ဒုတိယအကြိမ်ကျင်းပမယ့် ခြောက်ပွင့်ဆိုင်တွေ့ဆုံပွဲကို လာမယ့်မေလဆန်းမှာ ကျင်းပ နိုင်ဖွယ်ရှိကြောင်း အမျိုးသားဒီမိုကရေစီအဖွဲ့ချုပ် ဥက္ကဌ ဒေါ်အောင်ဆန်းစုကြည်က ဒီနေ့ကျင်းပတဲ့ ဗဟိုအလုပ်အမှုဆောင် ကော်မတီအစည်းဝေးမှာ ပြောကြားလိုက် ပါတယ်။
ပြီးခဲ့တဲ့ ဧပြီလ ၁၀ ရက်နေ့က ကျင်းပခဲ့တဲ့ ပထမအကြိမ် ခြောက်ပွင့်ဆိုင်တွေ့ဆုံ ဆွေးနွေးပွဲနဲ့ပတ်သက်ပြီး ဒေါ်အောင်ဆန်းစုကြည်က ကော်မတီဝင်တွေကို ရှင်းပြရာမှာ ထည့်သွင်းပြောကြားခဲ့တာ ဖြစ်တယ်လို့ ဗဟိုအလုပ်အမှုဆောင်ကော်မတီဝင် ဒေါ်နန်းခင်ထွေးမြင့်က ပြောပါတယ်။
"ကျနော်တို့ရဲ့ခေါင်းဆောင်ကထပ်ရှင်းပြတယ်၊ တိုင်းရင်းသားကိုယ်စားလှယ် တွေထပ်တွေ့ဖို့ကို ဘယ်သူတွေသဘောတူတယ်၊ ဘယ်သူတွေကသဘော မတူဘူး၊ ဘယ်သူတွေကလက်ခံတယ်၊ နောက်အချိန်ကိုပြန်ပြီးသတ်မှတ်တယ်၊ မေလ ၆ ရက်နေ့ကိုပြန်ပြီးသတ်မှတ်တာတို့၊ အဲ့လိုမျိုးလေးတွေပေါ့၊ သူတောင်းဆိုခဲ့တဲ့ ဟာလေးတွေ၊ သူပြောဆိုခဲ့တဲ့ဟာလေးတွေပေါ့နော်"
ဒီနေ့ ရန်ကုန်မြို့ NLD ဌာနချုပ်မှာ ကျင်းပတဲ့ ဗဟို အလုပ်အမှုဆောင်အစည်းအဝေးမှာ လာမယ့် ၂၀၁၅ အထွေထွေရွေးကောက်ပွဲအတွက် အောင်နိုင်ရေး လုပ်ငန်းစဉ်တွေနဲ့ ကိုယ်စားလှယ်လောင်း အရည်အချင်းသတ်မှတ်နိုင်ရေးတို့ကို ဆွေးနွေးခဲ့ကြတာ ဖြစ်ပါတယ်။
လာမယ့် မေလအတွင်းမှာ ပြန်လည်ကျင်းပမယ့် ဗဟိုအလုပ်အမှုဆောင်ကော်မတီ အစည်းအဝေးမှာ ရွေးကောက်ပွဲဝင်မယ့် ကိုယ်စားလှယ်လောင်းတွေရဲ့ အရည်အချင်း သတ်မှတ်ချက်တွေနဲ့ပတ်သက်ပြီး ကော်မတီဝင်တွေက သဘောထားတွေတင်ပြရမှာ ဖြစ်ပါတယ်။
အမျိုးသားဒီမိုကရေစီအဖွဲ့ချုပ် ဗဟိုအလုပ်အမှုဆောင် ကော်မတီအစည်းအဝေးကို ပုံမှန် နှစ်ပတ်တစ်ကြိမ် ကျင်းပနေတာ ဖြစ်ပါတယ်။
RFA Burmese
