 |
| ရှမ်းပြည်နယ် ကျိုင်းတုံမြို့မှာ ကျပ်သိန်း ၆ သောင်းကျော်ရှိတဲ့ မူးယစ်ဆေးဝါးတွေနဲ့ လက်နက်ခဲယမ်းတွေကို ဧပြီလ ၂ ရက်နေ့က ဖမ်းဆီးရမိစဉ်။ Photo: Kan Thar/ RFA |
မနေ့ည သန်းခေါင်ချိန်မှာ ကားတစ်စီးကို တားရာကနေ အပြန်အလှန် ပစ်ခတ်မှုဖြစ်ပွားခဲ့တာဖြစ်ပြီး ငွေကျပ် သိန်းပေါင်း ၆ သောင်းကျော် တန်ဖိုးရှိတဲ့ ICE ကီလို ၁၆ဝ ကျော်ကို ဖမ်းမိထားတယ်လို့ ရဲမှူးချုပ် အောင်အောင် က ပြောပါတယ်။
"မနေ့ည ၁၂ နာရီက ကားတစ်စီးဖြတ်လာတော့ ဒီကတားတာပေါ့၊ တားနေတုန်းမှာပဲ အဲ့ဒီကားပေါ် ကနေ သေနက်နဲ့ပစ်တော့ ကျနော်တို့ ဒီဘက်က စစ်ဆေးရေးတာဝန်ကျတဲ့ ရဲ ၂ ယောက် ဒဏ်ရာရတယ်၊ ရဲအဖွဲ့ကနေ ပြန်ပစ်တော့ ကိုက် ၁ဝဝ လောက်မှာ ကားကမြောင်းထဲကို ကျသွားတယ်၊ ကားပေါ်မှာလူ ၃ ယောက်ကတော့ ဆင်းပြေးပါတယ်၊ ကားပေါ်မှာတော့ ICE ပေါ့ ၁၆၄ ကီလိုဂရမ်ပေါ့ ငွေနဲ့တွက်ရင်တော့ သိန်းပေါင်း ၆ သောင်းကျော်ရတယ်၊ လူတွေကိုတော့ မရဘူးပေါ့နော်၊ လူတွေကတော့ ကားမြောင်းထဲထိုး ကျသွားတာနဲ့ တခါတည်းပြေးသွားတာပေါ့"
အဲ့ဒီပစ်ခတ်မှုကြောင့် တပ်ကြပ် တစ်ဦးနဲ့ ဒုတပ်ကြပ်တစ်ဦး ဒဏ်ရာရရှိထားပါတယ်။
မူးယစ်ဆေးဝါးသယ်ဆောင်လာတဲ့ ကားကိုဖမ်းမိပြီး သယ်ဆောင်လာသူတွေဖြစ်တဲ့ ယာဉ်ပေါ်ပါသူ ၃ ဦးဟာ ထွက်ပြေးလွတ်မြောက်သွားပါတယ်။
ပြီးခဲ့တဲ့ ဧပြီလ ၁ ရက်နေ့ကလည်း အလားတူ ငွေကျပ်သိန်းပေါင်း ၆ သောင်းကျော် တန်ဖိုးရှိတဲ့ မူးယစ်ဆေး ဝါးတွေနဲ့ လက်နက်ခဲယမ်းတွေကို မိုင်းလားကနေ ကျိုင်းတုံဖက်ကိုလာတဲ့ ယာဉ်တစ်စီးပေါ်မှာ ဖမ်းဆီးရမိထားပြီး အဲ့ဒီအမှုနဲ့ပတ်သက်သူ ၅ ဦးကို ဖမ်းမိထားပါတယ်။
RFA Burmese
