ဇူလိုင် ၂၆ ရက်ကနေ ၂၉ ရက်ထိ ၄ရက်ကြာ ပြုလုပ်မယ့် တိုင်းရင်းသားလက်နက်ကိုင် တော်လှန်ရေးတပ်ဖွဲ့များရဲ့ ကချင်ပြည်နယ် မိုင်ဂျာယန်ညီလာခံကို အစိုးရက အတတ်နိုင်ဆုံး ကူညီ လုပ်ဆောင်ပေးသွားမှာ ဖြစ်ပါတယ်။
အစိုးရရဲ့ ၂၁ ရာစုပင်လုံညီလာခံ အကြိုပြင်ဆင်ရေးကော်မတီနဲ့ တိုင်းရင်းသားလက်နက်ကိုင် တပ်ဖွဲ့တို့ရဲ့ နိုင်ငံရေးဆွေးနွေးမှုအဖွဲ့တို့ မနေ့က ရန်ကုန်မြို့ တွေ့ဆုံမှုအတွင်း အခု သဘောတူညီချက် ရရှိခဲ့တာ ဖြစ်ပါတယ်။
၂၁ ရာစု ပင်လုံညီလာခံအကြိုပြင်ဆင်ရေးကော်မတီအတွင်းရေးမှူး ဦးလှမောင်ရွှေက နှစ်ဘက် တွေ့ဆုံမှုအတွင်း ခေါင်းစဉ် လေးခု ဆွေးနွေးခဲ့ကြတယ်။ နံပတ်တစ်အချက်က နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ ယူအန်အက်ဖ်စီဥက္ကဋ္ဌနဲ့အဖွဲ့ ဇူလိုင် ၁၇ ရက် တွေ့ကြမယ့်ကိစ ဆွေးနွေးတယ်။ နံပတ်နှစ်အချက်က မိုင်ဂျာယန်ညီလာခံကိစ တိုင်းရင်းသားတို့ ဘက်က ရှင်းပြတယ်။ တတိယ အစိုးရကော်မတီနဲ့ တိုင်းရင်းသားနိုင်ငံရေးဆွေးနွေးမှုအဖွဲ့ ဒီပီအန် တို့ နောက်တကြိမ် ပြန်ပြီးပါဝင်နိုင်ရေး ညှိနှိုင်းတယ်။ စတုတ္ထကတော့ မိုင်ဂျာယန်ညီလာခံ ကျင်းပရေးး လိုအပ်တာတွေ ကူညီပေးဖို့ ဆွေးနွေးတယ်လို့ တွေ့ဆုံမှုအပြီးမှာ မီဒီယာကို ရှင်းပြခဲ့ပါတယ်။
နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နဲ့ အစိုးရနဲ့ အပစ်ရပ်လက်မှတ်မထိုးသေးတဲ့ တိုင်းရင်းသားလက်နက်ကိုင်တပ်ဖွဲ့ ယူအန်အက်ဖ်စီ အဖွဲ့ ခေါင်းဆောင်တို့ ဒီနေ့ မွန်းလွဲ ၃ နာရီမှာ ရန်ကုန်မှာ ပထမဆုံးအကြိမ် တွေ့ဆုံဆွေးနွေးကြမှာ ဖြစ်ပါတယ်။
DVB
