မြန်မာနိုင်ငံရဲ့ ပထမဆုံးအကြိမ် အပြည်ပြည်ဆိုင်ရာ မော်တော်ဆိုင်ကယ်ကလပ်အသင်းများ တွေ့ဆုံပွဲကို အခု ဒီဇင်ဘာ ၁၄ နဲ့ ၁၅ ရက်တွေမှာ ကျင်းပမှာပါ။ နေရာကတော့ ရှမ်းပြည်နယ် အရှေ့ပိုင်းမှာရှိတဲ့ တာချီလိတ်မြို့မှာပါ။ နိုင်ငံပေါင်း ၁၉ နိုင်ငံက မော်တော်ဆိုင်ကယ် ကလပ်အသင်းတွေ လာရောက်တွေ့ဆုံကြမယ်လို့သိရပါတယ်။
 |
| ဓာတ်ပုံ - Eastern Eagle မော်တော်ဆိုင်ကယ်ကလပ် |
မြန်မာနိုင်ငံရဲ့ခရီးသွားလာရေးမြှင့်တင် လိုတဲ့ရည်ရွယ်ချက်နဲ့ လုပ်ဆောင်တာဖြစ်ပြီး အမေရိကန်နိုင်ငံ အပါအဝင် အာဆီယံ နိုင်ငံတွေက လာရောက်ကြမှာပါ။ ဒီ တွေ့ဆုံပွဲကို တာချီလိတ်မြို့နယ် ရှမ်းရိုးမကွင်းမှာ ကျင်းပပြုလုပ်မှာဖြစ်ပါတယ်။
ဒီမှာ ဂီတဖျော်ဖြေရေး ပွဲတွေပြုလုပ်ပြီး ဒီကနေ ရရှိလာမယ့် အကျိုးအမြတ်ကို ဘုန်းတော်ကြီး ပညာသင်ကျောင်းများအား လှူဒါန်းသွားမှာဖြစ်တယ်လို့ Eastern Eagle (myanmar) မော်တော်ဆိုင်ကယ်ကလပ်မှ အတွင်းရေးမှူး စိုင်းနော်ခမ်းက ဧရာဝတီကိုပြောပါတယ်။
“အာဆီယံ နိုင်ငံက ဆိုင်ကယ်ကလပ်တွေတော်တော်များများလာကြမယ်။ သူတို့နိုင်ငံကနေ ဆိုင်ကယ်စီးပြီး လာကြမယ်။ အမေရိကန်ကတော့ထိုင်းထိ လေယာဉ်နဲ့လာပြီး ထိုင်းကနေ ဆိုင်ကယ် စီးလာကြမယ်။”လို့ သူက ဆက်ပြောပါတယ်။
အခုလို တွေ့ဆုံပွဲကို တာချီလိတ်မြို့မှာ ပြုလုပ်ရခြင်းဟာ ရှမ်းအရှေ့ပိုင်း ခရီးသွားလာရေး ဖွံ့ဖြိုးလာစေဖို့နဲ့ ထိုင်း-မြန်မာ နယ်စပ်လည်းဖြစ်တဲ့အတွက် နိုင်ငံခြားသားတွေ ဝင်ရောက်လာဖို့ လွယ်ကူစေနိုင်တဲ့အတွက်ကြောင့်လို့လည်း ဆိုပါတယ်။
“ ထိုင်းကနေ ဆိုင်ကယ် အစီး ၆၀၀ကျော် စီးပြီးလာကြမယ်။ မြန်မာပြည်တဝှမ်းက ဆိုင်ကယ်သမားကတော့ ၅၀ ကျော် လာမယ်လို့ စာရင်းရထားတယ်။ တွေ့ဆုံပွဲပြီးရင်တော့ ကျိုင်းတုံ- မိုင်းလားဘက်ကို ဆိုင်ကယ်နဲ့ ခရီးဆက်ကြမယ်” လို့ Eastern Eagle မှ နိုင်ငံခြား ဆက်ဆံရေး တာဝန်ယူထားသည့် စိုင်းဝင်းလင်းထူး က ဧရာဝတီကို ပြောပါတယ်။
ဒီ တွေ့ဆုံပွဲမှာ နိုင်ငံတကာက စီးလာတဲ့ ဆိုင်ကယ်တွေထဲက ရှေးဟောင်းအကျဆုံး ဆိုင်ကယ်နှင့် အလှဆုံး ဆိုင်ကယ်တွေကို ရွေးပြီး ဆုပေးသွားမှာပါ။ ဒါ့အပြင် ဖျော်ဖြေရေး အစီအစဉ်အနေနဲ့ ထိုင်းနိုင်ငံက နာမည်ကြီး ရော့ခ်အဆိုတော် ကရာဘောင်း နဲ့ အဖွဲ့၊ မြန်မာနိုင်ငံက အင်ပါယာအဖွဲ့မှ အဆိုတော် ဇော်ဝင်းထွဋ် နဲ့ သျှီ တို့ကို ကိုလည်း ဖိတ်ခေါ်ထားတယ်လို့ သိရပါတယ်။
အဲ့ဒါတွေအပြင် ထိုင်းနိုင်ငံက နှစ်ပါးသွားအက နဲ့ အတူ ရှမ်းရိုးရာ အကတွေလည်း ပါဝင်ဖျော်ဖြေဖို့ ရှိတယ်လို့လည်း စိုင်းဝင်းလင်းထူးက ဆိုပါတယ်။
ပွဲတော် လုံခြုံရေးပိုင်းအနေနဲ့ ရဲတပ်ဖွဲ့တွေ၊ ယာဉ်ထိန်းရဲတွေ၊ အုပ်ချုပ်ရေးပိုင်းတွေ အားလုံးခွဲပြီး တာဝန်ယူထား တယ်လို့လည်း တာချီလိတ်ခရိုင် မြို့နယ် အုပ်ချုပ်ရေးမှူး ဦးထွန်းထွန်းဝင်းက ပြောပါတယ်။
အပြည်ပြည်ဆိုင်ရာ မော်တော်ဆိုင်ကယ် ကလပ်များ တွေ့ဆုံပွဲကို နိုင်ငံတကာမှာလည်း နှစ်စဉ်ကျင်းပလျက်ရှိတယ် လို့ သိရပါတယ်။
နန်းဆိုင်နွမ်(ဧရာဝတီ blog )
