ဒီမိုကရေစီပညာရေး ပင်မသပိတ်စစ်ကြောင်းမှ ကျောင်းသားများ မတ်လ ၁၀ ရက်၌ အကြမ်းဖက် ဖမ်းဆီးမခံရမီ SNLD မှ ဥက္ကဋ္ဌ ဦးခွန်ထွန်းဦးကိုယ်တိုင် မတ်လ ၈ ရက်တွင် ဦးအောင်မင်းနှင့် တွေ့ဆုံ၍ ပြောကြားခဲ့ခြင်းဖြစ်ပြီး မတ်လ ၉ ရက်တွင် ဦးအောင်မင်းဘက်က အားလုံး စီစဉ်ပြီးပြီဖြစ်၍ ကြားညပ်လိမ့်မည်ဟု အကြောင်းပြန် ခဲ့ ခြင်းဖြစ်သည်။
““၀င်မပါနဲ့လို့တော့ မပြောပါဘူး။ ကြားညပ်ကုန်လိမ့်မယ် အကုန်လုံးက အစီအစဉ်တကျ လုပ်ပြီးကုန်ပြီ။ အဲဒီ သဘောမျိုးပါပဲ။ သူတို့ဘက်က အစည်းအဝေး ဆုံးဖြတ်ပြီးပြီ။ ဘာမှလုပ်လို့ မရတော့ဘူး။ ကျွန်တော်တို့ဝင် တာ နောက်ကျတယ်။ နောက်ကျတဲ့အတွက် မအောင်မြင်ဘူးပေါ့”” ဟု တွေ့ဆုံစဉ် ပါဝင်သူ SNLD အထွေထွေ အတွင်းရေးမှူး ဦးစိုင်းညွန့်လွင်က မြန်မာသံတော်ဆင့်သို့ ပြောသည်။
ယင်းသို့စေ့စပ်မှုနှင့် ပတ်သက်၍ သမ္မတရုံးပြည်ထောင်စုဝန်ကြီး ဦးအောင်မင်းနှင့် SNLD တို့ တွေ့ဆုံ ပြောကြားစဉ် ဦးအောင်မင်းနှင့်အတူ ရှိနေသော မြန်မာငြိမ်းချမ်းရေးစင်တာမှ အကြီးတန်းအကြံပေး ဦးလှမောင်ရွှေထံသို့ ဆက်သွယ်မေးမြန်းခဲ့ရာ ““အဲဒါတော့ကျွန်တော် နားလည်တာတော့ အားလုံးပေါ့ဗျာ။ ၀န်ကြီးဦးအောင်မင်း အပါအ၀င် အားလုံးပါဝင်တဲ့သူတွေ အားလုံးကတော့ နိုင်ငံရဲ့အသွင် ကူးပြောင်းမှု ချောချောမွေ့မွေ့နဲ့ ရှေ့ကို ဆက်သွားနိုင်ဖို့ ရည်ရွယ်ပြီးတော့ ဆောင်ရွက်တာပါပဲ။ ဒီဆောင်ရွက်မှု အပေါ်မှာတော့ အားလုံးက စိတ်စေတနာ ကောင်းထားပြီးတော့ လုပ်ခဲ့တယ်လို့ပဲ ကျွန်တော့်အနေနဲ့ နားလည်တာပေါ့”” ဟု ပြန်လည် ဖြေကြားခဲ့သည်။
ယင်းသို့ SNLD ၏ ၀င်ရောက် စေ့စပ်ပေးမှုကို ၀န်ကြီးဦးအောင်မင်းဘက်မှ မတ်(၉)ရက်တွင် အကြောင်း ပြန် ခဲ့ပြီး နောက်တစ်နေ့ဖြစ်သည့် မတ်လ(၁၀)ရက်တွင် လက်ပံတန်းမြို့၌ သပိတ်တိုက်ပွဲ ပြုလုပ်နေ သည့် ကျောင်းသား ကျောင်းသူများနှင့် ၀န်းရံပြည်သူများကို ရဲတပ်ဖွဲ့ဝင်များက အကြမ်းဖက် ဖြိုခွဲခဲ့သည်။
လက်ရှိတွင် ပညာရေးစနစ် ပြုပြင်ပြောင်းလဲရေးအတွက် ကြိုးပမ်းခဲ့ကြသော ဒီမိုကရေစီပညာရေး ပင်မ သပိတ်စစ်ကြောင်းမှ ဗကသ ကျောင်းသားခေါင်းဆောင် အများစုနှင့် ၀န်းရံပြည်သူများမှာ သာယာဝတီ ထောင်တွင် ဖမ်းဆီးခံထားရပြီး အမှုရင်ဆိုင်နေရသည်။
ဝိုင်းမော် - မြန်မာသံတော်ဆင့်သတင်းဌာန
