လိုင်စင် အသိမ်းခံ ရှေ့နေအချို့ အမှုလိုက်ခွင့် ပြန်လည်ရရှိ

Written By လွင့်မောင်မောင် on Saturday, August 18, 2012 | 2:53 PM

နိုင်ငံရေး လှုပ်ရှားသူများအတွက် အကျိုးဆောင်ပေးခဲ့၍ လည်းကောင်း၊ ကိုယ်တိုင် တက်ကြွစွာ
နိုင်ငံရေးလှုပ်ရှား၍ လည်းကောင်း လိုင်စင်ရုပ်သိမ်းခံထားရသော ရှေ့နေများအနက် ရှေ့နေ ငါးဦးကို နေပြည်တော် တရားလွှတ်တော်ချုပ်မှ လိုင်စင် ပြန်လည် ထုတ်ပေးလိုက်သည်ဟု လိုင်စင်ပြန်လည် ရရှိသွားသူ ရှေ့နေ ဦးအေးမြင့် က ပြောသည်။

နှစ်ပေါင်းများစွာ ရှေ့နေလိုင်စင် ရုပ်သိမ်းခံထားရသော အမျိုးသားဒီမိုကရေစီအဖွဲ့ချုပ် NLD မှ ရှေ့နေ ဦးကြည်ဝင်း၊ ဦးရဲမြင့်၊ ဦးဌေးအောင်၊ ဦးဟန်မာညွန့်နှင့် လမ်းပြကြယ်အဖွဲ့ ဦးဆောင်သူ ဦးအေးမြင့်တို့ ငါးဦးတိုအား ရှေ့နေ လိုက်ခွင့် ပြန်ပေးခြင်းဖြစ်သည်ဟု သိရသည်။

သြဂုတ်လ ၁ဝ ရက်နေ့ တရားရုံးချုပ် တရားသူကြီး စည်းဝေးဆုံးဖြတ်ချက်ဖြင့် ညွန်ကြားရေးမှူး ဒေါ်တင်တင်ဝါ လက်မှတ်ဖြင့် ရှေ့နေလိုက်ပါဆောင်ရွက်ခွင့် လိုင်စင် ထုတ်ပေးလိုက်ခြင်း ဖြစ်သည်။

“ကျနော်က ရှေ့နေ ရှေ့ရပ်ကို ဖောက်ဖျက်တာ မဟုတ်ဘူး။ ရှေ့နေကျင့်ဝတ်နဲ့အညီ ကိုယ့်ဟာကို ဥပဒေကို ချစ်မြတ်နိုးလို့ လုပ်လာခဲ့ရတာ။ လုပ်ကြံဖန်တီးထားတဲ့ နိုင်ငံတော် ပုန်ကန်မှုနဲ့ အပြစ်ပေးခံရတာကို ပြစ်ဒဏ်က လွတ်ပေမယ့်လည်း (လိုင်စင်)သိမ်းခံထားရတာ။ အခုက ကိုယ်တိုင် ရှေ့နေအဖြစ် လိုက်ပေးနိုင်တဲ့အတွက် ဝမ်းသာတယ်” ဟု လမ်းပြကြယ် ဦးအေးမြင့် က ပြောသည်။

အမျိုးသားလွတ်တော် အမတ် ဒေါက်တာမြတ်ဉာဏစိုးက ရှေ့နေနှင့် ဆရာဝန်များ လိုင်စင် ရုပ်သိမ်းထားမှု ခွင့်ပြု၊ မပြု မေးမြန်းခဲ့ရာ ပြည်ထောင်စု တရားလွှတ်တော်ချုပ်က ပြန်စဉ်းစားမည်ဟု တုံ့ပြန်ခဲ့သည်။ ထို့နောက် လိုင်စင်
ပြန်ရစေလိုကြောင်း ပြီးခဲ့သည့် ဇွန်လ ၁ ရက်နေ့က ရှေ့နေများရုံးချုပ်သို့ အသနားခံစာတင်ခဲ့ခြင်း ဖြစ်သည်။

အာရှ ဥပဒေရေးရာ ရင်းမြစ်အဖွဲ့ ALRC ၏ ဇွန်လ မှတ်တမ်းအရ မြန်မာနိုင်ငံတွင် နိုင်ငံရေးအမှု လိုက်၍ ရှေ့နေလိုင်စင် ရုတ်သိမ်းခြင်းခံရေသော ရှေ့နေ ၃၂ ဦးအနက် တရားရုံးချုပ် ရှေ့နေ ၂၅ ယောက်နှင့် အထက်တန်းရှေ့နေ ၇ ယောက် တို့ ပါဝင်ပြီး စာရင်းသွင်းခြင်း မရှိသေးသူများလည်း ရှိကြောင်း သိရသည်။

ဇူလိုင်လ အတွင်းကလည်း တရားလွတ်တော်ရှေ့နေ ငါးဦးနှင့် အထက်တန်းရှေ့နေ ခုနှစ်ဦးတို့အား ရှေ့နေလိုင်စင်များ
ပြန်လည်ထုတ်ပေးခဲ့ပြီးဖြစ်၍ ယခုတကြိမ်မှာ ဒုတိယ အကြိမ် ဖြစ်သည်။

ကိုယ်ကျင့်တရားနှင့် ဥပဒေ မှားယွင်းခြင်းမှ လွဲ၍ လိုင်စင်များ မရုပ်သိမ်းသင့်ကြောင်း ၂ဝ၁၁ ခုနှစ်၊ ဒီဇင်ဘာလက
ရှေ့နေ တာဝန်ပျက်ကွက်သည်ဟုဆိုကာ ရှေ့နေ လိုင်စင် သုံးနှစ် ရပ်ဆိုင်းခံထားရသည့် ဦးမြင့်သွင် က ပြောသည်။

