မောတောင်ကို အထူးနယ်စပ်ဂိတ် အဖြစ် တိုးမြှင့်မည်

|Dawei Watch| မြိတ်၊ မေ ၇

မြန်မာ - ထိုင်း ယာယီနယ်စပ်ဂိတ်တစ်ခုဖြစ်သည့် မြိတ်ခရိုင် တနင်္သာရီမြို့နယ်ရှိ မောတောင်နယ်စပ်ဂိတ်ကို လာမည့် မေလ ၂၃ ရက်နေ့မှ စပြီး အထူးနယ်စပ်ဂိတ်အဖြစ် တိုးမြှင့် ဖွင့်လှစ်သွားမည်ဖြစ်ကြောင်း ပရာကျွတ်ခီရီခန် ခရိုင်ဝန်က ပြောကြားသည်။

တနင်္သာရီတိုင်းဒေသကြီး အစိုးရနှင့် ပရာကျွတ်ခရိုင်ဝန်နှင့် အဖွဲ့ဝင်များ မြိတ်မြို့တွင် မေလ ၆ ရက်နေ့က ပြုလုပ်သည့် မောတောင်-ဆင်းခွန် နယ်စပ် ဝင်/ထွက် ဂိတ် အဆင့်တိုးမြင့်ခြင်းနှင့် စပ်လျင်းသည့် ညှိနှိုင်းအစည်းအဝေးတွင် ခရိုင်ဝန်က ယင်းကဲ့သို့ ပြောခြင်းဖြစ်သည်။

အထူး နယ်စပ်ဂိတ်အဖြစ် တိုးမြင့်ရန် ထိုင်းနိုင်ငံရှိ ဝန်ကြီးများ အစည်းအဝေးတွင် သဘောတူပြီးဖြစ်ကာ ပရာကျွတ်ခရိုင်အတွင်းရှိ တိုက်နယ် ၅ ခုသို့ တညအိပ် နှစ်ရက်ခရီး သွားလာခွင့်ပြုမည်ဖြစ်ကြောင်း ခရိုင်ဝန်က ပြောသည်။

“တစ်ညအိပ် နှစ်ရက်ခရီးက တအားနည်းနေတယ်။ ၂ ည အိပ် လောက်ဆိုရင် လုံလောက်မယ်”ဟု မြိတ်ခရိုင် စက်မှုလက်မှု လုပ်ငန်းရှင်များအသင်း ဥက္ကဋ္ဌ ဦးလှသန်းက ပြောသည်။

ယင်းသို့ ဖြတ်သန်းသွားလာခွင့် အချိန်နည်းခြင်းသည် မြန်မာဘက်မှ ပရာကျွတ်သို့ ကုန်သွယ်လိုသူများအတွက် အခက်အခဲ ဖြစ်သကဲ့သို့ ပရာကျွတ်ဘက်မှ ခရီးသွားလုပ်ငန်း တိုးမြှင့်မည့်သူများအတွက်လည်း အခက်အခဲရှိနိုင်သည်ဟု ၀န်ကြီးချုပ် ဦးမြတ်ကိုက ပြောသည်။

ယခင် ယာယီနယ်စပ်ဂိတ်အဆင့်တွင် မြန်မာဘက်မှ ပရာကျွတ်မြို့ အနီးအနားသို့ နေ့ချင်းပြန်ခရီးသာ သွားလာခွင့်ပေးခဲ့သည်။

နောက်ပိုင်းတွင် ခရီးသွားလာမှုနှင့် ကုန်သွယ်မှု အခြေအနေ အပေါ် မူတည်ပြီး မြန်မာဘက်မှ ခွင့်ပြုပေးထားသည့် သွားလာ ခွင့်နှင့် ညီတူ ခွင့်ပြုရန် ထိုင်းဝန်ကြီးချုပ်ထံ တင်ပြသွားမည်ဟု ပရာကျွတ်ခရိုင်ဝန်က ပြောသည်။

အထူးနယ်စပ်ဂိတ်အဖြစ် ဖွင့်လှစ်ပြီးပါက ထိုင်းဘက်မှ မြန်မာဘက်သို့ နယ်စပ် ဖြတ်သန်း ခွင့်လက်မှတ်ဖြင့် ၁၃ ညအိပ် ၁၄ ရက်၊ ယာယီနယ်စပ်ဖြတ်သန်းခွင့် လက်မှတ်ဖြင့် ၆ ညအိပ် ၇ ရက် သွားလာခွင့် ပြုမည်ဖြစ်ကြောင်း အထက်ပါ အစည်းအဝေးမှ သိရသည်။
မြန်မာဘက်မှ မောတောင်နယ်စပ် စခန်းကို ၂၀၁၃ ခုနှစ် မေလ ၈ ရက်နေ့က တရားဝင်ဖွင့်လှစ်ထားပြီး ဖြစ်ကြောင်း သိရသည်။

Dawei Watch