“လာမည့် ၇ ရက်ကနေ ၁၀ ရက်အစည်းအဝေးမှာမှ ဆုံးဖြတ်ကြမှာကိုး တရားဝင်က၊ သာမာန်အားဖြင့်တော့ ဒီလို လေကြောင်းပါ အသုံးပြုပြီးတော့ မြေပြင်ကတော့ လက်နက်ကြီးပေါ့ဗျား အမြောက်နဲ့၊ ဝေဟင်ကတော့ ဂျက်လေယာဉ်လို ပစ္စည်းမျိုးတွေပါ ထုတ်ပြီးတော့ တုိုက်ခိုက်တဲ့အခါကြတော့ ဒီလို အခင်းအကျင်းမျိုးမှာ ပြည်တွင်းငြိမ်းချမ်းရေးအတွက် ဆွေးနွေးမယ် စကားပြောမယ်ဆိုရင် ယုတ္တိသိပ်မရှိတော့ဘူး ဖြစ်နေတာပေါ့” ဟု ဗိုလ်မှူးကြီး ခွန်ဥက္ကာက ပြောကြားခဲ့သည်။
အဆိုပါအခြေအနေများကြောင့် လက်ရှိအပစ်ရပ်ထားသည့်အဖွဲ့များအနေဖြင့်လည်း ၄င်းတို့အနေအထားအား ပြန်လည် သုံးသပ် သင့်ကြောင်း UNFC ၏ စည်းလုံးညီညွတ်ရေး ပူးပေါင်းဆောင်ရွက်ရေး လိုလားချက်များကို ပူးပေါင်းတုိုက်ပွဲဝင်ရေး ဒီကိစ္စများ၌ UNFC အဖွဲ့ဝင် အဖွဲ့များအနေဖြင့် စဉ်စားသင့်ကြောင်းကိုလည်း ၄င်းက ထောက်ပြ ပြောဆိုခဲ့သည်။
တိုင်းရင်းသား လက်နက်ကိုင်လူမျိုးစုအားလုံးပါဝင်သည့် UNFC ( ညီညွတ်သေားတိုင်းရင်းသားလူမျိုးများ ဖယ်ဒရယ် ကောင်စီ ) တွင် အစိုးရနှင့် အပစ်ရပ်ထားပြီးအဖွဲ့များနှင့် အပစ်မရပ်သေးသည့်အဖွဲ့ စုစုပေါင်း(၁၁)ဖွဲ့ဖြင့် ဖွဲ့စည်း ထားသည့် အဖွဲ့ဖြစ်သည်။
ပအို့အမျိုးသားလွတ်မြောက်ရေးအဖွဲ့ချူပ် ဥက္ကဌ ဗိုလ်မှူးကြီး ခွန်ဥက္ကာအနေနဲ့ အဖွဲ့အနေနဲ့ ကေအိုင်အိုဌာနချူပ်အနီးက တိုက်ပွဲအခြေအနေတွေကို သွားရောက်လေ့လာခဲ့ကြောင်း သိရှိရသည်။
အဆိုပါအဖွဲ့တွင် ဥက္ကဌ ဗိုလ်မှူးကြီး ခွန်ဥက္ကာနှင့်အတူ လားဟူဒီမိုကရက်တစ်ပါတီ ဒုဥက္ကဌ စောလမွန်၊ ကရင်နီအမျိုးသား တိုးတက်ရေးပါတီမှ နုိုင်ငံခြားရေးတာဝန်ခံ ဦးရွှေမျိုးသန့် ၊ ရခိုင်ပြည် အမျိုးသားကောင်စီမှ ဦးထွန်းဇော် တို့ပါဝင်တဲ့ UNFC အဖွဲ့ဝင်တွေဟာ ကချင်ပြည်နယ် KIO ဌာနချူပ်ရှိရာ လိုင်ဇာဒေသသို့ သွားရောက်ခဲ့ခြင်းလည်း ဖြစ်သည်။
လက်ရှိအစိုးရမှဆင်နေသည့် မိုးကြိုးစစ်ဆင်ရေး၌ အင်အား (၃၀၀၀)ကျော် အသုံးပြုနေကြောင်း၊ လိုအပ်ပါက ထိုထက်ပို၍ အင်အားသုံးတိုက်မည်ဖြစ်ကြောင်း လေယာဉ်များကိုလည်း ယခုအချိန်အထိ အသုံးပြုနေဆဲဖြစ်ကြောင်း ဗိုလ်မှူးကြီး ခွန်ဥက္ကာက ဆိုသည်။
