အစားပြန်ထိုးဖို့ပဲ ရှိတယ်။ ဒါကြောင့် ပြည်ထဲရေးဝန်ကြီးက သဘောမတူရင် ဖြစ်ပါ့မလားဆိုတဲ့ မေးခွန်းမျိုးဟာ တက်လာစရာ အကြောင်းကို မရှိဘူး။ ဘာဖြစ်လို့တုန်းဆိုတော့ သမ္မတလုပ်တာကို ပြည်ထဲရေးဝန်ကြီးက သဘောမတူဘူးလို့ ပြောခွင့်ကို မရှိဘူး။ အဲဒါ ဖွဲ့စည်းပုံအခြေခံဥပဒေအရ ကျနော်ပြောနေတာ။”

သမ္မတဦးထင်ကျော် သမ္မတတာဝန် စတင်ထမ်းရွက်ပြီဆိုတော့  အထက်က ဖြေကြားချက်တွေက ဖြစ်ကောင်းဖြစ်လာနိုင်သလား၊ အချိန်ယူရဦးမလား။

“ကျနော်တို့ ရွေးကောက်ပွဲ Manifesto (ရွေးကောက်ပွဲကြေညာစာတမ်း) မှာ ပါပြီးပါပြီခင်ဗျ။ တကယ့် နိုင်ငံသားတွေ၊ ပြည်သူပြည်သားတွေရဲ့ဘ၀ လုံခြုံ၊ ကြောင့်ကြမှု ကင်းပြီးတော့ အပူအပင်ကင်းမဲ့စွာနဲ့ နေထိုင်နိုင်တဲ့ အုပ်ချုပ်ရေးစနစ်တခုကို ပေါ်ပေါက်အောင် လုပ်မယ်ဆိုတာ ရွေးကောက်ပွဲ Manifesto မှာ ပါပြီးသားပါ။ Administrative Reform လို့ခေါ်တယ်၊ အုပ်ချုပ်ရေးကဏ္ဍ ပြုပြင်ပြောင်းလဲမှုရှိမယ်၊ တရားရေးဌာန ပြုပြင်ပြောင်းလဲမှုရှိမယ်၊ ငြိမ်းချမ်းရေးလုပ်မယ်၊ ဖွဲ့စည်းပုံအခြေခံဥပဒေ ဒီမိုကရေစီစံနှုန်းနဲ့ ကိုက်ပြီးတော့ ဖက်ဒရယ်နိုင်ငံတော် ထူထောင်နိုင်မယ့် ဖွဲ့စည်းပုံအခြေခံဥပဒေတရပ် ပေါ်ပေါက်ရေးဆိုတာ လုပ်မယ်ဆိုပြီးတော့ ရွေးကောက်ပွဲ ကြေညာစာတမ်းမှာ အဓိက ၄ ချက် ပေးထားပါတယ်။ အဲဒီထဲမှာ ဒီ အုပ်ချုပ်ရေး ပြုပြင်ပြောင်းလဲရေးဆိုတာ ပါပါတယ်။ ဒါကြောင့်မို့လို့ ရွေးကောက်ပွဲကတိ ဖြစ်တဲ့အတွက် သမ္မတကြီးဟာ သေချာပေါက် လုပ်သွားလိမ့်မယ်လို့ ကျနော် ပြောနိုင်ပါတယ်။”

တိုင်းဒေသကြီးနဲ့ ပြည်နယ်အစိုးရ အဖွဲ့တွေမှာ အတွင်းရေးမှူးတွေက ကျန်နေခဲ့တယ်ဆိုတော့ အရင်အစိုးရလက်ထက်တုန်းက လူတွေပဲလား၊ အခု အစိုးရအဖွဲ့ရဲ့ အတွင်းရေးမှူးတွေကလေ။

“ပြည်နယ်၊ တိုင်း အစိုးရအဖွဲ့ အတွင်းရေးမှူး အားလုံးဟာ အထွေထွေအုပ်ချုပ်ရေးဦးစီးဌာန တိုင်းမှူးတွေကို ခန့်ထားတာဗျ။ အဲဒီတော့ အဓိပ္ပာယ်က ပြည်နယ်၊ တိုင်းဒေသကြီးတွေ အားလုံးရဲ့ အုပ်ချုပ်ရေးမှာ အရေးပါတဲ့ Post တခုကို ထွေအုပ်က ယူထားတာပေါ့။ တနည်းအားဖြင့် ပြည်နယ်၊ တိုင်း အားလုံးကို ပြည်ထဲရေးဝန်ကြီးဌာနကနေ ထိန်းချုပ်ထားတဲ့သဘော ဖြစ်နေတာပေါ့။ အဲဒါကြောင့် ဒီလိုမျိုးလုပ်လို့မရဘူး၊ အဲဒီ အထွေထွေအုပ်ချုပ်ရေး ဦးစီးဌာနက ဘယ်လောက်ရာထူးကြီးကြီး တိုင်းမှူးဟာ သူက ၀န်ထမ်းပဲဖြစ်ရမယ်၊ ၀န်ထမ်းအကြီးအကဲပဲ။ သူ့ဝန်ထမ်းတွေကို အုပ်ချုပ်တဲ့နေရာမှာပဲ သူက တာဝန်ရှိမယ်။ ပြည်သူလူထုကို အုပ်ချုပ်တဲ့နေရာမှာ အဲဒီ ထွေအုပ်တိုင်းမှူးက သူ့မှာ ဘာအာဏာမှ မရှိဘူး။ ပြည်သူလူထုကို အုပ်ချုပ်မှာက ၀န်ကြီးချုပ်နဲ့ အစိုးရအဖွဲ့က အုပ်ချုပ်မှာ။ အဲဒီဝန်ကြီးချုပ်နဲ့ အစိုးရအဖွဲ့ရဲ့ အုပ်ချုပ်မှုယန္တရား လည်ပတ်နိုင်အောင် အထွေထွေအုပ်ချုပ်ရေးဦးစီးဌာန ၀န်ထမ်းတွေက သူ့ကျရာကျရာ တာဝန်တွေကို လုပ်ပေးရမယ်။ အုပ်ချုပ်ရေးအာဏာကို သူတို့ကို မပေးရဘူး၊ ၀န်ထမ်းအာဏာပဲ၊ နိုင်ငံ့ဝန်ထမ်း။ ၀န်ကြီးချုပ်ခိုင်းတာလုပ်၊ အစိုးရခို်င်းတာလုပ် ဒါပဲ။ သူတို့မှာ အုပ်ချုပ်ရေးအာဏာမအပ်ဘူး၊ ဒါကိုပြောတာ။ အခု အဲဒီ ခရိုင်အုပ်ချုပ်ရေးမှူးတို့၊ မြို့နယ်အုပ်ချုပ်ရေးမှူးတို့က သူတို့ အုပ်ချုပ်ရေးအာဏာ အပ်လိုက်တာ၊ ဟေ့ကောင် မင်းလာဆို သူက လာရတယ် ကျနော်တို့က။ မင်း ငါ့စကားနားထောင်ဆို နားထောင်ရမယ် ပြည်သူတွေက။ အမှန်က ၀န်ထမ်းကို အဲလိုအာဏာမပေးရဘူး။ အဲဒီလိုအာဏာကိုက ကောင်စီတွေကို ရွေးပြီးတော့မှ အဲဒီလိုအာဏာကို ပေးရတယ်။ ခရိုင်အုပ်ချုပ်ရေးမှူးဆိုတာက ခရိုင်ကောင်စီရဲ့အောက်မှာ လုပ်ရတဲ့ ၀န်ထမ်းအကြီးအကဲပဲဖြစ်တယ်။ အခု ၀န်ထမ်းအကြီးအကဲက ပြည်သူတွေရဲ့ အကြီးအကဲ လာဖြစ်နေတာဟာ ကျနော်တို့ဆီမှာ ရှုပ်ထွေးနေတာပဲ။”

တရားဥပဒေစိုးမိုးရေး၊ ပြည်တွင်းငြိမ်းချမ်းရေး၊ ဖွဲ့စည်းပုံပြင်ဆင်ရေးတွေ လုပ်မယ်လို့ အန်အယ်လ်ဒီက ကြွေးကြော်ခဲ့ပါတယ်။ အခုရော တရားစီရင်ရေးစနစ်က သမ္မတသစ် ဦးထင်ကျော်လက်ထက်မှာ ဘယ်လိုပြုပြင်ပြောင်းလဲမှုတွေ လုပ်မလဲ။

“တရားစီရင်ရေး ပြုပြင်ပြောင်းလဲဖို့ကိစ္စ ကြေညာစာတမ်းမှာပါတယ်။ အဲဒီတော့ ကြေညာစာတမ်းမှာ ပါတဲ့အတိုင်း အကောင်အထည်ဖော် ဆောင်ရွက်ဖို့အတွက်ကို အပိုင်း ၂ ပိုင်း ခွဲပြီး လုပ်ရမယ့်သဘော ရှိတယ်ဗျ။ တပိုင်းက ပြုပြင်ပြောင်းလဲရေး၊ တပိုင်းက ဖွဲ့စည်းပုံအခြေခံနဲ့ ဆက်စပ်တယ်။ အဲဒီတော့ ဖွဲ့စည်းပုံအခြေခံဥပဒေကို မပြင်ဘဲနဲ့ ဒီဟာက ပြောင်းလို့မရဘူး။ ဥပမာ ကျနော်တို့ လက်ရှိ ဖွဲ့စည်းပုံအခြေခံဥပဒေအရဆိုရင် ပြည်ထောင်စု တရားလွှတ်တော်ချုပ်ဆိုတာကို ဖွဲ့စည်းပြီးတော့မှ သူက တရားရေးအာဏာနဲ့ အုပ်ချုပ်ရေးအာဏာ ၂ ခုစလုံးကို ရောထွေးပြီး အပ်နှင်းထားတယ်။ ပြီးတော့ အုပ်ချုပ်ရေးနဲ့ပတ်သက်လို့ ဘတ်ဂျက်တွေဘာတွေ ဆွဲတာကလည်း သူက Independent မဖြစ်ဘူး။ အစိုးရကနေ တင်ပေးနေရတာတွေ ရှိနေတယ်။ ဒါမျိုး ဖြစ်လို့မရဘူး။ အဲဒီတော့ ဘယ်လိုလုပ်ရမတုန်းဆိုတော့ Judicial Ministry ဆိုတာ သတ်သတ်ပြန်ဖော်ရမယ်။ ကျနော်တို့ ၁၉၆၂ မတိုင်မီက ရှိပါတယ်။ တရားရေးဝန်ကြီးဌာနလို့ ခေါ်ပါတယ်။ တရားရေးဝန်ကြီးချုပ်ဆိုတာကို ခန့်ထားပါတယ်။ အဲဒီအောက်မှာမှ တရားရေးဝန်ကြီးများ၊ တရားရုံးချုပ် တရားသူကြီးများ ဆိုပြီးတော့ ဖွဲ့စည်းရပါတယ်။ ဆိုလိုတာက Judicial မှာ အပိုင်း ၂ ပိုင်း ရှိပါတယ်။ တရားရေးဆိုင်ရာ အုပ်ချုပ်ရေးနဲ့ တရားစီရင်ရေးဆိုပြီးတော့ ၂ မျိုးရှိတယ်။ တရားစီရင်ရေး ဆိုတာကတော့ ဖြောင့်မတ်မှန်တဲ့ တရားသူကြီးတွေ ခန့်ပြီးတော့ အမှုတွေကို စစ်ခိုင်းတဲ့အလုပ်ပေါ့။ အုပ်ချုပ်ရေးဆိုတာက အဲဒီတရားသူကြီးတွေ ဖြောင့်ဖြောင့်အလုပ်လုပ်ဖို့၊ အဲဒီတရားသူကြီးတွေ ရာထူးတိုးတာ၊ လျှော့တာ၊ ရွှေ့တာ၊ နယ်ပြောင်းတာ၊ အကျဉ်းထောင်တွေကို ထိန်းသိမ်းတာ၊ အုပ်ချုပ်တာ၊ အဲဒါကျတော့ အုပ်ချုပ်ရေးဌာနက တာဝန်ယူရတယ်။ အဲဒီတော့ တရားရေးဌာနကြီးကို ပြန်ပြီးတော့ ဖွဲ့စည်းမယ်ဆိုရင်တော့ ဖွဲ့စည်းပုံအခြေခံဥပဒေ ပြင်ပြီးမှရမယ်၊ ဒါက တပိုင်း။ ဒုတိယတပိုင်း ဖွဲ့စည်းပုံအခြေခံဥပဒေ မပြင်ခင် လုပ်လို့ရတဲ့ အပိုင်းကတော့ တရားစီရင်ရေးဥပဒေ အသစ်တခုကို ပြည်ထောင်စုလွှတ်တော်က ပြန်ရေးရမယ်။ အခုလောလောဆယ် ဗမာနိုင်ငံမှာ ၂၀၁၀ ပြည်ထောင်စုတရားစီရင်ရေး ဥပဒေအရ တရားစီရင်ရေး လုပ်ငန်းတွေကို ဆောင်ရွက်နေတယ်။ အဲဒီဥပဒေကို ပိုမိုကောင်းမွန်တဲ့ ဥပဒေနဲ့ အစားထိုးဖို့လိုမယ်။ ဆိုလိုတာက တရားသူကြီးတွေကို လွတ်လွတ်လပ်လပ် စီရင်နိုင်တဲ့ အခွင့်အာဏာကို ဥပဒေနဲ့ ပြဋ္ဌာန်းပေးမယ်။ တရားသူကြီးတွေကို ဘယ်အုပ်ချုပ်ရေးဌာနကမှ စွက်ဖက်လို့မရဘူး၊ အမိန့်ပေးလို့မရဘူး၊ ညွှန်ကြားချက်ပေးလို့မရဘူး။ ပေးလာရင်လည်း လုံးဝမနာခံရဘူး။ တရားသူကြီးတွေဟာ တည်ဆဲဥပဒေကို ထောက်ထားပြီးတော့ လွတ်လွတ်လပ်လပ် ကိုယ့်သဘောနဲ့ကိုယ် ဆုံးဖြတ်ရမယ်။ အဲဒီဆုံးဖြတ်ချက်ကိုလည်း တာဝန်ယူရမယ်။ မှားရင် တာဝန်ခံရမယ်။ မမှားအောင် အထက်တရားသူကြီးတွေက စောင့်ကြည့်ပေးရမယ်။ တကယ်လို့ စောင့်ကြည့်ဖို့ပျက်ကွက်ရင် ပျက်ကွက်တဲ့ အထက်တရားသူကြီးပါ အရေးယူမယ်ဆိုတဲ့ ပုံမျိုးနဲ့ တရားစီရင်ရေး ဥပဒေတခုကို ရေးလိုက်နိုင်မယ် ဆိုရင်တော့ လောလောဆယ် လာဘ်ပေးလာဘ်ယူ ဖြစ်တာတွေ၊ မတော်မတရား ဆုံးဖြတ်တာတွေ အတော်အတန် နည်းပါးသွားမယ်။ ဒါကတော့ လတ်တလော လျှင်လျှင်မြန်မြန် လုပ်လို့ရတဲ့အပိုင်းပေါ့။ ခုန ကျနော်ပြောတဲ့ ဌာနကြီးတခုလုံး ပြုပြင်ပြောင်းလဲဖို့ကျတော့ ဖွဲ့စည်းပုံအခြေခံဥပဒေ ပြင်တဲ့အပိုင်း၊ အဲဒါကတော့ နည်းနည်းခက်မယ်၊ ဖွဲ့စည်းပုံပြင်ပြီးမှ လုပ်လို့ရမယ်။ ဖွဲ့စည်းပုံမပြင်ဘဲ လုပ်လို့ရတာကတော့ ခုနပြောသလို တရားစီရင်ရေးဥပဒေ အသစ်တခုကို ရေးဆွဲပြီးတော့မှ အစားထိုးရမယ်။ လုပ်စရာတွေ အများကြီးပဲ။”

