နေပြည်တော် ပြည်ထောင်စု တရားလွှတ်တော်ချုပ်ရုံး၌ ပြင်ဆင်ချက်ကြားနာအပြီး ပြန်ကြွလာသည့် ဆရာတော်များအား တွေ့ရစဉ်
လန်ဒန်ဆရာတော် အပါအ၀င် သံဃာတော်ငါးပါးအား တိုင်းသာသနာရေးမှူးက စွဲဆိုထားသည့် အမှုနှစ်ခုအနက် ပုဒ်မ ၂၉၅ (က) အား ချေဖျက်ပေးရန်အတွက် နေပြည်တော် ပြည်ထောင်စုတရားလွှတ်တော်ချုပ်သို့ ဧပြီ ၂၉ ရက်က ပြင်ဆင်မှု တင်သွင်းခဲ့ရာ ပြည်ထောင်စုတရားလွှတ်တော်ချုပ်က ကြားနာခဲ့ပြီး ဧပြီ ၃၀ ရက်က ပလပ်ခဲ့ကြောင်း သိရသည်။
သာသနာညှိုးနွမ်းစေမှု ပုဒ်မ ၂၉၅ (က) အား ပယ်ဖျက်ပေးရန် ရန်ကုန်တိုင်းဒေသကြီး တရားလွှတ်တော်သို့ တင်သွင်းခဲ့ရာ ငြင်းဆိုခဲ့ပြီး နေပြည်တော် ပြည်ထောင်စုတရားလွှတ်တော်ချုပ်ကလည်း ယခုကဲသို့ ထပ်မံပလပ်ခဲ့ခြင်းဖြစ်သည်။
လန်ဒန်ဆရာတော် အပါအ၀င် သံဃာတော်ငါးပါးနှင့် တရားလွှတ်တော် ရှေ့နေများမှာ ဧပြီ ၂၉ ရက် နံနက် ၉ နာရီ ၃၀ မိနစ်တွင် ပြည်ထောင်စုတရားလွှတ်တော်ချုပ်သို့ ပြင်ဆင်မှု တင်သွင်းခဲ့ရာ ဧပြီ ၃၀ ရက် နံနက်ပိုင်းက ယခုကဲ့သို့ ပလပ်ခဲ့ကြောင်း ရှေ့နေများထံက သိရသည်။
“ကျွန်တော်တို့ တရားလွှတ်တော်ရှေ့နေတွေ အကုန်လုံး ပြောကြပါတယ်။ ဒီအမှုမှာ တရားလိုကနေ အထက်ကအမိန့်အရ စွဲတယ်လို့ ပြောပါတယ်။ အထက်က ပုဂ္ဂိုလ်ကို စစ်တဲ့အချိန်မှာ အထက်က ဘာအမိန့်မှ မပေးဘူးလို့ ပြောတယ်။ အဲဒီမှာ စွပ်စွဲထားတာတွေက ဘာမှမဆိုင်တဲ့ ကိုယ်ရေးကိုယ်တာ ကိစ္စတွေနဲ့ စွပ်စွဲတယ်။ ပုဒ်မ ၂၉၅ (က) နဲ့ စွပ်စွဲချက်တွေက ၀ိရောဓိဖြစ်နေတယ်။ ဘယ်လိုမှ မသက်ဆိုင်ဘူး။ ဒါကြောင့် ချေဖျက်ပေးပါလို့ ပြောတယ်။ ချက်ချင်း ပယ်တယ်လို့ အမိန့်ချမှတ်လိုက်တယ်။ တစ်ဖက်က အဓိပတိပုဂ္ဂိုလ်ကြီးဖြစ်တဲ့ ပီနန်ဆရာတော်ကြီးရဲ့ မျက်နှာကို မထောက်ဘူး” ဟု တရားလွှတ်တော်ရှေ့ ဦးသန်းထွန်းအောင်က ပြောကြားသည်။
လန်ဒန်ဆရာတော်မှ နိုင်ငံတော် သံဃမဟာနာယက ဆရာတော်များ၊ တိုင်းသံဃနာယကဥက္ကဋ္ဌ အပါအ၀င် သံဃာအပါး ၂၀ အား မတရားတားဆီး ကန့်ကွက်မှု၊ မတရားဖမ်းဆီး ချုပ်နှောင်ထားမှု စသည့် ပုဒ်မနှစ်ခုဖြင့် တရားပြန်စွဲမှုကို မြို့နယ်လေးမြို့နယ်မှ တရားသူကြီးများက ပြန်လည်ပယ်ချခဲ့ရာ လူ့အခွင့်အရေး ချိုးဖောက်ခံရခြင်းများနှင့် မတရားဖမ်းဆီး ချုပ်နှောင်ခံရခြင်းများအတွက် ပြည်ထဲရေးဝန်ကြီးဌာန၊ နိုင်ငံတော်သံဃမဟာနယကအဖွဲ့ သာသနာရေးဦးစီးဌာနတို့ထံမှ နစ်နာကြေးအဖြစ် ဒေါ်လာငါးသန်း တောင်းဆိုထားကြောင်း သိရသည်။
ရန်ကုန်တိုင်းဒေသကြီး သာသနာရေးဦးစီးဌာနမှ ဦးစိန်မော်က ဆရာတော်ဦးဥတ္တရ၊ ဦးပညာစာရ၊ ဦးတေဇိန္ဒ၊ ဦးသုန္ဒရသီရိနှင့် ဦးနန္ဒိယတို့အား ပြစ်မှုဆိုင်ရာ ဥပဒေပုဒ်မ ၂၉၅ (က) ဖြင့် ၂၀၁၄ ခုနှစ် ဒီဇင်ဘာ ၆ ရက်တွင် တရားစွဲဆိုထားသော အမှုဖြစ်ကြောင်း သိရသည်။
အမှုဖြစ်ပွားရသည့် အကြောင်းရင်းမှာ မဟာသန္တိသုခ ကျောင်းတော်ကြီးအား ဆောက်လုပ်သီတင်းသုံးနေထိုင် ပိုင်ဆိုင်ခဲ့သော ပီနန်ဆရာတော်ကြီးကို မဟာသံဃနာယကအဖွဲ့မှ မဟာသန္တိသုခကျောင်းကြီးမှ ဖယ်ရှားပေးရန် ညွှန်ကြားခဲ့သော်လည်း ပီနန်ဆရာတော်ကြီးက ဖယ်ရှားပေးခြင်းမပြုဘဲ ကျောင်းတော်ကြီးတွင် ရှိနေသော မဟာသံဃနာယကအဖွဲ့က စေလွှတ်ထားသော သံဃာတော်များနှင့် ဂေါပကအဖွဲ့ကို နှင်ထုတ်ခဲ့ပြီး ကျောင်းပိုင်ဆိုင်မှုနှင့် ပတ်သက်၍ အငြင်ပွားမှု စတင်ပေါ်ပေါက်ခဲ့ကြောင်း နေပြည်တော် ပြည်ထောင်စုတရားလွှတ်တော်ချုပ်သို့ ပြင်ဆင်မှု
လျှောက်လဲချက်အရ သိရသည်။
Writer:
နေရိုင်း၊ ဇေယျာထွန်းEleven Media Group
