မွန်ဝန်ကြီးချုပ် သတင်းရယူခွင့် ကန့်သတ်မှုအပေါ် ဒေသခံ မီဒီယာသမားများ ဝေဖန်

 မော်လမြိုင်၊ ဧပြီ ၂၉

မွန်ပြည်နယ်အစိုးရအဖွဲ့ကို ဦးဆောင်သည့် မွန်ပြည်နယ်ဝန်ကြီးချုပ်အနေက အစိုးရ လုပ်ငန်းများနှင့် သက်ဆိုင်သည့် ကိစ္စရပ်များ ကို တစ်လတစ်ကြိမ်သာ သတင်းရယူခွင့်ပေးမည်ဟု ကန့်သတ်လိုက်သည့်အပေါ် မဖြစ်သင့်ဟု မွန်ပြည်နယ် အခြေစိုက် သတင်းမီဒီယာသမားများက ဝေဖန်သည်။

ဧပြီလ ၂၇ ရက်က ၀န်ကြီးချုပ်ထံ သွားရောက် မေးမြန်းခဲ့သည့် သတင်းထောက်များကို ယင်းသို့ ပြောဆိုခဲ့ခြင်း ဖြစ်သည်။

သတင်းမီဒီယာတို့နှင့် တွေ့ဆုံရန် အချိန်အခက်ခဲရှိနေခြင်းကြောင့် အစိုးရ လုပ်ငန်းများနှင့်သက်ဆိုင်သည့်ကိစ္စရပ်များနှင့် ပတ်သက်ပြီး တစ်လတစ်ကြိမ်သာ မီဒီယာတို့နှင့် တွေ့ဆုံသွားမည်ဟု ၀န်ကြီးချုပ် ဦးမင်းမင်းဦးက ပြောဆိုခဲ့သည်။

“ဒီမီဒီယာကို တစ်လတစ်ကြိမ် ကန့်သတ်လိုက်တဲ့ကိစ္စကတော့ မဖြစ်သင့်ဘူး၊ လူထုအတွက် သတင်းထုတ်ပြန်ဖို့က ဘယ်နည်း နဲ့မှ အဆင်မပြေနိုင်ဘူး” ဟု မော်လမြိုင် အခြေစိုက် သံလွင်တိုင်းမ်သတင်းဌာနမှ အယ်ဒီတာ ဦးကြည်ဇော်လွင်က ပြောသည်။

ဝန်ကြီးချုပ်အနေဖြင့် အချိန်မပေးနိုင်ပါက သတင်းထုတ်ပြန်ရေးအတွက် မည်သူ့ကို တာဝန်ပေးမည်ကို စဉ်းစားသင့်သည်ဟု ဦးကြည်ဇော်လွင် ပြောသည်။

“သတင်းထောက်တွေဆိုတာက နေ့စဉ်နဲ့အမျှ သတင်းတင်နေရတယ်။ တချို့သတင်းတွေဆို အချိန်နဲ့တပြေးညီ တင်နေရ တာလဲ ရှိတယ်။ ဝန်ကြီးချုပ်အနေနဲ့ တလတခါဘဲ သတင်းမေးခွင့်ပေးမယ်ဆိုရင် ဘယ်လိုမှ အဆင်မပြေနိုင်ဘူး ဒါ မဖြစ်သင့်တဲ့ကိစ္စပါ” ဟု မွန်ပြည်နယ်အခြေစိုက် 7 Days သတင်းထောက် မသက်သန္တာလှိုင်က ပြောသည်။

အစိုးရအဖွဲ့တစ်ခုအနေဖြင့် သတင်းရယူခွင့်ကန့်သတ်လိုက်ခြင်းသည် သတင်းရယူခွင့်၊ ပြည်သူလူထု သတင်းသိရှိပိုင်ခွင့် နောက်ကျ သွားမည်ဖြစ်သည့်အတွက် ဒီမိုကရေစီကျင့်စဉ်နှင့် ဆန့်ကျင်သွားစေသည်ဟု BNI ခေါ် နိုင်ငံတကာ မြန်မာ သတင်းအဖွဲ့ ဒါရိုက်တာ နိုင်ကဆုမွန်က ပြောသည်။

“ဝန်ကြီးချုပ် ပြောထားတာကတော့ အစိုးရတခုလုံးနဲ့ ပတ်သက်တဲ့ကိစ္စဆိုရင် မပြောဖို့ပေါ့နော် ကိုယ့် ဝန်ကြီးဌာနနဲ့ သက်ဆိုင်တဲ့ ကိစ္စဆိုရင်တော့ ပြောလို့ရပါတယ်။ အစိုးရတစ်ဖွဲ့လုံးကိုယ်စား သတင်းထုတ်ပြန်ပေးတဲ့နေရာ ဖွင့်ပေးထားသင့်တယ် အခုတော့ ဖွင့်ထားပေးတာမရှိသေးဘူး တစ်လမှတစ်ခါဆိုတော့ up to date တော့မဖြစ်ဘူးပေါ့ ဥပမာဆို မေလ ၁ ရက်နေ့မှာ ဖြစ်တဲ့ သတင်းကို မေလကုန်မှ ထုတ်ပြန်ရမယ်ဆိုတော့ နောက်ကျသွားတာပေါ့” မွန်ပြည်နယ်အစိုးရအဖွဲ့ သယံဇာတနှင့် သဘာဝ ပတ်ဝန်းကျင်ထိန်းသိမ်းရေးဝန်ကြီးက ပြောသည်။

အစိုးရက ယင်းသို့ သတင်းယူခွင့် ကန့်သတ်ထားသော်လည်း မွန်ပြည်နယ် လွှတ်တော်အနေဖြင့်မူ အချိန်မရွေး လွတ်လပ်စွာ သတင်းယူခွင့်ပေးထားပြီး မကြာမီ သတင်းထုတ်ပြန်သည့် ဌာနလည်း ထားသွားရန် အစီအစဉ် ရှိသည်ဟု မွန်ပြည်နယ် လွှတ်တော် ဒု-ဥက္ကဌ ဒေါက်တာအောင်နိုင်ဦးက ပြောသည်။

သတင်းမီဒီယာသမားများ၏ ရပိုင်ခွင့်များနှင့် ပတ်သက်ပြီး သက်ဆိုင်ရာ ဌာန၊ အဖွဲ့အစည်းက သတ်မှတ်ထားသော စည်းကမ်းနှင့် အညီ အစိုးရရုံး၊ ဌာန၊ အဖွဲ့အစည်းများတွင် သတင်းအချက်အလက် ရယူခွင့်၊ နေရာထိုင်ခင်းရခွင့်နှင့် ဝင်ထွက်သွား လာခွင့် တို့ရှိသည်ဟု သတင်းမီဒီယာ ဥပဒေ အခန်း(၃) ပုဒ်မ ၄ (ဃ) တွင် ဖော်ပြထားသည်။
 |Dawei Watch|