တစ်ပတ်အတွင်း မိုးလေဝသ ခန့်မှန်းချက်မှသည် ၂၀၁၇သို့

မိုးလေဝသပညာရှင် ဒေါက်တာထွန်းလွင်၏ မြန်မာနိုင်ငံနှင့် အနီးပတ်ဝန်းကျင် ဒေသတွေမှာ ဖြစ်ပေါ်ခဲ့တဲ့ မိုးလေဝသ အခြေနေတွေနဲ့  လာမယ့်ရက်တွေမှာ ယေဘုယျအားဖြင့် ကြုံတွေ့နိုင်တဲ့ မိုးလေဝသ အခြေနေ ကြိုတင်သုံးသပ်ချက်တို့ကို မဇ္ဈိမ စာဖတ်ပရိတ်သတ်များအတွက် ကောက်နုတ်ဖော်ပြလိုက်သည်။
လက်ရှိအပူချိန်အခြေအနေ
အခုဆိုရင် ရာသီကာလ အပိုင်းခြားအနေနဲ့  ၂၀၁၆ ခုနှစ်ရဲ့ နွေရာသီ ကာလကို ရောက်ရှိနေပြီ ဖြစ်ပါတယ်။ နွေရာသီ ကာလတို့ရဲ့ အစဉ်လာတိုင်း မြန်မာနိုင်ငံမှာ နေ့အပူချိန်တွေဟာ တစ်နေ့ထက် တစ်နေ့ ပိုမိုမြင့်တက်လာနေတာ တွေ့ရပါတယ်။ လက်ရှိအချိန်နေမှာတော့ မြန်မာနိုင်ငံမှာ စစ်ကိုင်တိုင်းအောက်ပိုင်း၊ မကွေးတိုင်း၊ ပဲခူးတိုင်း၊ ဧရာဝတီတိုင်းအရှေ့ပိုင်း၊ ရန်ကုန်တိုင်းမြောက်ပိုင်း၊ ကယားပြည်နယ်၊ ကရင်ပြည်နယ်တောင်ပိုင်၊ မွန်ပြည်နယ်တောင်ပိုင်းနှင့် တနင်္သာရီတိုင်းတောင်ပိုင်းတို့မှာ အပူချိန်အမြင့်ဆုံး ဖြစ်နေတာ တွေ့ရပါတယ်။ အပူချိန်ဟာ ၄၁ ဒီဂရီမှ ၄၅ ဒီဂရီစင်တီဂရိတ်လောက်ထိ မြင့်တက်နေတာ တွေ့ရပါတယ်။ ကျန်ဒေသတွေမှာတော့ အများအားဖြင့် နေအပူချိန်များဟာ ၃၀ မှ ၄၀ ဒီဂရီစင်တီဂရိတ် အတွင်းမှာ ရောက်ရှိနေကြတာ တွေ့ရပါတယ်။
အယ်နီညိုအခြေအနေ
၂၀၁၆ ခုနှစ်ဟာ အယ်နီညိုနှစ် ဖြစ်နေဆဲ တွေ့ရပါတယ်။ ပြီးခဲ့တဲ့ ၂၀၁၅ ခုနှစ် မတ်လလောက်က စတင်ပြီး အယ်နီညို ရာသီဥတု စတင်လာတာဟာ ၂၀၁၅ခုနှစ် ဒီဇင်ဘာလမှာ အယ်နီညိုဟာ အားကောင်းဆုံး အဆင့်ကို ရောက်ရှိခဲ့ပါတယ်။ ၂၀၁၆ ခုနှစ်အတွင်း ဝင်ရောက်လာတဲ့ အခါမှာတော့ အယ်နီညို အင်အားများဟာ တစ်စ တစ်နဲ့ပြန်လည် လျော့ကျလာရမှာ ပြီးခဲ့တဲ့ ဖေဖော်ဝါရီလ ၂၉ ရက်နေ့ အထိ အယ်နီညိုဟာ အားကောင်းတဲ့ အဆင့်မှာ ရှိနေဆဲ ဖြစ်ပါတယ်။ ဒါပေမယ့် မတ်လအတွင်း ရောက်တဲ့ အချိန်ကစပြီး အယ်နီညိုရဲ့ အင်အားဟာ အားကောင်းတဲ့ အဆင့်ကနေပြီးတော့ အားအသင့်တင့် ရှိတဲ့အဆင့်ကို တစ်ဖြေးဖြေး လျော့ကျလာနေတာကို တွေ့ရပါတယ်။ နောက်ဆုံး တိုင်းတာချက်ကို မတ်လ ၂၁ ရက်နေ့ တိုင်းတာ ခဲ့ရာမှာ အယ်နီညိုရဲ့ အင်အားကို ဖော်ပြတဲ့ ပစိဖိတ်သမုဒ္ဒရာရဲ့ အရှေ့ဘက် အီကွေတာ ရပ်ဝန်းမှာ ရှိတဲ့ ပင်လယ်ရေ မျက်နှာပြင်များရဲ့ ပုံမှန်ထက် ပိုမိုမြင့်မားတဲ့ အပူချိန် ပမာဏဟာ ၁.၇ ဒီဂရီစင်တီဂရိတ်ခန့် ရှိနေဆဲ ဖြစ်တာကို တွေ့ရပါတယ်။ ဒါပေမယ့်လည်း အယ်နီညိုဟာ တစ်ပါတ်ထက် တစ်ပါတ် အင်အား လျော့ကျ လာနေတာ ဖြစ်တဲ့ အတွက် လက်ရှိအနေထားအရ လာမယ့် ဇွန်လလောက်မှာ အယ်နီညို ဖြစ်စဉ်ဟာ ကုန်ဆုံးမယ်လို့ ခန့်မှန်းရပါတယ်။
ကြားနေရာသီဥတု
ပစိဖိတ် သမုဒ္ဒရာထဲမှာ ရာသီဥတု ဖြစ်စဉ်ဟာ အချိန်နေ သုံးမျိုး ဖြစ်ပေါ်လေ့ ရှိပါတယ်။ ပထမ တစ်မျိုးကတော့ လက်ရှိ ဖြစ်နေတဲ့ ပူပြင်းခြောက်သွေ့တဲ့ ရာသီဥတုကို ဖြစ်စေတတ်တဲ့ အယ်နီညို ရာသီဥတု ဖြစ်ပါတယ်။ နောက်တစ်မျိုးကတော့ အဲဒီရာသီဥတုနဲ့ ဆန့်ကျင်တဲ့ အေးပြီး စွတ်စိုတဲ့ ရာသီဥတုကို ဖြစ်စေတတ်တဲ့ လာနီညာ ရာသီဥတု အမျိုးစား ဖြစ်ပါတယ်။ တစ်ခါတစ်ရံမှာတော့ အယ်နီညိုလည်း မဟုတ် လာနီညာလည်း မဟုတ်တဲ့ ကြားအခြေနေ ဖြစ်တဲ့ ကြားနေ ရာသီဥတုမျိုးလည်း ဖြစ်ပေါ်လေ့ ရှိပါတယ်။ လက်ရှိအနေထားများအရ ၂၀၁၆ ခုနှစ် လက်ရှိဖြစ်ပေါ်နေတဲ့ အယ်နီညိုဟာ တစ်ဖြေးဖြေး အားလျော့လာရမှ လာမယ့် ဇွန်လမှာအယ်နီညို ဖြစ်စဉ်ဟာ ကုန်ဆုံးမယ်လို့ ခန့်မှန်းရရှိပါတယ်။ အယ်နီညိုဖြစ်စဉ် ကုန်ဆုံးတာနဲ့ ပစိဖိတ် သမုဒ္ဒရာရဲ့ ရာသီဥတု ပုံစံဟာ ကြားနေ အဆင့်ကိုကူးပြောင်းသွားမှာ ဖြစ်ပါတယ်။ အဲဒီကြားနေအဆင့် ရာသီဥတုဟာ ၂၀၁၆ ခုနှစ် ဇွန်လက စတင်ပြီး ဂျုလိုင်လ သြဂုတ်လ စတင်ဘာလ နောက်ဆုံး ပါတ်ထိ ဆက်လက် ရှိနေနိုင်ပြီးတော့ စတင်ဘာလ နောက်ဆုံး အပတ်ရောက်တဲ့ အခါမှာတော့ ပစိဖိတ် သမုဒ္ဒရာရဲ့ ရာသီဥတုဟာ လက်ရှိဖြစ်နေတဲ့ အယ်နီညိုနဲ့ ဆန့်ကျင်တဲ့ လာနီညာ ရာသီဥတုကို ကူးပြောင်း သွားမယ်လို့ သချာင်္ပုံစံ တွက်ချက်မှုများအရ တွေ့ရှိထားရပါတယ်။ ၂၀၁၆ ခုနှစ် နှစ်ကုန်တဲ့အထိ လာနီညာဟာ ဆက်လက်ဖြစ်ပေါ်နေပြီး အစဉ်လာတိုင်း ဒီဇင်ဘာလမှာ လာနီညာ အားကောင်းဆုံး ဖြစ်လာမှာ ဖြစ်ပါတယ်။
၂၀၁၇ လာနီညာ အလားအလာ
အဲဒီနောက် ၂၀၁၇ ခုနှစ် ဝင်ရောက်တဲ့ အခါမှာတော့ လာနီညာ ဖြစ်စဉ်ဟာ တဖြေးဖြေး ပြန်လည် အားလျော့လာပြီး ၂၀၁၇ ဇွန်လလောက်မှာ လာနီညာ ဖြစ်စဉ်ဟာ ပြီးဆုံးသွားနိုင်တယ်လို့ ခန့်မှန်းဖော်ပြ တွက်ချက် ရရှိထားပါတယ်။ လာနီညာ ရာသီဥတု ဖြစ်စဉ်ဟာ များသောအားဖြင့် အေးပြီးစွတ်စိုတဲ့ ရာသီဥတုကို ဖြစ်စေတတ်တဲ့ အတွက်ကြောင့် ၂၀၁၇ ခုနှစ်ရဲ့ မိုးရာသီကာလမှာ မိုးများစွာ ရွာသွန်းနိုင်မယ့် အနေထားရှိပါတယ်။ မိုးများစွာ ရွာသွန်းတဲ့ အခါမှာ မြန်မာနိုင်ငံမှာ နောက်က ကပ်ပါလာတတ်တဲ့ သဘာဝဘေးကတော့ ရေကြီးခြင်း ဘေးဖြစ်ပါတယ်။ အဲတာအပြင် လာနီညာနှစ်တွေရဲ့ ထူးခြားမှုက လာနီညာနှစ်တွေမှာ မြန်မာနိုင်ငံကို မုန်တိုင်းဝင်ရောက်လေ့ ရှိပါတယ်။ ဒီဖြစ်စဉ်ဟာ ၂၀၁၇ခုနှစ်မှာ ကြုံတွေ့ရမှာ ဖြစ်ပါတယ်။
လောလောဆယ်မှာတော့ အယ်နီညို ရာသီဥတု ဖြစ်နေတဲ့ အတွက် မြန်မာနိုင်ငံ တစ်ဝှမ်းမှာ ထိခိုက်မှုကို နယ်ပယ် ငါးခုမှာ တွေ့နေရပြီ ဖြစ်ပါတယ်။ အပူချိန်လွန်ကဲတဲ့ နွေရာသီကို လက်ရှိကြုံတွေ့နေရပြီး ပူပြင်းတဲ့ နွေရာသီပေါ်မှာ အကြောင်းပြုပြီး ရေရှားပါမှု ပြဿနာ ကြုံတွေ့နေရပြီး ကူးစက်တတ်တဲ့ ရောဂါ ပျံ့ပွား မှုများ စတာတွေကိုလည်း မြန်မာနိုင်ငံမှာ ကြုံတွေ့နေရပါတယ်။ အဲတာအပြင် စိုက်ပျိုးသီးနှံ ထုတ်လုပ်မှုကလည်း အပူချိန်မြင့်ပြီး ခြောက်သွေ့တဲ့ ရာသီဥတု ကြောင့် အထွက်နှုန်းလျော့ကျနိုင်တဲ့ အလားလာများလည်း ရှိနေတာ တွေ့ရပါတယ်။ နောက်ဆုံးတွေ့ရတဲ့ အယ်နီညိုရဲ့ အကျိုးဆက်ကတော့ သဘာဝဘေးတစ်ခုဖြစ်တဲ့ မီးလောင်မှု အန္တရာယ်တွေ နေ့စဉ်နဲ့ အမျှ ကြုံတွေ့နေရခြင်းပဲ ဖြစ်ပါတယ်။
မုတ်သုန်ကာလ ကြိုတင်ခန့်မှန်းချက်
ဒီအချက်လက်များပေါ်မှာ အခြေခံပြီး လာမယ့် မိုးရာသီကာလမှာ အထူးသဖြင့် မုတ်သုန်ကာလ ဖြစ်တဲ့ မေလရဲ့ ရာသီဥတု များပေါ်မှာ သတိပြုစရာ လေး ရှိနေပါတယ်။ မေလမှာ ထူးခြားတဲ့ ရာသီဥတုဟာ သုံးမျိုး သုံးစားရှိပါတယ်။ ပထမ တစ်မျိုးကတော့ မေလမှာမိုးတိမ်တောင်များ ဖြစ်ပေါ်တတ်တဲ့ ကာလဖြစ်ပါတယ်။ အယ်နီညို ရာသီဥတုကြောင့် ဖြစ်ပေါ်လာမယ့် မိုးတိမ်တောင်များဟာ ပိုမိုပြင်းထန်နိုင်ပါတယ်။ အယ်နီညိုရာသီဥတု ဖြစ်တဲ့အတွက် ဖြစ်ပေါ်လာတဲ့ မိုးတိမ်တောင်များအားကောင်းမယ်ဆိုရင် မိုးကြိုးပစ်ခြင်း နေရာကွက်၍ မိုးကြီးခြင်း မိုးသက်လေပြင်း တိုက်ခတ်တတ်ခြင်း လေဆင်နှာမောင်း တိုက်ခတ် တတ်ခြင်း စတာတွေရဲ့ အန္တရာယ်ကို သတိပြုဖို့ လိုမှာ ဖြစ်ပါတယ်။ အထူးသဖြင့် မိုးကြိုးပစ်ခြင်း အန္တရာယ်ကို လယ်ယာလုပ်ငန်းဝင်ကြမယ့် တောင်သူဦးကြီးများ အနေနဲ့ အထူးသတိထားဖို့ လိုအပ်ပါတယ်။ မြန်မာနိုင်ငံမှာ မိုးကြိုးပစ်ခြင်းကြောင့် သေဆုံးသူများဟာ နှစ်စဉ် တစ်ရာထက် ကျော်လွန်နေတာကိုလည်း တွေ့မြင်နေရတာ ၁၀ နှစ်ခန့် ရှိနေပြီ ဖြစ်ပါတယ်။
 မေလမှာ နောက်ထပ် အရေးကြီးတဲ့ ဖြစ်စဉ်တစ်ခုကတော့ မုန်တိုင်းဝင်တတ်ခြင်းပဲ ဖြစ်ပါတယ်။ ဒါပေမယ့်လို့ ဒီနှစ်မှာ အယ်နီညို နှစ် ဖြစ်နေတဲ့အတွက် လာမယ့် မေလအတွင်း မြန်မာနိုင်ငံကို မုန်တိုင်းဝင်ရောက်ဖို့ အလားလာများစွာ ဝင်ရောက်နိုင်တယ်လို့ တွက်ချက် ရရှိပါတယ်။ သို့သော်ငြားလည်း မုန်တိုင်း သတင်းကြေငြာချက် ထုတ်ပြန်တဲ့ အခါမှာတော့ သတင်းကိုတော့ စောင့်ကြည့်ဖို့ လိုပါတယ်။ သို့သော် စောစောက တင်ပြခဲ့သလို အယ်နီညို နှစ်တွေမှာ မြန်မာနိုင်ငံကို  မုန်တိုင်းဝင်ရောက်မှု မရှိတာ အကြောင်းပြုပြီး မုန်းတိုင်း အန္တရာယ် လျော့နည်းနိုင်တယ်လို့ သုံးသပ် ရရှိထားပါတယ်။
မေလမှာ နောက်ထပ် အရေးကြီးတာ တစ်ခုကတော့ မြန်မာနိုင်ငံအတွင်းကို မုတ်သုန်လေ စတင်ဝင်ရောက်တတ်ခြင်း ဖြစ်ပါတယ်။ အယ်နီညိုနှစ် ဖြစ်နေတဲ့အတွက် ၂၀၁၆ခုနှစ် မေလမှာ မြန်မာနိုင်ငံကို မုတ်သုန်ဝင်ရောက်မှုဟာပုံမှန်ထက် နောက်ကျနိုင်ပါတယ်။ မြန်မာနိုင်ငံ တောင်ပိုင်းဒေသများကို ပုံမှန်ထက် ၁၅ ရက်လောက် နောက်ကျပြီး မေလ ၂၀ ရက်ခန့်မှာ ဝင်ရောက်နိုင်မယ်လို့ ခန့်မှန်းရပါတယ်။ မြစ်ဝကျွန်းပေါ်ဒေသများကိုတော့ ပုံမှန်ထက် ၁၀ ရက်ခန့် နောက်ကျပြီး မေလ ၂၅ ရက်နေ့ခန့်မှာ ဝင်ရောက်နိုင်မယ်လို့ ခန့်မှန်းရပါတယ်။ မြန်မာနိုင်ငံ အလယ်ပိုင်းဒေသများကိုတော့  မုတ်သုတ်လေ ဝင်ရောက်မှုဟာ သိသာ ထင်ရှားမှု မရှိစေဘဲ မြောက်ပိုင်းဒေသများနဲ့ အတူ ဇွန်လ တစ်ရက်နေ့မှာ ဝင်ရောက်နိုင်တယ်လို့ ခန့်မှန်းရတဲ့အတွက် အလယ်ပိုင်း ဒေသအဖို့လည်း မုတ်သုန်ဝင်ရောက်ရောက်မှုမှာ တစ်ပတ်ခန့် နောက်ကျနိုင်တယ်လို့ ဆိုရမှာ ဖြစ်ပါတယ်။
တစ်ပတ်အတွင်း ခန့်မှန်းချက်
လာမယ့်တစ်ပါတ်အတွက် မိုးလေဝသခန့်မှန်းချက်များ ခန့်မှန်းရမယ်ဆိုရင်ဖြင့် လာမယ့်တစ်ပါတ်အတွင်း ဘင်္ဂလားပင်လယ်အော်မှာ မုန်တိုင်းဖြစ်ဖို့ အလားလာ မရှိနိုင်သေးဘူးလို့ပဲ ခန့်မှန်းရရှိပါတယ်။ ဘင်္ဂလားပင်လယ်အော်မှာ အများအားဖြင့် တိမ် အသင့်တင့် ဖြစ်ထွန်းနိုင်ပြီး မြန်မာကမ်းရိုးတန်းနဲ့ ကမ်းလွန်ပင်လယ်ပြင်မှာလည်း အများအားဖြင့် လှိုင်းအနည်းငယ်သာ ရှိနိုင်ပြီး လှိုင်းအမြင့်က တစ်ပေမှ လေးပေခန့်သာ ရှိနိုင်ပါတယ်။ အထူးသဖြင့် သတိထားဖို့ လိုအပ်တာကတော့ လာမယ့် တစ်ပါတ်အတွင်း မြန်မာနိုင်ငံ တစ်ဝှမ်းမှာ မွန်းလွဲ ညနေပိုင်း အချိန်ကာလမှာ မိုးတိမ်တောင်များ ဖြစ်ပေါ်တတ်ခြင်းပဲ ဖြစ်ပါတယ်။ ဒီလိုမိုးတိမ်တောင်တွေ ဖြစ်ပေါ်တဲ့ အခါမှာ နေရာကွက် မိုးကြီးတာတွေ မိုးသက်လေပြင်း တိုက်ခတ်တာတွေ လျှပ်စီးလက်တာတွေ မိုးခြိမ်းတာတွေ စတာတွေနဲ့ အတူ မိုးကြိုးပစ်ခြင်း မိုးသီးကြွေခြင်း စတာတွေကလည်း မကြာမကြာ ဖြစ်ပေါ်တတ်လေ့ ရှိပါတယ်။ အထူးသဖြင့်မိုးကြိုးပစ်ခြင်း အန္တရာယ်နဲ့ လေပြင်းတိုက်ခတ်ခြင်း အန္တရာယ်ကိုတော့ သတိပြုဖို့ လိုမှာ ဖြစ်ပါတယ်။
နေ့အပူချိန်များ
နေ့အပူချိန်များ အနေနဲ့တော့ လာမယ့် တစ်ပါတ်အတွင်းမှာ စစ်ကိုင်းတိုင်းအောက်ပိုင်း၊ မကွေးတိုင်း၊ ပဲခူးတိုင်း  ဧရာဝတီတိုင်း၊ ရန်ကုန်တိုင်း၊ ကယားပြည်နယ်၊ ကရင်ပြည်နယ်၊ မွန်ပြည်နယ်၊ တနင်္သာရီတိုင်း တို့မှာ နေ့အပူချိန်တွေဟာ ၄၀ ဒီဂရီစင်တီဂရိတ် မှ ၄၅ ဒီဂရီစင်တီဂရိတ်အထိ မြင့်မားနေနိုင်ပါတယ်။ ကျန်ဒေသများမှာတော့ နေ့အပူချိန်တွေဟာ ၃၀ မှ ၄၀ လောက်ထိ မြင့်မားနိုင်ပါတယ်။ ခရမ်းလွန်ရောင်ခြည် အညွှန်းကိန်းအနေနဲ့တော့ မြန်မာနိုင်ငံရဲ့ အရှေ့မြောက် ဒေသများ ဖြစ်တဲ့ ရှမ်းပြည်နယ်မြောက်ပိုင်း  ကချင်ပြည်နယ် စစ်ကိုင်းတိုင်း အထက်ပိုင်းတို့မှာ အလွန်မြင့်မားတဲ့ အဆင့်မှာ ရှိနေနိုင်ပြီး ကျန်ဒေသအားလုံးမှာတော့ ခရမ်းလွန်ရောင်ခြည် အညွှန်းကိန်းအဆင့်ဟာ လွန်ကဲတဲ့အဆင့်ကို ရောက်ရှိနေနိုင်ပါတယ်လို့ ခန့်မှန်းရရှိထားပါကြောင်း တင်ပြအပ်ပါတယ်။ မြန်မာနိုင်ငံသူ နိုင်ငံသားများအားလုံး သဘာဝဘေးအန္တရာယ်များမှ အစဉ်ကင်းဝေးနိုင်ကြပါစေ။

မြန်မာ့စီးပွားရေး ဦးပိုင် လီမီတက် အနေဖြင့် အများနှင့် သက်ဆိုင်သော ကုမ္ပဏီအဖြစ် ပြောင်းလဲ ရပ်တည်ပြီး လုပ်ငန်းများ ဆောင်ရွက်သွားမည်