“အသနားခံတယ်ဆိုတာက တိုင်းပြည်တခုမှာ ကော်မတီတွေ၊ သမ္မတတွေမှာ အသနားခံရင် သမာသမတ်ကျကျ မျှမျှတတ လူသားစိတ် စဉ်းစားရင် အကုန်ပြန်လုပ်ပေးလေ့ရှိတယ်။ အဓိက ကိုယ်ကျင့်တရားနဲ့ ပတ်သက်တာရယ်၊ ဥပဒေကို ခွင့်မလွှတ်နိုင်လောက်အောင် မှားတာက လွဲလို့တော့ လိုင်စင်က မသိမ်းသင့်ပါဘူး”ဟု ပြောသည်။

လိုင်စင်ပြန်ရရေးအတွက် သမ္မတ ဦးသိန်းစိန်ထံ စာတင်ပြထားသဖြင့် ပြန်လည် ရရှိမည်ဟု ဦးမြင့်သွင် က မျှော်လင့်နေ သည်။

လိုင်စင် ရုပ်သိမ်းလိုက်သည့်အတွက် အမှုသည်ဘက်များ နစ်နာခြင်း၊ ပညာရပ်ပေါ် နစ်နာခြင်း၊ အသက်မွေးဝမ်းကြောင်း
ဖြစ်သည့်အတွက် စားဝတ်နေရေးအတွက် နစ်နာဆုံးရှုံးမှုများ ရှိသည်ဟု ဦးမြင့်သွင်က ပြောသည်။

ရှေ့နေအချို့ လိုင်စင်များ ပြန်လည် ရရှိသော်လည်း နိုင်ငံရေးလှုပ်ရှားမှုများကြောင့် လိုင်စင် ရုပ်သိမ်းခံထားရသော ဆရာဝန်များ၏ လိုင်စင်များကိုမူ ပြန်လည် ထုတ်ပေးခြင်း မရှိသေးပေ။

၁၅ နှစ်ကြာ ဆရာဝန်လိုင်စဉ် ရုပ်သိမ်းခံရသူ အမျိုးသားဒီမိုကရေစီအင်အစားစု NDF ပါတီ ခေါင်းဆောင် ဒေါက်တာ သန်းငြိမ်းက ဆရာဝန်လိုင်စင် ပြန်လည် ရရှိရေးလျှောက်ထားမည် မဟုတ်ဘဲ အစိုးရ၏ မတရား လုပ်ခဲ့ခြင်းဖြစ်သဖြင့် အစိုးရသည်သာလျှင် ပြန်လည် ဖြေရှင်းပေးရမည်ဟု ပြောဆိုလိုက်သည်။

“မကြိုးစားပါဘူး။ ဘာလို့လဲဆိုတော့ သူတို့ မတရားလုပ်သွားတဲ့ ကိစ္စပဲ။ အမှန်ဆို ဆေးကောင်စီကနေ ဖြစ်ဖြစ် ခေါ်စစ် ရမယ်။ ထုချေခွင့်တွေ ရှိမယ်။ ဘာမှ ကျူးလွန်တာမှ မရှိဘူး။ ဒါပေမယ့် ဘာမှ မလုပ်ဘဲနဲ့ သိမ်းသွားတဲ့ကိစ္စဟာ မပြော
တော့ဘူး။ သူတို့ ပြန်ပေးရမှာပဲလေ။ မပေးသမျှဟာ သူတို့ အပြစ်ရှိတာပေါ့” ဟု ဒေါက်တာသန်းငြိမ်းက ပြောသည်။

ထိုစဉ်က ဒေါက်တာသန်းငြိမ်းမှာ NLD ပါတီတွင် ရန်ကုန်တိုင်း ဒု-ဥက္ကဋ္ဌ ဖြစ်သည်။ သူ၏ အမှုတွင် သက်သေအဖြစ် ဆရာဝန်တဦး၏ ကျင့်ဝတ်နှင့် ပတ်သက်၍ ထွက်ဆိုခဲ့သူ NLD ပါတီမှ ဒေါက်တာဝင်းနိုင် သည်လည်း ယနေ့ထိ ဆရာဝန်လိုင်စင် ရုပ်သိမ်းခံထားဆဲဟု ဆိုသည်။

အသက်မွေး ဝမ်းကျောင်းလုပ်ငန်းများတွင် နစ်နာဆုံးရှုံးမှု အများအပြား ခံစားနေရ၍ တဦးချင်းအလိုက် ပြန်လည် စိစစ်ရန် အစိုးရ၌ တာဝန်ရှိသည်ဟု ဒေါက်တာသန်းငြိမ်း က ပြောသည်။

မြန်မာ့ဆိုရှယ်လစ်ခေတ် ဖျက်သိမ်း၍ ဒီမိုကရေစီအရေးအတွက် လှုပ်ရှားကြစဉ် ဆရာဝန်နှင့် ရှေ့နေများ အများအပြား ပါဝင်ခဲ့သူများ ရာဇဝတ်မှု၊ အမှုလိုက်သည့်အချိန် ယှဉ်ပြိုင် လုပ်မှု၊ ဆရာဝန်လိုင်စင် သက်တမ်းမတိုးမှု၊ လိုင်စင်မရှိဘဲ
ဆေးကုမှု စသည့်ဖြင့် မမှန်စွပ်စွဲကာ ရှေ့နေနှင့် ဆရာဝန်များ၏ ပညာရပ်ဖြင့် အသက်မွေးဝမ်းကျောင်းခွင့်ကို အာဏာပိုင် များက ရုပ်သိမ်းခဲ့သည်ဟု ရှေ့နေများက ပြောသည်။
ချင်းမိုင်(မဇ္စျိမ)

Share this article :