သမဂ္ဂများ လွတ်လပ်စွာ ဖွဲ့စည်းခွင့် အမျိုးသားပညာရေး ဥပဒေတွင် ပြဋ္ဌာန်းရန်လိုဟု ပညာရှင်များ ပြောကြား

ရန်ကုန်၊ ဒီဇင်ဘာ ၅

အမျိုးသားပညာရေး နည်းဥပဒေကြမ်း၊ အဆင့်မြင့်ပညာရေး ဥပဒေနှင့် တက္ကသိုလ် ပဋိညာဉ်များတွင် ဆရာသမဂ္ဂများ၊ ကျောင်းသားသမဂ္ဂများ လွတ်လပ်စွာ ဖွဲ့စည်းခွင့်ပေးရန် အမျိုးသားပညာရေး ဥပဒေ ရေးဆွဲစဉ်ကတည်းက အာမခံ ပြဋ္ဌာန်းပေးထားရန် လိုအပ်ကြောင်း ပညာရေးဆိုင်ရာ ကျွမ်းကျင်သူများက ပြောဆိုသည်။

ဒီဇင်ဘာ ၅ ရက်နေ့ နံနက် ၁၀ နာရီခန့်မှ ညနေ ၅ နာရီခန့်အထိ ဒီမိုကရေစီ ပညာရေးလှုပ်ရှားမှု ဦးဆောင်ကော်မတီက ရန်ကုန် နာရေးကူညီမှုအသင်းတွင် ပြုလုပ်သည့် “ပညာရေး ပြုပြင်ပြောင်းလဲမှုနှင့် အမျိုးသားပညာရေး ဥပဒေ” စာတမ်းဖတ်ပွဲတွင် စာတမ်းဖတ်ကြားသည့် ပညာရှင်အများစုက အထက်ပါအတိုင်း ပြောဆိုခြင်း ဖြစ်သည်။

“အခြေခံမူကတည်းက သမဂ္ဂဆိုတဲ့ စကားလုံး ပါကိုပါရမယ်။ ကမ္ဘာမှာ Student Union လို့ သုံးတယ်၊ ကျောင်းသားသမဂ္ဂလို့ ဘာသာပြန်ရင် သူ့ထက် ဆီလျော်တဲ့ စကားလုံး ဆရာတို့တော့ မတွေ့သေးဘူး” ဟု အမျိုးသားပညာရေး ဥပဒေ ပြင်ဆင်ရေးအတွက် ဆွေးနွေးချက် ခေါင်းစဉ်ဖြင့် စာတမ်းဖတ်ကြားခဲ့သော ဒေါက်တာတင်လှိုင်က The Voice သို့ ပြောကြားသည်။

အမျိုးသားပညာရေး ဥပဒေသည် ဘုံဥပဒေ ဖြစ်သည့်အတွက် အပြည့်အစုံ မပါဝင်ကြောင်း၊ ကျောင်းသားသမဂ္ဂ၊ ဆရာသမဂ္ဂဟု ထည့်သွင်းသုံးနှုန်းခြင်းသည် အဖွဲ့အစည်း တစ်ခုကိုသာ ကိုယ်စားပြုပြီး ကျောင်းသား အဖွဲ့အစည်းများကို ကိုယ်စားမပြုသဖြင့် အသင်းအဖွဲ့များ လွတ်လပ်စွာ ဖွဲ့စည်းခွင့်ဟု အမျိုးသားပညာရေး နည်းဥပဒေကြမ်းတွင် ထည့်သွင်းထားကြောင်း ပညာရေး ဝန်ကြီးဌာန တာဝန်ရှိသူများက ပြောဆိုထားသည်။

“ပါချုပ်က ဖွဲ့ခိုင်းလို့ ဖွဲ့ရင် လွတ်လပ်စွာ ဖွဲ့စည်းခွင့်ရှိတဲ့ သမဂ္ဂ မဟုတ်ဘူး။ လွတ်လပ်တဲ့ သမဂ္ဂ ဖြစ်မလာဘူး” ဟု အဆင့်မြင့်ပညာရေး မူဝါဒ သဘောထား စာတမ်းဖတ်ကြားခဲ့သည့် ဒေါက်တာအာကာမိုးသူက မှတ်ချက်ပြု ပြောဆိုသည်။

အသင်းအဖွဲ့များ ဖွဲ့စည်းခွင့်ကို ခွင့်ပြုကြောင်း သုံးနှုန်းခြင်းမှာ တက္ကသိုလ် အုပ်ချုပ်ရေးအဖွဲ့ သို့မဟုတ် ပါမောက္ခချုပ် စိတ်တိုင်းကျ ရွေးချယ်ထားသည့် ဆရာ၊ ကျောင်းသားများနှင့် ဖွဲ့စည်းထားသည့် အဖွဲ့အစည်းများ ပေါ်ပေါက်လာစေကာ လွတ်လပ်စွာ ဖွဲ့စည်းထားသော သမဂ္ဂများကို အမြင်မှားလာစေနိုင်ကြောင်း ၎င်းက ပြောဆိုသည်။
The Voice