မြန်မာ့ စီးပွားရေး ဦးပိုင် လီမီတက်မှ ကြေညာချက်အားတွေ့ရစဉ် (ဓာတ်ပုံ-MOI)
    ရန်ကုန်၊ မတ် ၃၁ ရက် (ဆင်ဟွာ)

    မြန်မာ့စီးပွားရေး ဦးပိုင် လီမီတက် အနေဖြင့် “က’’ အစု ရှယ်ယာရှင်များအား “ခ” အစုရှယ်ယာ အဖြစ် လွှဲပြောင်း ပြီးစီးကြောင်း နှင့် မြန်မာ့စီးပွားရေး ဦးပိုင် လီမီတက်အား ၁၉၅၀ ပြည့်နှစ် ၊ အထူးကုမ္ပဏီ အက်ဥပဒေ ဖြင့် ဖွဲ့စည်း တည်ထောင်ခဲ့သည့် ကုမ္ပဏီ မှ ၁၉၁၄ ခုနှစ် ၊ မြန်မာနိုင်ငံ ကုမ္ပဏီများ အက်ဥပဒေအရ အများ နှင့်သက်ဆိုင်သော ကုမ္ပဏီအဖြစ် ပြောင်းလဲရပ်တည်ပြီး လုပ်ငန်းများ ဆောင်ရွက်သွားမည် ဖြစ်ကြောင်း  မြန်မာ့စီးပွားရေး ဦးပိုင် လီမီတက် မှ ကြေညာချက် ထုတ်ပြန်သည်။

မြန်မာ့စီးပွါးရေးဦးပိုင်လီမီတက်ကို ၁၉၉၀ ပြည့်နှစ် ဧပြီ လ ၂၇ ရက်နေ့တွင် အများပိုင်ကုမ္ပဏီအဖြစ် ဖွဲ့စည်းတည်ထောင်ခဲ့ပြီး “က”အစုရှယ်ယာရှင်အဖြစ် ကာကွယ်ရေးဝန်ကြီးဌာန နှင့် ကာကွယ်ရေး ဦးစီးချုပ်ရုံး (ကြည်း)၊ ပစ္စည်းဝယ်ယူမှု ညွှန်ကြားရေးမှူးရုံးတို့မှ ထည့်ဝင်ပြီး “ခ’’ အစုရှယ်ယာရှင်များတွင် စစ်မှုထမ်းများ၊ စစ်မှုထမ်းဟောင်းများ ၊တပ်ရင်း/တပ်ဖွဲ့များ မှ ထည့်ဝင်ခဲ့ကြသည်။

ကုမ္ပဏီကို ဒါရိုက်တာအဖွဲ့ နှင့် အစုရှင်များ၏ သဘောတူညီချက်အရ  “က’’ အစုရှင်၏ အစုရှယ်ယာများ ကို “ခ’’ အစုရှင်သို့ လွှဲပြောင်းခွင့် နှင့် ၁၉၅၀ ပြည့်နှစ်၊ အထူးကုမ္ပဏီအက်ဥပဒေအရ ဖွဲ့စည်းထားသော အထူးကုမ္ပဏီ အဖြစ်မှ ၁၉၁၄ မြန်မာနိုင်ငံ ကုမ္ပဏီများ အက်ဥပဒေအရ ဖွဲ့စည်းထားသော အများနှင့် သက်ဆိုင်သော ကုမ္ပဏီအဖြစ် ပြောင်းလဲခွင့် ကို အမျိုးသား စီမံကိန်းနှင့် စီးပွားရေးဖွံ့ဖြိုး တိုးတက်မှု ဝန်ကြီးဌာနသို့ တင်ပြခဲ့ရာ ဝန်ကြီးဌာနက ၂၀၁၆ ခုနှစ်၊ မတ်လ ၃၀ ရက်နေ့ ရက်စွဲပါ အမိန့်ကြော်ငြာစာ အမှတ် ၉၀/၂၀၁၆ ဖြင့် မြန်မာ့စီးပွားရေး ဦးပိုင်လီမီတက် (Myanmar Economic Holdings Limited ) အား အများ နှင့်သက်ဆိုင်သော ကုမ္ပဏီအဖြစ် ပြောင်းလဲခွင့်ပြုခဲ့ကြောင်း ကြေညာချက်ထဲတွင် ပါရှိသည်။

(Xinhua)

မြန်မာနိုင်ငံတ၀န်း လမ်းတံတားဂိတ်ပေါင်း ၁၆၀ ကျော်တွင် ဂိတ်ကြေးကောက်ခံမှုဖျက်သိမ်း

မြန်မာနိုင်ငံတ၀န်းရှိလမ်း၊တံတား အသုံးပြုခကောက်ခံနေတဲ့ ဂိတ်ပေါင်း ၃၀၀ ကျော်အနက် ဂိတ်ပေါင်း ၁၆၀ကျော်မှာ ဒီကနေ့ ဧပြီလ (၁)ရက်နေ့ကစပြီး ဂိတ်ကြေး ကောက်ခံခြင်းမပြုတော့ဘဲ ဖြေလျော့ပေးသွားမယ်လို့ ဆောက်လုပ်ရေးဝန်ကြီးဌာနက
 ကြေညာပါတယ်။
ဂိတ်ကြေးမကောက်ခံတော့မယ့် နေရာဒေသတွေထဲမှာ စစ်ကိုင်းတိုင်း၊ မကွေးတိုင်း၊ ဧရာဝတီတိုင်းဒေသကြီး၊ ရှမ်းပြည်နယ်နဲ့ ရခိုင်ပြည်နယ် အတွင်းက လမ်းတံတား ဂိတ်တွေ က အရေ အတွက် အများစုပါဝင်ပါတယ်။
အစိုးရသစ်တက်လာပြီးရက်ပိုင်းအတွင်း ခုလို ဆောက်လုပ်ရေးဝန်ကြီးဌာနက  ဂိတ်ကြေးကောက်ခံမှုတွေကို ရုပ်သိမ်းလိုက်တာဖြစ်ပါတယ်။
ဆောက်လုပ်ရေးဝန်ကြီးဌာန ပြည်ထောင်စုဝန်ကြီးသစ် ဦးဝင်းခိုင်ကတော့  မနေ့က ဌာနတာဝန်ရှိသူတွေနဲ့ တွေ့ဆုံရာမှာ   ပြည်သူကို အခြေပြုဦးစားပေးတဲ့လုပ်ငန်းတွေကို အရည်အသွေးရှိရှိလုပ်ကိုင်ဖို့၊  လမ်းတံတား ကဏ္ဍတိုးမြှင့်အောင်ဆောင်ရွက်ဖို့၊ ပြည်သူတွေအတွက် အိမ်ရာလိုအပ်တွေဖြည့်ဆည်းပေးဖို့နဲ့ စီမံကိန်း ဂရံကိစ္စတွေ မူဝါဒချမှတ်ပြီး ပွင့်လင်းမြင်သာမှုရှိစွာ ကြေညာဆောင်ရွက်ဖို့ စတာတွေ တိုက်တွန်းခဲ့တယ်လို့  ၀န်ကြီးဌာန လူမှုကွန်ရက်မှာဖော်ပြပါတယ်။

(ဓာတ်ပုံ – Ministry of Construction)

နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာ ဥပဒေမူကြမ်း အမျိုးသားလွှတ်တော်အတည်ပြု

ဒေါ်အောင်ဆန်းစုကြည်ကို နိုင်ငံတော် အတိုင်ပင်ခံ ပုဂ္ဂိုလ်အဖြစ် တာဝန်ပေးအပ်ဖို့ ရည်ရွယ်တဲ့  နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာ ဥပဒေမူကြမ်းကို ဒီကနေ့ ဧပြီ ၁ ရက်နေ့ အမျိုးသားလွှတ်တော်မှာ တပ်မတော်သားအမတ်တွေက  အပြင်းအထန် ဆန့်ကျင်ကန့်ကွက်နေတဲ့ကြားက မဲခွဲဆုံးဖြတ် အတည်ပြုလိုက်ပါတယ်။
ဒီဥပဒေမူကြမ်းကို အတည်ပြုပေးဖို့ အမျိုးသားလွှတ်တော် ဥပဒေကြမ်း ကော်မတီဝင် ဦးအောင်ကြည်ညွန့်က လွှတ်တော်မှာ အဆိုတင်သွင်းပြီး  တပ်မတော်သားအမတ်က ကန့်ကွက်တဲ့အတွက် မဲခွဲဆုံးဖြတ်ရာမှာ ထောက်ခံမဲ ၁၃၇ မဲ ကန့်ကွက်မဲ ၇၀ ကြားနေမဲ ၂ မဲနဲ့  အဆိုကို အတည်ပြုလိုက်တာဖြစ်ပါတယ်။
DVB

ထားဝယ်တိုင်းရင်းသားများပါတီမှ ဝမ်းမြောက်ဂုဏ်ယူကြောင်းသဝဏ်လွှာထုတ်ပြန်

                        ၀မ်းမြောက်ဂုဏ်ယူကြောင်း သဝဏ်လွှာ
၂၀၁၅ အထွေထွေရွေးကောက်ပွဲတွင် မဲဆန္ဒရှင်ပြည်သူများ၏ တခဲနက်ထောက်ခံမှုဖြင့် အနိုင်ရခဲ့သောအမျိုးသားဒီမိုကရေစီအဖွဲ့ချုပ် (NLD) က ဦးဆောင်ဖွဲ့စည်းခဲ့သော ပြည်ထောင်စုလွှတ်တော်၊ ပြည်ထောင်စုအစိုးရအဖွဲ့၊ တိုင်းဒေသကြီး နှင့် ပြည်နယ် လွှတ်တော်များ၊ တိုင်းဒေသကြီးနှင့် ပြည်နယ် အစိုးရအဖွဲ့များ စတင်အသက်ဝင် အလုပ်လုပ်ကိုင်လာနိုင်ခြင်းအတွက် များစွာ ဂုဏ်ယူဝမ်းမြောက်ပါကြောင်း ထားဝယ်တိုင်းရင်းသားများပါတီက ထုတ်ပြန်အပ်ပါသည်။

အမျိုးသားလွှတ်တော် ဥက္ကဋ္ဌ အဖြစ် ရွေးချယ်ခံရသော မန်းဝင်းခိုင်သန်း၊ ပြည်သူ့လွှတ်တော် ဥက္ကဋ္ဌ အဖြစ် ရွေးချယ်ခံရသော ဦးဝင်းမြင့်၊ တနင်္သာရီတိုင်းဒေသကြီးလွှတ်တော် ဥက္ကဋ္ဌ အဖြစ် ရွေးချယ်ခံရသောဦးခင်မောင်အေးတို့အတွက်လည်း ၀မ်းမြောက်ဂုဏ်ယူကြောင်း ထုတ်ဖော်လိုပြီး နိုင်ငံသူ၊ နိုင်ငံသားများ၏ အကျိုးကိုဆထက်တပိုးထမ်းဆောင်နိုင်ပါစေကြောင်းဆုတောင်းအပ်ပါသည်။
ယင်းအပြင် ပြည်ထောင်စု မြန်မာနိုင်ငံတော် သမ္မတအဖြစ် ရွေးချယ်ခံရသောဦးထင်ကျော်၊ တနင်္သာရီတိုင်းဒေသကြီး ၀န်ကြီးချုပ်အဖြစ် ရွေးချယ်ခံရသောဒေါက်တာလဲ့လဲ့မော်တို့ အတွက်လည်း အထူးဝမ်းမြောက်ပြီးတိုင်းရင်းသားများ၏ အရေးကိုရှေ့ရှုသောဖက်ဒရယ် ဒီမိုကရေစီ နိုင်ငံတော်ကြီးတည်ဆောက်ရေးစွမ်းဆောင်နိုင်ပါစေကြောင်းဆုတောင်းလိုက်ပါသည်။
ထားဝယ်တိုင်းရင်းသားများပါတီအနေနှင့်လည်းအရွေးချယ်ခံအစိုးရ၊ လွှတ်တော် အသီးသီးအပါအ၀င် မိတ်ဖက်တိုင်းရင်းသားအင်အားစုများ၊ ဒီမိုကရေစီအင်အားစုများ ၊ အရပ်ဘက်အဖွဲ့အစည်းများနှင့် လိုအပ်သလိုပူးပေါင်းဆောင်ရွက်ကာ ပြည်သူများလိုလားတောင့်တနေသော ၀ပြောချမ်းသာသည့် ဖက်ဒရယ် ဒီမိုကရေစီနိုင်ငံပေါ်ထွန်းလာရေးဆက်လက်ကြိုးပမ်းသွားမည်ဖြစ်ကြောင်းလေးစားစွာထုတ်ပြန်အပ်ပါသည်။

ထားဝယ်တိုင်းရင်းသားများပါတီ
ထားဝယ်မြို့။

မန္တလေးအစိုးရအဖွဲ့ တာဝန်လွှဲပြောင်းရေး အဆင်မပြေ

မန္တလေးတိုင်းဝန်ကြီးချုပ်အသစ် ဒေါက်တာ ဇော်မြင့်မောင် ကို တွေ့ရစဉ်။ Photo: Hset Paing Toe/RFA

ဝန်ကြီးချုပ်ဟောင်း ဦးရဲမြင့် ဦးဆောင်တဲ့ မန္တလေးတိုင်းဒေသကြီး အစိုးရအဖွဲ့က မနေ့က တာဝန်လွှဲပြောင်းပေးဖို့ ရှိရာမှာ ဝန်ကြီးချုပ်အသစ် ဒေါက်တာ ဇော်မြင့်မောင်ကို တာဝန်လွှဲပြောင်းပေးတာ မလုပ်ခဲ့ဘူး လို့ ဒေါက်တာ ဇော်မြင့်မောင်က ပြောပါတယ်။

ဒီကနေ့ မန္တလေးတိုင်းဝန်ကြီးချုပ်အဖြစ် တိုင်းလွှတ်တော်မှာ ကတိသစ္စာပြုပြီးမှာ ဝန်ကြီးချုပ်ဒေါက် တာ ဇော်မြင့်မောင် က ပြောတာဖြစ်ပါတယ်။

"မနက်ဒီ မှာ ၉ နာရီ ကျနော်လာထိုင်တယ်၊ အလုပ်ရှိတယ်၊ အဲ့ဒီအချိန်မှာ ဘယ်လိုလဲ အလွှဲအပြောင်း ရှိတယ်ဆိုတာ ဝန်ကြီးချုပ်မရှိဘူးတဲ့၊ လာမှမဟုတ်ဘူး၊ အလွှဲအပြောင်းမရှိဘူးလို့ ပြောတာ တိုင်းဒေသ ကြီးအဖွဲ့ဝင် အတွင်းရေးမှူး၊ အဲ့ဒါနဲ့ကျနော်တို့ငြိမ်နေတယ်၊ ပြီးတော့ သတင်းဘာထွက်လာသလဲဆိုတော့ ကျနော်တို့ မလာဘူးဆိုတာကိုပြောတယ်၊ အဲ့ဒါမှားတယ်၊ ကျနော်တို့ထိုင်စောင့်နေတယ်၊ အလွှဲအပြောင်း ရှိတယ်ဆိုပြီး ကျနော့်ဆီကို တရားဝင်စာပို့ရင်ပို့ မပို့ရင် ကျနော့်ကို ဖုန်းဆက်ပြီး ပြောလို့ရှိရင်ရတယ်၊ ကျနော်ဒီမှာရှိနေတာ၊ ဒါပေမဲ့ မပြောဘူး၊ အဲ့ဒါကြောင့် အလွှဲအပြောင်းပြီးတဲ့အခါ မနေ့က မနက်ပိုင်းကို လာတယ်၊ ကျနော်တို့ အစည်းအဝေးပြီးတဲ့အချိန် တိုင်းဒေသကြီးအစိုးရအဖွဲ့ အတွင်းရေးမှူး ဦးဝင်းရှိန် လွှဲပြောင်းပြီးသွားပါပြီတဲ့ လာပြီးပြောတယ်၊ အဲ့တော့ ကျနော်သွားပြီးတော့ ရုံးထိုင်တယ်"

မနေ့က ဒေါက်တာဇော်မြင့်မောင်ဟာ မန္တလေးတိုင်း အစိုးရအဖွဲ့ရုံးကို ရောက်ရှိချိန်မှာ နိုင်ငံတော်သမ္မတရုံးက ညွှန်ကြားထားတာ မရှိတဲ့အတွက် တာဝန်လွှဲပြောင်းရေး အခမ်းအနား မရှိဘူးလို့ အစိုးရအဖွဲ့အတွင်းရေးမှူး က ပြောတယ်လို့ ဒေါက်တာ ဇော်မြင့်မောင်က ပြောပါတယ်။

ဒေါက်တာဇော်မြင့်မောင်က ဒီကနေ့ ကတိသစ္စာပြုရာမှာ သူ့အစိုးရအဖွဲ့ကို လွှတ်တော်ကလည်း ထိန်းကျောင်းပေး ဖို့ ပြောခဲ့ပါတယ်။

အလားတူ ရန်ကုန်၊ မန္တလေး၊ ကချင် နဲ့ မွန်ပြည်နယ် လွှတ်တော်တွေမှာလည်း သက်ဆိုင်ရာ အစိုးရအဖွဲ့ ဝန်ကြီးချုပ်တွေ ကတိသစ္စာပြုခဲ့ကြပါတယ်။

တိုင်းဒေသကြီးနဲ့ ပြည်နယ်ဝန်ကြီးချုပ်တွေဟာ ဝန်ကြီးဌာနအရေအတွက်နဲ့ ဝန်ကြီးအမည်စာရင်းတွေကို မကြာမီရက်ပိုင်းအတွင်း သက်ဆိုင်ရာလွှတ်တော်တွေမှာ တင်ပြကြရမှာပါ။

မနေ့က ရခိုင်ပြည်နယ် ဝန်ကြီးချုပ်အဖြစ် အတည်ပြုပြီးဖြစ်တဲ့ ဦးညီပုဟာ မနက် ဖြန်ကျင်းပမယ့် လွှတ်တော်မှာ ကတိသစ္စာပြုမှာ ဖြစ်ပါတယ်။

RFA Burmese

တိုင်းရင်းသားရေးရာဝန်ကြီး ခန့်အပ်ခံရမှု ပါတီအပေါ် သက်ရောက်မှုမရှိဟု မွန်အမျိုးသားပါတီထုတ်ပြန်

Dawei Watch| မော်လမြိုင်၊ မတ် ၃၁

ပြည်ထောင်စု အစိုးရအဖွဲ့ဝင် တိုင်းရင်းသားရေးရာဝန်ကြီးဌာန ပြည်ထောင်သု ဝန်ကြီးအဖြစ် မွန်အမျိုးသားပါတီမှ ဒု-ဥက္ကဋ္ဌ (၁) နိုင်သက်လွင်ကို ခန့်အပ်လိုက်သည့်အပေါ် ပါတီတွင်း တစုံတရာ သက်ရောက်မှုမရှိကြောင်း မွန်အမျိုးသားပါတီ (MNP) က ထုတ်ပြန်ကြေညာလိုက်သည်။

