သဘာ၀၀န်းကျင် ဆွေးနွေးပွဲ ကျွန်းစုတွင် တားမြစ်ခံရ

Dawei Watch| ကျွန်းစု၊ မေ ၁၀

ထင်ရှားသော သဘာဝပတ်ဝန်းကျင် ထိန်းသိမ်းရေး ပညာရှင် ဦးဝင်းမျိုးသူ ဦးဆောင်သော အဖွဲ့တစ်ခု ဖြစ်သည့် စိမ်းလန်းအမိမြေ ဖွံ့ဖြိုးရေးတိုးတက်ရေး အဖွဲ့ (ALARM) က ကျွန်းစုမြို့နယ်တွင် ပြုလုပ်သော သဘာဝသယံဇာတ ထုတ်ယူသုံးစွဲမှုဆိုင်ရာ ဆွေးနွေးပွဲ မေလ ၉ ရက်နေ့က တားမြစ်ခံလိုက်ရသည်။

သစ်တောဥပဒေ အကျိုးသက်ရောက်မှုရှိရေး၊ စီမံအုပ်ချုပ်ရေးနှင့် ကုန်သွယ်မှုဆိုင်ရာ မြို့နယ်အဆင့် အလုပ်ရုံဆွေးနွေးပွဲကို တနင်္သာရီတိုင်းဒေသကြီး၊ မြိတ်ခရိုင်၊ ကျွန်းစုမြို့ပေါ်တွင် မေလ ၉ ရက်နေ့က ပြုလုပ်ရာ သက်ဆိုင်ရာ အခြားဌာနများက ကျင်းပခွင့်ပေးခဲ့သော်လည်း သစ်တောဦးစီးဌာနမှ လာရောက် တားမြစ်ခဲ့ခြင်း ဖြစ်ကြောင်း အထက်ပါအဖွဲ့၏ တနင်္သာရီတိုင်း တာဝန်ခံ ဦးဇော်မင်းသန့်က ရှင်းပြသည်။

နားလည်မှု စာချွန်လွှာ (MoU) လက်မှတ်ရေးထိုးကာ ပူးပေါင်းခြင်း မရှိသဖြင့် တားမြစ်ရခြင်းဖြစ်ကြောင်း ကျွန်းစုမြို့နယ် သစ်တော ဦးစီးဌာနမှ ဦးစီးမှူး ဦးနိုင်လင်းထွန်းက ပြန်လည်ရှင်းလင်းပြောဆိုသည်။

“တိုင်းဒေသကြီးညွန်ကြားရေးမှူးရုံးက ဖုန်းဆက် ပြောလို့ ကျွန်တော်တို့ဌာနက သွားရောက် တားမြစ်ခဲ့တာပါ”ဟု ၎င်းက ဆိုသည်။

အထက်ပါကိစ္စနှင့် ပတ်သက်၍ ALARM ၏ ဥက္ကဋ္ဌ နှင့် EcoDev ၏ အုပ်ချုပ်မှု ဒါရိုက်တာ ဦးဝင်းမျိုးသူကို မေးမြန်းရာ မှတ်ချက်မပြုလိုကြောင်း ပြန်လည်ပြောဆိုသည်။  

အဆိုပါ အလုပ်ရုံဆွေးနွေးပွဲတွင် ကျွန်းစုမြို့နယ်များမှာ ဒေသခံ ၂၅ ဦး တက်ရောက်ဆွေးနွေးခဲ့ပြီး သစ်တောသယံဇာတ ထုတ်ယူသုံးစွဲနေမှု အခြေအနေများနှင့် လူမှုရေး၊ စီးပွားရေးနှင့် ပတ်ဝန်းကျင်အပေါ် သက်ရောက်မှုများနှင့် စိန်ခေါ်မှုများကို ထည့်သွင်းဆွေးနွေးခဲ့ကြောင်း ပွဲတက်ရောက်သူများထံမှ သိရသည်။

ယင်းဆွေးနွေးပွဲကို မေလ ၉ ရက်နှင့် ၁၀ ရက်နေ့တွင် ပြုလုပ်ရန် စီစဉ်ခဲ့သော်လည်း ပထမရက် နေ့လယ်တွင်ပင် လာရောက်တားမြစ်ခဲ့သဖြင့် နေ့တစ်ဝက်သာ ပြုလုပ်နိုင်ခဲ့သည်။

ကျွန်းစုမြို့နယ်အတွင်း ဒီရေတောများနှင့် သစ်တောများကို မြေပြင် စစ်တမ်းကောက် တိုင်းတာရေး လုပ်ငန်းများတွင် သစ်တောဦးစီးဌာနမှ ပူးပေါင်းမှုရှိခဲ့သော်လည်း ယခု အလုပ်ရုံဆွေးနွေးပွဲ တားမြစ်မှုကြောင့် နစ်နာရကြောင်း ဦးဇော်မင်းသန့်က ထောက်ပြသည်။

စိမ်းလန်းအမိမြေ ဖွဲ့ဖြိုးတိုးတက်ရေး အဖွဲ့ သည် သဘာဝပတ်ဝန်းကျင် ထိန်းသိမ်းရေး၊ သယံဇာတ ထုတ်ယူရေးကြောင့် ပတ်ဝန်းကျင် ထိခိုက်မှု ဆိုင်ရာ အသိပညာပေးခြင်း၊ သုတေသန ပြုခြင်း တို့ မြန်မာနိုင်ငံ တစ်ဝန်း လုပ်ကိုင်လျက်ရှိသည်။

Dawei Watch