ဦးနေမျိုးဝေကို ဆက်သွယ်ရေးဥပဒေပုဒ်မ ၆၆(ဃ) နဲ့ အမှုဖွင့်

နိုင်ငံတော်သမ္မတအပါအ၀င် နိုင်ငံ့အကြီးအကဲတွေကို ဖေ့ဘွတ်စ်မှာ ပုတ်ခတ်ရေးသားခဲ့တဲ့အတွက် မတူကွဲပြားခြင်းနှင့် ငြိမ်းချမ်းရေးပါတီ ဥက္ကဌ ဦးနေမျိုးဝေ ကို ဆက်သွယ်ရေးဥပဒေပုဒ်မ ၆၆ (ဃ)နဲ့ မြန်မာနိုင်ငံလုံးဆိုင်ရာ ဆရာ၊ ဆရာမများသမဂ္ဂအဖွဲ့ချုပ် က ဦးဝေယံအောင်က ဧရာဝတီတိုင်း ဒေသကြီး ကန်ကြီးထောင့်မြို့နယ် ရဲစခန်းမှာ မနေ့က အမှုဖွင့်လိုက်ပါတယ်။

ဦးနေမျိုးဝေဟာ နိုင်ငံတော်သမ္မတ၊ ဒေါ်အောင်ဆန်းစုကြည်နဲ့ တပ်မတော်ကာကွယ်ရေးဦးစီးချုပ်တို့ကို ဂုဏ်သိက္ခာကျဆင်းအောင် နဲ့ ပြည်ထောင်စုပြိုကွဲအောင် သွေးထိုးရေးသားမှုတွေ လုပ်နေတာကြောင့် အမှုဖွင့်တာဖြစ်တယ်လို့ ဦးဝေယံအောင်က ပြောပါတယ်။

ဦးနေမျိုးဝေ ကို ဖမ်းဆီးဖို့ပြင်ဆင်နေကြောင်း ကန်ကြီးထောင့်ရဲစခန်းက အမှုစစ်ရဲအုပ် သိန်းလွင် က ပြောပါတယ်။

ဦးနေမျိုးဝေ ဟာ သူ့ရဲ့ဖေ့ဘွတ်စ်စာမျက်နှာမှာ ပြီးခဲ့တဲ့ ဧပြီလ ၂၅ ရက်နေ့ကနေ ၃၀ရက်နေ့အထိ နိုင်ငံအကြီးအကဲတွေကို အသရေဖျက်တဲ့ စာသားတွေနဲ့ အန်အယ်လ်ဒီပါတီကို ပုတ်ခတ်တဲ့ စာသားတွေကို ၁၅ကြိမ်လောက် ရေးပြီးတင်ခဲ့တာဖြစ်တယ်လို့ ဦးဝေယံအောင်က ပြောပါတယ်။

RFA Burmese