၂၀၁၃ ခုနှစ် ဇူလိုင်လ အတွင်းက ချင်းမိုင်မြို့၌ တိုင်းရင်းသား ညီလာခံ ပြုလုပ်စဉ်
အမျိုးသား ဒီမိုကရေစီ အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်နှင့် ပြည်ခိုင်ဖြိုးပါတီ ဥက္ကဋ္ဌတို့ သက်သေအဖြစ် လက်မှတ်ရေးထိုးပေးရေး၊ နိုင်ငံရေး ပြဿနာများကို နိုင်ငံရေးနည်းဖြင့် ငြိမ်းချမ်းစွာ အကျေအလည် ညှိနှိုင်းဖြေရှင်းရေးကို အာမခံရန်ဆိုသည့် အချက်များ အပါအ၀င် နိုင်ငံလုံးဆိုင်ရာ အပစ်အခတ် ရပ်စဲရေးအတွက် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ (UNFC) ၏ လိုလားချက်များကို အောက်တိုဘာ ၇ ရက်မှ ၉ ရက်အထိ ပြုလုပ်ခဲ့သော UNFC အရေးပေါ် ကောင်စီအစည်းအဝေး ဆုံးဖြတ်ချက်အရ ထုတ်ပြန်ခဲ့သည်။
သက်သေများအဖြစ် လက်မှတ်ရေးထိုးမှုတွင် ၎င်းတို့နှစ်ဦးအပြင် UNA ဥက္ကဋ္ဌ၊ ကမ္ဘာ့ ကုလသမဂ္ဂ အတွင်းရေးမှူးချုပ်၊ နိုင်ငံတကာ ခေါင်းဆောင်များ၊ UNFC ဥက္ကဋ္ဌ၊ UNFC အဖွဲ့ဝင်များ၏ ဥက္ကဋ္ဌများ (သို့မဟုတ်) ဒုဥက္ကဋ္ဌများ (သို့မဟုတ်) အတွင်းရေးမှူးများ၊ UNFC အဖွဲ့ဝင် မဟုတ်သော လက်နက်ကိုင် တော်လှန်ရေး အဖွဲ့အစည်းများမှ ဥက္ကဋ္ဌများ (သို့မဟုတ်) ဒုတိယ ဥက္ကဋ္ဌများ (သို့မဟုတ်) အတွင်းရေးမှူးများနှင့် အခြားပါဝင်သင့် ပါဝင်ထိုက်သည့် ပုဂ္ဂိုလ်များ ပါဝင်လက်မှတ် ရေးထိုးရမည်ဟု ထုတ်ပြန်ချက်တွင် ပါရှိသည်။
လက်မှတ်ရေးထိုးမှုတွင် သမ္မတ၊ ပြည်သူ့လွှတ်တော် ဥက္ကဋ္ဌ၊ အမျိုးသားလွှတ်တော် ဥက္ကဋ္ဌ၊ ကာကွယ်ရေး ဦးစီးချုပ်နှင့် တရားသူကြီးချုပ်တို့ ပါဝင်လက်မှတ် ရေးထိုးရမည်ဖြစ်ပြီး အဆိုပါ ငါးဦးမှ တစ်ဦးဦး ပျက်ကွက်ပါက သဘောတူညီချက် အထမြောက်မှု မရှိဟု မှတ်ယူစေရမည်ဟု UNFC ၏ ကြေညာချက်၊ လက်တွေ့အကောင်အထည်ဖော် ဆောင်ရွက်ရာတွင် ပါဝင်ရမည့် အချက်များတွင် ပါရှိသည်။
လက်မှတ်ရေးထိုးပွဲ မပြုလုပ်မီတွင် လိုအပ်သော အချက်များအဖြစ် စစ်ရေးနှင့် ပတ်သက်၍ ရန်လိုမှုနှင့် စစ်ရေးပြုမူမှု အားလုံးကို ရပ်စဲရန်၊ နှစ်ဖက်ညှိနှိုင်း၍ အစိုးရ တပ်စခန်းများအား ပြန်လည်နေရာ ချထားခြင်းနှင့် နှစ်ဖက်တပ်လှုပ်ရှားမှုများ သတ်မှတ်ထားရှိရန်၊ Nationwide Ceasefire Accord (မူကြမ်း) ကို နှစ်ဖက်ကြိုတင်လေ့လာ ညှိနှိုင်းထားပြီး ရေးသားထားရန် စသည်ဖြင့် ပါဝင်သည်။
