 |
| လားရှိုးမြို့လယ် မန်ဆူကျောင်းရောက် ဒုက္ခသည်များ |
“ အခု လားရှိုးမြို့ မန်ဆူ(သျှမ်း)ကျောင်းတိုက်မှာ ကျမတို့ ၉၇ ဦးရောက်တယ် ။ သျှမ်းတွေချည်းဘဲ ။ အဲဒီ ၉၇ ယောက်က ဝမ့်လုံရွာ နဲ့ နောင်နွေးရွာဘဲ ။ များသော အားဖြင့် ပုခက်သွင်းခလေးတွေနဲ့ အဖိုးအဖွားတွေများတယ် ။ နီးစပ်တဲ့ အသိမိတ်ဆွေတွေ အိမ်နီးနားချင်းတွေရဲ့ ထော်လာဂျီတွေ ၊ ၆ လုံးထိုးကားတွေ ရှိတဲ့ သူတွေနဲ့ လိုက်လာတာ ။ ဝမ်လုံရွာ တရွာတည်းဘဲ အိမ်ခြေ ၈၀ ကျော် တယ် ။ လူဦးရေက ၃၀၀ ကျော် တယ် ။ အများအားဖြင့်တော့ သံလွင်ရွာနဲ့ ၊ နမ့်ပေါင်ရွာ စတဲ့ နီးစပ်ရာ အမျိုးတွေဆီ ထွက်ပြေးကြတယ် ။ တိုက်လေ ယာဉ် နဲ့ ဘဲ သုံးလေး ကြိမ်လာတိုက်တယ် ဒီနေ့ ” - ဟု လားရှိုးမြို့ရောက် စစ်ဘေးရှောင် သားသည်မိခင် တဦးက ပြောသည် ။
နမ့်မ နှင့် နားနျု ကျေးရွာအုပ်စု အတွင်းရှိ ရမခ အရှေ့မြောက်ပိုင်းတိုင်း စစ် ဌာန ချုပ် လက်အောက်ခံ လားရှိုးအခြေစိုက် ခလရ ၄၁ ၊ ၆၈ စသည့် တပ်ရင်း များ စုပေါင်းအင်အား ၃၀၀ ကျော် က တိုက်ပွဲဝင် စစ်ရဟတ်ယာဉ် ၂ စီး နှင့် အတူ ထိုးစစ်ဆင်တိုက်ခိုက်ခဲ့သည်ဟု ဆိုသည် ။
“ နှစ်ကြိမ်တိုင်တိုင် တိုက်လေယာဉ်နဲ့ လာတိုက်တယ် ။ မွန်းတည့်ချိန်က တခါ ၊ မွန်းလွဲ ပိုင်းတုန်းကတော့ နာရီဝက်လောက် လှည့်ပတ်တိုက်ခိုက်တယ် အဲဒီ စစ်လေယာဉ်က ” - ဟု ဌာနချုပ်အရာရှိ တပ်မှူး က ပြောသည် ။
ထို့အတူ တပ်မတော်သည် ကျောက်မဲမြို့နယ်အတွင်း SSPP/SSA နှင့် ၎င်း၏မဟာမိတ် TNLA တအာင်းပလောင် တပ်ဖွဲ့တို့ အပေါ် ထိုးစစ်ဆင် မှုကြောင့် ဒေသခံ နှစ်ထောင်ခန့် စစ်ဘေး ရှောင်ခဲ့ရသည် ။
သျှမ်းသံတော်ဆင့်
