ထားဝယ်စီမံကိန်းတွင် တရုတ်ပါဝင်လာရန် ထိုင်းကြိုးပမ်း

Written By Live100 on Tuesday, March 29, 2016 | 8:26 AM

ထားဝယ်၊ မတ် ၂၈

အလျင်အမြန်ရင်းနှီးမြှုပ်နှံခြင်းမပြုဘဲ သတိကြီးစွာ စောင့်ကြည့်နေဆဲဖြစ်သော ဂျပန်ရင်းနှီးမြှုပ်နှံသူများအစား ထားဝယ်စီမံကိန်း အစောပိုင်းအဆင့်များတွင် တရုတ်ရင်းနှီးမြှုပ်နှံသူများ ပါဝင်လာရန် စီမံကိန်း ကနဦးလုပ်ပိုင်ခွင့်ရ ထိုင်းကုမ္ပဏီက ကြိုးပမ်းလျက်ရှိကြောင်း ထိုင်းနိုင်ငံမှ လာသော သတင်းများအရသိရသည်။

ထားဝယ်စီမံကိန်း၏ ကနဦးအစိတ်အပိုင်းတစ်ရပ်ဖြစ်သော ၂၇ စတုရန်းကီလိုမီတာ အကျယ်ရှိ စက်မှုဇုန် တည်ထောင်ရန် အီတာလျံ-ထိုင်းနှင့် ရိုဂျာနာကုမ္ပဏီတို့ ယမန်နှစ် သြဂုတ်လ ၅ ရက်နေ့က လုပ်ပိုင်ခွင့်ရရှိပြီးနောက် မြန်ထားဝယ် စက်မှုမြို့တော် (Myan-Dawei Industiral Estate – MIE) အမည်ရ ကုမ္ပဏီဖြင့် လုပ်ငန်းလုပ်ကိုင်လျက်ရှိသည်။

ယင်းကုမ္ပဏီသည် ထိုကနဦးစက်မှုဇုန်တွင် လုပ်ငန်းလာရောက်လုပ်ကိုင်ရန် ဂျပန်ကုမ္ပဏီတို့ကို ဖိတ်ခေါ်နေသော်လည်း နှောင့်နေးနေသဖြင့် တရုတ်လုပ်ငန်းများ ပါဝင်လာရန် စတင်အားထုတ်လျက်ရှိကြောင်း ထိုင်းနိုင်ငံအခြေစိုက် သတင်းဌာနများတွင် ဖော်ပြကြသည်။

ITD ၏ အမှုဆောင်အရာရှိချုပ်ဖြစ်သော ပရီချိုင်းသည် မတ်လဆန်းက တရုတ်ရင်းနှီးမြှုပ်နှံသူ ၁၄ ဦးကို နေပြည်တော်သို့ ခေါ်ဆောင်လာပြီး ထားဝယ်အထူးစီးပွားရေး ဥက္ကဋ္ဌနှင့် အခြားဆက်စပ်သော အစိုးရဌာနများနှင့် တွေ့ဆုံခဲ့ကြောင်း MIE ၏ အမှုဆောင်ဒါရိုက်တာ ဆုံချက်သီနာပွန်က ပြောဆိုသည်။

“တရုတ်တွေက အခြေခံအားဖြင့်တော့ လမ်းအဆင့်မြှင့်တင်တဲ့နေရာမှာ ၀င်လုပ်ပါမယ်။ ထားဝယ်စီမံကိန်းကနေ ဖူနမ်ရွန်ကို လေးလမ်းသွားအဖြစ် ချဲ့ဖို့ရောပေါ့”ဟု ဆုံချက်သီနာပွန်က ထိုင်းပြည်တွင်း သတင်းဌာန တစ်ခုကို ပြောဆိုထားသည်။

ထားဝယ်စီမံကိန်းတွင် ပါဝင်လာနိုင်မည့် တရုတ်လုပ်ငန်းများမှာ နိုင်ငံပိုင်နှင့် ပုဂလိက နှစ်ရပ်စလုံးမှ ဖြစ်ကြောင်း ၎င်းကဆိုပြီး King Trillian Company၊ China Railways Engineering Corporation Comapny (CREC) တို့အပြင် အာရှနှင့် ဥရောပကို လွှမ်းခြုံအခြေပြုကာ စီးပွားရေးဖွံ့ဖြိုးလာရေး တရုတ်အစိုးရက ရည်မှန်းချက်ထား လုပ်ဆောင်နေသော Silk Road Fund အမည်ရ နိုင်ငံပိုင် ရင်းနှီးမြှုပ်နှံမှု ရန်ပုံငွေ အဖွဲ့လည်း ပါဝင်လာဖွယ်ရှိကြောင်း သတင်းများတွင် ဖော်ပြထားသည်။

