စီးပွားကူးသန်း အရာရှိ ၃ဝ ရာထူးတိုးရာမှာ မသမာမှုများ ရှိနေသလား

စီးပွားရေးနှင့် ကူးသန်းရောင်းဝယ်ရေး ၀န်ကြီးဌာန၊ ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာန လက်အောက်ရှိ ဌာနခွဲများတွင် လစ်လပ်လျက်ရှိသော အရာရှိရာထူး ၃၀ အတွက် ၀န်ထမ်းများ ရာထူး တိုးပေးရာတွင် တရားမျှတမှု မရှိဘဲ မသမာမှု များရှိနေကြောင်း သတင်းရရှိသည်။ 

 စီးပွားကူးသန်း သင်တန်းဖွင့်ပွဲ မြင်ကွင်း

သမ္မတ ဦးသိန်းစိန်က မတ်လ ၂၉ ရက်နေ့တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ညွှန်ကြားရေးမှူးချုပ် ၂ ဦး၊ နယ်စပ် ကုန်သွယ်ရေး ဦးစီးဌာနမှ ညွှန်ကြားရေးမှူး ၆ ဦးအပါအ၀င် နယ်စပ် ကုန်သွယ်ရေးဝန်ထမ်း အချို့ကို ရာထူးမှ ထုတ်ပယ်ခြင်း၊ ဌာနပြောင်းရွှေ့ခြင်းများ လုပ်ဆောင်ခဲ့ပြီးနောက် နယ်စပ်ကုန်သွယ်ရေး ဦးစီးဌာနကို ကူးသန်းရောင်းဝယ် ရေးနှင့် စားသုံးသူရေးရာ ဦးစီးဌာနဟု အမည်
ပြောင်း ခဲ့ကြောင်း၊ ယင်းနောက် အဆိုပါ ဦးစီးဌာနတွင် ဒုတိယ ညွှန်ကြားရေး မှူး ရာထူး ၁၀ နေရာ၊ လက်ထောက် ညွှန်ကြားရေးမှူး ရာထူး နေရာ ၂၀ နေရာ စုစုပေါင်း ရာထူးနေရာလွတ် ၃၀ ရှိလာ ကြောင်း၊ ထို့ကြောင့် ဌာနမှ ၀န်ထမ်းများကို ရာထူးတိုးပေး ရန် လုပ်ဆောင် ယင်းသို့ ရာထူးတိုးမှု အတွက်လုပ်ဆောင် ရာတွင် တရားမမျှတမှုများ ဖြစ်ပေါ်လာခြင်း ဖြစ်ကြောင်း သိရှိရသည်။ 

ရာထူးတိုးလုပ်ဆောင်ရာတွင် ကူးသန်းရောင်းဝယ်ရေးနှင့်စားသုံးသူရေးရာဦးစီးဌာန လက်အောက်ရှိ စီမံရေးရာဌာနခွဲက အဓိက ကိုင်တွယ် လုပ်ဆောင်ရပြီး လစ်လပ် ရာထူးနေရာများအတွက် အရည်အချင်း များသတ်မှတ်ထားကြောင်း၊ ရာထူး လုပ်သက် ၄ နှစ်မှ စတင် စဉ်းစားပေးမည် ဆိုသော အချက်အပါအ၀င် သတ်မှတ်ချက်များ ရှိကြောင်း၊ သို့ရာတွင် အမှန် တကယ် ရာထူးတိုးပေးရာတွင် သတ်မှတ်ချက်နှင့် မညီသူ များ၊ အရည်အချင်း မရှိသူများကို ရာထူး တိုးမြှင့် စာရင်းတွင် ထည့်သွင်းထားကြောင်း သိရှိရသည်။ 

"လက်ရှိရာထူးမှာ လုပ်သက် ၄ နှစ်ရှိတဲ့သူကစပြီး စဉ်းစားပေးမယ်ဆိုပေမယ့် တကယ်တန်း ရာထူးတိုး လျာထား စာရင်းမှာ ဦးစီးအရာရှိရာထူး လုပ်သက် ၄ နှစ် မရှိတဲ့သူ ၂ ဦး၊ ဘွဲ့ရပညာ တတ်မဟုတ် တဲ့ သူတွေနဲ့ တပ်ဘက်ကနေ ဗိုလ်ကြီး ဘ၀နဲ့ အငြိမ်းစား ယူလာတဲ့သူ ၅ ဦး ကို လက်ထောက် ညွှန်ကြားရေး မှူး  အဖြစ် စာရင်းထည့်ထားတယ်။ နောက် ဒုတိယညွှန်ကြားရေးမှူးရာထူးအတွက် ဌာနခွဲ တိုင်းက အရည်အချင်းရှိတဲ့သူ တွေကို စာရင်း ထည့်သွင်း စဉ်းစားရမှာ ဖြစ်ပေမယ့် Mobile Team က သူတွေကို ဦးစားပေး စာရင်းတင် ပေးတာမျိုးတွေ လည်း လုပ်ထားတယ်။ အဓိက က မူဘောင်ကျော် လုပ်တာ
တွေ တော်တော်များတယ်'' ဟု ကူးသန်းရောင်းဝယ်ရေးနှင့် စားသုံးသူရေးရာဦးစီးဌာနမှ အရာထမ်းတဦး က ပြောသည်။

