စမ်းချောင်းမြို့နယ် ဂွဈေး မီးလောင်နေစဉ် (ဓာတ်ပုံ - ညီကေး)
“အထပ်မြင့်ဈေးဆောက်ဖို့ စည်ပင်က ဈေးသူဈေးသားတွေကို ညှိုတယ်။ အဲဒါ အဆင်မပြေဘူး။ ဈေးသူ ဈေးသားတွေဘက်ကလည်း လက်မခံဘူး။ နှစ်အတော်ကြာနေပြီ အဲဒီလိုညှိုမရဖြစ်နေတာ။ အဲလိုအချိန်မျိုးကြီးမှာမှ ထဖြစ်တယ်ဆိုတော့ သံသယဖြစ်စရာတွေဖြစ်ကုန်တယ်။ ဒါက ရှို့မီးလား။ မနေ့ ညနေက မိုးကသဲသဲမဲမဲရွာထားတယ်။ တညလုံးလည်း မိုးတဖွဲဖွဲလေးကျနေတာ။ မီးလောင်ဖို့ မလွယ်လှဘူး။ ဘာပဲပြောပြော အခု စည်ပင်က လုပ်ချင်နေတဲ့ ဈေးသစ်စီမံကိန်းကြီးဖြစ်လာတော့မှာပေါ့” ဟု ဂွဈေးတွင် ဈေးရောင်းချသူ ကုန်စုံဆိုင်ပိုင်ရှင် တစ်ဦးက သုံးသပ်သည်။
စမ်းချောင်းမြို့နယ်မီးသတ်တပ်ဖွဲ့စခန်းမှ တာဝန်ရှိသူတစ်ဦးကမူ ဂွဈေးလောင်ကျွမ်းသော မီးသည် ရှို့မီးမဟုတ် ကြောင်း၊ ပေါ့ဆမီးဖြစ်ပြီး မီးလောင်မှုစတင်ဖြစ်သော ဆိုင်ခန်းပိုင်ရှင်ကို ဥပဒေအရ အမှုဖွင့်အရေးယူထားကြောင်း ဧရာဝတီသို့ ပြောဆိုသည်။
“စပြီးလောင်တာက ဈေးရုံ ဃ ရုံ၊ ဆိုင်ခန်း အမှတ် ၁ က စလောင်တာပါ။ အဲဒီဆိုင်က ကုန်စုံဆိုင်။ မနေ့ ညနေပိုင်းက ကုန်စုံဆိုင်မှာ ကုန်ပစ္စည်းတွေချတဲ့နေရာမှာ ထွန်းထားတဲ့ လေးပေမီးချောင်းနားမှာ ပစ္စည်းတွေချသွားတယ်။ အဲဒါ လေးပေမီးချောင်းကိုလည်း တညလုံးထွန်းထားခဲ့တော့ အပူလွန်ပြီး ဘေးနားမှာရှိတဲ့ ပစ္စည်းတွေကို စပြီး မီးလောင်တယ်။ အဲဒီကစလို့ မီးကူးစက်တာ။ ဆိုင်ရှင် နာမည်က ဒေါ်အေးသန်း။ အခုကျနော်တို့ ဥပဒေအရ အရေးယူဆောင်ရွက်မှုတွေလုပ်နေပါပြီ” ဟု စမ်းချောင်းမြို့နယ်မီးသတ်တပ်ဖွဲ့မှ တာဝန်ရှိသူတစ်ဦးက ဆိုသည်။
ဆိုင်ခန်းအားလုံးနီးပါး မီးလောင်ကျွမ်းသွားသောကြောင့် ဈေးပြန်မဖွင့်နိုင်တော့ကြောင်း၊ ဈေးသူဈေးသား အများစုက ဆိုင်ခန်းနေရာ ပြန်မရမည်ကို စိုးရိမ်မှုများဖြစ်ပေါ်နေကြကြောင်း သိရှိရသည်။
“မီးလောင်ထားတော့ ဈေးဆိုင်တွေ ပြန်ဖွင့်ခွင့် မရဖို့က များတယ်။ တကယ်လို့ အထပ်မြင့် ဈေးသစ်ကြီးဆောက်ရင်ကော ဆိုင်ခန်း နေရာပြန်ပေးပါ့မလား။ အဲဒါကို အားလုံးစိုးရိမ်ကြတယ်။ ဘာမှကို မသေချာဘူး။ စောင့်ကြည့်ရမယ်” ဟု ဈေးသူဈေးသားတဦးက ပြောသည်။
