ထားဝယ်သားပိုင် လေကြောင်းလိုင်း လာမည့်အပတ် စတင်ပြေးဆွဲမည်

|Dawei Watch| ထားဝယ်၊ ဧပြီ ၂

ထားဝယ်တိုင်းရင်းသား စီးပွားရေးလုပ်ငန်းရှင်တစ်ဦး ပိုင်ဆိုင်သည့် Apex လေကြောင်းလိုင်းကို 

ဧပြီလ ၇ ရက်နေ့ စတင်၍ ပြေးဆွဲသွားမည်ဖြစ်ကြောင်း အဆိုပါလေကြောင်းလိုင်းထံမှ သိရသည်။

Apex လေကြောင်းလိုင်း ဖွင့်ပွဲအခမ်းအနားကို ဧပြီလ ၂ ရက်နေ့ နံနက်ပိုင်းတွင် ထားဝယ်လေဆိပ်နှင့် ထားဝယ်မြို့ မြို့တော် ခန်းမတို့တွင် ကျင်းပခဲ့ပြီး လာမည့် ဧပြီလ ၇ ရက်နေ့မှ စတင်၍ နေပြည်တော်- ရန်ကုန်-ထားဝယ်-မြိတ်-ကော့သောင်း တို့ကို နေ့စဉ် ပုံမှန်ပြေးဆွဲသွားမည်ဖြစ်ကြောင်း ယင်းလေကြောင်းလိုင်းထံမှ သိရသည်။

Apex လေကြောင်းလိုင်းသည် နေပြည်တော်တွင် အခြေစိုက်ပြီး ATR72-600 အမျိုးအစား လေယာဉ်တစ်စီးဖြင့် စတင် ပြေးဆွဲမည်ဖြစ်သည်။

“ဒုတိယ လေယာဉ်တွေ၊ တတိယ လေယာဉ်တွေရလာရင် ဒေသကလူတွေအတွက် ရနောင်းကို၊ ဘန်ကောက်ကို တိုက်ရိုက်ပျံသန်းပြေးဆွဲမယ်” ဟု Apex လေကြောင်းလိုင်းဥက္ကဋ္ဌ ဦးခင်စိုးကလေကြောင်းလိုင်းဖွင့်ပွဲတွင် ပြောကြားခဲ့သည်။

လေယာဉ်ခ သတ်မှတ်နှုန်းထားကို ပရိုမိုးရှင်းကာလတွင် နေပြည်တော်-ရန်ကုန် ၆၃၀၀၀ကျပ်၊ ရန်ကုန်-ထားဝယ် ၆၃၀၀၀ ကျပ်၊ ထားဝယ်-မြိတ် ၄၇၀၀၀ကျပ်၊ မြိတ်-ကော့သောင်း ၄၇၀၀၀ ကျပ်၊ ရန်ကုန်-ကော့သောင်း ၁၀၂၀၀၀ကျပ်၊ ရန်ကုန်-မြိတ် ၈၃၀၀၀ ကျပ် စသဖြင့် အသီးသီးသတ်မှတ်ထားကြောင်း ယင်းလေကြောင်းလိုင်းမှ ထုတ်ပြန်ကြေညာထားသည်။

ပရိုးမိုးရှင်းကာလ အပိုင်းအခြားကိုမူ ထပ်မံထုတ်ပြန်ပေးမည်ဖြစ်ကြောင်း Apex လေကြောင်းလိုင်းမှ ပြောရေးဆိုခွင့်ရှိသူတစ်ဦးက ပြောသည်။

Apex Airline ဥက္ကဋ္ဌ ဖြစ်သူဦးခင်စိုးသည် ထားဝယ်အများပိုင်ကုမ္ပဏီဖြစ်သည့် DDPC ကုမ္ပဏီတွင်လည်း ဥက္ကဋ္ဌအဖြစ် တာဝန်ယူထားသူ ဖြစ်သည်။

Apex လေကြောင်းလိုင်းတွင် DDPC ကုမ္ပဏီမှ ရှယ်ယာအချို့ပါဝင်ထားကြောင်း ယင်းလေကြောင်းလိုင်းထံမှ သိရသည်။

Dawei Watch