သမ္မတလောင်း ၂ ဦးစလုံးဟာ တနင်္လာနေ့မှာ ပြည်နယ်တွေတော်တော်များများကို သွားရောက် မဲဆွယ်နေကြပါတယ်။ ကြိုတင်မဲစစ်တမ်းတွေအရကတော့ ၂ ဦးစလုံး သူမသာ ကိုယ်မသာ အနေအထားမျိုးမှာရှိပါတယ်။ သမ္မတလောင်းတွေအပေါ် ထောက်ခံသူတွေ အနေအထားဟာ အဓိကကျတဲ့ အိုဟိုင်းယိုး၊ ဖလော်ရီဒါ၊ ၀စ္စကိုဆင်၊ ဗာဂျီးနီးယား၊ ကော်လိုရာဒို၊ အိုင်အိုဝါ စတဲ့ ပြည်နယ်တွေမှာ ကွာခြားမှုသိပ်မရှိတာကိုတွေ့ရပါတယ်။
လက်ရှိသမ္မတ မစ္စတာဘရက်အိုဘားမားဟာ တနင်္လာနေ့မှာ ၀စ္စကိုဆင်၊ အိုအိုင်ဝါနဲ့ အိုဟိုင်းယိုးပြည်နယ်တွေကို ပြန်လည်သွားရောက်ပြီး မဲဆွယ်မှုတွေပြုလုပ်ပြီးတဲ့နောက် သူနေထိုင်ရာ အီလီးနွိုက်စ်ပြည်နယ် ချီကာဂိုမြို့ကို ထွက်ခွာ သွားပါတယ်။ရွေးကောက်ပွဲကျင်းပတဲ့ အင်္ဂါနေ့တနေ့လုံး မစ္စတာအိုဘားမားဟာ ချီကာဂိုမြို့မှာ ရှိနေမှာ ဖြစ်ပါတယ်။
ရီပတ်ဗလစ်ကင်ပါတီ သမ္မတလောင်း မစ္စတာ မစ်ရော်မနေကတော့ တနင်္လာနေ့ စောစောပိုင်း ဖလော်ရီဒါမှာ မဲဆွယ် စည်းရုံးမှု ပြုလုပ်ပြီး ဗာဂျင်းနီးယား၊ အိုဟိုင်းယိုး နဲ့ နယူး ဟမ်(စ)ရှိုင်းယားပြည်နယ်တွေကို သွားရောက်ပါလိမ့်မယ်။ ရွေးကောက်ပွဲနေ့မှာ တော့ မစ္စတာ ရော်မနေဟာ သူနေထိုင်ရာ မန်စီချူးဆက် မှာရှိနေမှာဖြစ်ပါတယ်။VOA
