PNLO က တစ်နိုင်ငံလုံး အပစ်ရပ်စာချုပ်တွင် လက်နက်ကိုင်တပ်ဖွဲ့များအကြား လိုက်နာရမည့် သဘောတူညီချက်များလည်း ထည့်သွင်းပေးရန် NCCT ကို အကြံပြုမည်

 တစ်နိုင်ငံလုံး အပစ်ရပ်စာချုပ်တွင် လက်နက်ကိုင်တပ်ဖွဲ့များ အချင်းချင်းကြား လိုက်နာရမည့် သဘောတူညီချက်များလည်း ထည့်သွင်းပေးရန် ပအိုဝ်းလွတ်မြောက်ရေးအဖွဲ့ချုပ် (PNLO) က တိုင်းရင်းသားလက်နက်ကိုင် အဖွဲ့များ၏ တစ်နိုင်ငံလုံး အပစ်အခတ်ရပ်စဲရေးဆိုင်ရာ ညှိနှိုင်းရေးအဖွဲ့ (NCCT) ကို အကြံပြုသွားမည်ဖြစ်ကြောင်း PNLO ဥက္ကဋ္ဌ ဦးခွန်မြင့်ထွန်းက ပြောကြားသည်။ PNLO ဥက္ကဋ္ဌ ဦးခွန်မြင့်ထွန်းက “တစ်ပြည်လုံးဆိုင်ရာ အပစ်အခတ်ရပ်စဲရေး သဘောတူစာချုပ်မှာ ဘာတွေထည့်ဖို့လိုသလဲဆိုရင် အစိုးရနဲ့ချုပ်ဆိုထားတဲ့ သဘောတူညီချက်တွေကို အစိုးရနဲ့သက်ဆိုင်ရာ အဖွဲ့အစည်းတွေကလည်း လေးစားလိုက်နာဖို့ လိုအပ်သလို ကျန်သောအပစ်ရပ် အဖွဲ့အစည်းများကလည်း အပြန်အလှန် လေးစားလိုက်နာရမယ်ဆိုတဲ့အချက် ကျွန်တော်တို့ ထည့်သွင်းချုပ်ဆိုဖို့ လိုတယ်လို့ထင်တယ်။ ဒါဟာ အခုကျွန်တော်တို့ လုပ်ရင်းလုပ်ရင်းနဲ့ တွေ့လာတဲ့ကိစ္စ ဖြစ်တယ်။ ဒီ့အပြင် အရင်အပစ်ရပ်စာချုပ်တွေ ချုပ်ဆိုတုန်းကလည်း ကျွန်တော်တို့ နှစ်ဖက်လေးစားလိုက်နာဖို့ဆိုတာထက် ကျန်တဲ့လူတွေက လေးစားလိုက်နာဖို့ဆိုတာကို ထည့်သွင်းချုပ်ဆိုထားတာ မရှိဘူး။ ဒါ့ကြောင့် ဒီအချက်ကိုတော့ ကျွန်တော့်အနေနဲ့ပြောရရင် တိုင်းရင်းသားလက်နက်ကိုင် အဖွဲ့အစည်းတွေဘက်ကရော အစိုးရဘက်ကရော ဒီအချက်ကို သတိမထားမိကြသေးပါဘူး။ ကျွန်တော်တို့ကတော့ အခုဒီအချက်ကိုလည်း NCCT ကို အကြံပြုမှာဖြစ်ပါတယ်။ ဒီအချက်ကို ထည့်သွင်းပေးဖို့ပေါ့။ ဒါကတော့ လုပ်ငန်းလုပ်ရင်းနဲ့မှ သိရှိလာတဲ့အချက်ပေါ့” ဟု နိုဝင်ဘာ ၈ ရက်က ပြောကြားသည်။ ထိုသို့ တိကျသည့် သဘောတူလိုက်နာရန်အချက်များ မရှိသေးခြင်းကြောင့် ရှမ်းပြည်ပြန်လည်ထူထောင်ရေးကောင်စီ (RCSS) နှင့် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) တို့အကြား နယ်မြေအငြင်းပွားမှု ပြဿနာများသည် ယခုအချိန်အထိ ရှိနေဆဲဖြစ်ကာ နှစ်ဖက်တပ်ဖွဲ့များအကြား ဆွေးနွေးနေရဆဲ ကိစ္စရပ်တစ်ခုဖြစ်ကြောင်း ၎င်းကဆက်လက်ပြောကြားသည်။ တစ်ပြည်လုံးဆိုင်ရာ အပစ်အခတ်ရပ်စဲရေး သဘောတူစာချုပ်မှာ ဘာတွေထည့်ဖို့လိုသလဲဆိုရင် အစိုးရနဲ့ချုပ်ဆိုထားတဲ့ သဘောတူညီချက်တွေကို အစိုးရနဲ့သက်ဆိုင်ရာ အဖွဲ့အစည်းတွေကလည်း လေးစားလိုက်နာဖို့ လိုအပ်သလို ကျန်သောအပစ်ရပ် အဖွဲ့အစည်းများကလည်း အပြန်အလှန် လေးစားလိုက်နာရမယ် . . . . . PNLO အဖွဲ့၏ လှုပ်ရှားနယ်မြေအဖြစ် အစိုးရမှ သတ်မှတ်ပေးထားသော နယ်မြေများတွင် PNLO အဖွဲ့၏ ဆောင်ရွက်နေမှုများနှင့် ပတ်သက်၍ စက်တင်ဘာလအတွင်းက RCSS နှင့် PNLO အကြား တိုက်ပွဲများဖြစ်ပွားခဲ့သလို ထိုနယ်မြေများအတွင်း အောက်တိုဘာလဆန်းပိုင်းက ဖြစ်ပွားခဲ့သော ပစ်ခတ်တိုက်ခိုက်မှုများကြောင့်လည်း နယ်မြေအငြင်းပွားမှုပြဿနာများ ဖြစ်ပွားရကြောင်း သိရသည်။ “အခု နယ်မြေအငြင်းပွားမှုဆိုင်ရာ ပြဿနာတွေ ဖြစ်လာတယ်။ ဒါ့ကြောင့်မို့ ကျွန်တော်တို့ ဥပမာနဲ့ဆိုရင် ဒါဟာကျွန်တော်တို့ RCSS နဲ့ ကျွန်တော်တို့ PNLO နှစ်ဖက်အကြားပဲ ဆွေးနွေးလို့ရတဲ့ဟာ မဟုတ်တော့ဘူး။ အကုန်လုံးနဲ့ ဆိုင်လာပါပြီ” ဟု ဦးခွန်ထွန်းမြင့်က ဆိုသည်။ တစ်နိုင်ငံလုံး အပစ်အခတ်ရပ်စဲရေးစာချုပ် ချုပ်ဆိုနိုင်ရေးအတွက်မူ ပြည်ထောင်စုငြိမ်းချမ်းရေးဖော်ဆောင်ရေး လုပ်ငန်းကော်မတီ (UPWC) နှင့် တိုင်းရင်းသားလက်နက်ကိုင်အဖွဲ့များ၏ တစ်နိုင်ငံလုံးအပစ်ရပ်စဲရေးဆိုင်ရာ ညှိနှိုင်းရေးအဖွဲ့ (NCCT) တို့သည် လက်ရှိအချိန်အထိ ဆွေးနွေးဆဲဖြစ်ကာ ယခုနိုဝင်ဘာလကုန်ပိုင်းတွင်လည်း ဆက်လက်ဆွေးနွေးနိုင်ရန် ညှိနှိုင်းလျက်ရှိကြောင်း သိရသည်။
 ဇာလီမြင့်ဦး