တနင်္သာရီတိုင်းရှိ ကရင်တိုင်းရင်းသားဒေသများရှိ သိမ်းဆည်းမြေများ ပြန်ပေးရန်တောင်းဆို

Written By Live100 on Thursday, April 28, 2016 | 12:03 AM

|Dawei Watch| ထားဝယ်၊ ဧပြီ ၂၇

တနင်္သာရီတိုင်းဒေသကြီးအတွင်း ကရင်တိုင်းရင်းသားဒေသများရှိ အကြောင်းအမျိုးမျိုးဖြင့် သိမ်းဆည်းထားသည့် မြေများ ပြန်လည်စွန့်လွှတ်ပေးရန် ဒေသခံ ကရင်တိုင်းရင်းသားများက တိုင်းအစိုးရအဖွဲ့မှ ကရင်တိုင်းရင်းသားရေးရာဝန်ကြီးထံ တောင်းဆိုခဲ့ကြသည်။

ဧပြီလ ၂၇ ရက်က ထားဝယ်မြို့တွင် ပြုလုပ်ခဲ့သည့် ကရင်တိုင်းရင်းသားရေးရာဝန်ကြီးနှင့် ဒေသခံပြည်သူများ တွေ့ဆုံပွဲ အခမ်း အနားတွင် ဒေသခံ ကရင်တိုင်းရင်းသားများက သိမ်းဆည်းမြေကိစ္စနှင့် ပက်သက်၍ ဆွေးနွေးခဲ့ရာ ၀န်ကြီးက စာဖြင့်ထပ်မံ တင်ပြ ရန်ပြောဆိုခဲ့သဖြင့် ဆွေးနွေးပွဲအပြီးတွင် ဒေသခံများက စာဖြင့် ချက်ခြင်း တင်ပြတောင်းဆိုခဲ့ခြင်းဖြစ်သည်။

မြိတ်ခရိုင်အတွင်း ကျွန်းစုမြို့နယ် ကတန်ကျွန်းတွင် ကြိုးပြင်ကာကွယ်တောအဖြစ်သိမ်းဆည်းထားသည့် မြေဧက ရှစ်သောင်း ကျော်၊ ပုလောမြို့နယ်၊ ပလောက်မြို့နယ်ခွဲရှိ ၀ါးဇွင်းအုပ်ကျေးရွာတွင် အမှတ် ၁၂ တပ်မတော် တန်းမြင့်လေ့ကျင့်ရေးကျောင်းမှ သိမ်းဆည်းထားသော မြေဧက ခြောက်ရာကျော်၊ တနင်္သာရီမြို့နယ်၊ သိမ်ပြင်ကျေးရွာတွင် MSPP ဆီအုန်းစိုက်ပျိုးရေး ကုမ္ပဏီက လုပ်ပိုင်ခွင့်ရထားသည့် ဧက လေးသောင်းကျော်နှင့် တနင်္သာရီမြို့နယ်၊ ညောင်ပင်ကွင်းကျေးရွာအုပ်စု ထုံမခါကျေးရွာအနီးတွင် CKB ဆီအုန်းစိုက်ပျိုးရေးကုမ္ပဏီမှ လုပ်ပိုင်ခွင့်ရထားသည့် မြေဧက ၂၀၀၀ တို့ကို ပြန်လည်စွန့်လွှတ်ပေးရန် ယင်းဒေသခံများက တောင်းဆိုကြခြင်းဖြစ်ကြောင်း ၎င်းတို့၏ တင်ပြစာများအရ သိရသည်။

ထို့အပြင် ထားဝယ်ခရိုင်၊ ကလိန်အောင်မြို့ နှမ်းကျဲကျေးရွာအုပ်စု၊ ကျေးဇူးတော်ကျေးရွာတွင်လည်း ရွှေပဒုမ္မာ ဆီအုန်း စိုက်ပျိုးရေးကုမ္ပဏီကို လုပ်ပိုင်ခွင့်ပေးထားသည့် မြေဧက ခြောက်ရာကျော် တို့ကို ပြန်လည်စွန့်လွှတ်ပေးရန် တောင်းဆိုခဲ့သည်။

“သက်ဆိုင်ရာ ၀န်ကြီးနဲ့ ညှိနှိုင်းပြီးလုပ်ဆောင်သွားမယ်” ဟု တနင်္သာရီတိုင်းဒေသကြီး အစိုးရအဖွဲ့မှ ကရင်တိုင်းရင်းသား လူမျိုးရေးရာဝန်ကြီး စောလုကာ က ပြောကြားသည်။

ကရင်တိုင်းရင်းသားဒေသများမှ ဒေသခံများနှင့် ကရင်တိုင်းရင်းသားရေးရာဝန်ကြီးတို့တွေ့ဆုံပွဲကို တိုင်းဒေသကြီးအစိုးရအဖွဲ့မှ သယံဇာတနှင့် ပတ်ဝန်းကျင်ထိန်းသိမ်ရေးဝန်ကြီး ဦးမြင့်မောင်၊ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဦးမြင့်စန်းနှင့် အရပ်ဖက်လူမှုအဖွဲ့အစည်းအချို့ တက်ရောက်ခဲ့ကြသည်။

Share this article :