လစ်လပ်မဲဆန္ဒနယ်များအတွက် ကြားဖြတ်ရွေးကောက်ပွဲ ယခုနှစ်အတွင်း ပြုလုပ်ဖွယ်ရှိ

လွှတ်တော်ကိုယ်စားလှယ် လစ်လပ်မဲဆန္ဒနယ်များအတွက် ကြားဖြတ်ရွေးကောက်ပွဲကို ယခုနှစ်အတွင်း ပြုလုပ်ဖွယ်ရှိကြောင်း ပြည်ထောင်စုရွေးကောက်ပွဲကော်မရှင်နှင့် နီးစပ်သူများထံမှ သတင်းရရှိသည်။

ဝန်ကြီးအဖြစ် တာဝန်ပေးအပ်ခံခဲ့ရသော လွှတ်တော်ကိုယ်စားလှယ်များနှင့် ကွယ်လွန်ခဲ့သည့် လွှတ်တော်ကိုယ်စားလှယ်များကြောင့် လစ်လပ်သွားသော မဲဆန္ဒနယ်များ၌ ကြားဖြတ်ရွေးကောက်ပွဲ ပြုလုပ်ရန် ပြီးခဲ့သည့်နှစ်အတွင်းကပင် လွှတ်တော် ကိုယ်စားလှယ်အချို့က တောင်းဆိုမှုများ ပြုလုပ်ခဲ့သည်။

ဒုတိယအကြိမ်ဖြစ်လာမည့် ကြားဖြတ်ရွေးကောက်ပွဲကို ပြုလုပ်ပေးနိုင်ဦးမည်မဟုတ်ကြောင်း ပြည်ထောင်စုရွေးကောက်ပွဲကော်မရှင်က ပြီးခဲ့သည့်နှစ်အတွင်း ပြောဆိုခဲ့သော်လည်း ယခုလပိုင်းများတွင် ကြားဖြတ်ရွေးကောက်ပွဲတစ်ရပ် ပြုလုပ်ရန် စဉ်းစားမှုများ ရှိနေကြောင်း The Daily Eleven  ကတွေ့ဆုံခဲ့ပြီး ပြည်ထောင်စုရွေးကောက်ပွဲကော်မရှင်နှင့် နီးစပ်သည့်သတင်းရင်းမြစ်အချို့က ပြောကြားသည်။

သို့ရာတွင် ကြားဖြတ်ရွေးကောက်ပွဲ  ပြုလုပ်ရေးကိစ္စရပ်နှင့် စပ်လျဉ်းသည်များကို  ဖြေကြားရန် ပြည်ထောင်စုရွေးကောက်ပွဲကော်မရှင်အဖွဲ့ဝင်များက ပြောဆိုမှုမပြုနိုင်သေးကြောင်း ငြင်းဆိုခဲ့သည်။

 ပြည်ထောင်စုရွေးကောက်ပွဲကော်မရှင်အဖွဲ့မှ ညွှန်ကြားရေးမှူးဦးသောင်းနိုင်က ကြားဖြတ်ရွေးကောက်ပွဲဆိုင်ရာကိစ္စများကို လွှတ်တော်ကိုယ်စားလှယ်များက မေးမြန်းထားကြောင်း၊ ထိုမေးခွန်းများသည်  ကြယ်ပွင့်ပြမေးခွန်းများဖြစ်ကြောင်း၊ ထို့အတွက်ကြောင့် လွှတ်တော်၌ မဖြေဆိုမီထုတ်ဖော်ပြောဆို၍ မရသေးကြောင်း The Daily Eleven  သို့ ပြန်လည်ဖြေကြားခဲ့သည်။

ထို့အတူ ပြည်ထောင်စုရွေးကောက်ပွဲကော်မရှင်မှ ဒုတိယညွှန်ကြားရေးမှူး ဦးလှမောင်ချိုကလည်း ကြားဖြတ်ရွေးကောက်ပွဲဆိုင်ရာကိစ္စများကို လွှတ်တော်၌ မကြာမီပြောဆိုရန် ရှိကြောင်းနှင့် လွှတ်တော်၌ ဖြေကြားချက်ကို စောင့်ဆိုင်းရန် ပြောဆိုခဲ့သည်။
ယခင်နှစ်က ရရှိထားသော စာရင်းများအရ လွှတ်တော်ကိုယ်စားလှယ်မရှိသည့် လစ်လပ်မဲဆန္ဒနယ်အရေအတွက်မှာ ၁၅  နေရာရှိသည်။ ပြည်ထောင်စုရွေးကောက်ပွဲ ကော်မရှင်၏ အတည်ပြုချက်မရဘဲ နောက်ဆုံးသိရှိရသော စာရင်းများအရ နေရာ ၂၀ မှ ၂၉ နေရာကြားတွင် ရှိနေကြောင်း သိရသည်။

