ဘိန်းစိုက်ခင်းတစ်ခုမှ ဘိန်းပင်များကို တွေ့ရစဉ် Photo: Nay Thwae/ RFA
မြန်မာနိုင်ငံမှာ ဘိန်းစိမ်းထုတ်လုပ်မှု ဆက်လက်မြင့်မားနေတဲ့ ပြသနာဖြေရှင်းရေး ကိစ္စဟာ ဒေါ်အောင်ဆန်းစုကြည် ဦးဆောင်မယ့် အစိုးရသစ်အတွက် အကြီးမားဆုံး စိန်ခေါ်မှုတစ်ခု ဖြစ်လိမ့်မယ်လို့ ကုလသမဂ္ဂ မူးယစ်ဆေးဝါးတိုက် ဖျက်ရေးအဖွဲ့ UNODC က ဒီကနေ့ ပြောကြားလိုက်ပါတယ်။ အခု ၂ဝ၁၅ ခုနှစ်အတွင်း မြန်မာပြည်ကနေ ဘိန်းစိမ်း တန်ချိန် ၆၅ဝ ခန့်ထွက်မယ်လို့ ကုလက ခန့်မှန်းထားပါတယ်။ ဒါဟာ ကမ္ဘာပေါ်မှာ အာဖဂန်နစ္စတန်နိုင်ငံပြီးရင် အများဆုံးထွက်တဲ့ပမာဏဖြစ်ပါတယ်။ မြန်မာပြည်တဝှမ်း ဘိန်းစိုက်မြေ ပမာဏကတော့ မနှစ်ကနည်းတူ ဟက်တာ ၅ သောင်းခွဲကျော်ရှိတယ်လို့ ဆိုပါတယ်။ ဘိန်းစိုက်တောင်သူတွေအနေနဲ့ တခြားအစားထိုးသီးနှံ စိုက်ပျိုးစရာလည်း မရှိဘူးလို့ ကုလအရာရှိတစ်ဦးကပြောပါ တယ်။ မြန်မာပြည်ဟာ ဘိန်းတင်မက Methamphetamine စိတ်ကြွဆေးဝါးလည်း အဓိကထုတ်လုပ်နေတဲ့ နိုင်ငံ တစ်ခုဖြစ်ပါတယ်။
