ထားဝယ်မြို့ မြို့တော်ခန်းမတွင်ဖေဖေါ်ဝါရီ ၂၈ရက်နေ့က ပြုလုပ်သော သန်းခေါင်စာရင်းဆိုင်ရာ ဆွေးနွေးပွဲတွင် ထားဝယ်လူမျိုးဆိုသည်မှာ
မရှိကြောင်း၊ထားဝယ်လူမျိုးသည် တိုင်းရင်းသား ၁၃၅မျိုးတွင်မပါဝင်ကြောင်း ထားဝယ်ခရိုင်အုပ်ချုပ်ရေးမှူး ဦးကျော်ဆွေ ပြောဆိုခဲ့ခြင်းနှင့် ပတ်သက်၍ ထားဝယ်လူထုမှ မကြေမနပ်ဖြစ်နေကြသည်။
တနင်္သာရီအပတ်စဉ်ဂျာနယ် အယ်ဒီတာကလည်း မတ်လ ၃-၂၀၁၄ နေ့ထုတ် ဂျာနယ်တွင် ဤကဲ့သို့ မေးခွန်းများထုတ်ထားသည်။
“ဒေသတစ်ခု၏ အကြီးမားဆုံးသောအမှတ်သင်္ကေတဖြစ်သည့် လူမျိုးဟူသည့် သင်္ကေတကိုပင် နားလည်ခြင်းမရှိဘဲ ယင်းဒေသကိုမည်သို့အုပ်ချုပ်နေသနည်း။”
“ယင်းသို့ နားမလည်ဘဲ အုပ်ချုပ်နေသူ မည်မျှရှိသနည်း။”
“ထို့သို့ နားမလည်သည့်အုပ်ချုပ်သူများကြောင့် ပဋိပက္ခများ မည်မျှအထိဖြစ်နေသနည်း”
ဆက်လက်၍
“အုပ်ချုပ်သူများအနေဖြင့် သက်ဆိုင်ရာဒေသ၏ အထိအရှမခံသည့် ကိစ္စများကို ထဲထဲဝင်ဝင် နားလည်ထားရန်လိုအပ်သည်။
မိမိနားမလည်လျှင်လည်း လက်လွတ်စပယ်မပြောဆိုရန် လိုပေသည်။
ထိုသို့နားမလည်ခြင်းကြောင့် ဆုံးဖြတ်ချက်အမှားများ လုပ်ထုံးလုပ်နည်းအမှားများ ဖြစ်လာနိုင်ပြီး ဒေသတွင်း ပဋိပက္ခများကို ဖန်တီးသကဲ့သို့ဖြစ်မည်ဖြစ်သည်။
အုပ်ချုပ်သူများသည် ပဋိပက္ခများကိုလျော့နည်းအောင်ကိုင်တွယ်သူများသာဖြစ်သင့်သည်။
ပဋိပက္ခများကိုဖန်တီးသူများ မဖြစ်သင့်ကြောင်း ပြောလိုရင်းဖြစ်သည်။” ဟု တနင်္သာရီအပတ်စဉ်ဂျာနယ် အယ်ဒီတာကပင် ၄င်းဂျာနယ်တွင်အကြံပြုထားသည်။
မိမိနေထိုင်ရာဒေသရှိ ပြည်သူလူထုသည် မည်သည့်လူမျိုးများဖြစ်သည် မည်သည့်တိုင်းရင်းသားများဖြစ်ကြသည်ဆိုသည်ကိုပင် မသိသော အုပ်ချုပ်ရေးမှူးများကို
ဤဒေသမှ တခြားသို့ ပြောင်းရွှေ့လိုက်ခြင်းသည်သာအသင့်တော်ဆုံးဖြစ်ပေလိမ့်မည်ဟု Lwintmgmg Daily News အယ်ဒီတာမှ မှတ်ချက်ပြုသည်။
လူမျိုးစုများနှင့် ဂဏန်းသင်္ကေတ ကိုဖော်ပြပေးလိုက်ပါတယ်။
ဗမာစု၌ပါဝင်သော တနင်္သာရီတိုင်းအတွင်း လူမျိုးများမှာ ထားဝယ်လူမျိုး ၊ မြိတ်လူမျိုး နှင့် ဆလုံလူမျိုးတို့ဖြစ်ကြသည်။
- ထားဝယ်လူမျိုး ---- ဂဏန်းသင်္ကေတ (၅၀၂)
- မြိတ်လူမျိုး --------- ဂဏန်းသင်္ကေတ (၅၀၃)
-ဆလုံလူမျိုး --------- ဂဏန်းသင်္ကေတ (၅၀၈)