ပါတီကို အသိပေးခြင်းမရှိဘဲ နိုင်သက်လွင်အား တိုင်းရင်းသားရေးရာဝန်ကြီးအဖြစ် ခန့်အပ်လိုက်ခြင်းသည် မွန်အချင်းချင်းများအကြား သွေးကွဲအောင် လုပ်ဆောင်ခြင်းဖြစ်သည်ဟု မွန်ပြည်သူလူထုများကြား ဝေဖန်မှုများ ထွက်ပေါ်နေသည့်အပေါ် တုန့်ပြန်သည့်သဘောဖြင့် MNP ပါတီက ယခုကဲ့သို့ ကြေညာချက် ထုတ်ပြန်လိုက်ခြင်းဖြစ်သည်။

တိုင်းရင်းသားနိုင်ငံရေး လုပ်ကိုင်နေသော အဖွဲ့အစည်းတစ်ခုမှ ခေါင်းဆောင်ကို တိုင်းရင်းသားရေးရာ ၀န်ကြီးဌာန ပြည်ထောင်စု ၀န်ကြီးအဖြစ် ခန့်အပ်ခြင်းအတွက် လုပ်သင့်လုပ်ထိုက်သော အလုပ်ဖြစ်သည်ဟု ထင်မြင်ကြောင်း မွန်အမျိုးသားပါတီ အထွေထွေအတွင်းရေးမှူး (၂) နိုင်စိုးမြင့် က ပြောသည်။

“ဒီအပေါ်မှာ တချို့သော ဝေဖန်ရေးသမားတွေရှိတော့ မွန်တွေ ကွဲမယ်ဆိုတာ ဒီအတွက်ကြောင့် ကျနော်တို့ ပါတီမှာကွဲဖို့ဆိုတာ အကြောင်းမရှိဘူး” ဟု ၎င်းက ပြောသည်။

NLD အနေဖြင့် မွန်အမျိုးသားပါတီ ဒု-ဥက္ကဋ္ဌ ကို တိုင်းရင်းသားရေးရာဝန်ကြီးအဖြစ် ခန့်အပ်မည်ဆိုသည်ကို ပါတီသို့ တရားဝင်အကြောင်းကြားထားခြင်းမရှိကြောင်း ခန့်အပ်မည့်သူကိုသာ ခေါ်ယူဆွေးနွေး မေးမြန်းပြီး ခန့်အပ်လိုက်ခြင်းဖြစ်ကြောင်း ၄င်းက ပြောသည်။

မွန်အမျိုးသားပါတီ၏ သဘောထားဆန္ဒရယူခြင်းမရှိဘဲ NLD မှ မွန်အမျိုးသားပါတီ၏ ဒုဥက္ကဋ္ဌ (၁) ကို ပြည်ထောင်စု တိုင်းရင်းသားရေးရာဝန်ကြီးအဖြစ် ခန့်အပ်ထားခြင်းသည် မဖြစ်သင့်ကြောင်း ပါတီ ဒုဥက္ကဋ္ဌ (၂) ဖြစ်သည့် နိုင်ငွေသိန်းက ပြောသည်။

အဆိုပါအကြောင်းအရာနှင့် ပတ်သက်ပြီး ပါတီထိပ်ပိုင်းခေါင်းဆောင်အချို့တို့က လက်မခံနိုင်သည့်အနေအထားရှိနေပြီး ပါတီတွင်း သဘောထားကွဲလွဲမှုများ ရှိနေသည်ဟု ပါတီခေါင်းဆောင်အချို့ထံမှ သိရသည်။

မွန်နိုင်ငံရေးကိုအနီးကပ်စောင့်ကြည့်နေသည့် မင်းမင်းနွယ်က “အဖွဲ့ချုပ်​က အခု တိုင်းရင်းသားတွေကိုတိုင်းရင်းသားရေးရာဝန်ကြီးပေးတာဟာ အနှစ်မပါတဲ့ နေရာပေးမှုလို့ပဲ မြင်ပါတယ်၊ ဘာကြောင့်လဲဆိုတော့ မည်သည့်တိုင်းရင်းသားပါတီကိုမှ သူတို့က မူဝါဒအရ ညှိနှိုင်းမှုမရှိဘဲနဲ့ သြဇာရှိတဲ့ ပါတီခေါင်းဆောင်တွေကို ဆွဲထုတ်ခန့်အပ်လိုက်ခြင်းအားဖြင့် ပါတီများအတွင်း အကွဲအပြဲဖြစ်ပေါ်စေပြီးတော့ ပါတီ အားနဲချည့်နဲ့သွားအောင် ဘော်လစီအရ သူတို့ ရွေးချယ် လုပ်ဆောင်နေတယ်လို့ပဲ မြင်ပါတယ်” ဟု သုံးသပ်ပြောကြားသည်။

မွန်အမျိုးသားပါတီ၏ ထုတ်ပြန်ချက်တွင် သမ္မတဦးထင်ကျော် ဦးဆောင်သော အစိုးရအဖွဲ့သည် ပြည်သူ့ကိုယ်စားပြု အစိုးရတစ်ရပ်ဖြစ်သောကြောင့် မွန်အမျိုးသားပါတီအနေဖြင့် အပြုသဘောဆောင်စွာ ကြိုဆိုကြောင်းလည်း ပါရှိသည်။

တိုင်းရင်းသားရေးရာဝန်ကြီးဌာနသည် သမ္မတဦးထင်ကျော်ဦးဆောင်သည့် အစိုးရလက်ထက်တွင် ပေါ်ပေါက်လာသည့် ဝန်ကြီးဌာနအသစ်တစ်ခု ဖြစ်ပြီး ယင်းနေရာအတွက် ရှမ်းအမျိုးသားဒီမိုကရေစီ အဖွဲ့ချုပ်မှ အထွေထွေအတွင်းရေးမှူး ဦးစိုင်းညွန့်လွင်ကို ကနဦးကမ်းလှမ်းခဲ့ကြောင်း သတင်းများထွက်ပေါ်ခဲ့သည်။

အမျိုးသားဒီမိုကရေစီ အဖွဲ့ချုပ်သည် အမျိုးသားပြန်လည်သင့်မြတ်ရေး အစိုးရ ဖွဲ့စည်းရန် အခြားပါတီများမှ ခေါင်းဆောင်များကို အစိုးရအဖွဲ့ဝင်နေရာများ၊ လွှတ်တော်အကြီးအကဲနေရာများ ခန့်အပ်ရာတွင် သက်ဆိုင်ရာ ပါတီများကို အသိပေးခြင်းမရှိသည့်အတွက် ဝေဖန်မှုများရှိနေသည်။

UNA ခေါ် စည်းလုံးညီညွတ်သော တိုင်းရင်းသား လူမျိုးစုများမဟာမိတ်အဖွဲ့၏ အဖွဲ့ဝင်ဖြစ်သည့် မွန်အမျိုးသားပါတီသည် ၂၀၁၅ အထွေထွေရွေးကောက်ပွဲတွင် လွှတ်တော်ကိုယ်စားလှယ် ၃ ဦး အနိုင်ရရှိထားသည့်ပါတီဖြစ်သည်။

Dawei Watch

အလုပ်သမား သေဆုံးခဲ့သော ထားဝယ်ရှိ အအေးခန်းစက်ရုံ အလုပ်ရှင် အလုပ်သမား စာချုပ်အသစ် ပြန်ချုပ်မည်

Dawei Watch| ထားဝယ်၊ မတ် ၃၁

ရဲတပ်ဖွဲ့ဝင်၏ ရိုက်နှက်မှုကြောင့် အလုပ်သမားသေဆုံးခဲ့သည့် ထားဝယ်မြို့ရှိ ငါးအအေးခန်းစက်ရုံတွင် အလုပ်ရှင်အလုပ်သမားသဘောတူစာချုပ်ကို မကြာမီ ပြန်လည်ချုပ်ဆိုမည်ဖြစ်ကြောင်း ထားဝယ်မြို့နယ်၊ အလုပ်သမားညွှန်ကြားမှုဦးစီးဌာနထံမှ သိရသည်။

ပြီးခဲ့သည့်မတ်လ ၇ ရက်နေ့က ရဲတပ်ဖွဲ့ဝင်၏ ရိုက်နှက်မှုကြောင့် သေဆုံးခဲ့သည့်ဖြစ်စဉ်အပြီး နောက်တစ်နေ့ မတ်လ ၈ ရက်နေ့တွင် အလုပ်သမားများက အနိမ့်ဆုံးလုပ်ခလစာမရရှိခြင်း၊ အလုပ်နားရက်မရှိခြင်းနှင့် အချိန်ပိုကြေးမရခြင်းတို့ကို သက်ဆိုင်ရာ အလုပ်သမားရုံးသို့ တိုင်ကြားခဲ့ပြီးနောက် ထိုသို့ စာချုပ်ချုပ်ဆိုရန် စီစဉ်လာခြင်း ဖြစ်သည်။

မတ်လ ၁၃ ရက်နေ့တွင် သွားရောက်စစ်ဆေးခဲ့ချိန်တွင် အလုပ်သမားဥပဒေအတိုင်းဆောင်ရွက်မှု အားနည်းနေသည်ကို တွေ့ရှိခဲ့ရသည့်အတွက် အလုပ်ရှင်၊ အလုပ်သမား သဘောတူစာချုပ်(EC စာချုပ်) ကို ပြန်လည်ချုပ်ဆိုရန်ညွှန်ကြားထားကြောင်း မြို့နယ် အလုပ်သမားညွှန်ကြားမှုဦးစီးဌာနမှ မြို့နယ်ဦးစီးမှူး ဦးသန်းဦးက ပြောသည်။

“ဥပဒေနဲ့အညီ လုပ်ဆောင်သွားဖို့ပြောထားတယ်”ဟု မြို့နယ်ဦးစီးမှူး ဦးသန်းဦး ကပြောသည်။

ယင်းသဘောတူစာချုပ်အား စက်ရုံပိုင်ရှင်၏ တောင်းဆိုချက်အရ လာမည့် သင်္ကြန်ကာလအပြီးတွင် ချုပ်ဆိုပေးမည်ဖြစ်ကြောင်း ၎င်းက ဆိုသည်။

“အလုပ်သမားတွေရဲ့ တောင်းဆိုချက်တွေကို လိုက်လျောပေးမယ်ဆိုတော့ ကျေနပ်တယ်”  ဟု ယင်းစက်ရုံမှ အလုပ်သမားတစ်ဦးဖြစ်သူ ကိုမျိုးဇော်အောင် ကပြောသည်။

သင်္ကြန်ကာလအတွင်း အိမ်ပြန်မည့်အလုပ်သမားများရှိပြီး အသစ်လုပ်မည့်သူများရှိသောကြောင့် သင်္ကြန်ပြီးမှသာ အလုပ်ရှင်/အလုပ်သမားသဘောတူစာချုပ် ချုပ်ဆိုနိုင်လိမ့်မည်ဖြစ်ကြောင်း ဟိုင်ယွမ် ငါးအအေးခန်းစက်ရုံမှ မန်နေဂျာ ဦးအောင်စိုးနိုင် ကဆိုသည်။

“အခြေခံလစာကတော့ စာချုပ် ချုပ်တဲ့အချိန်ကျမှ အလုပ်သမားခေါင်းဆောင်တွေနဲ့ ညှိနှိုင်းသွားမယ်” ဟု ၎င်းကပြောသည်။

၂၀၁၅ ဒီဇင်ဘာလမှ ၂၀၁၆ မတ်လ အထိ လေးလအတွက် အချိန်ပိုကြေးများကို တစ်လလျှင် နာရီ ၄၀ နှုန်းဖြင့် ဈေးနှုန်းအား အလုပ်သမားခေါင်းဆောင်များနှင့်ညှိနှိုင်းကာ သင်္ကြန်မတိုင်မီ ပြန်လည်ပေးအပ်သွားမည်ဟု ဦးအောင်စိုးနိုင် ကဆိုသည်။

အဆိုပါစက်ရုံမှာ မတ်လ ၇ ရက်နေ့ ညပိုင်းတွင် အလုပ်ရှင်နှင့် အလုပ်သမား အချို့ စကားများရန်ဖြစ်ကြသည့်အပေါ် ရပ်ကွက်တာဝန်ရှိသူများမှ အကူအညီတောင်းခံသဖြင့် ရဲတပ်ဖွဲ့မှ လာရောက်ကာ ၀င်ရောက်ဖြန်ဖြေစဉ် ရုန်းရင်းဆန်ခတ်ဖြစ်ပွားခဲ့ပြီး ယင်းစက်ရုံမှ အလုပ်သမားတစ်ဦးမှာ ရဲတပ်ဖွဲ့ဝင်တစ်ဦး၏ ရိုက်နှုက်မှုကြောင့် သေဆုံးသွားခဲ့သည်။

ယင်းသို့သေဆုံးရခြင်းကြောင့် တိုင်းဒေသကြီး ရဲတပ်ဖွဲ့မှူး ရဲမှူးကြီး နေမျိုးက တောင်းပန်ထားသည်။

Dawei Watch

ဘာသာရေးအစွန်းရောက် အဖွဲ့မှ ကာ့ဒ်တပ်ဖွဲ့ဝင် သုံးဦးကို လမ်းလယ်ခေါင်တွင် ခေါင်းဖြတ်သတ်

ဘဂ္ဂဒက် ၊ ၃၁-၃-၂၀၁၆

အီရတ်နိုင်ငံ၏ လူသွားလူလာ များပြားလှသည့် လမ်းတစ်ခုပေါ်တွင် ယမန်နေ့ နေ့လယ်ပိုင်းက ကာ့ဒ်တပ်ဖွဲ့ဝင် သုံးဦးကို ဘာသာရေး အစွန်းရောက် အဖွဲ့ဖြစ်သည့် ဒက်ရှ် အဖွဲ့က ခေါင်းဖြတ် သတ်ပြသည့် ဗီဒီယိုဖိုင် တစ်ခုကို အစ္စလာမ္မစ်နိုင်ငံ တစ်နိုင်ငံက ထုတ်လွှင့်ပြသ ခဲ့ကြောင်း Express သတင်းဌာနက ဖော်ပြခဲ့သည်။

၎င်း ဗီဒီယိုဖိုင်သည် ခြောက်မိနစ် ကြာပြီး ဘာသာရေး အစွန်းရောက် ဝါဒီတစ်ဦးက ကာ့ဒ်တပ်ဖွဲ့ဝင် သုံးဦးကို အီရတ်နိုင်ငံရှိ လမ်းတစ်ခုပေါ်တွင် လိမ္မော်ရောင် ဝတ်စုံ ဝတ်ဆင်ထားသည့် ဒက်ရှ် အဖွဲ့ဝင် ဘာသာရေး အစွန်းရောက် တစ်ဦးက ဓားကို ဝှေ့ရမ်းပြလျက် ရက်စက်စွာ ခေါင်းဖြတ် သတ်ခဲ့ခြင်းဖြစ်ပြီး ခေါင်းများကို လူသေ အလောင်းများ ပေါ်တွင်တင်ကာ ပြသခဲ့ခြင်း ဖြစ်သည်။

အီရတ် သတင်းမီဒီယာ များ၏ ဖော်ပြချက်အရ ကာ့ဒ်တပ်ဖွဲ့ဝင် သုံးဦးကို ရက်စက် ကြမ်းကြုတ်စွာ ခေါင်းဖြတ် သတ်ပြခဲ့သော ဘာသာရေး အစွန်းရောက် ဝါဒီသမားသည် အီရန်နိုင်ငံသား တစ်ဦး ဖြစ်ကြောင်း နှင့် ၄င်းက ဗီဒီယိုဖိုင်တွင် ''သင် အစ္စလာမ္မစ်နိုင်ငံ ကို ချုပ်ကိုင်နိုင်ခြင်း မပြုနိုင်'' ဟု ကင်မရာကို ကြည့်၍ ပြောခဲ့ကြောင်း သိရသည်။

အဆိုပါ ဗီဒီယိုဖိုင်သည် ဒက်ရှ် နှင့် ကာ့ဒ် တပ်ဖွဲ့ဝင်များ အကြား စစ်ရေး တိုက်ခိုက်ခြင်း အခြေအနေကို ပြသခြင်းဖြစ်သည့် အပြင် ကာ့ဒ်ဒေသ ဆိုင်ရာ အစိုးရအဖွဲ့ (KRG) သမ္မတ မာ ဆော့ဒ်ဗာဇာနီ နှင့် ဝန်ကြီးချုပ် နက်ခ်ချာဗန် ဗာဇာနီ တို့ကိုလည်း ခြိမ်းခြောက်ခြင်း ဖြစ်သည်။ ကာ့ဒ်တပ်ဖွဲ့ များသည် ISIS အဖွဲ့များ ချုပ်ကိုင်ထားသော မိုဆူလ်မြို့ကို ပြန်လည်ရယူရန် အီရတ်စစ်ဘက်၊ အမေရိကန် တို့နှင့် ပူးပေါင်းထား ပြီးဖြစ်သည်။

ယင်း ရက်စက် ကြမ်းကြုတ် သော ဗီဒီယိုဖိုင်သည် ရုရှား အထူးတပ်ဖွဲ့ များမှ အရာရှိတစ်ဦးက လေကြောင်းဖြင့် ISIS အစွန်းရောက် အဖွဲ့များကို တိုက်ခိုက်ရန် တောင်းဆိုပြီး နောက် ထွက်ပေါ် လာခဲ့ခြင်း ဖြစ်ကြောင်း သိရသည်။

PyiChitThar

ဧရာဝတီမြစ်ရေ ရုတ်တရက်မြင့် တက်လာနိုင်ဟု သတိပေးထား

မိုးလေ၀သနဲ့ ဇလဗေဒဌာနက ဧရာဝတီမြစ်ရေဟာ မြန်မာနိုင်ငံအထက်ပိုင်း ကချင်ပြည်နယ်၊ စစ်ကိုင်းတိုင်းနဲ့မန္တလေးတိုင်းဒေသကြီးတွေမှာရုတ်တရက် မြင့်တက်လာနိုင်တယ်လို့ အောက်ပါအတိုင်း သတိပေးထုတ်ပြန်လိုက်ပါတယ်။

၂၀၁၆ခုနှစ်၊ မတ်လ (၃၁) ရက်၊ (၁၃း၀၀) နာရီအချိန် ထုတ်ပြန်ချက်ကို အောက်ပါအတိုင်း ထုတ်ပြန်ထားပါတယ်...

