| ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌ ဦးတင်အေး။ဓာတ်ပုံ- ဖိုးဇော်(ထားဝယ်) |
Dawei Watch | ထားဝယ်၊ အောက်တိုဘာ ၈
၂၀၁၀ ရွေးကောက်ပွဲတွင် ကြိုတင်မဲကြောင့် နစ်နာခဲ့ရသည်များကို မေ့ပစ်လိုက်ရန် ရွေးကောက်ပွဲ ကော်မရှင် ဥက္ကဋ္ဌ ဦးတင်အေးက အောက်တိုဘာ ၆ ရက်နေ့ ထားဝယ်ခရီးစဉ်တွင် ပြောကြားသည်။
ရွေးကောက်ပွဲကော်မရှင်ဥက္ကဋ္ဌနှင့် တိုင်းဒေသကြီးအစိုးရအဖွဲ့၊ တိုင်းဒေသကြီးလွှတ်တော်၊ ရွေးကောက်ပွဲကော်မရှင်အဆင့်ဆင့်၊ ဌာနဆိုင်ရာတာဝန်ရှိသူများ၊ နိုင်ငံရေးပါတီများနှင့် အရပ်ဖက်လူ့အဖွဲ့အစည်းများတွေ့ဆုံရာ တနင်္သာရီတိုင်းဒေသကြီး တိုင်းရင်းသားစည်းလုံးညီညွှတ်ရေးပါတီ (တစည) အတွင်းရေးမှူးဦးတင်ဦးက ကြိုတင်မဲစနစ်နှင့် ပတ်သက်၍ မေးမြန်းရာ ကော်မရှင်ဥက္ကဋ္ဌ ဦးတင်အေးက အထက်ပါအတိုင်းဖြေကြားခဲ့ခြင်းဖြစ်သည်။
တစည ပါတီက ကြိုတင်မဲကြောင့် ကိုယ်စားလှယ် အရေအတွက်မည်မျှ ရှုံးနိမ့်ခဲ့သည်ကို စာရင်းရှိကြောင်း ဦးတင်အေးကဆိုပြီး ယင်းတို့ကို အတိတ်တွင်ထားခဲ့ရန် ပြောဆိုခဲ့သည်။
“၂၀၁၀ က ဟာတော့ အတိတ်မှာထားခဲ့ပါတော့ . . .
" . . . ပြီးခဲ့တာတွေမေ့လိုက်ပါတော့။ ကျွန်တော့လက်ထက်မှတော့ မဖြစ်စေရဘူးလို့ ပြောချင်ပါတယ်။” ဟု ရွေးကောက်ပွဲကော်မရှင်ဥက္ကဋ္ဌ ဦးတင်အေးက တွေ့ဆုံပွဲတွင် ပြောကြားခဲ့သည်။
လာမည့်၂၀၁၅ ခုနစ်ရွေးကောက်ပွဲတွင် ကြိုတင်မဲစနစ်ကိုအသုံးပြုမည်ဖြစ်သော်လည်း ၂၀၁၀ ခုနစ်ရွေးကောက်ပွဲကဲ့သို့မဖြစ်စေရဟု ၎င်းကဆိုသည်။
“ရှိပါသေးတယ်။ မရှိလို့ဘယ်ရမလဲ၊ နိုင်ငံခြားသွားတဲ့သူတွေ၊ သင်တန်းသွားတက်တဲ့သူတွေ ကလည်း မဲပေးချင်မှာပေါ့။ ဒါကြောင့် ကြိုတင်မဲစနစ်ရှိရဦးမှပါ။ သို့သော်လည်း ၂၀၁၀ ကဲ့သို့မဖြစ်စေရပါဘူး။ ၂၀၁၀ ကဲ့သို့မဖြစ်ရအောင်လည်း နည်းဥပဒေတွေ လေ့လာထားကြပါ။ ကျွန်တော်လည်း လုပ်ထားမှာပါ” ဟု ဦးတင်အေးက ဆိုသည်။
ရွေးကောက်ပွဲစောင့်ကြည့်ရာတွင် ညနေ ၄ နာရီနောက်ပိုင်းရောက်လာသည့်မဲသည် တရားမ၀င်ဖြစ်သည်ကို မဖြစ်မနေသိထားရမည်ဖြစ်ကြောင်း ၎င်းက ဆိုသည်။
ကြိုတင်မဲဆိုသည်မှာ ပြည်သူအတွက် လူအခွင့်အရေးဆုံးရှုံးမှာကို စိုးရိမ်သည့်အတွက် လူတိုင်းမဲပေးနိုင်အောင် ထားရှိသည့်စနစ်ဖြစ်ပြီး မဲဆန္ဒနယ်အတွင်း မဲရုံတွင် လာရောက်မဲမပေးနိုင်သူများရှိပါက ကြိုတင်မဲကို အိမ်တိုင်ရာရောက်ယူပေးမည်ဖြစ်ကြောင်း၊ အိမ်တိုင်ရာရောက် သွားယူရာတွင် သက်ဆိုင်ရာ ကိုယ်စားလှယ်လောင်းများ လိုက်ပါနိုင်ကြောင်း ဦးတင်အေးက ဆိုသည်။
“၂၀၁၀ မှာ ပြည်ခိုင်ဖြိုးက ကြိုတင်မဲနဲ့ပဲ အကုန်ယူသွားတယ်။ တိုင်းထဲက မြို့နယ်တစ်ခုမှာဆိုရင် လုံးဝမဖြစ်နိုင်တဲ့ ကြိုတင်မဲကို ယူထားတယ်။ ကြိုတင်မဲက ခိုင်လုံမဲထက်များနေတယ်” ဟု တနင်္သာရီတိုင်းဒေသကြီး တိုင်းရင်းသားစည်းလုံးညီညွတ်ရေးပါတီဥက္ကဋ္ဌ ဦးထွန်းလွင်က ပြောသည်။
၂၀၁၀ ရွေးကောက်ပွဲတွင် တ.စ.ည ပါတီအနေဖြင့် မဲဆန္ဒနယ်အများစုတွင် အပြတ်အသတ်အနိုင်ရခဲ့သော်လည်း ကြိုတင်မဲနှင့် တရားမ၀င်မဲ(ခိုင်လုံမဲကို ပယ်မဲဖြစ်အောင်လုပ်ခြင်း) များဖြင့် ရှုံးနိမ့်ခဲ့ရသည့်အတွက် ကြိုတင်မဲကြောင့် အထိနာဆုံးပါတီမှာ တ.စ.ည ပါတီဖြစ်သည် ဟု ဦးထွန်းလွင်က ဆိုသည်။
Dawei Watch