ထို့ပြင် အစိုးရမှ တစ်ပြည်လုံး အတိုင်းအတာဖြင့် အပစ်အခတ် ရပ်စဲကြောင်းကို တရားဝင်ထုတ်ပြန် ကြေညာပေးရန်၊ နှစ်ဖက်လက်ခံနိုင်သော နိုင်ငံရေးလမ်းပြ မြေပုံကို ညှိနှိုင်းဆွေးနွေး သဘောတူထားပြီး ဖြစ်ရန်၊ အပစ်အခတ် ရပ်စဲရေးဆိုင်ရာ နှစ်ဖက်တပ်များ လိုက်နာရမည့် စည်းမျဉ်းစည်းကမ်းများကို သဘောတူပြီးနောက် အကောင်အထည် ဖော်ဆောင်မှုကို ကြီးကြပ်သည့် အဖွဲ့များ ထားရှိရန်ဟူသော အချက်များလည်း မပြုလုပ်မီ လိုအပ်သော အချက်များတွင် ထည့်သွင်းထားသည်။
လက်မှတ်ရေးထိုးပွဲတွင် အဓိက ပါဝင်ရမည့် အချက်များအဖြစ် ပြည်ထောင်စုသမ္မတ မြန်မာနိုင်ငံကို ဒီမိုကရေစီ ဖက်ဒရယ် အခြေခံမူများနှင့်အညီ တည်ဆောက်သွားရန်နှင့် ပြည်ထောင်စု အဖွဲ့ဝင် အမျိုးသား အခြေခံ ပြည်နယ်များ၏ တန်းတူရေးနှင့် ကိုယ်ပိုင်ပြဋ္ဌာန်းခွင့် အခွင့်အရေးကို အာမခံရန်၊ ဖက်ဒရယ် ပြည်ထောင်စု ကာကွယ်ရေး တပ်မတော် ဖွဲ့စည်းတည်ဆောက်သွားရန်၊ လက်မှတ်ရေးထိုးပွဲ ပြီးသည့်နောက် ရက်ပေါင်း ၃၀ အတွင်း နိုင်ငံရေး ဆွေးနွေးပွဲအတွက် အခြေခံ မူဘောင်ကို ဆွေးနွေးညှိနှိုင်းပြီး သဘောတူညီချက် ရယူရန်၊ သဘောတူပြီးသော အခြေခံ မူဘောင်နှင့်အညီ နှောင့်နှေးခြင်း မရှိစေဘဲ လွှတ်တော်ပြင်ပ၌ နိုင်ငံရေး ဆွေးနွေးပွဲကို ဆက်လက်ကျင်းပသွားရန်၊ လက်မှတ်ရေးထိုးပြီး အချိန်ပိုင်း အတွင်း၌ တိုင်းရင်းသား လက်နက်ကိုင် တော်လှန်ရေး အဖွဲ့အစည်းများကို မတရားအသင်း ဥပဒေပုဒ်မနှင့် ငြိစွန်းခြင်းမှ ကင်းရှင်းကြောင်း တရားဝင် ထုတ်ပြန်ကြေညာ ပေးရန်နှင့် ဥပဒေကြောင်းအရ ဆောင်ရွက်မှုများကို ၁၅ ရက်အတွင်း စီစဉ်ပေးရန်၊ သဘောတူထားပြီးသော စစ်ဘက်ဆိုင်ရာ အချက်များကို အမြန်ဆုံး အကောင်အထည် ဖော်ရန်တို့ ပါဝင်သည်။
အဆိုပါ နိုင်ငံလုံးဆိုင်ရာ အပစ်အခတ် ရပ်စဲရေး လက်မှတ်ရေးထိုးပွဲကို အောက်တိုဘာလကုန်တွင် ပြုလုပ်သွားရန် ပြည်ထောင်စု ငြိမ်းချမ်းရေး ဖော်ဆောင်ရေး လုပ်ငန်းကော်မတီမှ စီစဉ်နေပြီး အဖွဲ့အားလုံး မပါဝင် ပါကလည်း ပြုလုပ်သွားမည်ဟု ပြည်ထောင်စုဝန်ကြီး ဦးအောင်မင်းက ပြောကြားသည်။
UNFC အဖွဲ့တွင် အပစ်အခတ် ရပ်စဲရေး သဘောတူထားသည့် အဖွဲ့ခြောက်ဖွဲ့၊ ကေအိုင်အေ အပါအ၀င် ဆွေးနွေးဆဲ အဖွဲ့နှစ်ဖွဲ့နှင့် ဆွေးနွေးမှု လုံးဝမပြုလုပ်ရသေးသည့် အဖွဲ့သုံးဖွဲ့ စသည်ဖြင့် တိုင်းရင်းသား လက်နက်ကိုင် အဖွဲ့ ၁၁ ဖွဲ့ ပါဝင်ကြောင်း သိရသည်။
သတင်းနှင့်ဓာတ်ပုံ- Eleven Media Group