ယင်းတရုတ်လုပ်ငန်းများသည် ထားဝယ်စီမံကိန်းတွင် ပါဝင်ရင်းနှီးမြှုပ်နှံရန် အစိုးရသစ်ထံ အဆိုပြုလွှာ တင်ရန်လိုအပ်မည်ဖြစ်သည်။

“လာမယ့် အစိုးရသစ်အနေနဲ့လည်း စီမံကိန်းအပေါ် အကောင်းမြင်လိမ့်မယ်လို့ ကျွန်တော် ထင်ပါတယ်”ဟု ဆုံချက်က ဆိုသည်။

တရုတ်တို့ပါဝင်လာရန် ကြိုးပမ်းခြင်းမှာ တရုတ်နှင့် ဂျပန်တို့သည် ဒေသတွင်းတွင် အားပြိုင်မှုများရှိနေသည့် အတွက် တရုတ်ကို အသုံးပြု၍ ဂျပန်ရင်းနှီးမြှုပ်နှံသူများ စီမံကိန်းတွင် အလျင်အမြန်ပါဝင်လာရန် လုပ်ဆောင်နေသော ဗျူဟာတစ်မျိုး ဖြစ်ကြောင်း ထားဝယ်ဖွံ့ဖြိုးရေးအဖွဲ့ (DDA) မှ ဒါရိုက်တာ ဦးသန့်ဇင်က ဆိုသည်။

အစိုးရအသစ်အနေနှင့် ဆုံးဖြတ်ချက်တစ်စုံတစ်ရာမချမီ စီမံကိန်းကို အသေအချာ ပြန်လည်သုံးသပ်ရန် လိုအပ်ပြီး ဒေသခံများ၏ အကျိုးစီးပွားကို မျက်နှာမူကာ ဆုံးဖြတ်ရန်လိုကြောင်း ၎င်းက ပြောသည်။

“ရှင်းရှင်းပြောရရင် ထိုင်းက လိုသလို ဇာတ်ညွန်းရေးပြီး လာလုပ်တဲ့ ပုံစံဖြစ်လို့မရဘူး။ မြန်မာအစိုးရမှာ ကိုယ်ပိုင်ဆုံးဖြတ်ချက်ရှိရမယ်”ဟု ဦးသန့်ဇင်က ဆိုသည်။

MIE သည် ကနဦးစက်မှုဇုန် ဧရိယာအတွင်း စက်မှုဇုန်၊ လူနေအိမ်ခြေ တို့အတွက် အခြေခံအဆောက်အဦများ တည်ဆောက်ရေး မြေပြင်လုပ်ငန်းများ ဆောက်ရွက်နေပြီး ယခုနှစ်ကုန်တွင် ယင်းလုပ်ငန်းများ အပြီးသတ်ရန် မျှော်လင့်ထားသည်။

လတ်တလောတွင် ယင်းစက်မှုဇုန်တွင် လာရောက်လုပ်ကိုင်ရန် လက်မှတ်ရေးထိုးထားသော ထိုင်းကုမ္ပဏီမှာ VSI Union ဖြစ်ပြီး ထိုင်းနိုင်ငံ ရနောင်းမြို့အခြေစိုက် အအေးခန်းစက်ရုံတစ်ခု တစ်ဖြစ်သည်။

ယင်းစက်ရုံသည် စက်မှုဇုန်အတွင်း မြေဧရိယာ ၄ ဧက ပေါ်တွင် စက်ရုံတည်ဆောက်မည်ဖြစ်ပြီး ပင်လယ်စာထွက်ပစ္စည်းများကို ထုပ်ပိုးပြင်ဆင်ကာ ထိုင်းနိုင်မှ တဆင့် ပြည်ပတင်ပို့မည်ဖြစ်သည်။

ထားဝယ်စီမံကိန်းကို မြန်မာ-ထိုင်း-ဂျပန် အစိုးရတို့ သုံးပွင့်ဆိုင် လုပ်ကိုင်သော စီမံကိန်းအဖြစ် အသွင်ပြောင်းလိုက်သော်လည်း ရင်းနှီးမြှုပ်နှံသူများကို ဆွဲဆောင်နိုင်ရန် အခက်အခဲတွေ့နေဆဲ ဖြစ်သည်။
Dawei Watch|

Share this article :