လန်ဒန်ဆရာတော်ဦးဥတ္တရအပါအ၀င် လူဝတ်လဲ ဖမ်းဆီးထားသည့် သံဃာတော် ငါးပါးအား တာမွေမြို့နယ်တရားရုံးတွင် ရုံးထုတ်စစ်ဆေး

လန်ဒန်ဆရာတော် ဦးဥတ္တရအပါအ၀င် လူဝတ်လဲ ဖမ်းဆီးထားသည့် သံဃာတော် ငါးပါးအား ဇွန်၂၀ နံနက်ပိုင်းက အင်းစိန်ထောင်မှ တာမွေမြို့နယ် တရားရုံးသို့ ရုံးထုတ်ခဲ့သည်။

သံဃာတော်ငါးပါးအား ရုံးထုတ်ရာ တာမွေတရားရုံးသို့ ဦးဝီရသူ၊ ဦးပါမောက္ခ၊ ရွှေည၀ါဆရာတော်အပါအ၀င် သံဃာတော်များနှင့် တရားရုံးပတ်ဝန်းကျင်မှ ပြည်သူများ၊ သံဃာတော်များအား အဓမ္မလူဝတ်လဲ၍ တရားဆွဲဆိုဖမ်းဆီးခြင်းကို လက်မခံနိုင်သူများ ပီနန်ဆရာတော်၏ ဒါယိကာ၊ ဒါယိကာမများနှင့် ၈၈ မျိုးဆက်ငြိမ်းချမ်းရေးနှင့် ပွင့်လင်းလူ့အဖွဲ့အစည်းမှ မမီးမီး၊ ဦးစိုးထွန်း အမျိုးသားဒီမိုကရေစီအဖွဲ့ချုပ်စသည့် အဖွဲ့ဝင်များလည်း လာရောက်ခဲ့ကြပြီး “အပြစ်မဲ့သံဃာတော်များ ချက်ချင်းလွှတ်”၊ သမ္မတရုံးအကြံပေး ဦးအံ့မောင် ချက်ချင်းဖြုတ်” စသည့် ကြွေးကြော်သံများဖြင့်လည်း ဆန္ဒပြဟစ်ကြွေးမှုများ ပြုလုပ်ခဲ့သည်။

ရုံးထုတ်ခဲ့သည့် ဇွန် ၂၀ရက်တွင် လူပုဂ္ဂိုလ် ၁၀ဦးနှင့် သံဃာတော်များ အာမခံဖြင့်လွှတ်ပေးမည်ဖြစ်ပြီး ယနေ့ရုံးတင် စစ်ဆေးပြီးပါက အာဏာပိုင်များကလူဝတ်လဲထားမှုများအား သင်္ကန်းပြန်ဆည်းမည်ဖြစ်ပြီး သုံးထပ်ကျောင်းတွင် ပြန်လည်သိက္ခာထပ်မည် ဖြစ်ကြောင်း ဖမ်းဆီးခံသံဃာတော်များအား အာမခံပေးသည့် ဥရောပမြန်မာအသင်းမှ ဦးဆန်းဝင်းက တာမွေမြို့နယ်တရားရုံးတွင် ပြောကြားသည်။
“သံဃာတစ်ပါးကို လူနှစ်ဦး အာမခံပေးရတယ်။ အာမခံဆိုတော့ အိမ်ပိုင်တဲ့သူလည်း ဖြစ်ရမယ်လေ။ ဆရာတော်ကြီးတွေလည်း ဖမ်းဆီးခံသံဃာတွေအတွက် အာမခံပေးရတယ်။ ဘယ်လိုပေးရသလည်းတော့ မသိဘူး။ အခုလောလောဆယ် စီစဉ်ထားတာက ဆရာတော်တွေကို တရားရုံး ရုံးချိန်းပြီးတာနဲ့ သင်္ကန်းပြန်ဆည်းမယ်။ သုံးထပ်ကျောင်းမှာ သိက္ခာထပ်မယ်။ အမှုကိုတော့ သင်္ကန်းဝတ်နဲ့ပဲ ဆက်လက်ရင်ဆိုင်ရမှာပေါ့” ဟု ဦးဆန်းဝင်းက လတ်တလော အခြေအနေအပေါ် ပြောကြားသည်။
သံဃာတော်ငါးပါးအား ရုံးထုတ်ရာတရားခွင်တွင် မဟနဆရာတော်ကြီးများ၊ သာသနာရေးဦးစီးဌာနမှ တာဝန်ရှိသူများကိုလည်း တရားခွင်စစ်ဆေးမှုများပြုလုပ်နေကြောင်း သိရှိရသည်။
Eleven Media Group