ဧရာဝတီမြစ်ရေသည် ၂၀၁၆ခုနှစ်၊ မတ်လ (၃၀)ရက်နေ့တွင် မြစ်ကြီးနား မြို့(၁၈)နာရီအတွင်း (၆)ပေခွဲခန့် မြင့်တက်ခဲ့ပြီး (၃၁.၃.၂၀၁၆)ရက်နေ့ (၁၂း၃၀)အချိန်တိုင်းထွာချက်အရ(၂-ပေခန့်) ပြန်လည်ကျဆင်းခဲ့ပြီး ဖြစ်ပါသည်။

အဆိုပါမြစ်ရေသည်ဗန်းမော်မြို့တွင်(၁)ရက်အတွင်း(၂)ပေခန့် မြင့်တက်ခဲ့သည်ကိုတွေ့ရှိရပါသည်။

ဧရာဝတီမြစ်အထက်ပိုင်းတွင် မြင့်တက်ခဲ့သော မြစ်ရေများသည် နောက်(၁) ရက်မှ (၂)ရက် အတွင်း ဗန်းမော်မြို့နှင့် ကသာမြို့တို့တွင် (၂)ပေမှ (၅) ပေခန့်၊ နောက် (၃)ရက်မှ (၆) ရက်အတွင်း မန္တလေးမြို့၊ စစ်ကိုင်းမြို့၊ မြင်းမူမြို့၊ ပခုက္ကူ မြို့နှင့် ညောင်ဦးမြို့တို့တွင် (၂)ပေခွဲမှ (၃)ပေခွဲခန့် လက်ရှိရေမှတ်များ အထက် မြင့်တက်လာနိုင်ပါသည်။

သို့ဖြစ်ပါ၍ မြစ်ကြောင်းများအတွင်း သွားလာနေကြမည့် ရေယာဉ်၊ လှေ၊ သင်္ဘော များအနေ ဖြင့် ဂရုပြုသင့်ပါကြောင်းနှင့် မြစ်ရေနည်းစဉ် သဲသောင်ခုံများတွင်စိုက်ပျိုးနေထိုင်ကြသူများအနေဖြင့်လည်း မြစ်ရေရုတ်တရက် တိုးလာ နိုင်မှုကို ဂရုပြုနေထိုင်သင့်ပါကြောင်း အကြံပြုအပ်ပါသည်။

News Watch(စောင့်ကြည့်သတင်းဂျာနယ်)

ထွက်တော်မူ နန်းကခွာသလား၊ အောင်စေပိုင်စေလား

မတ်လ ၃၀ ရက်နေ့ ကြံ့ခိုင်ဖွံ့ဖြိုးရေးအစိုးရဟောင်းနှင့် NLD အစိုးရသစ်တို့ အာဏာလွှဲပြောင်း အခမ်းအနား ကျင်းပကြောင်းကို စကိုင်းနက် ရုပ်သံအစီအစဉ်မှာ ပြသည်။ သမ္မတအိမ်တော်မှာ သမ္မတဟောင်းက သမ္မတ သစ်ကို အာဏာလွှဲပြောင်းမည့် အစီအစဉ်မှာတော့ နောက်ခံတီးလုံးကလည်း တီးထားတော့ ရှေးသီချင်းတပုဒ်၊ နှစ်ပုဒ်ကိုသွားသတိရမိသည်။ တပုဒ်ကတော့ ထိုအထဲကစာသားကို လူအများ မကြာခဏအသုံးပြုနေကြသည့် ယသော်ဓရာပတ်ပျိုး ဖြစ်သည်။ သိဒ္ဓတ္ထမင်းသား တောထွက်ခန်းကို သီဆိုထားသော ပတ်ပျိုးဖြစ်သည်။

''ထွက်တော်မူ . . . နန်းကခွာတယ် . . . မောင် ဖုန်းပျောက်တယ် . . . ဆောင်အုန်းဗွေမြင့်လယ်'' ဆိုသော သီချင်းဖြစ်သည်။ မတ်လ ၃၀ ရက်နေ့က သမ္မတအိမ်တော်တွင် ယခင်အစိုးရအဖွဲ့ဝန်ကြီးဟောင်းများက တဖက်၊ ယခုအသစ်တက်လာမည့် အစိုးရသစ်မှ ၀န်ကြီးများက တဖက်ထိုင်နေကြပါ သည်။ သမ္မတဟောင်း၊ ၀န်ကြီးဟောင်းများအတွက်ကတော့ ယသော်ဓရာပတ်ပျိုးထဲကလို ''ထွက်တော်မူ နန်းကခွာတယ်''ဆိုသော အခမ်းအနား ဖြစ်သည်။ စကိုင်းနက်ရုပ်မြင်အစီအစဉ်က နောက်ခံတီးလုံးကလည်း အလွမ်းသယ်နေသည့် တီးလုံးသံဖြစ်သည်။ ၀န်ကြီးသစ်နှင့် ၀န်ကြီးဟောင်းများတဖက်စီ ထိုင်နေကြစဉ် သမ္မတဟောင်း ဦးသိန်းစိန်နှင့် သမ္မတသစ် ဦးထင်ကျော်တို့ ထွက်အလာကို အချိန်အတော်ကြာစောင့်စားနေကြရသည်မှာ ဇာတ်အဖွဲ့ထဲမှာ နောက်ပိုင်း အဓိကဇာတ်မင်းသားထွက်အလာကို မျှော်ရသလို ဖြစ်နေပါသည်။

''ဘာဖြစ်လို့ ဒီလောက်ကြာနေတာလဲ၊ ဦးသိန်းစိန် ဘာအ၀တ်တွေ လဲနေတာလဲ၊ ဒါမှမဟုတ် ၀မ်းနည်းနေ လို့လား''စသဖြင့် ပရိသတ်ထံမှ ကြားနေရသည်။ ထိုင်နေကြသည့်အချိန်မှာ အစိုးရအဖွဲ့ဟောင်း ပုဂ္ဂိုလ်များ သည် ရင်ထဲမှာ ဘယ်လိုခံစားနေကြသလဲ၊ ဘာတွေ အကြံအစည်ရှိနေ ကြသလဲဆိုသည်ကို သူတို့သာ အသိဆုံး ဖြစ်သည်။

အချိန်အတန်ကြာစောင့်ပြီးမှ သမ္မတဟောင်း ဦးသိန်းစိန်နှင့် သမ္မတသစ် ဦးထင်ကျော်တို့ ထွက်လာကြပါသည်။ တကယ်က ယနေ့အာဏာလွှဲပြောင်း အခမ်းအနားကို တနိုင်ငံလုံး တီဗွီမှကြည့်ကြသည်မှာ လက်ဖက် ရည်ဆိုင်များကအစ ယခင်ဘောလုံးပွဲကြည့်သလို ပရိသတ်များ စုဝေးကာကြည့်ကြသည်။ ၀မ်းသာအားရ လက်ခုပ်လက်ဝါးတီးကြသည်။ ယခုနှစ် သင်္ကြန်ကာလမှာ ပျော်ရွှင်ပွဲသည် ယခုကတည်းက အကြိုပျော်ပွဲ ဖြစ်နေပါသည်။ ပြည်သူတရပ်လုံး ပျော်ကြသည်။ ပြည်သူတရပ်လုံး၏ အပျော်ဆုံ စည်းရာနေ့တနေ့ဖြစ်သည်။

ဒုတိယသမ္မတ(၁)ဦးမြင့်ဆွေကို မျက်နှာထားတင်းတင်းနှင့် တွေ့ရသည်။ သမ္မတဦးထင်ကျော်ကို နေရာသို့ ခြံရံပို့ဆောင်သည့်ပုဂ္ဂိုလ်များထဲတွင် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ကိုလည်း တွေ့ရသည်။ ကာချုပ်မင်းအောင်လှိုင်ကတော့ မျက်နှာအပြုံးမပျက်ပါ။ ဒုသမ္မတဟောင်း ဦးဥာဏ်ထွန်းကိုမူ ဂနာမငြိမ်သည့် အမူအရာမျိုး တွေ့ရသည်။ ဒူးနှန့်နေသည်ကို တွေ့ရသည်။

သမ္မတအပြောင်းအလွှဲအခမ်းအနားကို ဒီ့ထက်ခမ်းနားစွာကျင်းပရန် လိုပါသည်။ ဘာကြောင့်လဲဆိုလျှင် မြန်မာ ပြည်သူတရပ်လုံး အာရုံစိုက်သောကြောင့်ဖြစ်သည့်အပြင် ယခင် ကြံ့ဖွံ့အစိုးရ တချိန်လုံးသုံးနှုန်းခဲ့သော နိုင်ငံရေးယဉ်ကျေးမှုအရ ဖြစ်သည်။
သမ္မတဦးထင်ကျော်က ပြည်သူအား မိန့်ခွန်းပြောကြားသလို သမ္မတဟောင်း ဦးသိန်းစိန်ကလည်း ပြည်သူသို့ နှုတ်ဆက်မိန့်ခွန်းပြောကြားသင့်သည်။ ထို့ပြင် ဒုသမ္မတအဟောင်း၊ အသစ်၊ ၀န်ကြီး အဟောင်း၊ အသစ်တို့ မှာလည်း တဦးကိုတဦး သဘောထားကြီးစွာ၊ ကြည်ဖြူစွာ လက်ဆွဲနှုတ်ဆက်ကြရန် လိုသည်။

အစိုးရအဖွဲ့ဟောင်းများအတွက် ''ထွက်တော်မူ နန်းကခွာတယ်'' ဆိုသော ယသော်ဓရာပတ်ပျိုးကို သတိရမိ သော်လည်း အစိုးရအဖွဲ့သစ်အတွက်မူ 'အောင်စေ ပိုင်စေ နိုင်စေ' သီချင်းကို သတိရစေသည်။ ၁၉၉၀ ပြည့်နှစ်တုန်းက NLD ရွေးကောက်ပွဲမှာ အနိုင်ရသည့်အခါ ပြည်ပ အသံလွှင့်ဌာနတခုဖြစ်သော VOA အမေရိကန် မြန်မာသံက လွှင့်ခဲ့သည်မှာ 'အောင်စေ ပိုင်စေ နိုင်စေ ပွဲပေါင်း''ဆိုသော သီချင်းတပုဒ်ဖြစ်သည်။ အလွန် ကျက်သရေမင်္ဂလာရှိသော သီချင်းဖြစ်သည်။
မြန်မာအစိုးရသစ်ကို ပေါ်ပေါက်စေသည့် NLD ပါတီဥက္ကဋ္ဌ ဒေါ်အောင်ဆန်းစုကြည်ကို ယခင် အာဏာရှင် ဟောင်း ဗိုလ်ချုပ်မှူးကြီးသန်းရွှေကလည်း ''ဒေါ်အောင်ဆန်းစုကြည်သည် အနာဂတ် မြန်မာနိုင်ငံ၏ ခေါင်း ဆောင်ဖြစ်မည်''ဟု ပြောကြားထားပါသည်။

ပြီးခဲ့သည့် မတ်လ ၂၇ ရက် (၇၁)နှစ်မြောက် တော်လှန်ရေးနေ့(တပ်မတော်နေ့)ကလည်း ဗိုလ်ချုပ်မှူးကြီးမင်းအောင်လှိုင် (တပ်မတော် ကာကွယ်ရေးဦးစီးချုပ်)ကလည်း ''တပ်မတော်အနေဖြင့် နိုင်ငံတော်နှင့် ပြည်သူလူထုအကျိုးစီးပွားကို ဖြစ်ထွန်းအောင်မြင်အောင် ဖော်ဆောင်နိုင်ရန်အတွက် ပူးပေါင်းဆောင်ရွက်သွားမည်ဖြစ်ကြောင်း''ပြောကြားသွားပါသည်။ ဗိုလ်ချုပ်မှူးကြီးမင်းအောင်လှိုင်က သူတို့တပ်မတော်က ဒီမိုကရေစီကိုဖော်ဆောင်သွားမည်ဟုဆိုခြင်းမဟုတ်ဘဲ 'ပူးပေါင်းဆောင်ရွက်သွားမည်'ဟု ပြောသည်မှာလည်း အဓိပ္ပာယ်ရှိပါသည်။ ပူးပေါင်းသည် ဆိုကတည်းက မည်သူနှင့် ပူးပေါင်းမည်နည်း။ ဒီမိုကရေစီအစိုးရနှင့်သာ ဒီမိုကရေစီကို ပူးပေါင်းဆောင်ရွက်သွားရမည်မဟုတ်ပါလား။ ထို့ကြောင့် သူ၏ 'ပူးပေါင်းဆောင်ရွက်သွားမည်'ဆိုသည့် စကားမှာ ကြိုဆိုရမည့်စကား ဖြစ်ပါသည်။

ဤ NLD အစိုးရ၏ အောင်ပွဲသည် NLD ပါတီတခုတည်း၏ အောင်ပွဲမဟုတ်ပါ။ ၁၉၆၂ ခုနှစ်ကတည်းက စစ်အစိုးရကို နည်းမျိုးစုံနှင့် ကာလကြာရှည်တိုက်ပွဲဝင်ခဲ့ကြသော ခေတ်အဆက်ဆက်က တိုက်ပွဲဝင် သူရဲ ကောင်းတို့၏ ကိုယ်ကျိုးစွန့်မှုတို့ကို မေ့ပစ်၍မရနိုင်ပါ။ လူမျိုး၊ ဘာသာ၊ အယူဝါဒ၊ ခံယူချက်၊ ယုံကြည်ချက် အမျိုးမျိုး ကွဲပြားမှုရှိကောင်းရှိပါလိမ့်မည်။ သို့သော် စစ်အာဏာရှင်စနစ်ကို တော်လှန်ခဲ့ကြရာမှာတော့ တခု တည်းသော ရည်မှန်းချက်ပန်းတိုင်ဖြစ်ပါသည်။
ထို့ပြင် ဒီမိုကရေစီစနစ်ကို ရှောရှောရှူရှူ ငြိမ်းငြိမ်းချမ်းချမ်းပေးခဲ့သည်ဟု စစ်အာဏာရှင် တဖြစ်လဲ ကြံ့ခိုင်ရေးနှင့် ဖွံ့ဖြိုးရေးအစိုးရက မကြာခဏပြောခဲ့သည်။ ဤသို့ ငြိမ်းငြိမ်းချမ်းချမ်းပေးသည်ဆိုခြင်းကို ပြည်သူလူထုက တကယ်ရော ယုံမှတ်နေကြပါသလား။

ဤသို့သော အခြေအနေတရပ် ဖြစ်လာရန်အတွက် နှစ်ပေါင်း ၅၀ ကျော်ကြာ အသေအကျေခံ၊ ထောင်သွင်း အကျဉ်းချခံ၊ တကျွန်းအကျခံကာ တိုက်ပွဲဝင်ခဲ့ကြသူများ ယနေ့ထိ ရှိနေကြဆဲပါ။ အလုပ်သမား၊ လယ်သမား၊ ကျောင်းသား၊ အရပ်သား လူထုလူတန်းစား အသီးသီး၏ စစ်အာဏာရှင်စံနစ်ကို ဆန့်ကျင်ခဲ့ကြသည့် ၁၉၈၈ အရေးတော်ပုံကိုလည်း မမေ့အပ်ပါ။
ထို့ကြောင့် စစ်အာဏာရှင် ဆန့်ကျင်သူများ၊ ကျဆုံးသွားသူများကို စာရင်းဇယားပြုစု၍ အညတြစစ်သည်တော် ဗိမာန်လို ဗိမာန်ဆောက်လုပ်ထားသင့်ပါသည်။ ထို့နောက် ဒုတိယကမ္ဘာစစ်ကာလက ဖက်ဆစ်တို့အောက်တွင် အသက်ပျောက်ခဲ့ရသော စစ်သည်တော်များကို ကမ္ပည်းမော်ကွန်းထိုးကာ အမှတ်တရ မှတ်တမ်းစိုက်ထူထား သော ထောက်ကြန့်ရှိ စစ်သချိုင်္င်းလို ဆောက်လုပ်မှတ်တမ်းတင်ထားရမည်ဖြစ်သည်။

ခေတ်တခေတ်ပြောင်းလဲရန်မှာ လူတဦးတယောက်တည်းက ပြောင်း၍မရ။ လူအများက ပြောင်းလဲရန် လိုလားကာ လှုပ်ရှားရုန်းကန် တိုက်ပွဲဝင်ပါမှ ခေတ်ပြောင်းသွားရခြင်း ဖြစ်သည်။
ခွင့်လွှတ်သင့်သူများကိုတော့ ခွင့်လွှတ်ရမည်ဖြစ်သော်လည်း သမိုင်းဆိုသည်မှာတော့ မေ့ပစ်ရန် မဟုတ်ပါ။ သမိုင်းကတော့ အမှန်အကန် မှတ်တမ်းတင်လိမ့်မည် ဖြစ်သတည်း။

တင်တင်ဦး
News Watch(စောင့်ကြည့်သတင်းဂျာနယ်)

ဒေါ်အောင်ဆန်းစုကြည်ကို အတိုင်ပင်ခံ ပုဂ္ဂိုလ် အဖြစ် တာဝန်ပေးရန် နိုင်ငံတော်၏ အတိုင်ပင်ခံ ပုဂ္ဂိုလ် ဆိုင်ရာ ဥပဒေကြမ်း အမျိုးသား လွှတ်တော်၌ လက်ခံ ဆွေးနွေးသွားမည်

အမျိုးသားလွှတ်တော် အစည်းအဝေးကျင်းပနေစဉ် (ဆင်ဟွာ)

    နေပြည်တော် ၊ မတ် ၃၁ ရက် (ဆင်ဟွာ)

    အမျိုးသား ဒီမိုကရေစီ အဖွဲ့ ချုပ် ဥက္ကဋ္ဌ ဒေါ်အောင်ဆန်းစုကြည်ကို အတိုင်ပင်ခံ ပုဂ္ဂိုလ် အဖြစ် ပြည်ထောင်စု လွှတ်တော်မှ တာဝန် ပေးအပ်နိုင်ရန် နိုင်ငံတော်၏ အတိုင်ပင်ခံ ပုဂ္ဂိုလ် ဆိုင်ရာ ဥပဒေကြမ်းကို ယနေ့ မတ်လ ၃၁ ရက်တွင် ပြုလုပ်သည့် အမျိုးသား လွှတ်တော် အစည်းအဝေးတွင် မကွေးတိုင်းဒေသကြီး မဲဆန္ဒနယ် အမှတ် (၄) မှ အမျိုးသား လွှတ်တော် ကိုယ်စားလှယ် ဦးအောင်ကြည်ညွှန့် က စတင် တင်သွင်းခဲ့သည်။

ထိုဥပဒေကြမ်းနှင့် စပ်လျဉ်း၍ ချင်းပြည်နယ် မဲဆန္ဒနယ် အမှတ် (၇) မှ လွှတ်တော်ကိုယ်စားလှယ် ဒေါ်ကျိန်ငိုက်မန်က ထောက်ခံ ဆွေးနွေးခဲ့သဖြင့် ဥပဒေကြမ်းအား လက်ခံဆွေးနွေးရန် သင့်၊ မသင့် လွှတ်တော်၏ အဆုံးအဖြတ် ရယူရာတွင် လက်ခံ ဆွေးနွေးရန် ဆုံးဖြတ်ခဲ့သည်။

နိုင်ငံတော်၏ အတိုင်ပင်ခံ ပုဂ္ဂိုလ် ဆိုင်ရာ ဥပဒေ၏ ရည်ရွယ်ချက်များမှာ ပါတီစုံ ဒီမိုကရေစီ စနစ် ထွန်းကားရေး ၊ ဈေးကွက် စီးပွားရေး စနစ် ပီပြင်ရေး ၊ ဖက်ဒရယ် ပြည်ထောင်စု နိုင်ငံတော် တည်ဆောက်ရေး နှင့် ပြည်ထောင်စု ငြိမ်းချမ်းရေး နှင့် ဖွံ့ ဖြိုး တိုးတက်ရေး တို့ ဖြစ်ပြီး အတိုင်ပင်ခံ ပုဂ္ဂိုလ် ဆိုသည်မှာ ယင်းရည်ရွယ်ချက်များ အောင်မြင်စေရန် ဤဥပဒေအရ တာဝန်ပေးအပ်ခြင်း ခံရသူကို ဆိုလိုကြောင်း ဥပဒေကြမ်းတွင် ဖော်ပြပါရှိသည်။

