ယခုနှစ် အတွင်း ဒေါ်အောင်ဆန်းစုကြည်၏ ပြည်ပ ခရီးစဉ်များတွင် ၀တ်ဆင် ခဲ့သည့် မြန်မာ့ရိုးရာ ချည်ထည် ၀တ်စုံများကြောင့် ချည်ထည် အ၀တ် အထည်နှင့် ဒီဇိုင်းများကို ပြည်ပခရီးသွား ဧည့်သည်အများစု ယခင်ကထက် ပိုမိုစိတ်ဝင်စား ၀ယ်ယူလာကြကြောင်း ဗိုလ်ချုပ်အောင်ဆန်းဈေးမှ ချည်ထည်ဆိုင်များက ပြောသည်။ “ဒေါ်အောင်ဆန်းစုကြည်ဝတ်တဲ့ ဒီဇိုင်းတွေရှိလားလို့ တကူးတ ကမေးမြန်းပြီး လာဝယ်တဲ့ နိုင်ငံခြားသားဧည့်သည်တွေ ဒီနှစ်ထဲ များလာတယ်။
လူကြီးရော လူငယ်တွေပါ ကြိုက်ကြတယ်။ ၀ယ်ပြီးရင် ချက်ချင်းချုပ်ပြီး ၀တ်လို့ရအောင် စောင့်ယူသွားကြတာ များတယ်”ဟု ဗိုလ်ချုပ်အောင်ဆန်းဈေး၊ အရှေ့ဘက်တန်း ရှိ အောင်မြင့်မိုရ် အထည်ဆိုင်မှ ဒေါ်အေးအေးနွယ်ကပြောသည်။
မြန်မာ့ရိုးရာ ချည်ထည်များကို နိုင်ငံခြားသား ဧည့်သည်များသာမက ပြည်တွင်းမှ လူငယ်အမျိူးသမီးများပါ ၀ယ်ယူမှု မြင့်တက်လာကြောင်း၊ အထူးသဖြင့် တက္ကသိုလ်တက်ရောက်နေသော ကျောင်းသူအများစုက ဦးစားပေး ၀ယ်ယူလာကြကြောင်း သိရသည်။ “ဒါ ဒေါ်အောင်ဆန်းစုကြည်ရဲ့ ဒီဇိုင်းလို့ ပြောရောင်းတာနဲ့ကို ဟုတ်ဟုတ်၊ မဟုတ်ဟုတ် စိတ်ဝင်တစားနဲ့ကို ၀ယ်သွားကြတယ်။
တချို့ နိုင်ငံခြား သားတွေက ဒေါ်အောင်ဆန်းစုကြည်ဝတ်တဲ့ ဒီဇိုင်းတွေကို ဖုန်းနဲ့ဓာတ်ပုံရိုက်ယူလာပြပြီး ၀ယ်ကြတာလည်းရှိတယ်။ ဒီနှစ်ထဲမှာ ဧည့်အ၀င်များတာလည်းပါတော့ ချည်ထည်တွေ တော်တော်လေး ရောင်းရတယ်”ဟု ဗိုလ်ချုပ်အောင်ဆန်းဈေး စီရုံရှိ ချည်ထည်ဆိုင်တစ်ဆိုင်မှ အရောင်းတာဝန်ခံတစ်ဦးက ပြောသည်။
အချို့ နိုင်ငံခြားသားများမှာမူ ဒေါ်အောင်ဆန်းစုကြည်၏ ပြည်ပခရီးစဉ် ဓာတ်ပုံများကို အင်တာနက်မှ ရယူပြီး ပုံပါအဆင်ဒီဇိုင်းများကို လာရောက်ရှာဖွေ ၀ယ်ယူကြကြောင်း သတင်းရရှိသည်။ အနောက်နိုင်ငံများမှ နိုင်ငံခြားသား ဧည့်သည်အများစုမှာ ၀တ်ဆင်ရန် ချည်ထည်များကို ဦးစားပေး ၀ယ်ယူကြပြီး အရောင်တောက်သော တိုင်းရင်းသားဝတ်စုံအချို့နှင့် ရိုးရာဂျပ်ခုတ်ထည်များကို လက်ဆောင်ပေးရန် ၀ယ်ယူကြကြောင်း ဗိုလ်ချုပ်အောင်ဆန်းဈေး၊ စီရုံရှိ Ct Chin-NAGA ဆိုင်မှ တာဝန်ခံကပြောသည်။
မြန်မာ့ရိုးရာအ၀တ်အထည်ကို နိုင်ငံတကာမှ ၂၀၁၀ ခုနှစ်နောက်ပိုင်း ပိုမိုစိတ်ဝင်စားလာခြင်းမှာ ဒီမိုကရေစီခေါင်းဆောင်တစ်ဦးအဖြစ် အသိအမှတ်ပြုထားခြင်း ခံရသည့် ဒေါ်အောင်ဆန်းစုကြည်၏ တစ်စိုက်မတ်မတ် ၀တ်ဆင်မှုကြောင့်ဖြစ်ကြောင်း ဧည့်လမ်းညွှန်အချို့က သုံးသပ်ပြောကြားသည်။
“ဗိုလ်ချုပ်အောင်ဆန်းဈေးကို ရောက်တာနဲ့ ရိုးရာဝတ်စုံတွေ ကြည့်တယ်။ ဒေါ်စုဒီဇိုင်းတွေဆိုရင် ၀ယ်တယ်။ သူတို့နိုင်ငံ ပြန်ရောက်ရင် ဒါဒေါ်အောင်ဆန်းစုကြည်ဝတ်တဲ့ ဒီဇိုင်းဆိုပြီး အမှတ်တရ ပြန်ပြချင်တာ”ဟု စပိန်ဧည့်လမ်းညွှန်တစ်ဦးက ပြောသည်။ “အခု ဒေါ်အောင်ဆန်းစုကြည်က မြန်မာ့ရိုးရာဝတ်စုံကို ကမ္ဘာကို ထိုးဖောက်နိုင်ပြီ။ အဲဒီလိုပဲ မြန်မာ့ရိုးရာ အစားအစာတွေကိုလည်း ကမ္ဘာကို ထိုးဖောက်သင့်တယ်။ ကိုရီးယားဆိုရင် သူတို့ ရိုးရာအစားအစာကို ကမ္ဘာအနှံ့ ထိုးဖောက်နိုင်တာ တွေ့ရတယ်”ဟု အသက် ၅၀ အရွယ် အိမ်ရှင်မ ဒေါ်မြင့်မြင့်သန်းကပြောသည်။
အေးသူစံ၊ ခိုင်ချိူ News from : 7DAY NEWS