စီမံရေးရာဌာနခွဲက လစ်လပ်ရာထူးတိုးနေရာများအတွက် အရာရှိလျာထားစာရင်းကို အောက်တိုဘာ ၂၂ ရက်နေ့တွင် ထုတ်ပြန်ခဲ့ပြီး ကန့်ကွက်လိုပါက ခိုင်လုံသော အကြောင်းပြချက်ဖြင့် အောက်တိုဘာ ၂၈ ရက်
နေ့ နောက်ဆုံးထား ကန့်ကွက်နိုင်သည်ဟု ရုံးတွင်းအမိန့်စာထုတ်ပြန်ခဲ့သည်။

 စီမံရေးရာဌာနခွဲမှ အရာရှိတဦးက ထုတ်ပြန်ထားသော အရာရှိ ရာထူးတိုးမြှင့်စာရင်းကို ကန့်ကွက်ပါက ကန့်ကွက်သူကို မှတ်တမ်း တင်ထားမည်ဖြစ်ကြောင်း၊ တိုးမြှင့်အရာရှိစာရင်းတွင် လျာထားသူများသည် မည်သို့သော ကန့်ကွက်မှု ရှိစေကာမူ လျာထားရရှိမည်ဖြစ်ကြောင်း၊ ရာထူးတိုးမြှင့်မှုနှင့် ပတ်သက်၍ သတ္တိရှိလျှင် ကြိုက်သည့်နေရာသို့ တိုင်ကြား နိုင်သည်ဟု ပြောဆိုခဲ့ကြောင်း သိရှိရသည်။ 

''ရာထူးတိုးတာကို ကန့်ကွက်နိုင်တယ် ဆိုပေမယ့် တဖက်မှာလည်း သတ္တိရှိရင် လုပ်ဆိုပြီး ပြောထားဆိုထားတော့ ကန့်ကွက်မယ့်သူကလည်း အရဲကိုးလုပ်ကြရတယ်လေ ။ ဒါပေမယ့်လည်း ဒီရာထူးတိုးနဲ့ ပတ်သက်ပြီး ဌာနတွင်း မှာက တော်တော် မကျေနပ်တာတွေဖြစ်နေတာဆိုတော့ တိုင်စာတွေတော့ တက်နေပြီ'' ဟု ကူးသန်း ရောင်းဝယ် ရေး နှင့် စားသုံးသူရေးရာဦးစီးဌာနမှ အရာထမ်းက ရှင်းပြသည်။ 

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ရုံးအဖွဲ့မှူးက လစ်လပ်ရာထူးများအတွက် အရာရှိများ ခန့်ထားမှုကို ၀န်ကြီးရုံးက တိုက်ရိုက်မကိုင်တွယ်ကြောင်း၊ သို့ရာတွင် ရာထူးတိုးမြှင့်မှုနှင့် ဆက်စပ်၍ တဦးနှင့်တဦး မကျေနပ်မှုများ ရှိနိုင်ပြီး လာဘ်ပေးလာဘ်ယူကိစ္စများ မရှိနိုင်ကြောင်း၊ အမှန်တကယ် မသမာမှုများရှိပါက ဌာနတွင်း စုံစမ်းစစ်ရေးအဖွဲ့ ဖွဲ့စည်းစစ်ဆေးမည်ဟု ဧရာဝတီသို့ပြောဆိုသည်။ 

ဧရာဝတီက ကူးသန်းရောင်းဝယ်ရေးနှင့် စားသုံးသူရေးရာဌာနမှ တာဝန်ရှိသူများကို ဆက်သွယ်မေးမြန်းရန် ကြိုးစားခဲ့သော်လည်း တာဝန်ခံ ဖြေကြားမည့်သူမရှိပေ။ 

သာလွန်ဇောင်းထက် ~ဧရာဝတီ