ထို့ ပြင် အတိုင်ပင်ခံ ပုဂ္ဂိုလ်၏ ရာထူး သက်တမ်းသည် နိုင်ငံတော် သမ္မတ၏ ရာထူး သက်တမ်း အတိုင်း ဖြစ်ပြီး ဤ ဥပဒေသည် ဒုတိယ အကြိမ် ပြည်ထောင်စု လွှတ်တော် သက်တမ်း ကာလတွင် တာဝန်ထမ်းဆောင်သည့် နိုင်ငံတော် သမ္မတ၏ သက်တမ်းကာလ အတွက်သာ ဖြစ်စေရမည်ဟု ဥပဒေကြမ်းတွင် ဖော်ပြပါရှိပြီး ပြည်ထောင်စု လွှတ်တော်သည် ဤဥပဒေပါ ပြဋ္ဌာန်းချက်များနှင့် စပ်လျဉ်း၍ လိုအပ်သော နည်းဥပဒေများကို ထုတ်ပြန်နိုင်ကြောင်း ဖော်ပြထားသည်။

အတိုင်ပင်ခံ ပုဂ္ဂိုလ်၏ တာဝန် ၊ လုပ်ပိုင်ခွင့်နှင့် ရပိုင်ခွင့်များမှာ ဖွဲ့ စည်းပုံ အခြေခံ ဥပဒေပါ ပြဋ္ဌာန်းချက်များ နှင့် မဆန့်ကျင် စေဘဲ နိုင်ငံတော်နှင့် နိုင်ငံသားများ၏ အကျိုးစီးပွားများ အတွက် အကြံပြုချက်များ ပေးရခြင်း ၊ အကြံပြုချက်များ ဆောင်ရွက်ချက်များ နှင့် စပ်လျဉ်း၍ ပြည်ထောင်စု လွှတ်တော်သို့ တာဝန်ခံရခြင်း ၊ အတိုင်ပင်ခံ ပုဂ္ဂိုလ်သည် ဤဥပဒေပါ ရည်ရွယ်ချက်များ အောင်မြင်စေရန် အတွက် အစိုးရ အဖွဲ့ ၊ ဌာနဆိုင်ရာများ ၊ အဖွဲ့ အစည်းများ ၊ အသင်းအဖွဲ့ များ ၊ လူပုဂ္ဂိုလ်များ နှင့် ဆက်သွယ် ဆောင်ရွက်နိုင်ခြင်း ၊ အတိုင်ပင်ခံ ပုဂ္ဂိုလ်သည် ရာထူးအလျောက် ရရှိသည့် လစဉ် ချီးမြှင့်ငွေ ၊ စရိတ် ၊ အဆောင်အယောင်နှင့် အခွင့်အရေးများကို ခံစားခွင့် ရှိခြင်း ၊ အတုိုင်ပင်ခံ ပုဂ္ဂိုလ်၏ ချီးမြှင့်ငွေ ၊ စရိတ်နှင့် အဆောင်အယောင်များ အတွက် ပြည်ထောင်စု၏ ဘဏ္ဍာငွေ အရအသုံးဆိုင်ရာ ဥပဒေတွင် ခွဲဝေ သတ်မှတ် ထားရှိရခြင်းများ ပါဝင်ကြောင်း သိရသည်။

 (Xinhua)

ဖလော်ရီဒါတွင် ကြီးမားသည့် တွင်းကြီးတခုဖြစ်ပေါ်၊ ဒေသခံများ ထွက်ပြေး (ရုပ်သံ)

အမေရိကန်နိုင်ငံ ဖလော်ရီဒါပြည်နယ် တာပွန်စပရင်းစ်မြို့က ရွေ့လျားအိမ်တွေရှိတဲ့ ရပ်ကွက်နားမှာ မြေကျွံဝင်အပြီး ကြီးမားတဲ့တွင်းတခု မတ်လ ၃၀ ရက်နေ့က ပေါ်လာခဲ့ပါတယ်။
ဒါကြောင့် ဒေသခံ တဒါဇင်ကျော် သူတို့အိမ်တွေကနေ ထွက်ပြေးခဲ့ရတယ်လို့ ဒေသခံမီဒီယာက အစီရင်ခံပါတယ်။
ပေ ၆၀ လောက်ကျယ်တဲ့ တွင်းကြီးဟာ ရွေ့လျားအိမ်တချို့နဲ့ ပေနည်းနည်းအကွာမှာ ပေါ်လာခဲ့တာလို့ အန်ဘီစီ သတင်းဌာနက အစီရင်ခံပါတယ်။
လမ်းနားမှာ အလုပ်လုပ်နေတုန်း ကျန်ခဲ့တဲ့ သီတင်းပတ်တွေက တွင်းက ကြီးလာတာကို သတိထားမိတယ်လို့ အရာရှိတွေက ပြောပါတယ်။
ဒီတွင်းကြောင့် မိလ္လာနဲ့ ရေပိုက်လိုင်းတချို့ ပျက်စီးခဲ့ပြီး တခြား အပျက်အစီး ဒဏ်ရာရမှုတော့ အစီရင်ခံတာ မရှိပါသေးပါဘူး။
DVB

သူရဦးရွှေမန်း ဦးဆောင်တဲ့ ကော်မတီက ဥပဒေ ၁၄၂ ခုကို ပြင်ဆင်ဖို့  အကြံပြုချက် ထုတ်ပြန်

သို့

နာယက၊ ပြည်ထောင်စုလွှတ်တော်

ဥက္ကဋ္ဌ၊ ပြည်သူ့လွှတ်တော်

ဥက္ကဋ္ဌ၊ အမျိုးသားလွှတ်တော်

အကြောင်းအရာ။ သုံးသပ်အကြံပြုချက်များတင်ပြခြင်း

၁။ ဒုတိယအကြိမ် ပြည်သူ့လွှတ်တော်ကာလအတွင်း ၂၀၁၆ ခုနှစ်၊ဖေဖော်ဝါရီလ ၄ ရက်နေ့တွင် ပြည်သူ့လွှတ်တော်၊ ဥပဒေရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေး ကော်မရှင်ကို စတင်ဖွဲ့စည်းခဲ့ပြီးနောက် ထိုကော်မရှင်ကို ပြည်သူ့လွှတ်တော်မှ ၂၀၁၆ ခုနှစ်၊ မတ်လ ၁ ရက်နေ့တွင် ရုပ်သိမ်းကာ ပြည်ထောင်စုလွှတ်တော်၊ ဥပဒေ ရေးရာနှင့် အထူးကိစ္စရပ်များ လေ့လာဆန်းစစ် သုံးသပ်ရေးကော်မရှင်ကို ၂၀၁၆ ခုနှစ်၊ မတ်လ ၁ ရက်နေ့တွင် ဆက်လက်ဖွဲ့စည်းခဲ့ပါသည်။

၂။ ကော်မရှင်သည် ဤကာလအတွင်း နိုင်ငံတော်နှင့် နိုင်ငံသားအကျိုးစီးပွား အတွက် ဘာသာရပ်အသီးသီးနှင့် အစိုးရအဖွဲ့အသစ်လက်ထက်တွင် မဖြစ်မနေ ကြုံတွေ့ဖြေရှင်း ဆောင်ရွက်ရမည့် အဓိကကိစ္စရပ်များကို လေ့လာဆန်းစစ်သုံးသပ်၊ ဆွေးနွေးညှိနှိုင်းပြီး ပြည်သူ့လွှတ်တော်ဥက္ကဋ္ဌ၊ အမျိုးသားလွှတ်တော်ဥက္ကဋ္ဌ၊ အမျိုးသား ဒီမိုကရေစီအဖွဲ့ချုပ်ပါတီ ဥက္ကဋ္ဌတို့အား ရှင်းလင်းတင်ပြခဲ့ပြီးနောက် ထိုအဖွဲ့များ၏ ပြန်လည်ဆွေးနွေးချက်များအပေါ် ပြန်လည်စိစစ် ဖြည့်စွက်ဆောင်ရွက်ပြီး ကော်မရှင်၏ နောက်ဆုံးသုံးသပ်အကြံပြုချက်များကို လိုအပ်သလို ဆက်လက်ဆောင်ရွက်နိုင်ပါရန် ကဏ္ဍအလိုက် သုံးသပ်အကြံပြုချက်များနှင့်အတူ ပူးတွဲပေးပို့တင်ပြအပ်ပါသည်-
(က) တည်ဆဲဥပဒေများအနက်မှ ပြင်ဆင်ရန်၊ ပယ်ဖျက်ရန်၊ ရုပ်သိမ်းရန်၊ အသစ် ပြန်လည်ရေးဆွဲရန် လိုအပ်ကြောင်း စိစစ်တွေ့ရှိရသည့် ဥပဒေ ၁၄၂ ခု တွေ့ရှိရပြီးဖြစ်ကာ ဆက်လက် လေ့လာဆောင်ရွက်သွားရန် လိုအပ်မည်ဖြစ်ပါသည်။ တည်ဆဲဥပဒေသာရှိပြီး၊ နည်းဥပဒေမရှိခြင်း၊ နည်းဥပဒေရှိပြီး အမိန့်ကြော်ငြာစာများ မထုတ်ပြန်နိုင်သေးခြင်း၊ ထုတ်ပြန်ပြီးသော အမိန့်ကြော်ငြာစာများမှာလည်း မူလဥပဒေနှင့် ကိုက်ညီမှုမရှိခြင်း၊ လက်တွေ့လုပ်ဆောင်၍မရခြင်း စသော ကိစ္စရပ်များ အပေါ် သုံးသပ်ချက်၊ ပူးတွဲ(က)
(ခ) ၂၀၁၆-၂၀၁၇ ခု ဘဏ္ဍာရေးနှစ် ဘတ်ဂျက်ဥပဒေ၊ စီမံကိန်းဥပဒေများကို ၂၀၁၆ ခုနှစ် ဇန်နဝါရီလ ၂၅ ရက်နေ့တွင် ကျင်းပပြုလုပ်သော ပထမအကြိမ် ပြည်ထောင်စုလွှတ်တော်တွင် ပြဋ္ဌာန်းခဲ့ပြီးဖြစ်သော်လည်း အချိန်လု၍ အချိန်မီ ပြီးစီးအောင် ဆောင်ရွက်ခဲ့ရသောကြောင့် ပြည်သူ့ဘဏ္ဍာငွေများ စနစ်တကျ ထိရောက်မှန်ကန်စွာ အသုံးပြုနိုင်ရန် လက်ရှိ ဒုတိယအကြိမ် ပြည်ထောင်စုလွှတ်တော်သည် အမျိုးသား ဒီမိုကရေစီအဖွဲ့ချုပ်အစိုးရသစ်နှင့် ဆွေးနွေးညှိနှိုင်းပြီး ဆောင်ရွက်သင့်သော လုပ်ငန်းများ၊ စီမံကိန်းများကို စိစစ်နိုင်ရန် အမျိုးသား ဒီမိုကရေစီအဖွဲ့ချုပ်အစိုးရဖွဲ့စည်းပြီးနောက် ဆောလျင်စွာ ပြန်လည် စိစစ် သုံးသပ်ရန်အတွက် အစိုးရနှင့်လွှတ်တော်မှ ဆောင်ရွက်ရန် တင်ပြချက်၊ ပူးတွဲ(ခ)
(ဂ) ပထမအကြိမ်၊ လွှတ်တော်ကာလအတွင်း ထုတ်ပြန်ခဲ့ပြီးဖြစ်သော ၂၀၁၆ ခုနှစ်၊ ပြည်ထောင်စု၏ အခွန်အကောက်ဥပဒေနှင့်စပ်လျဉ်း၍ ကော်မရှင် အဖွဲ့ဝင် များသည် ဘဏ္ဍာရေးဝန်ကြီးဌာနမှ တာဝန်ရှိသူများနှင့် လေးကြိမ်တိုင် တွေ့ဆုံဆွေးနွေး လေ့လာဆန်းစစ် ညှိနှိုင်း အဖြေရှာ သုံးသပ်ခဲ့ပြီး ထိုတွေ့ရှိသုံးသပ် အကြံပြုချက်အတိုင်း ပြင်ဆင်ရန် လိုသော အခွန်ဥပဒေကို ပြည်ထောင်စုအစိုးရအဖွဲ့နှင့် ပြည်ထောင်စု လွှတ်တော်က ပြန်လည်ပြင်ဆင်ခြင်းနှင့် လိုက်နာဆောင်ရွက်ရမည့် ကိစ္စရပ်များကို အခွန်ထမ်းပြည်သူနှင့် အခွန်ဦးစီးဌာနတို့မှနည်းလမ်းတကျ ဆောင်ရွက်ခြင်းဖြင့် နိုင်ငံတော်နှင့် ပြည်သူများအတွက် များစွာ အကျိုးဖြစ်ထွန်းမည် ဖြစ်သည်။ ထိုသို့အခွန်ထမ်းပြည်သူများနှင့် အခွန်ဦးစီးဌာနမှ ဝန်ထမ်းများအနေဖြင့် တိကျစွာ လိုက်နာဆောင်ရွက် နိုင်ရေးအတွက် စံပြုထားသော လုပ်ထုံးလုပ်နည်းများ (Standard Operation Procedure ) များ ထုတ်ပြန်နိုင်ရေးကိစ္စ၊ ပူးတွဲ(ဂ)
(ဃ) အစိုးရအဖွဲ့အသစ်လက်ထက်တွင် မလွှဲမသွေကြုံတွေ့ဆောင်ရွက်ရမည့် တင်ဒါခေါ်ယူခြင်း ကြီးကြပ်ခြင်းဆိုင်ရာ ကိစ္စရပ်များအတွက် ထုတ်ပြန်ထားပြီးဖြစ်သော ဥပဒေ၊ နည်းဥပဒေ၊ အမိန့်ကြော်ငြာစာ၊ ညွှန်ကြားချက်များအတိုင်း တိကျစွာလိုက်နာဆောင်ရွက်နိုင်ရေးနှင့် ထိုသို့ဆောင်ရွက်နိုင်ရေး ကြီးကြပ်ဆောင်ရွက်ပေးရေးကိစ္စများအပေါ်သုံးသပ်ချက်၊ ပူးတွဲ(ဃ)
(င) တောင်သူလယ်သမား အခွင့်အရေးကာကွယ်ရေးနှင့် အကျိုးစီးပွား မြှင့်တင်ရေးဥပဒေ ထုတ်ပြန်ပြီးသော်လည်း သက်ဆိုင်ရာဌာနများမှ နည်းဥပဒေ၊ အမိန့်ကြော်ငြာစာများ ထုတ်ပြန်နိုင်ခြင်း မရှိသေးခြင်း တို့ကြောင့် တောင်သူလယ်သမားများအတွက် ဥပဒေပါအတိုင်း သင့်တင့်မျှတ လုံလောက်သော ၂၀၁၆ ခုနှစ်၊ မိုးရာသီစိုက်ပျိုးစရိတ် အချိန်မီ ထုတ်ချေးနိုင်ရေးနှင့် လိုအပ်သော နည်းပညာပံ့ပိုးပေးရေး၊ ထွက်ရှိသော သီးနှံများကို ဈေးကွက်နှင့် သင့်တင့်မျှတသော ဈေးနှုန်းမရရှိနိုင်ခြင်း၊ သိမ်းဆည်းခံ လယ်ယာမြေများနှင့် ပတ်သက်၍ လည်း ယခုတိုင်ပြီးပြတ်မှုမရှိဘဲ ကြန့်ကြာနေသဖြင့် သက်ဆိုင်ရာ ပြည်ထောင်စုအစိုးရအဖွဲ့ ဌာနဆိုင်ရာများမှ အလေးဂရုပြု၍ ဆောင်ရွက်ပေးပါက အဆင်ပြေနိုင်ကြောင်း သုံးသပ်ချက်များ၊ ပူးတွဲ(င)
(စ) ရုံးဌာနအသီးသီးရှိ အချို့သောရုံးအသုံးစရိတ်များမှာ အမှန်ကုန်ကျငွေများ ကို ခွင့်ပြုပေးထားခြင်း မရှိသည့်အတွက် လုပ်ငန်းဖြစ်မြောက် အဆင်ပြေစေရန်ဝန်ထမ်းများမှ မလျော်မကန်သောနည်းဖြင့် ဆောင်ရွက်လျက်ရှိမှု များကြောင့် ဝန်ထမ်းများ၏ ဂုဏ်သိက္ခာကျဆင်းခြင်း၊ ပြည်သူများ၏ ယုံကြည်မှုကျဆင်း လျော့နည်းလာခြင်းများ ဖြစ်ပေါ်နေပါသည်။ သို့ဖြစ်၍ အမှန်တကယ် ကုန်ကျငွေများကို စိစစ်ပြီးခွင့်ပြုထုတ်ပေးနိုင်ရေး သုံးသပ်၍ လိုအပ်သလို ဆောင်ရွက်သွားရန် ကိစ္စများ။ ပူးတွဲ(စ)

၃။ အထက်အပိုဒ် ၂ အပိုဒ်ခွဲ(က)(ခ)(ဂ)(ဃ)(င)(စ) ပါ ကိစ္စရပ်များမှာ မဖြစ်မနေ ဆောင်ရွက်သင့်သောကိစ္စရပ်များဖြစ်၍ အမျိုးသားဒီမိုကရေစီအဖွဲ့ချုပ်အစိုးရအဖွဲ့အသစ် စတင်တာဝန်ယူရသောအချိန်မှပင် ထိရောက်လျင်မြန်စွာ ဆောင်ရွက်နိုင်မှသာ ပြည်သူများ၏ မျှော်လင့်ထားသောအပြောင်းအလဲနှင့် နိုင်ငံတော်နှင့် နိုင်ငံသားများ အကျိုးစီးပွားရရှိလာနိုင်မည် ဖြစ်ပါသည်။

၎။ သို့ရာတွင် ဆောင်ရွက်ရမည့်လုပ်ငန်းများအားလုံးမှာ အချိန်တိုအတွင်း ပြီးမြောက်အောင် ဆောင်ရွက်နိုင်သောကိစ္စများရှိသလို အချိန်ယူ ဆောင်ရွက်ရမည့် ကိစ္စရပ်များလည်း ရှိသည့်အတွက် ဦးစားပေးအစီအစဉ်များ ချမှတ်၍ စနစ်တကျ ထိရောက်စွာ ဆောင်ရွက်သွားရန် လိုအပ်ကြောင်းသုံးသပ်တင်ပြပါသည်။
ပူးတွဲပါ- ကော်မရှင်၏သုံးသပ်ချက်(၆)စောင်

