 |
| သံသယရှိသူများကို စစ်ကြောရေးစခန်းတွင် မျက်နှာကို အ၀တ်ဖြင့်စည်း၍ လက်ကို မီးရှို့စစ်ဆေးခဲ့ကြောင်း ကိုယ်တိုင်ကြုံတွေ့ခဲ့သူများက ပြောသည်။ (ဓာတ်ပုံ - ဇော်ဝင်း) |
ကျောက်တော်မြို့နယ်အတွင်း မြန်မာအစိုးရတပ်မတော် က ၄င်းတို့နှင့် ထိတွေ့မှုများ ရှိခဲ့သည် ရက္ခိုင့်တပ်မတော် (AA) နှင့် ဆက်နွယ်ကြောင်း သံသယရှိသည့် အရပ်သားများ ဖမ်းဆီးစစ်ဆေးစဉ် အချို့မှာ ထိခိုက်ဒဏ်ရာ ရရှိခဲ့ကြောင်း သတင်းရရှိသည်။
တိုက်ပွဲဖြစ်ပွားရာ ဒေသအနီးရှိ လင်းစင် ရွာသစ်မှ အရပ်သားများကို မြန်မာအစိုးရ တပ်မတော်မှ ဖမ်းဆီးစစ်ဆေးမှုများ ရှိခဲ့ပြီး အချို့ကို ပြန်လွှတ်ပေးခဲ့သော်လည်း အများစုမှာ အဖမ်းခံထားရဆဲဖြစ်ကြောင်း အဆိုပါ ကျေးရွာသို့ သွားရောက်စုံစမ်းခဲ့သည့် ရခိုင်အမျိုးသမီး ကွန်ရက် (ကျောက်တော်) ဥက္ကဋ္ဌ ဒေါ်လှမေ ကပြောသည်။
“ကျွန်မတို့ကို သူတို့ရဲ့ သား၊ မယားတွေက လူနာမည် စာရင်းနဲ့တကွ တိုင်ကြားလာလို့ သိရတာပါ။ အရပ်သား ၇၀လောက်ကို ဖမ်းဆီးခဲ့တယ်လို့ ပြောပေမယ့် အတိအကျတော့ မသိရဘူး။ ဒါပေမယ့် လင်းစင်ရွာသစ်ကတော့ ၁၈ယောက် အဖမ်းခံနေရတုန်းပဲဆိုတာ နာမည်စာရင်းနဲ့ တကွသိခဲ့ရတယ်။ အဲ့ဒီအထဲက ၅ယောက်က ဦးခေါင်းနဲ့ လက်တွေမှာ ဒဏ်ရာရထားတယ်လို့ သိရတယ်” ဟု ဒေါ်လှမေ ကပြောသည်။
ကျောက်တော်မြို့နယ်အတွင်း တိုက်ပွဲများ ဖြစ်ပွားခဲ့ပြီးနောက်ပိုင်း ရက္ခိုင့်တပ်မတော် (AA) တပ်ဖွဲ့ဝင်များကို ယင်းဒေသအနီးရှိ တောတောင်များအတွင်း ဖမ်းဆီးရမိမှုများ ရှိခဲ့ပြီး၊ ၄င်းတို့နှင့်အတူ လက်နက်၊ အသုံးအဆောင် နှင့် မူးယစ်ဆေးဝါးများကိုပါ ဖမ်းဆီးရမိခဲ့ကြောင်း နိုင်ငံပိုင်သတင်းစာများတွင် သတင်းထုတ်ပြန်မှုများ ရှိခဲ့သည်။
ရက္ခိုင့်တပ်မတော် (AA) နှင့် ဆက်နွယ်ကြောင်း သံသယဖြင့် ဖမ်းဆီးခံခဲ့ရသည့် အရပ်သားများကို စစ်ဆေးစဉ် ထိခိုက်ဒဏ်ရာ ရရှိမှုနှင့် ပတ်သက်၍ ကျောက်တော်ဒေသအတွင်းရှိ မြန်မာအစိုးရ တပ်မတော် တာဝန်ရှိသူများထံမှ အတည်ပြုချက် မရရှိသေးပါ။
တိုက်ပွဲဖြစ်စဉ်အတွင်း ဖမ်းဆီးရမိသော ရက္ခိုင့်တပ်မတော် (AA) တပ်ဖွဲ့ဝင်များကို စစ်ဆေးချက်အရ သိရှိရသည့် ရခိုင်ပြည်နယ်အတွင်းရှိ ရက္ခိုင့်တပ်မတော် (AA) နှင့် ဆက်နွယ်သူ ၆၃ ဦး ကို ဖမ်းဆီးပေးရန် တပ်မတော်က စာရင်းပေးပို့ထားသော်လည်း လက်ရှိအချိန်အထိ တစ်ဦးမျှ ဖမ်းဆီးရမိခြင်း မရှိသေးကြောင်း ရခိုင်ပြည်နယ်ရဲတပ်ဖွဲ့ ဒုတိယ ပြည်နယ်ရဲတပ်ဖွဲ့မှူး ရဲမှူကြီး ဘိုဘိုဦး ကပြောသည်။
အပြစ်မဲ့ပြည်သူများကို သံသယနှင့် ဖမ်းဆီးခြင်း၊ နှိပ်စက်ခြင်းများ ရှိနေသဖြင့် ဒေသခံပြည်သူများ အထူးပင် စိုးရိမ်သောက ရောက်နေကြောင်း သိရှိနေရသည့်အတွက် ဒေသအာဏာပိုင်များ အနေဖြင့် အပြစ်မဲ့ ပြည်သူများအား ဥပဒေနှင့်အညီ ကာကွယ်စောင့်ရှောက်ပေးရန် တိုက်တွန်းကြောင်း ရခိုင်အမျိုးသားပါတီ က ၂၉ ရက်နေ့စွဲဖြင့် ထုတ်ပြန်သည့် ကြေငြာချက်တွင် ထည့်သွင်းဖော်ပြထားသည်။
ခိုင်ဖြိုး RakhineNewsAgency
