ရန်ကုန်မြို့ ၌ အကောင်အထည်ဖော်မည့် မြို့တွင်းပတ်လမ်းနှင့် မြို့ ပြင်ပတ်လမ်း စီမံကိန်းများကို ချိတ်ဆက်သွားလာရန် ရန်ကုန်မြစ်နှင့် လှိုင်မြစ်ကူးတံတားတစ်စင်းစီ ထပ်ဆောက်မည်

ရန်ကုန်မြို့၌ အကောင်အထည်ဖော်မည့် မြို့တွင်းပတ်လမ်းနှင့် မြို့ပြင်ပတ်လမ်းကွန်ရက် စီမံကိန်းများကို ချိတ်ဆက်သွားလာနိုင်ရန်အတွက် လိုအပ်သည့် ရန်ကုန်မြစ်ကူးတံတားနှင့် လှိုင်မြစ်ကူးတံတား တစ်စင်းစီ ထပ်မံဆောက်လုပ်မည်ဖြစ်ကြောင်း ရန်ကုန်မြို့တော်ဝန် ဦးလှမြင့်၏ ပြောကြားချက်အရ သိရသည်။

အဆိုပါ တံတားနှစ်စင်းမှာ ရန်ကုန်မြစ်ကူးတံတား (ထီးတန်း)နှင့် လှိုင်မြစ်ကူးတံတား (ဝါးတစ်ရာ) တို့ဖြစ်ကြောင်း၊ ရန်ကုန်မြစ်ကူးတံတား (ထီးတန်း) မှာ အလျား ၁ ဒသမ ၄၇ မီတာရှည်လျားပြီး လှိုင်မြစ်ကူးတံတား (ဝါးတစ်ရာ) မှာမူ ၁ ဒသမ ၂၁၆ ကီလိုမီတာ ရှည်လျားမည်ဖြစ်ကြောင်း သိရသည်။

“ရန်ကုန်မြို့ရဲ့ အနာဂတ်မြို့တွင်းပတ်လမ်း စီမံကိန်းနဲ့ မြို့ပြင်ပတ်လမ်း စီမံကိန်းတွေမှာ ချိတ်ဆက်သွားလာဖို့အတွက် တံတားနှစ်စင်းလိုမှာ။ မြို့ပြင်ပတ်လမ်းက နေပတ်သွားပြီးရင် အတွင်းထဲဝင်ချင်ရင် အဲဒီတံတားတွေကနေ ဝင်ရမှာ။ ဒါကြောင့် တံတားနှစ်စင်းထပ်ဆောက်ဖို့ လျာထားပါတယ်”ဟု ရန်ကုန်မြို့တော်ဝန် ဦးလှမြင့်က ပြောကြားသည်။

ရန်ကုန်မြို့၏ အနာဂတ်စီမံ ကိန်းများဖြစ်သည့် မြို့တွင်းပတ်လမ်း၊ မြို့ပြင်ပတ်လမ်း စီမံကိန်းများအတွက် ဒေါ်လာ ၃ ဒသမ ၅ ဘီလျံခန့် ကုန်ကျမည်ဟု ခန့်မှန်းထားပြီး ယင်းအထဲတွင် အဆိုပါတံတားနှစ်စင်းလည်း ပါဝင်မည်ဖြစ်သည်။ ယင်းလုပ်ငန်းများကို ပြည်တွင်းလုပ်ငန်းရှင်များ စိတ်ဝင်စားပါက တင်ဒါခေါ်ယူ၍ လုပ်ဆောင်သွားမည်ဖြစ်ကြောင်း၊ အဆိုပါစီမံကိန်းမှာ လာမည့် ၂ဝ၁၆-၂ဝ၁၇ ဘဏ္ဍာနှစ်၊ ၂ဝ၁၇-၂ဝ၁၈ ဘဏ္ဍာနှစ်များတွင် ဖြစ်နိုင်ကြောင်း ရန်ကုန်မြို့တော်ဝန်က ဆိုသည်။

“ပြည်တွင်း လုပ်ငန်းရှင်တွေ လုပ်ချင်ရင်လည်း တင်ဒါခေါ်ပြီး တော့ လုပ်သွားမှာပေါ့။ ဒီအစိုးရလက်ထက်မှာ မပြီးရင်လည်း နောက်အစိုးရလက်ထက်မှာ ပြီးအောင်လို့ ဖြစ်နိုင်ခြေလေ့လာမှုတွေ လုပ်ပေးထားမှာပါ”ဟု ရန်ကုန်မြို့တော်ဝန် က ပြောကြားသည်။

ရန်ကုန်မြို့၏ ယာဉ်ကြောပိတ်ဆို့မှုကို ရာနှုန်းပြည့် လျှော့ချနိုင်ရန် ရည်ရွယ်၍ ကောင်းမွန်သော လမ်းကွန်ရက်စနစ် ရေရှည်စီမံကိန်းဖြစ်သည့် မြို့တွင်းပတ်လမ်း၊ မြို့ပြင်ပတ်လမ်းများ ဖြစ်ပေါ်လာစေရေး လုပ်ဆောင်နေကြောင်း သိရသည်။
Eleven Media Group