သူရဦးရွှေမန်း

ဥက္ကဋ္ဌ

မိတ္တူကို
ပြည်ထောင်စုအစိုးရအဖွဲ့ရုံး
ဒေါ်အောင်ဆန်းစုကြည်
ရုံးလက်ခံ

Thura U Shwe Mann
https://www.facebook.com/HEThuraUShweMann

အစိုးရသစ်ဖွဲ့အပြီး NLD နိုင်ငံရေးပါတီ ပြန်လည်ဖွဲ့စည်းဖို့ ပြင်ဆင်

31.03.2016 

NLD ပါတီကို ပြန်လည်ဖွဲ့စည်းသွားဖို့ ရှိနေတယ်လို့ ပါတီရဲ့ ဗဟိုအလုပ်မှုဆောင် ဦးဉာဏ်ဝင်းက ပြောဆိုသွားပါတယ်။ ပါတီရဲ့ ပြန်ကြားရေးတာဝန်ခံ ဒေါက်တာ ဇော်မြင့်မောင် ကတော့ ဒေါ်အောင်ဆန်းစုကြည်ဟာ ပါတီဥက္ကဌအနေနဲ့ ဆက်ရှိနေမယ်လို့လည်း ပြောဆိုလိုက်ပါတယ်။
ပါတီနာယကကြီး ဦးတင်ဦးကတော့ အပြောင်းအလဲက ပါတီအပေါ်မှာ အကျိုးသက်ရောက်မှု ကြီးကြီးမားမား ဖြစ်လာမှာမဟုတ်ဘဲ စုစည်းမှုနဲ့ ရှေ့ဆက်မယ်လို့ ပြောပါတယ်။ အပြည်အစုံကို နေပြည်တော်ကနေ ဗွီအိုအေသတင်းထောက် မမေခက ပေးပို့ထားပါတယ်။
နိုင်ငံတော်အာဏာ အလွှဲအပြောင်းမှာ ဝန်ကြီးဌာနတွေကို တာဝန်ယူမယ့် ပြည်ထောင်စုဝန်ကြီး ၁၈ ဦး ကတိသစ္စာပြုခဲ့တာမှာ NLD ပါတီဥက္ကဌ ဒေါ်အောင်ဆန်းစုကြည် က ဝန်ကြီးဌာန ၄ ခုကို တာဝန်ယူခဲ့ပါတယ်။ ပါတီထဲက ဒေါ်အောင်ဆန်းစုကြည် အပါအဝင် လွှတ်တော်ကိုယ်စားလှယ် ၆ ဦးဟာ အစိုးရအဖွဲ့အစည်းထဲမှာ တာဝန်ထမ်းဆောင်သွားမှာပါ။ ဒီပြင် ဒုသမ္မတ ဟင်နရီဗန်တီးယူ အပြင် ဖွဲ့စည်းပုံ အခြေခံဥပဒေ ခုံရုံးမှာလည်း ပါတီဝင် လွှတ်တော်ကိုယ်စားလှယ်တွေ ပါဝင်ထားပါတယ်။ တိုင်းနဲ့ ပြည်နယ် ဝန်ကြီးချုပ်နေရာတွေမှာလည်း ပါတီဝင်တွေ ပါဝင်ထားသလို နောက်ထပ် ခန့်အပ်ဦးမယ့် တိုင်းနဲ့ပြည်နယ်က ဝန်ကြီးဌာနတွေအတွက် ဝန်ကြီးတွေနဲ့ရှေ့နေချုပ် နေရာတွေမှာလည်း NLD ပါတီဝင်တွေ ပါဝင်ဖို့ ရှိနေပါသေးတယ်။ ဒီလိုပါဝင်မှုတွေရှိ လာတာကြောင့် ပါတီကို ပြန်လည်ဖွဲ့စည်းသွားဖို့ စီစဉ်နေတာပါ။ ပြန်လည်ဖွဲ့စည်းမှုနဲ့ ပတ်သတ်ပြီး ဦးဉာဏ်ဝင်းက အခုလို ပြောဆိုလိုက်ပါတယ်။
“ကျနော်တို့ ပြန်လည်ဖွဲ့စည်းရေးလုပ်မှာပါ။ ဒါပေမဲ့ လက်ရှိကတော့ အတွင်းရေးမှူး ၅ ဦးက ဦးဆောင်မှာ။ အချိန်ရတာနဲ့ လုပ်မှာ။ အခု ဒီအချိန်မှာတော့ အန်ကယ်လ် ပြောလို့မရဘူး။ ဒီအချိန် ဘာမှမလုပ်နိုင်ဘူး။”
အရင် သမ္မတဟောင်း ဦးသိန်းစိန် အစိုးရလက်ထက်မှာလည်း ဝန်ကြီးနေရာတွေ တာဝန်ထမ်းဆောင်သူတွေမှာ ကြံ့ခိုင်ရေးပါတီကနေ နှုတ်ထွက်ခဲ့တာ မရှိခဲ့ပါဘူး။ ဒီပြင် သမ္မတဟောင်း ဦးသိန်းစိန် ကိုယ်တိုင်လည်း ပါတီဥက္ကဌ နေရာယူထားသလို သမ္မတတာဝန် ထမ်းဆောင်ခဲ့ပါတယ်။ ဒီအပေါ်မှာ ဝေဖန်မှုတွေ ရှိ်ခဲ့ပါတယ်။ တည်ဆဲ ဖွဲ့စည်းပုံအခြေခံဥပဒေ ပုဒ်မ ၆၄ နဲ့ ၂၃၂ အရ သမ္မတ၊ ဒုသမ္မတတွေနဲ့  ပြည်ထောင်စုဝန်ကြီးတွေဟာ လွှတ်တော်တရပ်ရပ်ရဲ့ ကိုယ်စားလှယ်ဖြစ်ခဲ့ရင် အစိုးရအဖွဲ့အစည်းမှာ တာဝန်ခန့်အပ်တဲ့ နေ့ကစပြီး လွှတ်တော် ကိုယ်စားလှယ်ကနေ နှုတ်ထွက်ရမယ်လို့ ပါဝင်ထားပါတယ်။ ဒီပြင် ရာထူးသက်တမ်းအတွင်း ပါတီအဖွဲ့အစည်း လုပ်ငန်းတွေမှာလည်း ဆောင်ရွက်ခွင့် မရှိစေရလို့ ပါပါတယ်။
ဒေါ်အောင်ဆန်းစုကြည်အနေနဲ့ ပြည်ထောင်စုဝန်ကြီး တာဝန်ယူလိုက်တာ ဖြစ်တာကြောင့် သူ့ရဲ့ အနာဂတ်နဲ့ ပတ်သက်ပြီး ပါတီ ပြန်ကြားရေးတာဝန်ခံ ဒေါက်တာဇော်မြင့်မောင် ကတော့ အခုလို ပြောပါတယ်။
“အဲတော့ ရှေ့ကသွားခဲ့တဲ့ အစိုးရကို ကြည့်လိုက်ပေါ့နော်။ ကျနော်တို့ လွှတ်တော်တွင်းမှာ ဒါကို မေးခွန်းမေးဖူးပါတယ်။ သမ္မတကြီး ဦးသိန်းစိန်က ပါတီမှာ ဘာတာဝန်ရှိသလဲပေ့ါနော် အခု အခြေခံ ဥပဒေအရဆိုရင်။ ဘာပြောလိုက်လဲဆိုတော့ ပါတီရဲ့လုပ်ငန်းတွေကို မဆောင်ရွက်တာပဲ ရှိပါတယ်။ ဥက္ကဌက ဥက္ကဌ ပါပဲဆိုပြီး ဖြေခဲ့တဲ့ ပုဂ္ဂိုလ်ကြီး ရှိပါတယ်။ အဲတော့ ကျနော်တို့ ဥက္ကဌ ဒေါ်အောင်ဆန်းစုကြည်ဟာ ပွင့်ပွင့်လင်းလင်းပြောမယ် NLD ဥက္ကဌပါ။ ပါတီလုပ်ငန်းကို မဆောင်ရွက်တာပဲ ရှိမယ်။ ဒါကြောင့်မို့လို့ အတွင်းရေးမှူး အဖွဲ့ဝင် လုပ်ပေးထားလိုက်တာကို သတိထားမိမှာပေါ့နော်။ အဲတော့ ဒေါ်အောင်ဆန်းစုကြည် ကျနော်တို့ရဲ့ ဥက္ကဌနေရာမှာ ဒေါ်အောင်ဆန်းစုကြည် ရှိနေမယ်။ ပါတီလုပ်ငန်းတော့ မဆောင်ရွက်ဘူးပေါ့လေ။”
NLD ပါတီကို ပြန်လည်ဖွဲ့စည်းသွားဖို့ ရှိနေတဲ့အပေါ်မှာ ပါတီရဲ့ ရှေ့အလားလာနဲ့ ပတ်သက်ပြီး ပါတီနာယကကြီး ဦးတင်ဦးကတော့ အခုလို မှတ်ချက်ပေး ပြောဆိုလိုက်ပါတယ်။
“တာဝန်ကတော့ မကြီးပါဘူး။ အခါတိုင်းလိုပဲ ပူးပေါင်းပြီး လုပ်နေတဲ့အခါကျတော့ ပိုပြီး ကြီးလာတယ် မဟုတ်ပါဘူး။ ဒီလိုပဲ မှန်မှန်ပဲ လုပ်သွားကြတာပေါ့။ အခက်အခဲတခုက နှစ်ပေါင်း ၂၇ ခုနှစ်လုံးလုံး ကျော်လွှားပြီးပြီ။ နောက်ဟာကို ဆက်ပြီးတော့ ကျော်လွှားနိုင်ဖို့အတွက် ဆက်လုပ်နိုင်ဖို့အတွက်ကို လမ်းပွင့်သွားတယ်။ လုပ်နိုင်မယ်လို့ ထင်ပါတယ်။ ပြည်သူပြည်သားတွေကလည်း တပါတည်း ပူးပေါင်းလာပြီးတော့ ကျနော်တို့ချည်း NLD ချည်းပဲ လုပ်လို့မရဘူး။ အားလုံး ခုနက ပြောသလိုပဲ အားလုံးပြန်ပြီးတော့ ပေါင်းပြီး စည်းရုံးသွားပြီး ဆောင်ရွက်ဖို့အတွက် ဖိတ်ခေါ်ထားတဲ့အတွက် အဲဒီအတိုင်း လိုက်ပြီးတော့ အောင်မြင်အောင် လုပ်ဖို့ဆိုတဲ့ဟာ လမ်းပွင့်သွားတယ်။ ၀မ်းသာတယ်။”
ဗုဒ္ဓဟူးနေ့က အာဏာလွှဲပြောင်းပြီးပြီ ဖြစ်တာကြောင့် NLD ပါတီကနေ ရွေးချယ်တင်မြှောက်လိုက်တဲ့ သမ္မတ၊ ဒုသမ္မတ၊ ပြည်ထောင်စုဝန်ကြီးတွေနဲ့ ဖွဲ့စည်းပုံအခြေခံခုံရုံးအဖွဲ့ဝင်နဲ့ ဝန်ကြီးချုပ်တွေဟာ လာမယ့် ဧပြီ ၁ ရက်နေ့မှာ စတင် တာဝန်ထမ်းဆောင်တော့မှာ ဖြစ်ပါတယ်။

သမ္မတသစ်မိန့်ခွန်းအပေါ် တိုင်းရင်းသားတွေ သဘောထား

31.03.2016 

သမ္မတသစ် ဦးထင်ကျော် ကတိပြုလိုက်တဲ့ အမျိုးသားပြန်လည်သင့်မြတ်ရေး၊ ငြိမ်းချမ်းရေးနဲ့ ဖက်ဒရယ် ပြည်ထောင်စုတရပ် ဖြစ်ပေါ်ရေးတို့ဟာ တိုင်းရင်းသားတွေရဲ့ လိုလားချက်တွေနဲ့ ထပ်တူ ဖြစ်တယ်လို့ တိုင်းရင်းသားခေါင်းဆောင်တချို့က ပြောဆိုပါတယ်။ ဆယ်စုနှစ်တွေအတွင်း ပထမဆုံးအကြိမ် အများဆန္ဒနဲ့ ရွေးကောက်ခံထားရတဲ့ အစိုးရသစ်တရပ် အာဏာရလာတာဟာ အရပ်ဘက်အဖွဲ့အစည်းတွေ မျှော်မှန်းထားတဲ့ ပန်းတိုင်တ၀က်ကို ရောက်ပြီလို့လည်း အခွင့်အရေး လှုပ်ရှားသူတချို့က ပြောဆိုပါတယ်။ အပြည့်အစုံကို မသိင်္ဂီထိုက် စုစည်းတင်ပြထားပါတယ်။
မြန်မာအစိုးရအဆက်ဆက်ကို ဆယ်စုနှစ်ပေါင်းများစွာ လက်နက်ကိုင် တော်လှန်နေတဲ့ မြန်မာ့ သက်တမ်းအရှည်ဆုံး တိုင်းရင်းသား လက်နက်ကိုင်အဖွဲ့ကြီးဖြစ်တဲ့ ကရင့်အမျိုးသားအစည်းအရုံး KNU က သမ္မတသစ် ဦးထင်ကျော်ရဲ့ ကတိက၀တ်တွေကို ကြိုဆိုပါတယ်။ သမ္မတ ဦးထင်ကျော်ရဲ့ ကတိပြုချက်တွေက တိုင်းရင်းသားတွေရဲ့ လိုလားချက်နဲ့ ထပ်တူ ဖြစ်တယ်လို့ KNU ရဲ့ အထွေထွေ အတွင်းရေးမှူး ဖဒိုကွယ်ထူးဝင်း က ပြောပါတယ်။
“ဒီဖွဲ့စည်းပုံကို ခုနက ကျနော်တို့ပြောတဲ့ ဒီမိုကရေစီ ဖက်ဒရယ် ပြည်ထောင်စုစနစ်ကို ဖွဲ့စည်းမယ်ဆိုရင် ကျနော်တို့ တိုင်းရင်းသားတွေဘက်က ကျနော်တို့ မျှော်လင့်ချက်နဲ့ တထပ်တည်းဖြစ်တယ်။ နောက်ပြီးတော့ အခြေအနေကလည်း ပြည်သူကလည်း ရွေးကောက်လိုက်တဲ့ အစိုးရဖြစ်တယ်။ နောက် ကျနော်တို့ ဒီလို အခြေပြချခြင်းအားဖြင့် ဆက်လက်ပြီးတော့ အကောင်အထည်ဖော်မယ်။ တိုင်းရင်းသားလက်နက်ကိုင်အဖွဲ့အစည်းနဲ့ရော နောက်ပြီးတော့ နိုင်ငံတော်မှာရှိနေတဲ့ နိုင်ငံရေးအစုအဖွဲ့ အကုန်လုံး စုပေါင်းပြီးတော့ ဆောင်ရွက်မယ်ဆိုရင်တော့ ကျနော်တို့ ဟိုး လွန်ခဲ့တဲ့ ၁၉၄၀ ခုနှစ်က စပြီး နှိုင်းယှဉ်လာမယ်ဆိုရင်တော့ ပိုမို နီးစပ်လာတယ်လို့ မြင်ပါတယ်။”
အစိုးရသစ်ရဲ့ ကနဦး ဆောင်ရွက်ချက် တချို့ဟာလည်း တိုင်းရင်းသား သွေးစည်းညီညွတ်မှုကို ဦးတည်တာ တွေ့ရတယ်လို့လည်း KNU အထွေထွေ အတွင်းရေးမှူး ဖဒိုကွယ်ထူးဝင်းက ပြောပါတယ်။
“အခုလက်ရှိမှာ ကျနော်တို့ ဒီ နိုင်ငံ့တာဝန် ထမ်းဆောင်ရမယ့် လွှတ်တော်မှာ နောက်ပြီးတော့ ပြည်ထောင်စုအဆင့်၊ ၀န်ကြီးအဆင့် နောက်ပြီးတော့ ပြည်နယ်အဆင့်မှာလည်း ကျနော်တို့ တိုင်းရင်းသား ခေါင်းဆောင်တွေ တော်တော်များများ ပါဝင်လာခဲ့တာ တွေ့ရတဲ့အတွက်ကြောင့် ကျနော်တို့ရဲ့ တိုင်းရင်းသားကြားထဲမှာရှိတဲ့ နားလည်မှုတွေ ပိုမို မြင့်မားလာဖို့အတွက် ဆောင်ရွက်တာပဲလို့ ကျနော်တော့ ယုံကြည်ပါတယ်။”
မြန်မာအစိုးရနဲ့ တိုက်ပွဲတွေဖြစ်နေဆဲ လက်နက်ကိုင်အဖွဲ့တွေ ပါဝင်တဲ့ ညီညွတ်သော တိုင်းရင်းသား လူမျိုးများ ဖက်ဒရယ်ကောင်စီ UNFC ကတော့ သမ္မတသစ်ရဲ့ ကတိက၀တ်တွေကို ကြိုဆိုပြီး ဒီကတိက၀တ်တွေအတိုင်း အကောင်အထည် ဖော်ဆောင်လာနိုင်ဖို့ မျှော်လင့်တဲ့အကြောင်း ပြောပါတယ်။ UNFC ရဲ့ ဒုတိယဥက္ကဌ နိုင်ဟံသာ က အခုလို ပြောပါတယ်။
“ကျနော်တို့ မျှော်လင့်တာကတော့ နော် ဒေါ်အောင်ဆန်းစုကြည်လည်း ခဏခဏပြောတယ်။ NLD ရဲ့ သဘောထားအရဆိုရင် အခုကတော့ ဒီ တနိုင်ငံလုံး အပစ်အခတ်ရပ်စဲရေးနဲ့ တဘက်က နိုင်ငံကို ကျနော်တို့ တိုင်းရင်းသားစည်းလုံးညီညွတ်ရေးနဲ့ ငြိမ်းချမ်းရေးကို ဦးစားပေးပြီးတော့ အကောင်အထည် ဖော်မယ်ဆိုတဲ့ကိစ္စလေ ဒါကတော့ သိပ်ကို မှန်ကန်တဲ့ ရပ်တည်ချက်ဖြစ်တယ်။ ကျနော်တို့လည်း ဒါကို လိုလားတယ်။ အဲ့လို ရပ်တည်ချက်မျိုးရှိရင်တော့ ကျနော်တို့ကတော့ အကောင်အထည် ဖော်တဲ့နေရာမှာ ထိရောက် ကောင်းမွန်လာလိမ့်မယ်လို့တော့ ယုံကြည်တယ်။”
အစိုးရသစ်နဲ့ တနိုင်ငံလုံး အပစ်အခတ်ရပ်စဲနိုင်ရေး အချိန်မရွေး ဆွေးနွေးနိုင်ဖို့လည်း အဆင်သင့် ရှိနေတယ်လို့ UNFC က ပြောဆိုပါတယ်။ အစိုးရသစ် အာဏာလွှဲပြောင်း ရယူမှုအပေါ် အရပ်ဘက် လူမှု အသိုင်းအ၀ိုင်းတွေ ဘက်မှာလည်း မျှော်လင့်ချက်တွေ ရှိနေပါတယ်။ အခွင့်အရေး လှုပ်ရှားသူ မမေစပါယ်ဖြူ က အခုလို ပြောပါတယ်။
“လူမျိုးစုတွေနဲ့ ဖြစ်ပွားနေတဲ့ ပြည်တွင်းစစ်ပဋိပက္ခ ချုပ်ငြိမ်းရေးပေါ့ ပြည်ထောင်စု ငြိမ်းချမ်းရေးအတွက်ကို ဦးစားပေးပြီး ဖော်ဆောင်မယ်ဆိုတဲ့ ကတိစကားကို ကြားရတာတော့ ကျမတို့ဘက်ကတော့ ဒါ အားရကျေနပ်စရာတော့ ဖြစ်ပါတယ်။ ဘာကြောင့်လဲဆိုတော့ ပြည်တွင်းငြိမ်းချမ်းရေးကို ဖော်ဆောင်နိုင်မှပဲ ကျမတို့အားလုံး မျှော်လင့်တောင့်တတဲ့ ဒီမိုကရေစီနဲ့ နိုင်ငံဖွံ့ဖြိုးတိုးတက်ဖို့ဆိုတာ ဖြစ်လာနိုင်မယ်ပေါ့နော်။ နောက်တခုကတော့
 ပြည်တွင်းငြိမ်းချမ်းရေးကို ဖော်ဆောင်မယ်ဆိုတဲ့ နေရာမှာ စစ်မှန်တဲ့ ဖက်ဒရယ်စနစ်ကို အခြေခံတဲ့ ဖွဲ့စည်းပုံအခြေခံဥပဒေ လိုအပ်တယ်လေ။ အဲတော့ အဲဒါတွေနဲ့ ပတ်သက်ပြီး အစိုးရသစ်ဟာ ဦးစားပေးပြီး တာဝန်ယူ ဆောင်ရွက်သွားမယ် ဆိုပြီးတော့ ကျမ်းသစ္စာကျိန်ဆိုတဲ့နေရာမှာ ပြောသွားတာတွေကိုတော့ ကျမတို့က အများကြီးပဲ မျှော်လင့်ပါတယ်။”
သမ္မတသစ် ဦးထင်ကျော်ရဲ့ လက်ထက်မှာ ယုံကြည်ချက်ကြောင့် အကျဉ်းကျသူတွေ၊ ဖမ်းဆီးခံထားရသူတွေ လွတ်မြောက်လာဖို့နဲ့  အရပ်ဘက် အဖွဲ့အစည်းတွေနဲ့ အစိုးရသစ်ကြား ပူးပေါင်းဆောင်ရွက်မှုတွေ ရှိလာဖို့ မျှော်လင့်တဲ့ အကြောင်းလည်း အရပ်ဘက် အဖွဲ့အစည်းတွေက မျှော်လင့်နေကြပါတယ်။

