ထားဝယ်မြို့နယ်စည်ပင် အရပ်ရပ် အခွင့်အရေးလိုင်စင်ကြေး ကျပ် သိန်း ၃၀၀၀ ကျော်ရ

|Dawei Watch| ထားဝယ်၊ မေ ၂

၂၀၁၆-၂၀၁၇ ဘဏ္ဍာရေးနှစ် အတွက် ထားဝယ်မြို့နယ်စည်ပင်သာ ယာရေးအဖွဲ့၏ အရပ်ရပ်အခွင့်အရေး လိုင်စင် ၂၅ခုအား လေလံတင်ရောင်းချရာ ငွေကျပ်သိန်းပေါင်း ၃၀၀၀ ကျော် ရရှိ ခဲ့ကြောင်း ထားဝယ်မြို့နယ် စည်ပင် သာယာရေးအဖွဲ့ထံမှ သိရသည်။

ထားဝယ်မြို့နယ်အတွင်းရှိ ဈေး ကောက်လိုင်စင် ၄ခု၊ ဘီးကောက် (မြို့ ဝင်ကြေး)လိုင်စင် ၃ခု ၊ သားသတ် လိုင်စင် ၄ခု၊ ဈေးအိမ်သာကောက်ခံခွင့် လိုင်စင် ၃ ခု၊ ယာဉ်ရပ်နားစခန်း ဝင်ခွင့် ကောက်ခံမှုလိုင်စင် ၂ခု၊ ဈေးများ စက် ဘီး/ဆိုင်ကယ် အပ်နှံခွင့်လိုင်စင် ၂ ခုနှင့် အပေါင်ဆိုင်လိုင်စင် ၇ခုအား လိုင်ကိုင် ခွင့်လိုင်စင် လေလံတင်ရာမှ ငွေကျပ် သိန်းပေါင်း ၃၂၀၀ သိန်း ရရှိ ခဲ့သည်ဟု ထားဝယ်မြို့နယ် စည်ပင် သာယာရေး အဖွဲ့မှ တာဝန်ရှိသူတစ်ဦးက ဆိုသည်။

“သတ်မှတ် နှုန်းထားအတိုင်း ကောက်ခံတာကိုပဲ ခွင့်ပြုတာ၊ ကျော်လွန် ကောက်ခံရင် လိုင်စင်ပိတ်သိမ်းတဲ့အထိ အရေးယူသွားမယ်”ဟု အဆိုပါ တာဝန် ရှိသူက ပြောသည်။

လိုင်စင်ကြေးမြင့်တက်ကာ ကောက်ခံမှုနှုန်းထားများ မြင့်တက် လာပြီး ကုန်ဈေးနှုန်း မတည်မငြိမ်ဖြစ် လာမည်ကို စိုးရိမ် သောကြောင့် လေလံ အပြိုင်ခွင့်ပြုခြင်း နည်းပါးကာ တိုင်းအစိုးရခွင့်ပြုချက်ဖြင့် သက်တမ်းတိုး လုပ်ကိုင်သည်က ပိုများကြောင်း ယင်း တာဝန်ရှိသူက ပြောသည်။

၂၀၁၅-၂၀၁၆ဘဏ္ဍာရေးနှစ်တွင် ထားဝယ်မြို့ နယ်စည်ပင်သာယာရေး အဖွဲ့၏ အရပ်ရပ်အခွင့်အရေးလိုင်စင် လေလံ တင်ရောင်းချရာမှ ငွေကျပ် သိန်းပေါင်း ၃၁၉၀ သိန်းရရှိခဲ့ကြောင်း ထားဝယ်မြို့နယ် စည်ပင်သာယာရေး အဖွဲ့ထံမှ သိရသည်။

ယင်း အရပ်ရပ်အခွင့်အရေး လိုင် စင်မှ ရရှိငွေနှင့် စားသောက်ဆိုင်၊ စတိုးဆိုင်၊ စက်ရုံ အလုပ်ရုံ လိုင်စင် ကြေးနှင့် အဆောက်အဦး စစ်ဆေးခ အစရှိသည့် အခွန်အကောက်တို့မှ ရရှိ ငွေအား မြို့ဖွံ့ဖြိုးရေးလုပ်ငန်းများ ဆောင်ရွက်ရာတွင် အသုံးပြုသည်ဟု ထားဝယ်မြို့နယ် စည်ပင်သာယာ ရေးအဖွဲ့မှ သိရသည်။



Dawei Watch