 |
| မောင်ဆောင်းခ |
သမ္မတဟောင်း ဦးသိန်းစိန်ကို ထိခိုက်တဲ့ ကဗျာရေးသားပြီး ဖေ့စ်ဘွတ်ခ်မှာ တင်ခဲ့တာကြောင့် ကဗျာဆရာမောင်ဆောင်းခ (ခေါ်) ကိုအောင်စည်သူကို ဆက်သွယ်ရေး ဥပဒေပုဒ်မ ၆၆ (ဃ) နဲ့ ဒီကနေ့ ရွှေပြည်သာမြို့နယ်တရားရုံးမှာ စွဲဈက်တင်စစ်ဆေးနေပါတယ်။
မောင်ဆောင်းခဟာ ပြီးခဲ့တဲ့နှစ် အောက်တိုဘာ ၅ ရက်မှာ ဖမ်းဆီးခံခဲ့ရတာဖြစ်ပြီး လက်ရှိ အင်းစိန်အကျဉ်းထောင်မှာ ထိန်းသိမ်းထားကာ လာမယ့်မေ၅ ရက်ဆိုရင် ၆ လပြည့်ပြီဖြစ်လို့ အမှုကို အမြန်စစ်ပြီး အမြန်မိန့်ချစေချင်တယ်လို့ မောင်ဆောင်းခရဲ့မိခင် ဒေါ်မြင့်မြင့်နိုင်က ပြောပါတယ်။
“သားကို ချမှာဆိုရင်လည်းချ။ မချဘူးဆိုရင်လည်း လွှတ်မယ်ဆိုရင်လွှတ်။ အခုက အဲလိုလည်း မဟုတ်ဘူး။ ကြားထဲမှာလည်း ရုံးချိန်းတွေကို ရုံးချိန်းအတိုင်းလည်း မစစ်ဘူး။ တရားလိုပြ သက်သေတွေလည်း ပုံမှန်မလားဘူး။ ဒါနဲ့ပဲရက်တွေ ကြာနေတယ်။ ”
ကဗျာဆရာ မောင်ဆောင်းခဟာ ဆက်သွယ်ရေး ဥပဒေပုဒ်မ ၆၆ (ဃ)နဲ့ နိုင်ငံတော် အကြည်ညိုပျက်စေမှု ပုဒ်မ ၅၀၅ (ခ)တို့နဲ့ တရားစွဲဆိုခံထားရတာဖြစ်ပေမယ့် ပုဒ်မ ၅၀၅ (ခ) ကိုတော့ ဧပြီ ၈ ရက်က ရုပ်သိမ်းပေးခဲ့တာပါ။
ကဗျာဆရာမောင်ဆောင်းခကတော့ သူဟာကဗျာတစ်ပုဒ်သာ ရေးသားခဲ့တာဖြစ်ပြီး ကဗျာထဲက သမ္မတဆိုတာ ဘယ်နိုင်ငံကသမ္မတရယ်လို့ ရည်ညွှန်းခဲ့တာ မဟုတ်ကြောင်း ဘယ်သူကို ရည်ညွှန်းတယ်ဆိုတာ ဖတ်တဲ့လူနဲ့သာ သက်ဆိုင်တဲ့အတွက် အပြစ်မရှိကြောင်းတရားရုံးကို ပြန်လည်ချေပခဲ့ပါတယ်။
ဒီအမူအတွက် မြန်မာနိုင်ငံ ကဗျာဆရာသမဂ္ဂက အတွင်းရေးမှူးအပါအဝင်ကဗျာ ဆရာနှစ်ဦးက သက်သေအဖြစ် ပြန်လည်ထွက်ဆိုချေပသွားမှာ ဖြစ်ပါတယ်။
DVB
