 |
| ကျမတိုဘ၀များ-ရောင်းရန်မဟုတ် အစီရင်ခံစာ |
ထားဝယ်အမျိုး သမီးသမဂ္ဂအနေနဲ့ ပြီးခဲ့တဲ့လက ‘ကျမတိုဘ၀ များ-ရောင်းရန်မဟုတ်’ ဆိုတဲ့ အစီရင်ခံစာ တစောင်ထုတ်ပြန် ခဲ့ပြီးနောက်ပိုင်း တနင်္သာရီတိုင်းအစိုးရ အဖွဲ့ဝင် ဒုဝန်ကြီး ဦးဘုန်းဆွေက ထားဝယ် အထူးစီးပွားရေး ဇုန် ထောက်ခံတဲ့ လူထုဆန္ဒပြပွဲတခု လုပ်ဆောင်ခဲ့ပြီး အမျိုးသမီး တက်ကြွလှုပ်ရှား သူတွေကို ဆန့်ကျင် ခြိမ်းခြောက်မှုတွေ လုပ်ခဲ့တာလို့ ထားဝယ်အမျိုးသမီးသမဂ္ဂ (တီဒဗလျူယူ) ရဲ့ ပြောခွင့် မယ်စုစုဆွေက ပြောပါတယ်။
“ကြံ့ခိုင်ဖွံ့ဖြိုးရေးပါတီက ဦးဆောင်ပြီးတော့ ထားဝယ်ရေနက်ဆိပ်ကမ်း အမြန်ဖော်ထုတ်ရေး၊ ထားဝယ်ရေနက်ဆိပ်ကမ်း ဆန့်ကျန်သူတွေအား ဒို့ရန်သူ၊ နောက်တခုက တီဒဗလျူယူက အဖျက် သမားဆိုပြီးတော့ အဲလို ပြောတာတွေ ရှိတယ်။ အဲဒီအပြင် ကျမတို့ရဲ့ အဖွဲ့ဝင်တဦးကို ဒီကျောက်မီးသွေးစက်ရုံ ဆိုးကျိုးနဲ့ ပတ်သက်ပြီး အသိပညာပေးလုပ်တဲ့အတွက် နောက်ကွယ်မှာ မုဒိမ်းကျင့်ပစ်လိုက်မယ်ဆိုတဲ့ ပြောဆိုတာတွေ ရှိတယ်။ ဒါပေမယ့် ဒါက နောက်ကွယ်မှာ ပြောတယ်။ သူရဲ့တပည့်တယောက်က လာပြီး သတိပေးသွားတယ်။ အစ်မ သတိထားပြီးနေ၊ ညည အပြင်မထွက်နဲ့ တယောက်တည်းလည်း ဘယ်မှမသွားနဲ့၊ အစ်မကို မုဒိမ်းကျင့်ဖို့ ပြောတယ်။”
ဒါ့အပြင် ကျောက်မီးသွေးရဲ့ ဆိုးကျိုးတွေနဲ့ပတ်သက်ပြီး အသိပညာပေးနေတဲ့ သကျက်တောရွာခံ အထက်တန်းကျောင်း ဆရာမကို မြို့နယ်နဲ့ တိုင်းပညာရေးမှူးတွေက ပြီးခဲ့တဲ့လအတွင်း ၃ ကြိမ် တွေ့ဆုံခဲ့ပြီး ကျောက်မီးသွေးစီမံကိန်းကို မဆန့်ကျင်ဖို့၊ နိုင်ငံရေးနဲ့ မပတ်သက်ဖို့ သတိပေးခဲ့တယ်လို့လည်း တီဒဗလျူယူရဲ့ ထုတ်ပြန်ချက်မှာ ပါရှိပါတယ်။
ဒါကြောင့် အမျိုးသမီးတွေကို ဦးတည်ပြီး နှောင့်ယှက် ခြိမ်းခြောက်မှုတွေ လုပ်ဆောင်တဲ့အပေါ် ကန့်ကွက်ရှုတ်ချတယ်လို့လည်း ထုတ်ပြန်ထားပါတယ်။
By နော်နိုရင်း(ဒီဗွီဘီ)