“၂၈ ရက် မနက်က စသုံးတဲ့ လေယာဉ်က အခုအချိန်ထိ သုံးတုန်းပဲဗျ၊ လိုင်ဇာပတ်ပတ်လည်က စိုးမိုးကုန်းတွေကို လုိုက်ပစ်နေတယ်၊ လိုင်ဇာ တည့်တည့်တော့ မပစ်သေးဘူး၊ ဒုက္ခသည်အားလုံးကတော့ တရုတ်နယ်စပ် ချောင်းဘေးမှာ ကပ်ပြီးတော့ နေကြတာပဲ၊ လိုင်ဇာတစ်ဝိုက်မှာတော့ ဒုက္ခသည် လေးသောင်းလောက်ဖြစ်နေပြီ၊ အခု အကူအညီ ကတော့ အခက်အခဲတော့ စဖြစ်နေပြီ၊ ပြည်တွင်းကလည်း လာဖို့ခက်၊ ပြည်ပကလည်း ၀င်ဖို့ခက်တဲ့အခြေအနေ”ဟု ဗိုလ်မှူးကြီး ခွန်ဥက္ကာက တိုက်ပွဲအခြေအနေနှင့်ပတ်သက်၍ ပြောကြားခဲ့သည်။
လက်ရှိတွင် ကချင်ပြည်နယ်လွတ်လပ်ရေးအဖွဲ့ KIO ဥက္ကဌ အပါအ၀င်၊ စစ်ဦးစီးချူပ်၊ ဒုတိယ စစ်ဦးစီးချူပ်၊ KIA အတွင်းရေးမှူးစတဲ့ရှိသည့် ထိပ်ပိုင်းခေါင်းဆောင်များ ဗဟိုကော်မတီဝင်များနှင့် တွေ့ဆုံမေးမြန်းခဲ့ကြောင်း၊ စစ်ဘေး ဒုက္ခသည်များအား ကူညီနေသည့်အဖွဲ့အစည်းများနှင့်လည်း တွေ့ဆုံခဲ့ကြောင်းကိုလည်း သိရသည်။
ကေအိုင်အို/ကေအိုင်အေ တပ်ဖွဲ့များအား တပ်မတော်မှထိုးစစ်များ ရပ်ဆိုင်းရန် ညွှန်ကြားထားပြီး ဖြစ်သော်လည်း ၎င်းတို့ဘက်မှ ရထားလမ်း၊ ကားလမ်းများ၊ တံတားများအား အကြောင်းမဲ့ မိုင်းခွဲဖျက်ဆီးခြင်း၊ စီးပွားရေးလုပ်ငန်းများအား ဟန့်တားနှောင့်ယှက်ခြင်း၊ ရေအားလျှပ်စစ်ဓာတ်အားပေးလိုင်းများအား ဖောက်ခွဲဖျက်ဆီးခြင်း၊ လုံခြုံရေးတပ်ဖွဲ့ဝင်များအား မကြာခဏ မိုင်းထောင်ခြင်း၊ ခြုံခိုပစ်ခတ်တိုက်ခိုက်ခြင်း စသောလုပ်ရပ်များ အဆက်မပြတ်ပြုလုပ်လာသည့်အတွက် တပ်မတော်အနေဖြင့် အများပြည်သူ၏ အသက်အိုးအိမ်လုံခြုံရေး၊ လမ်းပန်း ဆက်သွယ်ရေး လုံခြုံချောမွေ့စေရေး၊ နယ်မြေဒေသ အေးချမ်း တည်ငြိမ်ရေးအတွက် မိမိကိုယ်ကို ခုခံကာကွယ်ခြင်း နှင့် စစ်ရေးအရပြန်လည် တုံ့ပြန်မှုများကို မလွှဲမရှောင်သာ ပြုလုပ်ခဲ့ရသည်။ ထိုသို့ ပြုလုပ်ရသော်လည်း တပ်မတော်တပ်ဖွဲ့များသည် အင်အားကို အစွမ်းကုန် ထိန်းထိန်း သိမ်းသိမ်း ဆောင်ရွက်ခဲ့ခြင်းသာ ဖြစ်သည်ဟု အစိုးရဘက်မှထုတ်ပြန်သည့် သတင်းထုတ်ပြန်ချက် (၁/၂၀၁၃) တွင် ဖော်ပြပါရှိသည်။
နိုင်ငံတော်အစိုးရအနေဖြင့် တိုင်းရင်းသားလက်နက်ကိုင် အဖွဲ့အစည်း အသီးသီးနှင့် ထာဝရငြိမ်းချမ်းရေးရှိရေး ဆောင်ရွက်ခဲ့ရာ ကေအိုင်အို/ ကေအိုင်အေ အဖွဲ့မှလွဲ၍ ကျန်အဖွဲ့များနှင့်သဘောတူ ဆောင်ရွက်နိုင်ခဲ့ပြီး ဖြစ်ကြောင်း ကေအိုင်အို /ကေအိုင်အေအဖွဲ့နှင့်လည်း ငြိမ်းချမ်းရေးအတွက် ဆွေးနွေးမှု (၁၁) ကြိမ် ပြုလုပ်ခဲ့ပြီး ဖြစ်ကြောင်ကိုလည်း ထုတ်ပြန်ကြေညာထားသည်။ အောင်အောင်(မြစ်မခ)