၂၀၁၃ ခုနှစ် ဒီဇင်ဘာ ၃၀ ရက်က ပြုလုပ်ခဲ့သော ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ ဗဟိုကော်မတီ အစည်းအဝေးတွင် လစ်လပ်နေသည့် မဲဆန္ဒနယ်များ၊ ၂၀၁၀ပြည့်နှစ် ရွေးကောက်ပွဲနှင့်၂၀၁၂ ခုနှစ် ကြားဖြတ်ရွေးကောက်ပွဲများတွင် နယ်မြေမတည်ငြိမ်မှုကြောင့် ရွေးကောက်ပွဲပြုလုပ်နိုင်ခြင်းမရှိသည့် မဲဆန္ဒနယ်မြေများ၌ ကြားဖြတ်ရွေးကောက်ပွဲ ပြုလုပ်ရန်တိုက်တွန်းမည့် ဆုံးဖြတ်ချက်တစ်ရပ်ကို ချမှတ်ခဲ့သည်။

၂၀၁၃ ခုနှစ် ဇွန်လအတွင်းကလည်း  အမျိုးသားဒီမိုကရေစီအဖွဲ့ချုပ်မှ ပြည်သူ့လွှတ်တော်ကိုယ်စားလှယ် ဦးဝင်းမြင့်က လစ်လပ်မဲဆန္ဒနယ်မြေများတွင် ကြားဖြတ်ရွေးကောက်ပွဲ ပြုလုပ်ပေးရန် တောင်းဆိုခဲ့ပြီး ရခိုင်တိုင်းရင်းသားများတိုးတက်ရေးပါတီမှ ပြည်သူ့လွှတ်တော်ကိုယ်စားလှယ် ဦးဖေသန်းက ကြားဖြတ်ရွေးကောက်ပွဲ ပြုလုပ်ရန်အတွက် အချိန်သတ်မှတ်ပေးရေး အဆိုကို လွှတ်တော်၌ တင်သွင်းခဲ့သည်။

ကိုယ်စားလှယ်နှစ်ဦး၏ အဆိုကို ပြည်ထောင်စုရွေးကောက်ပွဲကော်မရှင် ဥက္ကဋ္ဌ ဦးတင်အေးက ပယ်ချခဲ့ပြီး ၂၀၁၅ ခုနှစ် ရွေးကောက်ပွဲအတွက် ကြိုတင်ပြင်ဆင်မှုများ စတင်ပြုလုပ်နေပြီဖြစ်သောကြောင့် ဒုတိယအကြိမ် ကြားဖြတ်ရွေးကောက်ပွဲ လုပ်မပေးနိုင်ခြင်းဖြစ်ကြောင်း ရှင်းလင်းခဲ့သည်။

ပြည်ထောင်စုရွေးကောက်ပွဲကော်မရှင်နှင့် နီးစပ်သော သတင်းရင်းမြစ်များ၏ ပြောဆိုချက်အရ ယခုလပိုင်းအတွင်း ပြုလုပ်သော ကော်မရှင်အစည်းအဝေးများတွင် ကြားဖြတ်ရွေးကောက်ပွဲ ပြုလုပ်ရေးကိစ္စရပ်များကို ဆွေးနွေးမှုများ ပြုလုပ်ခဲ့ပြီး ယခုနှစ်အတွင်း ပြုလုပ်ရန် စီစဉ်မှုများရှိသည်ဟု ဆိုသည်။ ၎င်းတို့၏ ပြောကြားချက်များအရ ဇွန်လပတ်ဝန်းကျင်တွင် ပြုလုပ်ဖွယ်ရှိကြောင်း သိရသည်။

သို့သော် သန်းခေါင်စာရင်းကောက်ယူရေးဆိုင်ရာကိစ္စအပြင် အာဆီယံအလှည့်ကျ ဥက္ကဋ္ဌတာဝန် ပါရှိနေသည့်အတွက် ကြားဖြတ်ရွေးကောက်ပွဲပြုလုပ်မည့်အချိန်ကို သတ်မှတ်ရန် ခက်ခဲနေကြောင်း သိရသည်။

၂၀၁၂ ခုနှစ်က ပြုလုပ်ခဲ့သော ကြားဖြတ်ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်က ၀င်ရောက်ယှဉ်ပြိုင်ခဲ့ပြီး လစ်လပ်မဲဆန္ဒနယ် ၄၄ နေရာအနက် ၄၃နေရာ တွင် အနိုင်ရရှိခဲ့သည်။

၂၀၁၀ ပြည့်နှစ်က ပြုလုပ်ခဲ့သော ရွေးကောက်ပွဲတွင် ပြည်သူ့လွှတ်တော်၊ အမျိုးသားလွှတ်တော်နှင့် ပြည်နယ်နှင့်တိုင်းဒေသကြီးလွှတ်တော်များအတွက် မဲဆန္ဒနယ် ၁၁၅၄ နေရာတွင် ရွေးကောက်ပွဲများ ပြုလုပ်ခဲ့သည်။ ၂၀၁၅ ခုနှစ် ရွေးကောက်ပွဲကို ၂၀၁၅ ခုနှစ်နှောင်းပိုင်းတွင် ပြုလုပ်ရန် စီစဉ်ထားကြောင်း သိရသည်။

နေထွန်းနိုင် Eleven Media Group