ရန်ကုန် ဧပြီ ၂၄
ပုဂံယဉ်ကျေးမှု နယ်မြေအတွင်းရှိ ရှေးဟောင်း အမွေအနှစ် ဘုရားပုထိုးများနှင့် နီးကပ်စွာ ရှိနေသော ဟိုတယ် ၂၂လုံးကို အမွေအနှစ် အပေါ် အကျိုးသက်ရောက်မှု အကဲဖြတ် အဖွဲ့(Heritage Impact Assessment)မှ ဇန်နဝါရီလအတွင်း စစ်ဆေးခဲ့ရာ ယဉ်ကျေးမှု အမွေအနှစ်အပေါ် အကျိုးသက်ရောက်မှု စံနှုန်းများနှင့် ငြိစွန်း နေသည့် ဟိုတယ်ခြောက် လုံးကို တွေ့ရှိခဲ့ကြောင်း သိရသည်။
အဆိုပါ ဟိုတယ်ခြောက်လုံးသည် နိုင်ငံတကာ၌ သတ်မှတ်ထားသော အမွေ အနှစ်အပေါ် အကျိုးသက်ရောက်မှု စံနှုန်းများအနက် ယဉ်ကျေးမှု အမွေအနှစ်များနှင့် နီးကပ်စွာ ရှိနေခြင်း၊ မြင်ကွင်းကွယ်နေခြင်းနှင့် ယဉ်ကျေးမှုအမွေအနှစ် အဆောက်အအုံများနှင့် ထိစပ်နေခြင်း စသည့်အချက် များနှင့် ငြိစွန်းကာ ဆောက်လုပ်ထား ကြောင်း သိရသည်။
ယူနက်စကို၏ ကမ္ဘာ့ယဉ်ကျေးမှု အမွေအနှစ် စာရင်းဝင်ရန် ကြိုးစားနေသည့် ပုဂံယဉ်ကျေးမှုနယ်မြေရှိ ဟိုတယ် ခြောက်လုံးကို ယဉ်ကျေးမှု အမွေအနှစ်အပေါ် အကျိုး သက်ရောက်မှု စံနှုန်းများနှင့် ငြိစွန်းနေသဖြင့် အရေးယူရန် အမျိုးသား ခရီးသွားလာရေး ဗဟိုကော်မတီ အဖွဲ့မှ ဆုံးဖြတ် သွားမည်ဖြစ်ကြောင်း ဟိုတယ်နှင့် ခရီး သွားလာရေး လုပ်ငန်း ဝန်ကြီးဌာနမှ သိရသည်။
ယဉ်ကျေးမှုအမွေအနှစ် အပေါ် အကျိုးသက်ရောက်မှု အကဲဖြတ်အဖွဲ့ (Heritage Impact Assessment) သည် အဆိုပါ ဟိုတယ်များနှင့် ပတ်သက်၍ အမွေအနှစ် စံနှုန်းများနှင့် ကိုက်ညီမှုရှိ၊ မရှိကိုသာ ကွင်းဆင်း စစ်ဆေး ခဲ့ခြင်းဖြစ်ပြီး ရှေ့ဆက်ဆောင်ရွက်ရမည့် ကိစ္စများကို သက်ဆိုင်ရာ အဖွဲ့မှ ဆုံးဖြတ် ဆောင်ရွက်မည် ဖြစ်ကြောင်း ယင်းစစ်ဆေးရေး အဖွဲ့ကို ငှားရမ်းပေးသည့် မြန်မာနိုင်ငံ ဆိုင်ရာ ယူနက်စကို ရုံးမှ သိရသည်။
မြ၀တီ
