အမေရိကန် ပြည်ထောင်စုနဲ့ ဖိလစ်ပိုင်တို့ရဲ့ ပူးတွဲ စစ်ရေးလေ့ကျင့်မှုဟာ ဒေသတွင်း ငြိမ်းချမ်းရေးနဲ့ တည်ငြိမ်ရေးအတွက် ကောင်းတဲ့ လုပ်ရပ်မျိုး မဟုတ်ဘူးလို့ တရုတ်အစိုးရက ဝေဖန်လိုက်ပါတယ်။
ပုံမှန်သတင်းစာရှင်းလင်းပွဲမှာ ကာကွယ်ရေးဝန်ကြီးဌာနရဲ့ ပြောခွင့်ရသူ ဂျင်ဂ် ရန်ရှန်(Geng Yansheng) က “တချို့နိုင်ငံတွေဟာ စစ်ရေးမဟာမိတ်တွေ ဖွဲ့တယ်။ ကြီးမားတဲ့ စစ်ရေး လေ့ကျင့်မှုတွေကို လုပ်နေတယ်။ ဒါဟာ ဒေသတွင်းမှာ တင်းမာမှုတွေဖြစ်အောင် ဖန်တီးနေတာပဲ။ ဒါဟာ ငြိမ်းချမ်းရေး၊ ဖွံ့ဖြိုးရေး၊ အပြန်အလှန် ပူးပေါင်းဆောင်ရွက်ရေး ဆိုတဲ့ လမ်းကြောင်းကို ပျက်ပြားစေပါတယ်။ စစ်ရေး မဟာမိတ်ဖွဲ့ပြီး အင်အားပြနေတာဟာ ဒေသတွင်း ငြိမ်းချမ်းရေးနဲ့ တည်ငြိမ်ရေးအတွက် ကောင်းသောလုပ်ရပ်မဟုတ်ဘူး” လို့ ပြောပါတယ်။
၁၀ ရက်ကြာတဲ့ အမေရိကန်နဲ့ ဖိလစ်ပိုင်တို့ရဲ့ ပူးတွဲ စစ်ရေးလေ့ကျင့်မှုဟာ ပြီးခဲ့တဲ့ ဧပြီ ၂၀ ရက်နေ့ကတည်းက စတင်ခဲ့တာ ဖြစ်ပါတယ်။
ဖိလစ်ပိုင် မီဒီယာတွေမှာ ဖော်ပြချက်အရ ဒီနှစ် စစ်ရေးလေ့ကျင့်မှုမှာ အမေရိကန်နဲ့ ဖိလစ်ပိုင်တပ်ဖွဲ့ဝင် ၁၁၀၀၀ ကျော်၊ သြစတြေးလျ စစ်သား ၆၁ ယောက်ပါဝင်ပြီး ၁၅ နှစ်တာ ကာလအတွင်း အင်အားအများဆုံး ဖြစ်တယ်လို့ ဆိုပါတယ်။
ဖိလစ်ပိုင်ဘက်ကတော့ စစ်ရေးလေ့ကျင့်မှုဟာ ရေကြောင်းနဲ့ကုန်းကြောင်း စစ်ဆင်ရေး တွေမှာ အမေရိကန်တပ်တွေနဲ့ ပူးပေါင်းဆောင်ရွက်မှု တိုးတက်လာဖို့ ရည်ရွယ်တယ်လို့ ဆိုပါတယ်။
DVB
