ထားဝယ်စီမံကိန်းမှ အီတာလျံ-ထိုင်း ကုမ္ပဏီ၏ လုပ်ငန်းခွင်များ ရပ်ဆိုင်းခဲ့မှုကြောင့် မြန်မာလုပ်သားများ အခက်တွေ့နေ

(ထားဝယ်စီးပွားရေးဇုန် အတွင်းရှိ လုပ်ငန်းခွင် တစ်နေရာအား တွေ့ရစဉ်)
ထားဝယ်အထူး စီးပွားရေးဇုန် စီမံကိန်းမှ စီမံကိန်း အဓိက တည်ဆောက်သူ အီတာလျံ-ထိုင်း ကုမ္ပဏီသည် နိုဝင်ဘာ ၂၁ ရက်တွင် စီမံကိန်း လုပ်ငန်းခွင်မှ နောက်ဆုံးထား ထွက်ခွာနေပြီး ထိုင်းလုပ်သား အများစုမှာ ထိုင်းနိုင်ငံသို့ ပြန်လည်ထွက်ခွာနေပြီး ဆိုက်အတွင်းရှိ မြန်မာလုပ်သားများကိုမူ ကျန်ရှိသည့် အလုပ်ခွင်သို့ ရွှေ့ပြောင်းပေးရန် စီစဉ်နေကြောင်း သိရသည်။

နိုဝင်ဘာ ၂၁ ရက်တွင် လုပ်ငန်းခွင်အမှတ် J.1973 (Early Township တွင် လုပ်ကိုင်နေသော အလုပ်သမားများကို အလုပ်ခွင်မှ ရပ်ဆိုင်းလိုက်သဖြင့် အခြားဆိုက်သို့ ရွှေ့ပြောင်းပေးရမည် ဖြစ်သော်လည်း ရွှေ့ပြောင်းပေးခြင်း မရှိကြောင်း၊ ထို့ကြောင့် အလုပ်ရပ်ဆိုင်းခဲ့မှုအတွက် အလုပ်သမားများ ရရှိမည့် လုပ်ခကျန်ငွေနှင့် အလုပ်ရပ်ဆိုင်းသည့်အတွက် နစ်နာကြေး ရရှိလိုကြောင်း အလုပ်သမားများမှ လက်မှတ်ထိုး၍ ထားဝယ်အထူးစီးပွားရေးဇုန် အထောက်အကူပြု လုပ်ငန်းအဖွဲ့သို့ အသနားခံ တင်ပြခဲ့ကြောင်း သိရသည်။

"နိုဝင်ဘာ ၂၀ ရက်ကစပြီး ဦးတို့ကို အလုပ်ဖြုတ်ခဲ့တယ်။ ၁၃ နဲ့ ၁၆ ကီလိုမီတာဆိုက်က အလုပ်သမား ၁၂၀ ကိုပါ။ ၁၈ ရက်က ဦးတို့ကို ITD ဆိုက်က အလုပ်သမား တာဝန်ခံက အလုပ်ခွင် ရပ်နားတော့မယ်။ ဒါပေမဲ့ ဦးတို့ကို အခြားအလုပ်ဆိုက် ပြောင်းပေးမယ်ဆိုပြီး လာပြောပါတယ်။ ဦးတို့ကို ပြောင်းပေးမယ့် အလုပ်ဆိုက်က ဦးတို့ကို လက်ရှိနေထိုင်ရတဲ့ အခြေအနေအတိုင်း မလုပ်ပေးနိုင်ဘူး ပြောပါတယ်။ ဦးတို့ရစရာရှိတဲ့ ဒီလအတွက် လစာငွေကို ပေးဖို့ပြောတော့ နောက်လ ၆ ရက်နေ့မှ ပေးနိုင်မယ်လို့ ပြောတယ်။ ပြောင်းပေးမယ့် အလုပ်ဆိုက်မှာ အရင်လို ထောက်ပံ့မှုတွေ ပေးရင်တော့ ဆက်လုပ်မယ်။ မပေးရင်တော့ ဦးတို့အတွက် နစ်နာကြေးလို ချင်တယ်။ အခု လက်မှတ်ထိုးပြီး တောင်းဆိုထားတယ်" ဟု ဧရာဝတီတိုင်းဒေသကြီး မြန်အောင်မြို့မှ လာရောက်လုပ်ကိုင်နေသည့် အလုပ်သမား ဦးသိန်းစိုးက ပြောကြားခဲ့သည်။

အလုပ်သမားများ အလုပ်ခွင်မှ ရပ်နားမှုနှင့် ပတ်သက်၍ ထားဝယ်အထူးစီးပွားရေးဇုန် အထောက်အကူပြု လုပ်ငန်းအဖွဲ့ကို ဆက်သွယ်မေးမြန်းခဲ့ရာ "မြန်မာအလုပ်သမားများကို အလုပ်ဖြုတ်ခြင်း မရှိပါဘူး။ ညှိနှိုင်းနေဆဲပါ။ ရှေ့ဆက်သွားမယ့် အစီအစဉ်တွေ ရှိသေးတယ်။ လောလောဆယ်တော့ ကုမ္ပဏီက သုံးလပဲ နားမှာပါ" ဟု ထားဝယ်အထူးစီးပွားရေးဇုန် အထောက်အကူပြု လုပ်ငန်းအဖွဲ့မှ အတွင်းရေးမှူးက ပြောကြားခဲ့သည်။
သတင်းနှင့်ဓာတ်ပုံ - Eleven Media Group