ထားဝယ်ဒေသ ဆယ်ရက်ကြာ လျှပ်စစ်မီးပြတ်တောက်နိုင်မှု ပြည်ထောင်စု အစိုးရထံ အရေးပေါ် တင်ပြမည်

>
ထားဝယ်မြို့တွင်း သွယ်တန်းထားသည့် ဓာတ်ကြိုးများဓာတ်ပုံ - Dawei Watch

 ထားဝယ်၊ မတ် ၁၀

ကမ်းလွန် ဇောတိက စီမံကိန်းမှ သဘာဝဓာတ်ငွေ့ ထုတ်လွှတ်မှု ဆယ်ရက်ကြာရပ်နားမည်ဆိုပါက ဇောတိက ပိုက်လိုင်းမှ သဘာဝဓာတ်ငွေ့ရယူကာ ထားဝယ်ခရိုင်အတွင်း ဖြန့်ဖြူးသည့် လျှပ်စစ်ပြတ်တောက်နိုင်မည့်အခြေအနေအပေါ် ပြည်ထောင်စုအစိုးရအဖွဲ့ထံ အရေးပေါ် တင်ပြသွားမည်ဖြစ်ကြောင်း တနင်္သာရီတိုင်းဒေသကြီး လျှပ်စစ်နှင့်စက်မှုဝန်ကြီး ဦးဝင်းဆွေက ပြောကြားသည်။

ဇောတိကသဘာဝဓာတ်ငွေ့စီမံကိန်းက မတ်လ ၁၉ ရက်နေ့မှ ၂၈ ရက်နေ့အထိ ဆယ်ရက် ကြာ သဘာဝဓာတ်ငွေ့ထုတ်လွှတ်မှု ရပ်ဆိုင်းမည့်ကိစ္စကို မတ်လ ၁၀ ရက်နေ့တွင်မှ သိခဲ့ရပြီး ယင်း ဆယ်ရက်အတွင်း ထားဝယ်ခရိုင်အတွက် လျှပ်စစ်ဖြန့်ဖြူးရန် သဘာဝဓာတ်ငွေ့ကို မည်သို့ အစားထိုးပေးမည်နည်း ဟု ပြည်ထောင်စုအစိုးရအဖွဲ့ထံသို့ အရေးပေါ် တင်ပြမေးမြန်းမည်ဖြစ်ကြောင်း ၀န်ကြီးဦးဝင်းဆွေကဆိုသည်။

“အချိန်က အရမ်းကပ်နေပြီ။ လျှပ်စစ်မီးမပြတ်အောင် ဘယ်လိုလုပ်မလဲဆိုတာ ဆက်စဉ်းစားရဦးမယ်” ဟု ဦးဝင်းဆွေက ပြောသည်။

မြန်မာ့ရေနံနှင့် သဘာဝဓာတ်ငွေ့လုပ်ငန်းနှင့် ထိုင်းနိုင်ငံအခြေစိုက် PTTEP ကုမ္ပဏီတို့ ပူးပေါင်းလုပ်ကိုင်နေသည့် ဇောတိက သဘာဝဓာတ်ငွေ့စီမံကိန်းမှ ဓာတ်ငွေ့ထုတ်လုပ်ရေးစင် ပြုပြင်ထိန်းသိမ်းရေးလုပ်ငန်းများ လုပ်ဆောင်ရန်အတွက် ဓာတ်ငွေ့ထုတ်လွှတ်မှု ၁၀ ရက်ကြာရပ်နားမည်ဟု စွမ်းအင်ဝန်ကြီးဌာနကို ကိုးကား၍ မတ်လ ၆ ရက်နေ့ထုတ် မြ၀တီနေ့စဉ်သတင်းစာတွင် ဖော်ပြထားသည်။

ယင်းသို့ ရပ်နားထားသည့် ကာလအတွင်း သထုံ၊ မော်လမြိုင်နှင့် ကံပေါက်ဒေသတို့ရှိ သဘာဝဓာတ်ငွေ့သုံး လျှပ်စစ်ဓာတ်အားပေးစက်ရုံများ၊ ဘိလပ်မြေစက်ရုံများနှင့် စက်ရုံငယ်များသို့ သဘာဝဓာတ်ငွေ့ပို့လွှတ်မှုခေတ္တရပ်ဆိုင်းထားမည်ဖြစ်ပြီး ရန်ကုန်ဧရိယာအတွက်မူ ရတနာ-ရန်ကုန် ၂၄ လက်မ ပိုက်လိုင်းမှ ရတနာသဘာဝဓာတ်ငွေ့စီမံကိန်း၏ ဓာတ်ငွေ့ဖြင့် အစားထိုးဖြန့်ဖြူးပေးရန် စီမံထားကြောင်း အထက်ပါသတင်းစာတွင် ဖော်ပြသည်။

ယင်း ၁၀ ရက် အတွက် အစားထိုးနိုင်သော အရန် ဒီဇယ်မီးစက်များ၏ စွမ်းဆောင်ရည်မှာ အမြင့်ဆုံး ၂ မဂ္ဂါဝပ်သာ ထုတ်နိုင်မည်ဖြစ်သောကြောင့် မီးအများဆုံးအသုံးပြုချိန်ဖြစ်သည့် ညအချိန်တွင် မီးသုံးစွဲအား ၇ မဂ္ဂါဝပ်ကျော် ရှိသည့် ထားဝယ်ခရိုင်အတွက် လုံလောက်မှုမရှိနိုင်ကြောင်း လျှပ်စစ်နှင့် စက်မှုဝန်ကြီး ဦးဝင်းဆွေက ပြောသည်။

ထားဝယ်ဒေသအတွင်း လျှပ်စစ်မီး ပေးနိုင်ရေး အတွက် စွမ်းအင် ရရှိရေးကို တိုင်းဒေသကြီး အစိုးရက တာဝန်ယူထားရပြီး ဖြန့်ဖြူးရေးကို ထားဝယ်ဖွံ့ဖြိုးရေး အများပိုင် ကုမ္ပဏီ (DDPC) က တာဝန်ယူထားသည်။

ဒေသတွင်း လျှပ်စစ်မီး မပြတ်တောက်အောင် သက်ဆိုင်ရာ အစိုးရ ဌာနနှင့် ပူးပေါင်းဆောင်ရွက်သွားမည်ဖြစ်ပြီး ဇောတိက စီမံကိန်းမှ ဓာတ်ငွေ့မရနိုင်သည့် ရက်များအတွင်း အချိန်ပိုင်းမီးပေးနိုင်ရန် စီစဉ်နေကြောင်း DDPC ကုမ္ပဏီ ၏ ဒါရိုက်တာ ဦးအောင်ဇော်ဟိန်းက Dawei Watch သို့ ပြောကြားသည်။

တိုင်းဒေသကြီးအစိုးရအဖွဲ့၏ အစီအစဉ်ဖြင့် ဇောတိကသဘာဝဓာတ်ငွေ့စီမံကိန်းမှ ဓာတ်ငွေ့ဝယ်ယူကာ ထားဝယ်ခရိုင် ၄ မြို့နယ်ကို ၂၀၁၄ ခုနှစ် ဇွန်လမှ စတင်၍ တစ်ယူနစ်လျှင် ၃၀၀ ကျပ်ဖြင့် လျှပ်စစ်ဓာတ်အား ဖြန့်ဖြူးခဲ့သည်။

DVB