အမျိုးသမီးငယ်တစ်ဦးကို တပ်မတော်သားတစ်ဦးက သစ်သားပိုင်းဖြင့် ရိုက်

Written By လွင့်မောင်မောင် on Wednesday, October 15, 2014 | 10:38 PM

ထားဝယ်၊ အောက်တိုဘာ ၁၅
တနင်္သာရီတိုင်းဒေသကြီး၊ ထားဝယ်ခရိုင်၊ ကံပေါက်ကျေးရွာ၊ သီရီမင်္ဂလာရပ်ကွက်နေ
အသက်၂၂အရွယ် အမျိုးသမီးတစ်ဦးကို တပ်မတော်သားတစ်ဦးက ကံပေါက်ဈေးသို့
သွားသည့်လမ်းတွင် အောက်တိုဘာလ ၁၃ရက်နေ့ နံနက် ၈ နာရီခန့်တွင်
ဦးခေါင်းကို သစ်သားပိုင်းဖြင့် ရိုက်နှက်မှု ဖြစ်ပွားခဲ့ကြောင်း
အရိုက်ခံရသူ၏ ဖခင် ဦးထွေးအောင်ထံမှ သိရသည်။
ဖြစ်စဉ်မှာ အရိုက်ခံရသူ အမျိုးသမီးသည် သီရီမင်္ဂလာရပ်ကွက်မှ
ကံပေါက်ဈေးသို့ ရွှေစေတီနောက်ဖက် ဖြတ်လမ်းအတိုင်း လမ်းလျှောက်သွားရာ
ရွှေစေတီဝင်းအတွင်းရှိ တံတားအလွန်အရောက်စဉ် တံတားအပေါ်၌ ထိုင်စောင့်နေသော
ကလိန်အောင်တပ်နယ်၊ ခမရ ၄၀၉ တပ်ရင်းမှ အသက် ၂၁ အရွယ်ရှိသော ရဲဘော်တစ်ဦးက
နောက်မှလိုက်လာကာ ၃လက်မခန့် ဗြက်ရှိသော သစ်သားပိုင်းဖြင့်
ဦးခေါင်းကိုရိုက်ပြီး အမျိုးသမီး၏ လည်ပင်း၌ဆွဲထားသော
လော်ကစ်ပါဆွဲကြိုးကို လုယူထွက်ပြေးခဲ့ခြင်းဖြစ်ကြောင်း ဦးထွေးအောင်က
ရှင်းပြသည်။
“ဒဏ်ရာရရှိတာနဲ့ ဖြစ်ဖြစ်ချင်း ကံပေါက်ဆေးရုံကိုတင်ပြီး ဆေးဝါးကုသခဲ့တယ်။
အဲဒီနေ့ ညနေပိုင်းမှာ ထားဝယ်ဆေးရုံကြီးကို ပြောင်းရွှေ့လာခဲ့တယ်။ သမီးက
စကားပြန်ပြောနိုင်ပေမယ့် ခေါင်းလှုပ်မရသေးဘူး”ဟု ဦးထွေးအောင်က ဆိုသည်။
ဦးခေါင်းကို ရိုက်ခံရခြင်းကြောင့် ဦးခေါင်းတွင် နှစ်ချက်ကွဲကာ
၂လက်မနှင့် ၃လက်မခန့်အကျယ် ရှိသော ဒဏ်ရာကို ၃ချက်စီချုပ်ထားရသည်ဟု
မိသားစုဝင်များထံမှ သိရသည်။
ယင်းအမျိုးသမီးငယ်မှာ ဇောတိကသဘာဝဓါတ်ငွေ့စီမံကိန်း(PTTEP)
ဇောတိကရေနံနှင့်သဘာဝ ဓါတ်ငွေ့ဗဟိုစခန်းမှ ယာယီလုပ်သားတစ်ဦးဖြစ်ပြီး
လုပ်နားရက်၌ ဈေးသို့သွားအချိန်တွင် ဖြစ်ပွားခဲ့ခြင်းဖြစ်ကြောင်း
ဒေသခံများထံမှသိရသည်။
ထားဝယ်ဆေးရုံကြီးသို့ရောက်သည့်နေ့ ညပိုင်းတွင် ခမရ ၄၀၉ တပ်ရင်း
စစ်ဗိုလ်နှစ်ဦးရောက်ရှိလာပြီး ဆေးဝါးကုသမှု တာဝန်ယူပေးမည်ဟု
လာရောက်ပြောဆိုပြီး တောင်းပန်စကားပြောခဲ့ကြောင်း မိသားစုဝင်များက
ပြောဆိုသည်။
“ စစ်ဗိုလ်တွေ ဒီနေ့ မနက် ၉နာရီမှာ ပြန်လာမယ်လို့ပြောတယ် အခုအထိတော့
(မွန်းလွဲနာရီခွဲကျော်အထိ) မလာသေးဘူး” ဟု အောက်တိုဘာလ ၁၄ ရက်နေ့က
ဦးထွေးအောင်က ဆိုသည်။
အမျိုးသမီးငယ်ဦးခေါင်းကို ရိုက်ကာထွက်ပြေးသွားသော ရဲဘော်ကို
ရဲတပ်ဖွဲ့ဝင်များနှင့်ရွာသားများဝိုင်းဝန်းရှာဖွေခဲ့ရာ ပရရွာနှင့်
ကံဘောက်ရွာအကြားရှိ ရော်ဘာခြံထဲတွင် ယင်းနေ့ မွန်းလွဲ၁၂ နာရီခန့်တွင်
ဖမ်းဆီးနိုင်ခဲ့သည်ဟု ကံပေါက်ရဲစခန်း ထံမှ သိရသည်။
ယင်းရဲဘော်အား ကံပေါက်ရဲစခန်းမှ (ပ) ၄၇ / ၂၀၁၄ ပြစ်မှုဆိုင်ရာဥပဒပုဒ်မ ၃၉၄
ဖြင့် အမှုဖွင့်ခဲ့ပြီး စစ်သည်ဖြစ်၍ စစ်ဘက်ဆိုင်ရာဥပဒေအရ
ဆက်လက်အရေးယူဆောင်ရွက်နိုင်ရန်အတွက် အောက်တိုဘာလ ၁၃ ရက်နေ့ ညက
ယင်းတပ်ရင်းသို့ လွှဲပြောင်းပေးအပ်ခဲ့ကြောင်း အထက်ပါရဲစခန်းထံမှ သိရသည်။
ဦးခေါင်းထိခိုက်ဒဏ်ရာရထားသည့် အမျိုးသမီးငယ်ကို
ထားဝယ်အထွေထွေရောဂါကုဆေးရုံကြီးတွင် အတွင်းလူနာအဖြစ် ကုသမှုခံယူနေရကြောင်း
ဖခင်ဖြစ်သူ ဦးထွေးအောင်က ပြောကြားသည်။

|Dawei Watch|

Share this article :