ရန်ကုန်၊ ဒီဇင်ဘာ ၂၂
ဆန္ဒပြ တောင်းဆိုမှုများ မကြာခဏ ဖြစ်ပွားလေ့ ရှိသည့် ရန်ကုန်တိုင်းဒေသကြီး အရှေ့ဒဂုံစက်မှုဇုန် အတွင်းရှိ Myanmar Handsome အထည်ချုပ် စက်ရုံတွင် လုပ်သား ခေါင်းဆောင် ၁၆ ဦး အလုပ် ထုတ်ခံရသဖြင့် လုပ်သား ၁၃၀ ကျော် ဒီဇင်ဘာလ ၁၀ ရက်နေ့မှ စတင်ကာ သပိတ်စခန်းဖွင့်ကာ ၁၂ ရက် ကြာသည်အထိ ဆန္ဒပြ တောင်းဆို နေသော်လည်း ပြေလည်မှု မရရှိသေးကြောင်း ဆန္ဒပြ လုပ်သားများက ပြောကြားသည်။
စက်ရုံတွင် အလုပ်ဌာနအလိုက် ကြီးကြပ်သူ ခေါင်းဆောင် ၁၆ ဦးက လက်ရှိ ရရှိနေသည့် တစ်လလုပ်အားခ ကျပ်ရှစ်သောင်းကို ကျပ် ၁၈၀,၀၀၀ ကျပ်သို့ တိုးမြှင့်ပေးရန် တောင်းဆိုရာ အလုပ်ရှင်က ကျပ် ၁၂၀,၀၀၀ တိုးမြှင့် ပေးကြောင်း၊ လုပ်သား ခေါင်းဆောင်များက ၁၅၀,၀၀၀ ပေးရန် ထပ်မံတောင်းဆိုရာ အလုပ်ရှင်က ကျပ် ၁၅၀,၀၀၀ နှုန်းဖြင့် သုံးလစာ လုပ်အားခပေးကာ အလုပ်ထုတ်ခဲ့ခြင်း ဖြစ်ကြောင်း လုပ်သားတစ်ဦးဖြစ်သူ ဒေါ်စုစုဝင်းက ပြောကြားသည်။
အဆိုပါ ပြဿနာ များကြောင့် အလုပ်ထုတ်ခံ ထားရသည့် ခေါင်းဆောင် များကို အလုပ်ပြန်လည် ခန့်ထားရန်၊ တစ်နာရီ လုပ်အားခ ကျပ်၂၅၀ ပေးရန်၊ အထည်ဆုကြေးများ ချုပ်သည့်အတိုင်း ပေးရန် အပါအဝင် အချက် ၁၇ ချက်ကို လုပ်သား ၁၃၇ ဦးက တောင်းဆိုနေကြောင်း လုပ်သားများထံမှ သိရှိရသည်။
တောင်းဆိုထားသည့်အချက် ရရှိခြင်း မရှိသဖြင့် ခုံသမာဓိအဖွဲ့သို့ တင်ပြထားကြောင်း အထက်ပါ လုပ်သားများထံမှ သိရှိရသည်။
အဆိုပါ ကိစ္စရပ်နှင့် ပတ်သက်၍ Myanmar Handsome အထည်ချုပ်စက်ရုံမှ မန်နေဂျာ တစ်ဦးထံ ဆက်သွယ် မေးမြန်းခဲ့ရာ မှတ်ချက်ပေးလိုခြင်း မရှိသေးကြောင်း ပြန်လည် ဖြေကြားသည်။
လုပ်သား ၃၃၀ ကျော်ရှိသည့် Myanmar Handsome အထည်ချုပ် စက်ရုံတွင် ၂ နှစ်အတွင်း ဆန္ဒပြမှုငါးကြိမ် ဖြစ်ပွားဖူးကြောင်း လုပ်သားများထံမှ သိရှိရသည်။
The Voice Weekly
