လာမယ့် ၂၀၁၅ ရွေးကောက်ပွဲမှာ စီအာပီပီ လို့ ခေါ်တဲ့ ပြည်သူ့လွှတ်တော် ကိုယ်စားပြု ကော်မတီမှာ ပါဝင်တဲ့ တိုင်းရင်းသားခေါင်းဆောင်တွေ ယှဉ်ပြိုင်မယ့် မဲဆန္ဒနယ်တွေမှာ NLD အနေနဲ့ ၀င်ရောက်မယှဉ်ပြိုင်ဖုို့ စဉ်းစားမှာဖြစ်တယ်လို့ ပြောခွင့်ရသူ ဦးဥာဏ်ဝင်းက ပြောပါတယ်။
အမျိုးသားဒီမုိုကရေစီအဖွဲ့ချုပ် ဗဟုိုအလုပ်အမှုဆောင်တွေနဲ့ ရှမ်းတိုင်းရင်းသားများ ဒီမုိုကရေစီ အဖွဲ့ချုပ်ခေါင်းဆောင်တွေ ရန်ကုန်မြို့မှာ ဇူလိုင် ၁၃ ရက်နေ့က တွေ့ဆုံအပြီးမှာ ပြောဆို လိုက်တာပါ။
ကျားခေါင်းပါတီနဲ့ စီအာပီပီမှာ ပါဝင်တဲ့ တိုင်းရင်းသားခေါင်းဆောင်တွေဟာ မိတ်ဆွေ ပါတီတွေဟာ NLD ရဲ့ မိတ်ဆွေပါတီဖြစ်လို့ အခုလို စဉ်းစားရတာ ဖြစ်တယ်လို့လည်း ဆုိုပါတယ်။ NLD ရဲ့ သဘောထားအပေါ်မှာ SNLD ဘက်ကလည်း သဘောတူထားပါတယ်။
ဒါ့အပြင် တိုင်းရင်းသားတွေနဲ့ ပိုမုို ရင်းနှီးစွာ ပူပေါင်းဆောင်ရွက်နိုင်တဲ့ တခြား ကိစ္စတွေကိုလည်း ညှိနှိုင်းသွားဖုို့ ရှိနေပါတယ်။
လောလောဆယ်မှာ အမျိုးသားဒီမိုကရေစီအဖွဲ့ချုပ်နှင့် ရှမ်းတိုင်းရင်းသားများ ဒီမုိုကရေစီအဖွဲ့ချုပ် SNLD ပါတီတို့ဟာ ကိုယ်စားလှယ် လောင်းတွေကို မရွေးချယ်ရသေးတဲ့အတွက် ရွေးချယ်ပြီးရင် ထပ်မံ တွေ့ဆုံ ညှိနှိုင်းသွားမှာ ဖြစ်တယ်လို့လည်း ဦးဥာဏ်ဝင်းက ပြောဆုိုသွားပါတယ်။
ပြည်သူ့လွှတ်တော် ကိုယ်စားပြု ကော်မတီဟာ ၁၉၉၀ ရွေးကောက်ပွဲတုန်းက အနိုင်ရခဲ့တဲ့ ရှမ်းတိုင်းရင်းသားများ ဒီမုိုက်ရေစီအဖွဲ့ချုပ်၊ ရခုိုင်ဒီမုိုကရေစီပါတီ၊ မွန်ဒီမုိုကရေစီပါတီနဲ့ ဇုိုမီးအမျိုးသား ကွန်ဂရက်ပါတီတွေက ကိုယ်စားလှယ်တွေနဲ့ ဖွဲ့စည်းထားတာ ဖြစ်ပါတယ်။
DVB