VOA

သမ္မတသစ်တည်ခင်းတဲ့ ညစာ (ရုပ်/သံ)

 

မတ်လ ၃၀ ရက်နေ့ ပြည်ထောင်စုလွှတ်တော်မှာ ကတိသစ္စာပြုပွဲအခမ်းအနားကျင်းပပြီး သမ္မတသစ် ဦးထင်ကျော်က သမ္မတအိမ်တော်မှာ ညစာ စားပွဲနဲ့ ဧည့်ပရိသတ်တွေကို တည်ခင်းခဲ့ပါတယ်။ အစိုးရအဖွဲ့ဝင်၊ လွှတ်တော်အကြီးအကဲတွေ၊ တပ်ဘက် ခေါင်းဆောင်တွေ၊ သံတမန်တွေနဲ့ အထူးဖိတ်ကြားထားတဲ့ ဧည်သည်တွေ တတ်ရောက်ခဲ့ကြပါတယ်။

နိုင်ငံတော် အတိုင်ပင်ခံပုဂ္ဂိုလ်ဆိုင်ရာ ဥပဒေ ပြဌာန်းမည်

နိုင်ငံတော် သမ္မတအသစ် ဦးထင်ကျော်ထံ တာဝန်လွှဲပြောင်းပေးမှုအခမ်းအနား သို့ ဒေါ်အောင်ဆန်းစုကြည်တက်ရောက်စဉ် ( ဓါတ်ပုံ- MOI )

နိုင်ငံတော်၏ အတိုင်ခံပုဂ္ဂိုလ်ဆိုင်ရာ ဥပဒေကြမ်းတရပ်ကို ကြာသပတေးနေ့ ကျင်းပမယ့် အမျိုးသားလွှတ်တော်အစည်းအဝေးမှာ တင်သွင်းဖို့ရှိတယ်လို့ ကိုယ်တိုင်တင်သွင်းမယ့် လွှတ်တော်ကိုယ်စားလှယ်က ဗွီအိုအေကို အတည်ပြု ပြောဆိုပါတယ်။

သမ္မတဦးထင်ကျော် လက်မှတ်ထိုး ပြဌာန်းမယ့် နိုင်ငံတော်၏ အတိုင်ပင်ခံပုဂ္ဂိုလ်ဆိုင်ရာ ဥပဒေကို အမျိုးသားလွှတ်တော် ဥပဒေကြမ်းကော်မတီဝင် မကွေးတိုင်း မဲဆန္ဒနယ် အမှတ်(၄) ကိုယ်စားပြု အမျိုးသားလွှတ်တော်ကိုယ်စားလှယ် ဦးအောင်ကျော်ညွှန့်က မတ်လ ၃၁ ရက်နေ့ ကျင်းပမယ့် အမျိုးသားလွှတ်တော်အစည်းအဝေးမှာ တင်သွင်းမယ့်အကြောင်း ဗွီအိုအေကို အတည်ပြု ပြောပါတယ်။

ဗွီအိုအေက တွေ့ရတဲ့ ဥပဒေကြမ်းမှာ အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်ကို နိုင်ငံတော်အတိုင်ပင်ခံပုဂ္ဂိုလ်အဖြစ် ပြည်ထောင်စုလွှတ်တော်က တာဝန်ပေးအပ်တယ်ဆိုပြီး ဥပဒေမူကြမ်း အခန်း(၃)မှာ အတိအလင်း ဖော်ပြထားပါတယ်။ ဥပဒေရဲ့ ရည်ရွယ်ချက်တွေအဖြစ် ပါတီစုံဒီမိုကရေစီစနစ်ထွန်းကားရေး၊ ဈေးကွက်စီးပွားရေးစနစ် ပီပြင်ရေး၊ ဖယ်ဒရယ်ပြည်ထောင်စုနိုင်ငံတည်ဆောက်ရေး၊ ပြည်ထောင်စုငြိမ်းချမ်းရေးနဲ့ ဖွံဖြိုးတိုးတက်ရေးဆိုပြီး ဖော်ပြထားပါတယ်။ ၏

အတိုင်ပင်ခံပုဂ္ဂိုလ်ဟာ ဖွဲ့စည်းပုံအခြေခံဥပဒေပါ ပြဌာန်းချက်တွေနဲ့ မဆန့်ကျင်စေပဲ နိုင်ငံတော်နဲ့ နိုင်ငံသားတွေရဲ့ အကျိုးစီးပွားအတွက် အကြံပြုချက်တွေပေးဖို့၊ အကြံပြုချက်တွေ ဆောင်ရွက်ချက်တွေနဲ့ စပ်လျဉ်းပြီး ပြည်ထောင်စုလွှတ်တော်ကို တာဝန်ခံဖို့၊ အတိုင်ပင်ခံပုဂ္ဂိုလ်ဟာ ဒီဥပဒေပါ ရည်ရွယ်ချက်တွေကို အောင်မြင်စေဖို့အတွက် အစိုးရအဖွဲ့ ဌာနဆိုင်ရာတွေ အဖွဲ့အစည်းတွေ အသင်းအဖွဲ့တွေ လူပုဂ္ဂိုလ်တွေနဲ့ ဆက်သွယ်ဆောင်ရွက်ဖို့ စသည်အားဖြင့် ပြဌာန်းရေး ပါရှိပါတယ်။ အတိုင်ပင်ခံပုဂ္ဂိုလ်ရဲ့ ရာထူးသက်တမ်းဟာ နိုင်ငံတော်သမ္မတရဲ့ ရာထူးသက်တမ်းအတိုင်းဖြစ်ပြီး ဒီဥပဒေဟာလည်း ဒုတိယအကြိမ် ပြည်ထောင်စုလွှတ်တော်သက်တမ်းကာလမှာ တာဝန်ထမ်းဆောင်တဲ့ နိုင်ငံတော်သမ္မတရဲ့သက်တမ်းကာလအတွက် ဖြစ်ရမယ်လို့လည်း ထွက်ရှိနေတဲ့ ဥပဒေမူကြမ်းမှာ ရှင်းရှင်းလင်းလင်းဖော်ပြထားပါတယ်။

ဗွီအိုအေ (မြန်မာပိုင်း)

NLD ကိုယ်စားလှယ် ဦးညီပုကို ရခိုင်ပြည်နယ်ဝန်ကြီးချုပ် အတည်ပြုခန့်အပ်

ရခိုင်ပြည်နယ် ဝန်ကြီးချုပ်အသစ် ဦးညီပု ကို မတ်လ ၃ဝ ရက်နေ့က ရခိုင်ပြည်နယ်လွှတ်တော်မှာ တွေ့ရစဉ်

Photo: Min Thein Aung/RFA

ရခိုင်ပြည်နယ်ဝန်ကြီးချုပ်အဖြစ် NLD ပါတီ ဂွမြို့နယ် ပြည်နယ်လွှတ်တော်ကိုယ်စားလှယ် ဦးညီပုကို အဆိုပြုထားတာ ကို ရခိုင်အမျိုးသားပါတီက ကန့်ကွက်ခဲ့ပေမယ့် ပြည်နယ်လွှတ်တော်က ဒီကနေ့ အတည်ပြုခန့်အပ်လိုက်ပါတယ်။
ကန့်ကွက်မှုဟာ ဥပဒေလုပ်ထုံးလုပ်နည်းနဲ့ မညီတာကြောင့် အတည်ပြုခန့်အပ်ကြောင်း လွှတ်တော်ဥက္ကဌ ဦးစံကျော်လှက ကြေညာခဲ့ပါတယ်။
"လွှတ်တော်ကိုယ်စားလှယ် ဦးကျော်လွင်၏ ကန့်ကွက်လွှာမှာ တိုင်းဒေသကြီး သို့မဟုတ် ပြည်နယ်လွှတ်တော် ဝန်ကြီးချုပ်တစ်ဦး၏ သတ်မှတ်ထားသော အရည်အချင်းကို ကန့်ကွက်ခြင်း မဟုတ်ကြောင်း သိရှိရပါသည်၊ သို့ပါ၍ ၄င်းတင်သွင်းမှုမှာ ဥပဒေလုပ်ထုံးလုပ်နည်းနဲ့ မညီကြောင်း သိရှိရပါသဖြင့် ဂွမြို့နယ်မဲဆန္ဒနယ် အမှတ် ၂ မှ ပြည် နယ်လွှတ်တော်ကိုယ်စားလှယ် ဦးညီပုအား ခန့်အပ်ရန် ရခိုင်ပြည်နယ် လွှတတေ်ာက သဘောတူ အတည်ပြုကြောင်း ကြေညာအပ်ပါတယ်"
ဦးညီပုဟာ လာမယ့် ဧပြီလ ၁ရက်နေ့ ကျင်းပမယ့် ပြည်နယ်လွှတ်တော်မှာ ဝန်ကြီးချုပ်အဖြစ် ကျမ်းသစ္စာကျိန်ဆို မှာဖြစ်ပါတယ်။ ရခိုင်ပြည်နယ် ၀န်ကြီးချုပ်တာဝန်ကို ANP က တစ်ဦးဦးကို ခန့်အပ်ဖို့ စစ်တွေ၊ မြောက်ဦး နဲ့ ကျောက်ဖြူမြို့တွေမှာ တောင်းဆိုမှုတွေ ရှိခဲ့သလို၊ တောင်ကုတ်မြို့မှာ ဒေသခံတွေကလည်း ANP ပါတီရဲ့ တောင်းဆိုမှုတွေကို ကန့်ကွက်ကြောင်း ဒီကနေ့ ဆန္ဒပြကြပါတယ်။
အလားတူ ကချင်ပြည်နယ်လွှတ်တော်က ဒေါက်တာခက်အောင်ကို ကန့်ကွက်သူမရှိ အတည်ပြုလိုက် ပါတယ်။ ဒေါက်တာခက်အောင်က အစိုးရသစ်လက်ထက်မှာ ငြိမ်းချမ်းရေးကိစ္စကို ဒေါ်အောင်ဆန်းစုကြည်ရဲ့ ဦးဆောင်မှုနဲ့ ကြိုးပမ်းသွားမယ်လို့ ပြောပါတယ်။
"ကျနော်တုိ့ ကချင်ပြည်နယ်အနေနဲ့ သတ်သတ်ကြီး ငြိမ်းချမ်းရေးကို အကောင်အထည်ဖော်လို့ မရဘူး၊ ဒီတော့ ပြည်ထာင်စုကနေပြီးတော့ ဖော်ဆောင်တဲ့ ငြိမ်းချမ်းရေးအပေါ်မှာပဲ ကချင်ပြည်နယ်ရဲ့ ငြိမ်းချမ်းရေးလည်း မူတည်မှာဖြစ်ပါတယ်၊ ငြိမ်းချမ်းရေးကို ကော်မတီအသစ်တွေ ထပ်ဖွဲ့ပြီးတော့ ကျနော်တို့ရဲ့ဥက္ကဌ ဒေါ်အောင်ဆန်း စုကြည် ကနေ ဦးဆောင်ပြီးတော့ လက်နက်ကိုင်အဖွဲ့အစည်းတွေ အားလုံးပါဝင်လာနိုင်အောင် ဆောင်ရွက် ပြီးတော့ အကောင်အထည်ဖော်သွားမှာဖြစ်ပါတယ်"
ကချင်ပြည်နယ်ဝန်ကြီးချုပ် ဒေါက်တာခက်အောင်က လူမှုရေးရာဝန်ကြီးဌာနကိုလည်း ပူးတွဲတာဝန်ယူသွား မှာဖြစ်ပြီး ပြည်နယ်အစိုးရအဖွဲ့မှာ ၀န်ကြီးဌာန ၅ ခုနဲ့ တိုင်းရင်းသားရေးရာဝန်ကြီး ၄ ဦး ရှိမှာဖြစ်ပါတယ်။
ဒီနေ့ ကချင်ပြည်နယ်လွှတ်တော်ကို မြစ်ကြီးနား၊ မိုးညှင်း၊ မိုးကောင်း၊ နမ္မတီး၊ ဟိုပင်၊ ဝိုင်းမော် စတဲ့ မြို့နယ်တွေက NLD ပါတီဝင် ၉၀ လောက် တက်ရောက်လေ့လာခဲ့ပါတယ်။
RFA

သမ္မတ အာဏာလွှဲပြောင်းမှု အထိမ်းအမှတ် ညစာစားပွဲ သျှမ်းခေါင်းဆောင် ခွန်ထွန်းဦး ဖိတ်ကြားခံရခြင်းမရှိ

NLD အမျိုးသား ဒီမိုကရေစီအဖွဲ့ချုပ်မှ တင်မြောက်သည့် သမ္မတဖြစ်သော သမ္မတ ဦးထင်ကျော် ၏ အာဏာ လွှဲပြောင်းရယူနိုင်မှု အထိမ်းအမှတ်အနေဖြင့် နေပြည်တော်တွင် မတ်လ ၃၀ ရက်နေ့ ညပိုင်းတွင် ကျင်းပမည့် ညစာစားပွဲသို့ တက်ရောက်ရန် နိုင်ငံရေးအင်အားစုများမှာ ဖိတ်ကြားခံရသော်လည်း သျှမ်းခေါင်းဆောင် ခွန်ထွန်းဦးနှင့် သူ၏ ပါတီဖြစ်သည့် SNLD သျှမ်းတိုင်းရင်းသားများ ဒီမိုကရေစီအဖွဲ့ချုပ်မှာ ဖိတ်ကြားခံရခြင်း မရှိကြောင်း SNLD ပါတီ တာဝန်ရှိသူထံမှ သိရသည် ။

"ကျနော်တို့ကို မဖိတ်ဘူးဗျ။ ၈၈ က ကိုမင်းကိုနိုင်ကိုတော့ ဖိတ်တယ်လို့ ကြားတယ် ။ " ဟု ပါတီအထွေထွေအတွင်း ရေးမှူးဦးစိုင်းညွှန့်လွင်က ပြောသည် ။


သမ္မတ အိမ်တော်တွင်ပြုလုပ်မည့် အဆိုပါ ညစာစားပွဲသို့ သမ္မတ ဦးသိန်းစိန်အစိုးရ အဖွဲ့မှ တာဝန်ရှိသူအချို့ တက်ရောက်မည်ဖြစ်သော်လည်း တက်ရောက်ရမည့် ပုဂ္ဂိုလ်များအတွက် ဖိတ်ကြားမှုကို NLD အမျိုးသား ဒီမိုကရေစီ အဖွဲ့ချုပ်ဘက်မှ စီစဉ်ခဲ့ခြင်းဖြစ်သည်ဟု သမ္မတရုံးတာဝန်ရှိသူအချို့ကလည်း အတည်ပြုပြော ဆိုသည် ။


ပရိသတ် ရာနှင့်ချီတက်ရောက်မည့် ညစာစားပွဲသို့ ဒီမိုကရေစီ အင်အားစုအမြောက်မြားတက်ရောက်ဖွယ်ရှိ သော်လည်း ဦးခွန်ထွန်းဦးနှင့် SNLD ပါတီကို ချန်လှပ်ခဲ့ခြင်းမှာ NLD အစိုးရအဖွဲ့တွင် ပူးပေါင်းပါဝင်ရန် SNLD ဘက်မှ ငြင်းဆန်မှုနှင့် ပတ်သက်နိုင်ကြောင်းလေ့လာသူအချို့ကလည်း သုံးသပ်သည် ။


‘ ဦးခွန်ထွန်းဦးကို ဖိတ်ချင်ရင် တကယ်လို့ နိုင်ငံရေးပါတီအနေနဲ့ မဖိတ်ရင်တောင် တိုင်းရင်းသားခေါင်းဆောင် အနေ နဲ့ သို့မဟုတ် ကာလရှည် ဒီမိုကရေစီ မဟာမိတ်အနေနဲ့ ဖိတ်လို့ ရတာပဲ ‘ ဟု အမည်မဖော်လိုသူလေ့လာသူ တဦးက မေးခွန်းထုတ်သည် ။


၈၈ မျိုးဆက်များကို အဆိုပါ အခမ်းနားသို့ တက်ရောက်ရန် ဖိတ်ကြားရာတွင်လည်း NLD နှင့် ပြေလည်သည့် ကိုမင်းကိုနိုင်တစ်ဦးတည်းကိုသာ နာမည်တပ်၍ ဖိတ်ကြားခဲ့ပြီး တက်ရောက်ခွင့်ရှိသူ အခြားတစ်ဦးမှာ ကိုမင်းကိုနိုင် ထိုင်ရမည့် ထိုင်ခုံနံပတ်နှင့် အမှတ်စဉ် ရာနှင့်ချီကွာဝေးသည့် နေရာတွင် ဖြစ်နေသည် ။


၈၈ မျိုးဆက်ခေါင်းဆောင်များအဖြစ် ကိုမင်းကိုနိုင်နှင့် ကိုကိုကြီးတို့ကို ပြည်သူများက ရှူမြင်ထားပြီး ကိုကိုကြီးမှာ NLD အမျိုးသားဒီမိုကရေစီအဖွဲ့ချုပ်က ရွေးကောက်ပွဲကိုယ်စားလှယ်လောင်းရွေးချယ်ရာတွင် ချန်လှပ်ခဲ့သည့် နောက်ပိုင်းနိုင်ငံရေးပါတီ တည်ထောင်မည်ဟု ကြေငြာထားခဲ့သူဖြစ်သည် ။


သျှမ်းတိုင်းရင်းသားများ ဒီမိုကရေစီအဖွဲ့ချုပ် ဥက္ကဌ ဦးခွန်ထွန်းဦးမှာ သျှမ်းပြည်နယ်ဝန်ကြီးချုပ် နေရာအတွက် SNLD ပါတီဝင်အား ပေးရန် မီဒီယာများကို ပြောဆိုမှုရှိခဲ့ဖူးပြီး NLD မှ ယင်းရာထူးရယူရန်သေချာခဲ့သည့် နောက် SNLD ပါတီမှာ NLD မှ ကမ်းလှမ်းခဲ့သည့် ပြည်ထောင်စု တိုင်းရင်းသားရေးရာဝန်ကြီးရာထူး ကို လည်း ငြင်းဆန်ခဲ့ပါသည် ။
သျှမ်းသံတော်ဆင့်