အမေရိကန် နိုင်ငံခြားရေးဝန်ကြီး ဂျွန်ကယ်ရီနှင့် သမ္မတဦးသိန်းစိန် ယနေ့တွင် ဘရူနိုင်း၌ သီးခြားတွေ့ဆုံရန်ရှိ

Written By လွင့်မောင်မောင် on Thursday, October 10, 2013 | 9:58 AM

အမေရိကန် နိုင်ငံခြားရေးဝန်ကြီး ဂျွန်ကယ်ရီနှင့် သမ္မတဦးသိန်းစိန်တို့သည် ယနေ့ (အောက်တိုဘာ ၁၀ ရက်)တွင် ဘရူနိုင်းနိုင်ငံ၌ သီးခြား တွေ့ဆုံရန်ရှိကြောင်း သိရသည်။
အမေရိကန် နိုင်ငံခြားရေးဝန်ကြီး ဂျွန်ကယ်ရီသည် (၂၃)ကြိမ်မြောက် အာဆီယံ ထိပ်သီးဆွေးနွေးပွဲနှင့် ဆက်စပ် အစည်းအဝေးဖြစ်သော ပထမအကြိမ် အာဆီယံ-အမေရိကန် ထိပ်သီးအစည်းအဝေးကို တက်ရောက်ရန်အတွက် ဘရူနိုင်းနိုင်ငံသို့ အောက်တိုဘာ ၉ ရက်က ရောက်ရှိခဲ့သည်။
ဂျွန်ကယ်ရီသည် အောက်တိုဘာ ၉ ရက်က ပြုလုပ်သော ပထမအကြိမ် အာဆီယံ-အမေရိကန် ထိပ်သီးအစည်းအဝေးသို့ တက်ရောက်ခဲ့ပြီး အောက်တိုဘာ ၁၀ ရက် နံနက်ပိုင်းတွင် မြန်မာသမ္မတနှင့် တွေ့ဆုံရန် စီစဉ်ထားခြင်း ဖြစ်သည်။
နိုင်ငံတော်သမ္မတ၏ ပြောရေးဆိုခွင့်ရှိသူ ဦးရဲထွဋ်က အဆိုပါတွေ့ဆုံမှုသည် ညှိနှိုင်းနေဆဲဖြစ်ပြီး အတိအကျ ပြောဆိုနိုင်ခြင်း မရှိသေးကြောင်း အောက်တိုဘာ ၉ ရက် ညနေပိုင်းက ပြောကြားသည်။
(၂၃)ကြိမ်မြောက် အာဆီယံထိပ်သီး ဆွေးနွေးပွဲများနှင့် ဆက်စပ်အစည်းအဝေးများကို အမေရိကန် သမ္မတ ဘားရက်အိုဘားမား တက်ရောက်ရန် အစီအစဉ်ရှိသော်လည်း အိုးဘားမားက ၎င်း၏ အာရှခရီးစဉ်ကို ဖျက်သိမ်းလိုက်ခြင်းကြောင့် အမေရိကန် နိုင်ငံခြားရေးဝန်ကြီး ဂျွန်ကယ်ရီက အိုဘာမားကိုယ်စား အာဆီယံ ထိပ်သီးဆွေးနွေးပွဲသို့ တက်ရောက်ခဲ့ခြင်း ဖြစ်သည်။
သမ္မတ ဦးသိန်းစိန်သည် အောက်တိုဘာ ၉ ရက် ညနေပိုင်းက တရုတ်ဝန်ကြီးချုပ် လီခကျန်းနှင့် တွေ့ဆုံခဲ့သည်။ ထိုတွေ့ဆုံမှုတွင် မြန်မာနိုင်ငံက အာဆီယံအလှည့်ကျ ဥက္ကဋ္ဌတာဝန်ယူချိန်တွင် အာဆီယံ-တရုတ် ဆက်ဆံရေး တိုးမြှင့်မှုကို မြန်မာနိုင်ငံက အကောင်အထည်ဖော်မည်ဟု မျှော်လင့်ကြောင်း ပြောကြားသည်။
၂၀၁၄ ခုနှစ်အတွက် အာဆီယံ အလှည့်ကျ ဥက္ကဋ္ဌတာဝန်ကို မြန်မာနိုင်ငံက ယနေ့တွင် လက်ခံရယူမည် ဖြစ်သည်။
EMG

Share this article :