တနင်္သာရီတွင် ပါတီ လေးခုသာ ကြားဖြတ်ရွေးကောက်ပွဲ ၀င်ပြိုင်မည်

|Dawei Watch| ထားဝယ်၊ ဇွန် ၉

၂၀၁၄ ခုနှစ် နှစ်ကုန်ပိုင်း ကျင်းပမည့် ကြားဖြတ်ရွေးကောက်ပွဲတွင် တနင်္သာရီတိုင်းဒေသကြီးအတွင်း လစ်လပ်နေသည့် လွှတ်တော် ကိုယ်စားလှယ်နေရာများအတွက် ပါတီ ၄ ပါတီသာ ၀င်ရောက် ယှဉ်ပြိုင်မည်ဖြစ်ကြောင်း သက်ဆိုင်ရာ ပါတီများထံမှ သိရသည်။

တနင်္သာရီတိုင်းဒေသကြီးတွင် ထားဝယ်မဲဆန္ဒနယ် အမှတ် ၂ အမျိုးသားလွှတ်တော် ကိုယ်စားလှယ်နေရာနှင့် မြိတ်မဲ ဆန္ဒ နယ်အမှတ် ၁ တိုင်းဒေသကြီး လွှတ်တော်ကိုယ်စားလှယ်နေရာတို့ လစ်လပ်နေကြောင်း တိုင်းဒေသကြီး ရွေးကောက်ပွဲ ကော်မရှင်က ပြောသည်။

အဆိုပါ လစ်လပ်နေရာများအတွက် အမျိုးသားဒီမိုကရေစီအဖွဲ့ချုပ်ပါတီ ၊ ပြည်ထောင်စု ကြံခိုင်ရေးနှင့် ဖွံ့ဖြိုးရေးပါတီ၊ တိုင်းရင်းသား စည်းလုံးညီညွှတ်ရေးပါတီနှင့် ထားဝယ်တိုင်းရင်းသားများပါတီတို့က ၀င်ပြိုင်မည်ဖြစ်ပြီး အမျိုးသား ဒီမိုကရေစီ အင်အားစုပါတီနှင့် ဒီမိုကရက်တစ်ပါတီ (မြန်မာ)တို့က ၀င်ပြိုင်မည်မဟုတ်ဟု သက်ဆိုင်ရာ ပါတီများထံမှ သိရသည်။

လက်ရှိတွင် ထားဝယ်တိုင်းရင်းသားများပါတီမှ အပ ကျန်ပါတီများ ရွေးကောက်ပွဲအတွက် ပြင်ဆင်နေပြီဖြစ်ကြောင်း သိရသည်။

တိုင်းဒေသကြီးအတွင်း လစ်လပ်နေရာများဖြစ်သည့် ထားဝယ်မဲဆန္ဒနယ်အမှတ် ၂ အမျိုးသားလွှတ်တော် ကိုယ်စားလှယ်နေရာမှ ဦးသန်းဆွေသည် ယဉ်ကျေးမှုဝန်ကြီးဌာန ဒုတိယဝန်ကြီးအဖြစ် ခန့်အပ်ခြင်းခံခဲ့ရပြီး မြိတ်မဲဆန္ဒနယ် အမှတ် ၁ တိုင်းဒေသကြီး လွှတ်တော်ကိုယ်စားလှယ် ဦးခင်ဇော် (ယခင် တိုင်းဒေသကြီးဝန်ကြီးချုပ်)သည် ကျန်းမာရေး ကြောင့်ဟုဆိုကာ လွှတ်တော်ကိုယ်စားလှယ်တာဝန်မှ အနားယူခဲ့သည်။